កូរិនថូស ទី១ ១២

អំណោយទានខាងវិញ្ញាណ

ប៉ុលបានសរសេរទៅពួកបរិសុទ្ធនៅក្រុងកូរិនថូស ដើម្បីជួយពួកគេឲ្យទទួលស្គាល់តម្រូវការរបស់ពួកគេដើម្បីរួបរួមនៅក្នុងព្រះគ្រីស្ទ ។ គាត់បានបង្រៀនថា ប្រសិនបើសមាជិកទាំងអស់នឹងទទួលស្គាល់ ហើយប្រើប្រាស់អំណោយទានខាងវិញ្ញាណដែលពួកគេបានទទួលពីព្រះអម្ចាស់ នោះពួកគេអាចដូចជាផ្នែកជាច្រើននៃរូបកាយដែលធ្វើការរួមគ្នាដោយសាមគ្គីភាព ។ គោលបំណងនៃមេរៀននេះគឺជួយអ្នកឲ្យស្គាល់អំណោយទានខាងវិញ្ញាណ ដែលព្រះអម្ចាស់បានប្រទានឲ្យអ្នកដើម្បីអ្នកផ្ដល់ពរដល់អ្នកដទៃ និងពង្រឹងសាសនាចក្ររបស់ទ្រង់ ។

អំណោយទានខាងវិញ្ញាណ ។ ព្រះអម្ចាស់ប្រទានពរដល់សមាជិកទាំងអស់នៃសាសនាចក្ររបស់ទ្រង់ជាមួយនឹងអំណោយទាន និងសមត្ថភាពខាងវិញ្ញាណ ។ សូមខិតខំស្វែងរក អភិវឌ្ឍ និងពង្រីកអំណោយទានខាងវិញ្ញាណទាំងនេះ ដើម្បីបម្រើសិស្សម្នាក់ៗក្នុងថ្នាក់សិក្ខាសាលា ហើយលើកទឹកចិត្តសិស្សឲ្យធ្វើដូចគ្នាផងដែរ ។

ការរៀបចំរបស់សិស្ស ៖ សូមអញ្ជើញសិស្សឲ្យរកអំណោយទានខាងវិញ្ញាណមួយ ឬពីរដែលបានប្រទានឲ្យពួកគេ ។ ពួកគេប្រហែលជាចង់សុំសមាជិកគ្រួសារ ឬមនុស្សជាទីស្រឡាញ់ដែលគួរឲ្យទុកចិត្តផ្សេងទៀតជួយពួកគេធ្វើកិច្ចការនេះ ។ សូមឲ្យសិស្សសញ្ជឹងគិតអំពីអំណោយទានរបស់ពួកគេ និងរបៀបដែលពួកគេកំពុងប្រើវាដើម្បីផ្តល់ពរដល់អ្នកដទៃ ។

សកម្មភាពរៀនសូត្រដែលអាចមាន

ការទទួលអំណោយ

សូមពិចារណាយកប្រអប់អំណោយមួយទៅថ្នាក់រៀន ហើយបង្ហាញវាក្នុងអំឡុងពេលពិភាក្សានេះ ។

• តើអំណោយដ៏មានអត្ថន័យមួយដែលអ្នកបានទទួលគឺជាអ្វី ?

• តើអំណោយនេះជះឥទ្ធិពលអ្វីខ្លះដល់ជីវិតរបស់អ្នក ? តើវាអនុញ្ញាតឲ្យអ្នកធ្វើអ្វីបានខ្លះ ?

• តើអ្នកមានអារម្មណ៍យ៉ាងណាចំពោះអ្នកដែលបានផ្តល់អំណោយដល់អ្នក ?

