1 Mga Taga-Corinto 6
“Ang Inyong Lawas Mao ang Templo sa Espiritu Santo”
Tingali usahay mabati kini nga ang pagkaylap sa imoralidad ug sekswal nga sala kay mga problema nga talagsaon sa atong panahon. Bisan pa niana, sa iyang sulat dul-an sa 2,000 ka tuig na ang milabay, si Pablo mitudlo ug mipasidaan mahitungod niining susamang mga sala. Ang gamhanang mga pagtulon-an ni Pablo mipalig-on ug mitul-id sa mga Santos sa Corinto, nagdala kanila balik sa dalan sa pakigsaad. Kini nga leksiyon gituyo aron matabangan ka nga mas makasabot sa importansiya sa imong pisikal nga lawas ug ang importansiya sa pagpabiling putli sa sekswal nga paagi.
Pagmugna og luwas nga palibot. Pagmugna og usa ka palibot diin anaa ang Espiritu Santo ug diin ang mga estudyante mahimong gawasnon nga mopahayag sa ilang mga pangutana ug mga pagbati. Usa ka paagi sa pagbuhat niini mao ang kanunayng pagtubag sa mga estudyante uban ang pagkamabination, kaluoy, ug respeto. Dasiga ang mga estudyante sa pagbuhat sa ingon ngadto sa usag usa.
Pagpangandam sa estudyante: Dapita ang mga estudyante sa pagpamalandong unsa ang ilang nahibaloan mahitungod sa sumbanan sa Ginoo sa sekswal nga kaputli ug sa pag-andam sa pagpangutana og bisan unsang mga pangutana nga aduna sila mahitungod sa sekswal nga kaputli.
Posible nga mga Kalihokan sa Pagkat-on
Dapita ang mga estudyante sa pagpamalandong sa mosunod nga mga pamahayag:
Sekswal nga kaputli
Basaha ang mosunod nga mga pamahayag mahitungod sa sekswal nga kaputli. I-rate ang matag pamahayag sa sukod gikan 1 hangtod 5 (1=dili gayod uyon, 2=dili uyon, 3=tunga-tunga, 4=uyon, 5=uyon gayod).
-
Kita nagpuyo sa usa ka kalibotan diin ang mga tawo adunay nagkalainlaing mga ideya sa unsa ang madawat nga sekswal nga mga kinaiya ug mga buhat.
-
Ako nakasabot sa sumbanan sa Ginoo sa sekswal nga kaputli (giila usab isip ang balaod sa kaputli).
-
Aduna koy tinguha sa pagpuyo sa sumbanan sa Ginoo sa sekswal nga kaputli.
-
Akong giila kon sa unsa nga paagi nga ang sumbanan sa Ginoo sa sekswal nga kaputli nagpanalangin sa akong kinabuhi.
-
Aduna koy mga pangutana mahitungod sa sumbanan sa Ginoo sa sekswal nga kaputli.
Ikonsiderar ang pagsulat diha sa imong journal sa pagtuon unsa ang imong nahibaloan ug gituohan mahitungod sa sumbanan sa Ginoo sa sekswal nga kaputli ingon man usab ang bisan unsang mga pangutana nga aduna ka mahitungod niini. Samtang magtuon ka niini nga leksiyon, tinguhaa nga ang Langitnong Amahan mogiya kanimo pinaagi sa Espiritu Santo. Paningkamot nga makaila ug makat-on sa mga kamatuoran nga makatabang kanimo nga mas makasabot ug magtinguha sa pagpuyo sa sumbanan sa Ginoo sa sekswal nga kaputli ug nga makatabang sa pagtubag sa imong mga pangutana ug mga kabalaka.
Si Pablo nagtudlo sa balaod sa Ginoo sa kaputli
Ang siyudad sa Corinto usa ka dako, adunahan, nagkadaiya nga siyudad diin ang sekswal nga sala mikaylap. Gilista ni Pablo ang makihilawason (sekswal nga mga relasyon gawas sa kaminyoon), pagpanapaw, ug pakighilawas sa isigkalalaki o isigkababaye isip pipila sa mga sala nga komon sa Mga Taga-Corinto (tan-awa sa 1 Mga Taga-Corinto 6:9–10).
Basaha ang mga pagtulon-an ni Pablo diha sa 1 Mga Taga-Corinto 6:18–20, ug ikonsiderar ang pagmarka sa mga pulong o mga pulongan nga naglangkob sa mga pagtulon-an sa Ginoo mahitungod sa sekswal nga kaputli ug sa sagradong kinaiyahan sa lawas sa tawo.
-
Unsa nga mga kamatuoran ang imong gibati nga gusto sa Ginoo nga imong masabtan gikan niining mga bersikulo? Sa imong hunahuna ngano kaha nga ang Ginoo gusto nga imong masabtan kadto nga mga kamatuoran?
