1 Mga Taga-Corinto 1–7
Kinatibuk-ang Pagpasabot
Karong semanaha nga mga leksiyon naghisgot sa unang pito ka mga kapitulo sa sulat ni Pablo ngadto sa Mga Taga-Corinto. Ang mga Santos sa Corinto naglibog tungod sa kalibotanong mga ideya ug si Pablo misulay pagtabang kanila nga makakita kon unsaon nila pagkat-on og malungtaron nga espirituwal nga mga kamatuoran. Ang gamhanang mga pagtulun-an ni Pablo nagpalig-on ug nagkorehir sa mga Santos sa Corinto, nagdala kanila balik sa dalan sa pakigsaad. Karong semanaha naglakip usab sa usa ka leksiyon nga makatabang kanimo pagsukod sa unsa ang imong nakat-onan.
Pangandam sa Pagtudlo
Ang mosunod nga impormasyon maghatag sa mga magtutudlo og mga ideya kon unsa ang lagmit nga kinahanglang andamon daan para sa kada leksiyon.
1 Mga Taga-Corinto 1–4
Tumong sa leksiyon: Kini nga leksiyon makatabang sa mga estudyante nga makasabot sa unsang paagi nga ang pagtukod sa atong kinabuhi diha sa pundasyon ni Jesukristo mahimong makatabang kanato sa pagbuntog sa kalibotanong mga hagit.
-
Pagpangandam sa estudyante: Dapita ang mga estudyante nga hangyoon ang usa ka miyembro sa pamilya o higala nga ipasabot giunsa nga ang pagtukod sa ilang kinabuhi sa pundasyon ni Jesukristo nakatabang kanila nga makaya ang lainlaing mga hagit sa kinabuhi.
-
Mga materyal alang sa mga estudyante: Usa ka piraso sa papel o journal sa pagtuon
-
Sugyot sa pagtudlo pinaagi sa videoconference: Gamit ang whiteboard nga feature, pagdapit og usa ka estudyante sa pagdrowing og usa ka hulagway sa usa ka balay nga adunay pundasyon. Dayon dapita ang klase sa pagsulat sa palibot sa balay og pipila ka mga hagit o negatibong mga impluwensiya nga ilang giatubang. Dapita usab sila sa pagsulat sulod o palibot sa pundasyon unsa ang ilang mahimo aron mabase ang ilang kinabuhi ngadto sa Manluluwas.
1 Mga Taga-Corinto 2
Tumong sa leksiyon: Kini nga leksiyon makatabang sa mga estudyante nga madapit ang Espiritu Santo aron tabangan sila nga makat-on og espirituhanong mga butang.
-
Pagpangandam sa estudyante: Dapita ang mga estudyante sa pag-andam og mga tubag sa mosunod nga mga pangutana: Unsa ang pipila sa mga kamatuoran ang inyong nahibaloan pinaagi sa Espiritu Santo? Giunsa sa Espiritu Santo pagkompirmar niini nga mga kamatuoran diha kaninyo?
-
Sugyot sa pagtudlo pinaagi sa videoconference: Ikonsiderar ang pagpakita sa teksto sa 1 Mga Taga-Corinto 2:9–14 . Gamit ang usa ka annotation tool, dapita ang mga estudyante sa paglinya o paglingin sa mga pulong o mga hugpong sa mga pulong nga nagpakita og espirituhanong mga kamatuoran. Dapita sila sa pagpasabot nganong ilang gimarkahan ang ilang gibuhat.
1 Mga Taga-Corinto 6
Tumong sa leksiyon: Kini nga leksiyon gituyo aron matabangan ang mga estudyante nga mas makasabot sa importansiya sa ilang pisikal nga mga lawas ug sa importansya sa pagpabilin nga sekswal nga pagkaputli.
-
Pagpangandam sa estudyante: Dapita ang mga estudyante sa pagpamalandong unsa ang ilang nahibaloan mahitungod sa sumbanan sa Ginoo sa sekswal nga kaputli ug pag-andam sa pagpangutana og bisan unsang mga pangutana nga aduna sila mahitungod sa sekswal nga kaputli.