នៅពេលអ្នកសិក្សា កូរិនថូស ទី១ ១២ អ្នកនឹងរៀនអំពីអំណោយទានខាងវិញ្ញាណដែលព្រះវរបិតាសួគ៌ប្រទានដល់បុត្រាបុត្រីរបស់ទ្រង់ ។ សូមរកមើលមូលហេតុដែលទ្រង់ប្រទានអំណោយទានទាំងនេះ ហើយស្វែងរកការបំផុសគំនិតពីព្រះវិញ្ញាណបរិសុទ្ធ ដើម្បីជួយអ្នករកឃើញអំណោយទានដែលបានប្រទានឲ្យអ្នក ។

ព្រះអម្ចាស់ប្រទានអំណោយទានខាងវិញ្ញាណដល់យើង

« អំណោយទានខាងវិញ្ញាណគឺជាពរជ័យ ឬលទ្ធភាពដែលត្រូវបានប្រទានឲ្យដោយព្រះដល់បុត្រាបុត្រីរបស់ទ្រង់ តាមរយៈព្រះចេស្ដានៃព្រះវិញ្ញាណបរិសុទ្ធ » ( ប្រធានបទដំណឹងល្អ « Spiritual Gifts » នៅលើគេហទំព័រ topics.ChurchofJesusChrist.org ) ។

សិស្សអាចទទួលបានអត្ថប្រយោជន៍ពីការធ្វើការជាក្រុម នៅពេលពួកគេសិក្សាវគ្គបទគម្ពីរខាងក្រោម ។ សមាជិកក្រុមនីមួយៗអាចអានខគម្ពីរផ្សេងៗ ហើយរាយការណ៍ទៅអ្នកផ្សេងទៀតនៅក្នុងក្រុមរបស់ពួកគេនូវអ្វីដែលពួកគេបានរៀន ។

សូមរៀនអំពីអំណោយទានខាងវិញ្ញាណដោយអាន កូរិនថូស ទី១ ១២:៣–១១ ។ ( សូមកត់សម្គាល់ថាពាក្យ « ដោយមុខៗ » ខទី ១១ មានន័យថា « រៀងៗខ្លួន » ឬ « មួយម្តងៗ » ) ។

• តើមានអំណោយទានខាងវិញ្ញាណណាខ្លះ ដែលបានរៀបរាប់នៅក្នុងខគម្ពីរទាំងនេះ ?

មានអំណោយទានខាងវិញ្ញាណផ្សេងៗគ្នាជាច្រើន ។ ដើម្បីរៀនអំពីអំណោយទានខាងវិញ្ញាណផ្សេងទៀត សូមអាន មរ៉ូណៃ ១០:៨–១៨ ; គោលលទ្ធិ និងសេចក្តីសញ្ញា ៤៦:១១–២៦ និងសេចក្ដីថ្លែងការណ៍ដូចតទៅនេះដោយអែលឌើរ ម៉ាវីន ជេ អាស្តុន ( ឆ្នាំ ១៩១៥–១៩៩៤ ) ក្នុងកូរ៉ុមនៃពួកសាវកដប់ពីរនាក់ ៖

ខ្ញុំសូមលើកឡើងអំពីអំណោយទានមួយចំនួនដែលមិនតែងតែបង្ហាញឲ្យឃើញ ឬគួរឲ្យកត់សម្គាល់នោះទេ ប៉ុន្តែវាសំខាន់ខ្លាំងណាស់ … ៖ អំណោយទាននៃការសួរ អំណោយទាននៃការស្តាប់ អំណោយទាននៃការឮ និងការប្រើសំឡេងតូច រហៀង អំណោយទាននៃការយំ អំណោយទាននៃការចៀសវាងជម្លោះ … អំណោយទាននៃការស្វែងរកអ្វីដែលសុចរិត អំណោយទាននៃការមិនកាត់សេចក្តីគេ អំណោយទាននៃការស្វែងរកព្រះសម្រាប់ការណែនាំ … អំណោយទាននៃការខ្វល់ខ្វាយចំពោះអ្នកដទៃ អំណោយទាននៃការអាចសញ្ជឹងគិត អំណោយទាននៃការអធិស្ឋាន អំណោយទាននៃការថ្លែងទីបន្ទាល់ដ៏អស្ចារ្យមួយ ។