-
Sa unsa nga paagi nga kini nga mga kamatuoran makaimpluwensiya sa paagi nga ikaw naghunahuna sa balaod sa Ginoo sa kaputli?
Usa ka kamatuoran nga atong makat-onan gikan niini nga mga bersikulo mao nga ang atong mga lawas mao ang mga templo sa Dios diin ang Espiritu makapuyo.
Sa tunga sa usa ka pahina sa imong journal sa pagtuon, pagmugna sa makadiyot og yano nga drowing sa usa ka tawo nga nagtindog tupad sa usa ka templo. Sa palibot sa imong drowing, paglista og mga pagkaparehas tali sa usa ka pisikal nga lawas ug sa usa ka templo. Ilha ang mga rason nga kining pagtandi makatabang nimo nga makasabot sa balaod sa kaputli. Ang mosunod nga mga pangutana makatabang kanimo nga makahimo niini nga pagtandi:
-
Sa unsa nga paagi nga ang paghunahuna sa atong mga lawas isip mga templo makaimpluwensiya sa paagi sa atong pagtratar sa atong mga lawas?
-
Sa unsa nga paagi kini nga analohiya sa atong mga lawas isip mga templo makaimpluwensiya sa atong mga hunahuna ug mga lihok mahitungod sa sekswal nga kaputli?
-
Unsa nga mga kamatuoran mahitungod sa Espiritu Santo ang importante nga masabtan niini nga tudling? Ngano man?
-
Unsa ang pipila sa mga rason sa imong hunahuna nga bililhon ang pagpaningkamot aron magapuyo kanimo ang Espiritu Santo?
Unsa kaha kon ang usa ka tawo mosupak sa balaod sa kaputli? Samtang nagtudlo sa mga Taga-Corinto, nahisgotan ni Pablo nga ang pipila sa mga miyembro nga taga-Corinto nakahimo og sekswal nga mga sala kaniadto (tan-awa sa 1 Mga Taga-Corinto 6:9–11). Apan sa dihang sila naghinulsol ug nabunyagan, sila nalimpyo pinaagi sa Pag-ula ni Jesukristo.
Basaha ang 1 Mga Taga-Corinto 6:11, ug ikonsiderar ang pagmarka sa mga pulong o mga pulongan nga gigamit ni Pablo aron matabangan ang mga taga-Corinto nga makasabot sa makalimpyong gahom sa Pag-ula ni Jesukristo, nga aana alang sa tanang indibidwal.
-
Nganong importante man nga masayran nga si Jesukristo makalimpyo kanato gikan sa sekswal nga sala?
Hinumdomi nga “ang mga biktima sa sekswal nga pang-abuso walay sala ug dili kinahanglang maghinulsol. Kon kamo biktima sa pang-abuso, hibaw-i nga kamo inosente ug ang Dios nahigugma kaninyo. Pakigsulti sa inyong mga ginikanan o sa laing masaligan nga hamtong, ug pangayo dayon og tambag sa inyong bishop. Makasuporta sila kaninyo sa espirituhanong paagi ug makatabang kaninyo nga makakuha og proteksiyon ug tabang nga imong gikinahanglan” (“Sekswal nga Kaputli,” Alang sa Kalig-on sa mga Kabatan-onan [booklet, 2011], 36).
Basaha ang 1 Mga Taga-Corinto 6:19–20 pag-usab, mangita kon unsa pa ang gitudlo ni Pablo mahitungod ni Jesukristo ug sa Iyang Pag-ula.
-
Unsa sa imong hunahuna ang gipasabot ni Pablo sa dihang miingon siya nga “kamo dili inyong kaugalingon” ug nga “kamo gipalit sa usa ka bili”?
Mahimong makaayo isip kabahin niini nga panaghisgot ang pagdirekta sa mga estudyante ngadto sa Doktrina ug mga Pakigsaad 18:10–12 aron sila makakita kon unsa ang gibuhat ni Jesukristo isip kabahin sa Iyang Pag-ula ug nganong gibuhat Niya kini. Dapita ang mga estudyante nga ikonsiderar ang pagsulat niining cross-reference sa tudling sa doktrinal nga kahanas duol sa 1 Mga Taga-Corinto 6:19–20.
-
Sa unsang paagi nga ang pagsakripisyo sa Manluluwas nakaapekto sa paagi sa imong paghunahuna ug pagtratar sa imong pisikal nga lawas?
Si Elder Jeffrey R. Holland sa Korum sa Napulog Duha ka Apostoles mihatag og gibug-aton sa relasyon tali sa kaputli ug sa sakripisyo ni Jesukristo.