-
Mga materyal alang sa mga estudyante: Usa ka kopya sa Alang sa Kalig-on sa mga Kabatan-onan nga booklet alang sa kada estudyante, kon mahimo
-
Sugyot sa pagtudlo pinaagi sa videoconference: Human ang mga estudyante makaila sa mga baroganan gikan sa 1 Mga taga-Corinto 6:18–20 , mahimong ipakita ang hulagway sa usa ka batan-on ug usa ka templo. Gamit ang chat nga feature, dapita ang mga estudyante sa paglista og mga pagkaparehas tali sa pisikal nga lawas ug sa templo. Dapita usab sila sa paghisgot giunsa niini nga pagtandi lagmit makaapekto sa paagi sa atong pagtan-aw ug pagtratar sa atong mga kalawasan.
Doktrinal nga Kahanas: 1 Mga Taga-Corinto 6:19–20
Katuyoan sa leksiyon: Kini nga leksiyon makatabang sa mga estudyante nga makamemorya sa pakisayran sa doktrinal nga kahanas ug sa mahinungdanong hugpong sa mga pulong sa kasulatan alang sa 1 Mga Taga-Corinto 6:19–20 , makapasabot sa doktrina, ug makagamit sa mga baroganan sa pag-angkon og espirituhanong kahibalo sa tinuod nga kahimtang sa kinabuhi.
-
Pagpangandam sa estudyante: Ikonsiderar ang pagpaambit sa mga estudyante sa pagbansay nga senaryo niini nga leksiyon ug dapita sila sa pagsugod og hunahuna mahitungod sa kon unsaon nila pagtubag.
-
Mga materyal alang sa mga estudyante: Mahimong makabenepisyo ang pagpakita sa senaryo aron ang mga estudyante makadangop niini diha sa ilang paggamit sa mga baroganan sa pag-angkon og espirituhanong kahibalo.
-
Sugyot sa pagtudlo pinaagi sa videoconference: Bahina ang mga estudyante ngadto sa mga breakout room aron magdrama-drama nga nagpasabot sa balaod sa kaputli ug nganong importante ang paggamit sa mga pagtulun-an sa 1 Mga Taga-Corinto 6:19–20 . Kon mahimo, paminaw sa lainlaing mga breakout room aron masukod unsa ka maayo ang pagsabot sa mga estudyante niini nga kamatuoran. Ingon man usab, mahimong gamiton ang chat nga feature aron matugotan ang mga estudyante sa pag-upload og usa ka hulagway sa ilang imahe, meme, o collage aron pagrepresentar sa 1 Mga Taga-Corinto 6:19–20 .
Sukda ang Imong Nakat-onan 8
Tumong sa leksiyon: Kini nga leksiyon gituyo aron matabangan ang mga estudyante sa pagtimbang-timbang sa mga tumong nga ilang gitakda ug personal nga paglambo nga ilang nasinati panahon sa ilang pagtuon sa Bag-ong Tugon.
-
Pagpangandam sa estudyante: Dapita ang mga estudyante sa pagpamalandong sa ilang pag-uswag sa ilang personal nga espirituhanong mga tumong. Dugang pa niana, dapita sila sa paghunahuna mahitungod sa unsa ang ilang nakat-onan o mga tumong nga ilang gitakda diha sa ilang pagtuon sa Mga Taga-Roma ug 1 Mga Taga-Corinto 1-7.
-
Sugyot sa pagtudlo pinaagi sa videoconference: Aron matabangan ang mga estudyante nga mamalandong ug mabansay ang panaghiusa, dapita sila sa pagpili sa gallery view aron ilang makita ang tanan sa ilang klase. Ang mga miyembro sa klase lagmit mapakita sa lainlaing pagkahan-ay alang sa matag estudyante. Sa pipila ka mga tool, kini mahimong bag-ohon pinaagi sa pag-drag ug pag-drop sa display windows ngadto sa gitinguha nga pagkahan-ay. Kon mahimo, dapita ang matag estudyante sa pagbutang sa ilang mga klasmeyt sa susamang han-ay sa ilang screen. Dayon sulayi pagpa-recite sa mga estudyante ang Mga Taga-Roma 14:19 o Mga Taga-Roma 15:1 , nga ang matag estudyante magsulti sa usa ka pulong sa matag higayon, magsunod sa pagkahan-ay nga anaa sa display screen.