( សូមមើល ម៉ាវិន ជេ អាស្តុន « There Are Many Gifts » Ensign ខែ វិច្ឆិកា ឆ្នាំ ១៩៨៧ ទំព័រ ២០ )

បន្ទាប់ពីសិស្សមានពេលសិក្សាហើយ សូមអញ្ជើញពួកគេឲ្យចែកចាយសេចក្ដីពិតដែលពួកគេបានរៀនអំពីព្រះអម្ចាស់ និងអំណោយទានដែលទ្រង់សព្វព្រះទ័យប្រទានពរដល់យើង ។

• តើព្រះអម្ចាស់ប្រទានពរដល់នរណាជាមួយនឹងអំណោយទានខាងវិញ្ញាណទាំងនេះ ?

• តើការណ៍នេះជួយអ្នកឲ្យយល់អ្វីខ្លះអំពីព្រះអម្ចាស់ ?

សេចក្តីពិតមួយដែលអ្នកអាចទទួលស្គាល់នោះគឺថា ព្រះអម្ចាស់ប្រទានដល់សមាជិកម្នាក់ៗនៃសាសនាចក្ររបស់ទ្រង់យ៉ាងហោចណាស់នូវអំណោយទានខាងវិញ្ញាណមួយ ដើម្បីប្រទានពរដល់អ្នកដទៃ ។

សូមអញ្ជើញសិស្សឲ្យសញ្ជឹងគិតអំពីអំណោយទានខាងវិញ្ញាណរបស់ពួកគេ ។ ប្រសិនបើពួកគេត្រូវបានអញ្ជើញឲ្យធ្វើការរៀបចំសម្រាប់សិស្ស សម្រាប់ថ្នាក់រៀន សូមអញ្ជើញពួកគេឲ្យគិតអំពីការសន្ទនាដែលពួកគេមានជាមួយសមាជិកគ្រួសារ ឬនរណាម្នាក់ផ្សេងទៀតដែលពួកគេបាននិយាយជាមួយអំពីអំណោយទានខាងវិញ្ញាណរបស់ពួកគេ ។

• តើអ្នកមានអារម្មណ៍យ៉ាងណាចំពោះព្រះវរបិតាសួគ៌ និងព្រះយេស៊ូវគ្រីស្ទ ពេលដឹងថាទ្រង់ទាំងទ្វេបានប្រទានពរដល់អ្នកនូវអំណោយទានមួយខាងវិញ្ញាណ ?

• តើការដឹងថា អ្នកត្រូវបានប្រទានឲ្យនូវអំណោយទានខាងវិញ្ញាណ ជះឥទ្ធិពលយ៉ាងណាទៅលើរបៀបដែលអ្នកយល់ឃើញពីអត្តសញ្ញាណដ៏ទេវភាពរបស់អ្នក ?

• ហេតុអ្វីបានជាអ្នកគិតថា ព្រះប្រទានអំណោយទានខាងវិញ្ញាណដល់សមាជិកសាសនាចក្រគ្រប់រូប ហើយមិនមែនដល់សមាជិកតែពីរបីនាក់នោះទេ ?

ព្រះអម្ចាស់សព្វព្រះទ័យឲ្យយើងផ្ដល់ពរដល់គ្នាទៅវិញទៅមក

នៅពេលសិស្សរៀនអំពីផ្នែកផ្សេងៗនៃរាងកាយ និងរបៀបដែលផ្នែកនីមួយៗមានសារៈសំខាន់ សូមពិចារណាអញ្ជើញសិស្សឲ្យបំពេញកិច្ចការមួយដែលចូលរួមដោយសមាជិកក្នុងថ្នាក់ច្រើននាក់ ដូចជាការផ្លាស់ទីនៃវត្ថុធំមួយនៅក្នុងថ្នាក់ជាដើម ។ ជម្រើសមួយទៀតគឺអនុញ្ញាតឲ្យសិស្សប្រើដៃតែមួយ ខណៈដែលពួកគេធ្វើការរួមគ្នាដើម្បីសាងសង់សំណង់តូចមួយ ហែកក្រដាសជាចម្រៀកៗ ឬធ្វើកិច្ចការផ្សេងទៀត ។