Ang lawas usa ka mahinungdanong bahin sa kalag. Kini nga tataw ug importante kaayo nga doktrina sa mga Santos sa Ulahing mga Adlaw nga nagpasabot nganong ang sekswal nga sala hilabihan kabug-at. … Sa pagpahimulos sa lawas sa lain—nga nagpasabot sa paggamit sa iyang kalag—ang tawo mipasipala sa Pag-ula ni Kristo, nga miluwas niana nga kalag ug diin mihimong posible sa gasa sa kinabuhing dayon. …
Palihog, ayaw gayod pag-ingon: “Kinsa man ang masakitan niini? Unsa ra man nang gamayng kagawasan? Ako makalapas karon ug maghinulsol ra ko unya.” Palihog ayaw kaayo pagpakabuang ug pagkamapintas. Dili nimo mahimo nga walay silot ang “paglansang pag-usab sa Anak sa Dios” [tan-awa sa Mga Hebreohanon 6:6 ]. “Likayi ang pakighilawas” [ 1 Mga Taga-Corinto 6:18 ], si Pablo mituaw, ug palayo “sa bisan unsa nga butang nga sama niini” [ Doktrina ug mga Pakigsaad 59:6 ], gidugang sa Doktrina ug mga Pakigsaad. Ngano man? Nan, alang sa usa ka rason tungod sa dili mabanabana nga pag-antos sa lawas ug sa espiritu nga giantos sa Manluluwas sa kalibotan aron nga kita mahimong makalikay [tan-awa ilabi na sa Doktrina ug mga Pakigsaad 19:15–20 ]. Kita nakautang Kaniya tungod niana. Sa tinud-anay, kita nakautang Kaniya sa tanang butang tungod niana.”
(Jeffrey R. Holland, “Personal Purity,” Ensign, Nob. 1998, 76)
-
Unsa ang natabang kanimo aron makasabot mahitungod Kaniya sa pagkahibalo nga ang Manluluwas miantos alang kanimo pinaagi sa pagpaagas sa Iyang dugo? Sa unsa nga paagi nga ang pagkaila niini makadugang sa imong tinguha ug abilidad sa pagsunod Kaniya?
Sama nga si Pablo namulong sa mga Santos nga taga-Corinto, ang mga alagad sa Ginoo sa atong panahon naghatag og tukma nga tambag mahitungod sa sumbanan sa Ginoo sa sekswal nga kaputli ug sa gahom sa Manluluwas sa pagpasaylo ug paglimpyo kanato. Basaha ang “Ang Inyong Lawas Sagrado,” Alang sa Kalig-on sa mga Kabatan-onan: Usa ka Giya sa Paghimo og mga Pagpili (booklet, 2022), 22–29, anaa sa ChurchofJesusChrist.org o sa Gospel Library nga app, mangita sa mga kamatuoran nga makapalig-on kanimo ug makatubag sa imong mga pangutana.
I Choose to be Pure
Six interfaith youth speak candidly on why they have chosen to be sexually pure.
Chastity: What Are the Limits?
Latter-day Saint teens are counseled to stay sexually pure, but what exactly are the limits? Using teachings of modern prophets, this presentation shows how we can find happiness and peace through staying chaste.
-
Unsa nga mga baroganan ang imong nakat-onan gikan sa 1 Mga Taga-Corinto 6 ug sa mga pulong sa mga propeta sa modernong panahon nga nakatabang kanimo aron mas makasabot sa sumbanan sa Ginoo sa sekswal nga kaputli?
-
Kon aduna kay mga pangutana o mga kabalaka mahitungod sa sekswal nga kaputli nga wala matubag niini nga leksiyon, asa man ka mangita og mga tubag?
Samtang ang mga estudyante namalandong sa ilang mga tubag niining mga pangutana, angay tingali nga dapiton sila nga hisgotan ang dugang nga mga pangutana nga aduna sila mahitungod sa sekswal nga kaputli kauban sa ilang mga ginikanan o bishop.
Paghatag og pagpamatuod bahin sa Pag-ula sa Manluluwas ug sa importansiya sa pagsunod sumala sa sumbanan sa Ginoo sa sekswal nga kaputli. Ikonsiderar ang pagpangutana kon ang usa ka estudyante o duha gusto ba usab nga mopamatuod.
Paggahin og panahon sa pagpamalandong sa bisan unsa nga mga pag-aghat gikan sa Espiritu Santo mahitungod sa unsa nga mga lihok ang lagmit gustong ipabuhat sa Ginoo kanimo tungod sa imong mga kasinatian karon.
Komentaryo ug Background nga Impormasyon
1 Mga Taga-Corinto 6:19 . Nganong makaapekto man kon ako maglantaw sa akong lawas isip usa ka “templo sa Espiritu Santo”?
Si Presidente Russell M. Nelson mitudlo kon sa unsang paagi ang pagtan-aw sa atong lawas isip usa ka templo sa Dios makaapekto sa atong mga kinabuhi.
Uban sa inyong lawas nga importante kaayo nga bahin sa mahangtorong plano sa Dios, dili ikatingala nga si Apostol Pablo mihulagway niini nga “templo sa Dios” [ 1 Mga Taga-Corinto 3:16 ; tan-awa usab sa 6:19 ]. Kada higayon nga motan-aw kamo sa samin, tan-awa ang inyong lawas isip inyong templo. Kana nga kamatuoran—angayng pasalamatan kada adlaw—positibong makaimpluwensiya sa inyong mga desisyon kon unsaon ninyo sa pag-atiman sa inyong lawas ug unsaon ninyo kini sa paggamit.
(Russell M. Nelson, “Mga Desisyon alang sa Kahangtoran,” Liahona, Nob. 2013, 107)
Sa unsa nga paagi si Satanas nagtintal kanato sa sayop nga paggamit sa atong mga lawas?
Si Elder David A. Bednar sa Korum sa Napulog Duha ka Apostoles mitudlo mahitungod sa mga pagtuis ni Satanas ug sa kaimportante sa lawas.
Kita Nagtuo sa Pagkaputli
Ang pagkamasulundon sa balaod sa kaputli makapalambo sa atong kalipay sa mortalidad ug mohimong posible sa atong pag-uswag sa kahangturan.
Kay ang pisikal nga lawas mahinungdanon sa plano sa Amahan sa kalipay ug sa atong espiritwal nga kalamboan, si Lucifer nagtinguha sa pagpugong sa atong pag-uswag pinaagi sa pagtintal nato sa sayop nga paggamit sa atong lawas. …
Ang pagsupak sa balaod sa kaputli bug-at nga sala ug ang sayop nga paggamit sa atong lawas. Kadtong nasayod ug nakasabot sa plano sa kaluwasan, ang paghugaw sa lawas usa ka lihok sa pagrebelde (tan-awa sa Mosiah 2:36–37 ; [Doktrina ug mga Pakigsaad] 64:34–35) ug usa ka paglimod sa atong tinuod nga pagkatawo isip mga anak sa Dios. Kon kita molantaw lapas sa mortalidad ug ngadto sa kahangtoran, sayon ang pag-ila nga ang sayop nga pagpakig-uban nga gipasiugdahan sa kaaway temporaryo ug dili mahinungdanon.
(David A. Bednar, “Kita Nagtuo sa Pagkaputli,” Liahona, Mayo 2013, 43)
Si Susan W. Tanner, kanhi Kinatibuk-ang Presidente sa Young Women, namulong og pipila sa mga paagi nga ang kaaway nagtintal kanato sa sayop nga paggamit sa atong pisikal nga mga lawas.
[Si Satanas] motintal sa kadaghanan sa pagpanamas-tamas niining mahinungdanong gasa sa lawas pinaagi sa pagkadili putli, dili ligdong, sa pagtagbaw sa kaugalingon, ug sa mga adiksyon. Iyang danihon ang uban sa pagbaliwala sa ilang mga lawas; ang uban iyang tintalon nga simbahon ang ilang mga lawas. Sa bisan asa nga kahimtang, iyang agnihon ang kalibotan nga tagdon ang lawas nga usa lamang ka butang. Sa rason nga adunay daghan kaayong mga satanikanhong bakak kabahin sa lawas, buot nakong kusgon ang akong tingog karon agig pagsuporta sa pagbalaan sa lawas. Ako mopamatuod nga ang lawas usa ka gasa nga pagatrataron uban sa pagpasalamat ug pagtahod.
(Susan W. Tanner, “Ang Kabalaan sa Lawas,” Liahona, Nob. 2005, 13)
Dugang nga Kalihokan sa Pagkat-on
Pagpabiling limpyo bisan ang uban dili
Sa pagtudlo sa baroganan nga kon atong pilion nga suod nga makig-uban niadtong mihangop sa sala, kita maimpluwensiyahan sa ilang pagkadaotan, ikonsiderar ang pagdapit sa mga estudyante sa pagtuon sa 1 Mga Taga-Corinto 5:1–2, 6–7, 9–11 . Unsa nga analohiya ang gigamit ni Pablo sa pagtudlo niini nga kamatuoran? Unsa nga tambag ang gihatag ni Pablo sa mga Santos nga taga-Corinto sa ilang kahimtang? Unsa ang atong mahimo nga dili makompromiso ang atong mga sumbanan sa pagtabang sa mga indibidwal kinsa mihangop sa sala?