សូមអាន កូរិនថូស ទី១ ១២:១៤–២០ ដើម្បីស្វែងរកការប្រៀបធៀបដែលប៉ុលបានប្រើដើម្បីជួយយើងឲ្យស្គាល់ពីសារៈសំខាន់នៃការរួមចំណែករបស់យើងម្នាក់ៗ ។

• តើប៉ុលប្រៀបធៀបសាសនាចក្រនៅក្នុងវគ្គបទគម្ពីរនេះទៅនឹងអ្វី ? តើការប្រៀបធៀបនេះបង្រៀនអ្នកអ្វីខ្លះអំពីអំណោយទានខាងវិញ្ញាណ ?

• តើអ្នកធ្លាប់បានទទួលពរជ័យតាមរយៈអំណោយទានខាងវិញ្ញាណរបស់អ្នកដទៃដែរឬទេ ?

ដើម្បីយល់ពីឧទាហរណ៍នៃបុគ្គលម្នាក់ដែលបានចែកចាយអំណោយទានខាងវិញ្ញាណរបស់ពួកគេជាមួយអ្នកដទៃ អ្នកអាចមើលវីដេអូ « With All Your Heart » ( ៣:២៦ ) ដែលមាននៅលើគេហទំព័រ ChurchofJesusChrist.org ដែលប្រាប់អំពីយុវជនម្នាក់ដែលត្រូវបានហៅឲ្យប្រើអំណោយទានពីព្រះអម្ចាស់ដែលគាត់ទើបតែបានស្គាល់អំណោយទាននោះ ។ នៅពេលអ្នកមើល សូមយកចិត្តទុកដាក់លើការបំផុសគំនិតពីព្រះវិញ្ញាណបរិសុទ្ធអំពីរបៀបដែលអ្នកអាចប្រើអំណោយទានរបស់អ្នកដើម្បីផ្តល់ពរដល់អ្នកដទៃ ។

សូមពិចារណាអញ្ជើញអ្នកស្ម័គ្រចិត្តពីរបីនាក់ឲ្យចែកចាយអំណោយទានខាងវិញ្ញាណដែលពួកគេឃើញមាននៅក្នុងខ្លួនពួកគេ ក្នុងមិត្តរួមថ្នាក់ ឬក្នុងមិត្តភក្តិផ្សេងទៀត ហើយលើកទឹកចិត្តពួកគេឲ្យពន្យល់ពីរបៀបដែលអំណោយទាំងនេះអាចផ្តល់ពរដល់អ្នកដទៃ ។ ក្នុងនាមជាគ្រូបង្រៀន សូមពិចារណាថាតើសិស្សណាម្នាក់នឹងទទួលបានប្រយោជន៍ពីការប្រាប់នៅក្នុងថ្នាក់ ឬដោយឡែកជាឯកជន អំពីអំណោយទានខាងវិញ្ញាណដែលមាននៅក្នុងពួកគេ ។

សូមសញ្ជឹងគិតពីរបៀបដែលអំណោយទានខាងវិញ្ញាណដែលអ្នកត្រូវបានប្រទានឲ្យបានផ្តល់ពរដល់អ្នក និងរបៀបដែលអ្នកអាចប្រើវាដើម្បីផ្តល់ពរដល់គ្រួសារ វួដ ឬសាខារបស់អ្នក និងអ្នកដទៃទៀត ។ អ្នកអាចចង់កត់ត្រានៅក្នុងសៀវភៅកំណត់ហេតុការសិក្សារបស់អ្នកនូវចំណាប់អារម្មណ៍ពីព្រះវិញ្ញាណបរិសុទ្ធអំពីអំណោយទានរបស់អ្នក ។

សូមពិភាក្សាសំណួរមួយចំនួន ឬទាំងអស់ខាងក្រោម ឬអញ្ជើញសិស្សឲ្យឆ្លើយសំណួរទាំងនោះនៅក្នុងសៀវភៅកំណត់ហេតុការសិក្សារបស់ពួកគេ ។

• តើអ្នកគិតថា ព្រះអម្ចាស់សព្វព្រះទ័យឲ្យអ្នកយល់ដឹងអ្វីខ្លះអំពីខ្លួនអ្នកផ្ទាល់ និងអំណោយទានខាងវិញ្ញាណរបស់អ្នក ?

• តើអ្នកនឹងផ្តល់ការលើកទឹកចិត្តអ្វីដល់អ្នកដែលមានអារម្មណ៍ថា ពួកគេគ្មានអំណោយទានខាងវិញ្ញាណ ?

• តើអំណោយទានខាងវិញ្ញាណអ្វីដែលអ្នកប្រាថ្នាចង់បាន ? តើអ្នកអាចធ្វើអ្វីខ្លះ ដើម្បីស្វែងរកអំណោយទាននោះ ? ( ព្រះអម្ចាស់បានអញ្ជើញយើងឲ្យស្វែងរកអំណោយទានខាងវិញ្ញាណ សូមមើល កូរិនថូស ទី១ ១២:៣១ ; ១៤:១ ; គោលលទ្ធិ និងសេចក្តីសញ្ញា ៤៦:៧–៩ ) ។

• តើមានវិធីអ្វីខ្លះដែលអ្នកអាចប្រើអំណោយទានខាងវិញ្ញាណរបស់អ្នកដើម្បីផ្តល់ពរដល់អ្នកដទៃ ? តើវានឹងជួយអ្នកឲ្យប្រែក្លាយកាន់តែដូចព្រះអង្គសង្គ្រោះយ៉ាងដូចម្ដេច ?

សូមអញ្ជើញសិស្សឲ្យចែកចាយអ្វីដែលពួកគេបានសរសេរ ។ សូមពិចារណាចែកចាយបទពិសោធន៍ផ្ទាល់ខ្លួន ឬទីបន្ទាល់អំពីអំណោយទានខាងវិញ្ញាណ ។

វិចារណកថា និងព័ត៌មានសាច់រឿង

តើខ្ញុំអាចប្រើអំណោយទានខាងវិញ្ញាណរបស់ខ្ញុំដើម្បីបម្រើអ្នកដទៃដោយរបៀបណា ?

ប្រធាន ឌៀថើរ អេហ្វ អុជដូហ្វ ដែលកាលនោះជាគណៈប្រធានទីមួយ បានចែកចាយពីរបៀបដែលយើងអាចធ្វើតាមគំរូរបស់ព្រះយេស៊ូវគ្រីស្ទ ៖

នៅពេលខ្ញុំគិតពីព្រះអង្គសង្គ្រោះ ជារឿយៗខ្ញុំបានស្រមៃពីទ្រង់ដោយមានព្រះហស្ដលូកមក ដើម្បីលួងលោម ព្យាបាល ប្រទានពរ និងស្រឡាញ់ ។ ហើយទ្រង់តែងតែមានបន្ទូល ជាមួយគេ មិនដែល មើលងាយមនុស្សឡើយ ។ ទ្រង់ស្រឡាញ់អ្នករាបសា និងទន់ទាប ហើយយាងទៅជាមួយនឹងពួកគេ ដោយធ្វើការងារបម្រើដល់ពួកគេ ហើយផ្ដល់សេចក្ដីសង្ឃឹម និងសេចក្តីសង្គ្រោះ ។ 

នោះគឺជាអ្វីដែលទ្រង់បានធ្វើ អំឡុងពេលព្រះជន្មរមែងស្លាប់របស់ទ្រង់ វាគឺជាអ្វីដែលទ្រង់នឹងធ្វើ ប្រសិនបើទ្រង់នឹងគង់នៅក្នុងចំណោមយើងនាថ្ងៃនេះ ហើយវាគឺជាអ្វីដែលយើងគួរធ្វើក្នុងនាមជាសិស្សរបស់ទ្រង់ និងជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។… 

នៅពេលយើងធ្វើតាមគំរូដ៏ល្អឥតខ្ចោះរបស់ទ្រង់ នោះដៃរបស់យើងអាចប្រែក្លាយទៅជាព្រះហស្ដរបស់ទ្រង់ ភ្នែករបស់យើងក្លាយជាព្រះនេត្ររបស់ទ្រង់ ហើយដួងចិត្តរបស់យើងក្លាយជាព្រះទ័យរបស់ទ្រង់ ។ 

( ឌៀថើរ អេហ្វ អុជដូហ្វ « You Are My Hands » Ensign ឬ Liahona ខែ ឧសភា ឆ្នាំ ២០១០ ទំព័រ ៦៨ )

អែលឌើរ ដេវីឌ អេ បែដណា ក្នុងកូរ៉ុមនៃពួកសាវកដប់ពីរនាក់បានបង្រៀន ៖

យើងទទួលអំណោយទានខាងវិញ្ញាណដើម្បីផ្តល់ពរដល់មនុស្សផ្សេងទៀត ។ ប្រសិនបើយើងចង់បានអំណោយទានដោយសារយើងចង់បាន នោះយើងប្រហែលជានឹងមិនទទួលបានវាទេ ។ នៅពេលយើងព្យាយាមដើម្បីបម្រើអ្នកដទៃស្របតាមការបង្រៀនរបស់ព្រះយេស៊ូវគ្រីស្ទ នោះយើងត្រូវបានប្រទានពរឲ្យមានអំណោយទានខាងវិញ្ញាណ និងការបង្កើនសមត្ថភាពដែលធ្វើឲ្យការបម្រើអាចធ្វើទៅបាន ។

( ដេវីឌ អេ បែដណា នៅក្នុង « Understanding Heavenly Father’s Plan » ChurchofJesusChrist.org/prophets-and-apostles/unto-all-the-world/understanding-heavenly-fathers-plan )

តើខ្ញុំអាចធ្វើដូចម្តេច ប្រសិនបើខ្ញុំគ្មានអារម្មណ៍ថា ខ្ញុំមានអំណោយទានខាងវិញ្ញាណដ៏សំខាន់ ?

ការទូន្មានពីអែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់អាចរកឃើញនៅក្នុងវីដេអូ « Songs Sung and Unsung » ( ចាប់ពីលេខកូដម៉ោង ០:៥៧ ដល់ ២:៥៧ ) ។ វីដេអូនេះមាននៅលើគេហទំព័រ ChurchofJesusChrist.org ។

អែលឌើរ ចន ស៊ី ភីងគ្រី ជុញ្ញ័រ ក្នុងពួកចិតសិបនាក់បានចែកចាយឧទាហរណ៍មួយអំពីបងស្រីម្នាក់ដែលរៀនថា គាត់មានអំណោយទានខាងវិញ្ញាណដែលគាត់បានមើលរំលង ៖

ថ្ងៃមួយមានបងស្រីដែលបាក់ទឹកចិត្តម្នាក់បានទូលអង្វរថា « ឱព្រះអម្ចាស់អើយ តើការបម្រើផ្ទាល់ខ្លួនរបស់ខ្ញុំម្ចាស់គឺជាអ្វីទៅ ? » ទ្រង់បានតបថា « សូមយកចិត្តទុកដាក់លើមនុស្សដទៃ » ។ វាគឺជាអំណោយទានខាងវិញ្ញាណ ! ចាប់តាំងពីពេលនោះមក គាត់បានរកឃើញអំណរក្នុងការយកចិត្តទុកដាក់លើអស់អ្នកដែលត្រូវបានគេបំភ្លេចចោលជាប្រចាំ ហើយព្រះបានធ្វើការតាមរយៈគាត់ដើម្បីប្រទានពរដល់មនុស្សជាច្រើន ។ ទោះបីអំណាយទានខាងវិញ្ញាណមួយចំនួនពុំធ្វើឲ្យយើងមានមុខមានមាត់នៅក្នុងបទដ្ឋាននៃពិភពលោកនេះក្តី ប៉ុន្តែវាមានភាពចាំបាច់ចំពោះព្រះ និងកិច្ចការរបស់ទ្រង់ ។

( ចន ស៊ី ភីងគ្រី ជុញ្ញ័រ « I Have a Work for Thee » Ensign ឬ Liahona ខែ វិច្ឆិកា ឆ្នាំ ២០១៧ ទំព័រ ៣៣–៣៤ )

តើខ្ញុំគួរធ្វើដូចម្តេច នៅពេលខ្ញុំមានអារម្មណ៍ថាគ្មានសមត្ថភាពគ្រប់គ្រាន់បំពេញកិច្ចការរបស់ខ្ញុំក្នុងសាសនាចក្រ ?

ប្រធាន ឌៀថើរ អេហ្វ អុជដូហ្វ ដែលកាលនោះនៅក្នុងគណៈប្រធានទីមួយបានបង្រៀន ៖

អ្នកអាចនឹងមានអារម្មណ៍ថា មានមនុស្សផ្សេងទៀតដែលមានសមត្ថភាព ឬមានបទពិសោធន៍ច្រើនជាង ដែលអាចបំពេញការហៅ និងការចាត់តាំងរបស់អ្នកបានប្រសើរជាងអ្នកទៅទៀត ប៉ុន្តែព្រះអម្ចាស់បានប្រទានការទទួលខុសត្រូវនេះដល់អ្នកដោយសារហេតុផលមួយ ។ ប្រហែលជាមានមនុស្ស និងដួងចិត្តនានាដែលមានតែអ្នកប៉ុណ្ណោះដែលអាចឈោងទៅជួយបាន ។ ប្រហែលជាគ្មាននរណាម្នាក់ផ្សេងទៀតអាចធ្វើវាតាមរបៀបដូចគ្នានោះបានឡើយ ។

( ឌៀថើរ អេហ្វ អុជដូហ្វ « Lift Where You Stand » Ensign ឬ Liahona ខែ វិច្ឆិកា ឆ្នាំ ២០០៨ ទំព័រ ៥៦ )

សកម្មភាពរៀនសូត្របន្ថែម

មនុស្សគ្រប់រូបសំខាន់

សូមជួយសិស្សឲ្យយល់ថា ទោះបីជាមនុស្សគ្រប់រូបខុសគ្នាក៏ដោយ ក៏ពួកគេទាំងអស់គ្នាត្រូវបានអញ្ជើញឲ្យមករកព្រះគ្រីស្ទ ហើយបម្រើក្នុងសាសនាចក្ររបស់ទ្រង់ ។ មេរៀននេះអាចត្រូវបានបង្ហាញដោយប្រើល្បែងផ្គុំរូប ។ សូមពិចារណាសរសេរពាក្យអំពី កូរិនថូស ទី១ ១២:១២ នៅលើក្រដាសមួយសន្លឹក រួចកាត់ក្រដាសនោះជាចម្រៀកៗ ដូចជាល្បែងផ្គុំរូប ដើម្បីឲ្យសិស្សដាក់ចូលគ្នា ។ សូមអញ្ជើញសិស្សឲ្យអានខគម្ពីរ ហើយពិភាក្សាអំពីអ្វីដែលវាបង្រៀនអំពីសាសនាចក្ររបស់ព្រះយេស៊ូវគ្រីស្ទ ។

សិស្សក៏អាចមើលវីដេអូ « We Come Together and Unite as One » ( ៦:២០ ) ដែលមាននៅលើគេហទំព័រ ChurchofJesusChrist.org ។