កូរិនថូស ទី១ ១៣

« សេចក្ដីសប្បុរសមិនដែលផុតឡើយ »

ព្រះយេស៊ូវគ្រីស្ទបានបង្ហាញសេចក្តីស្រឡាញ់ដ៏អស្ចារ្យជារៀងរាល់ថ្ងៃក្នុងព្រះជន្មរមែងស្លាប់របស់ទ្រង់ ។ ទីបំផុតទ្រង់បានបង្ហាញសេចក្ដីស្រឡាញ់ដ៏ឥតខ្ចោះរបស់ទ្រង់ដោយស្ម័គ្រព្រះទ័យបូជាព្រះជន្មរបស់ទ្រង់ដើម្បីយើង ។ សាវកប៉ុលបានសរសេរយ៉ាងលម្អិតអំពីសេចក្ដីស្រឡាញ់ដូចព្រះគ្រីស្ទ ឬសេចក្ដីសប្បុរស និងមូលហេតុដែលយើងគួរចង់ទទួលបានសេចក្ដីស្រឡាញ់នោះ ។ គោលបំណងនៃមេរៀននេះជួយអ្នកឲ្យទទួលអារម្មណ៍នៃសេចក្តីស្រឡាញ់ដ៏សុទ្ធសាធរបស់ព្រះយេស៊ូវគ្រីស្ទចំពោះអ្នក និងដើម្បីជួយអ្នកឲ្យស្វែងរកអំណោយទាននៃសេចក្តីសប្បុរសដើម្បីទទួលនូវសេចក្តីស្រឡាញ់នោះចំពោះអ្នកដទៃ ។

ការជឿទៅលើសិស្សម្នាក់ៗ ។ វិធីមួយដើម្បីបង្ហាញសេចក្ដីស្រឡាញ់ចំពោះសិស្សម្នាក់ៗគឺត្រូវទទួលស្គាល់ និងជឿលើអត្តសញ្ញាណ និងគោលបំណងដ៏ទេវភាពរបស់ពួកគេ ។ សូមអធិស្ឋានដើម្បីមើលឲ្យឃើញសិស្សដូចដែលព្រះអម្ចាស់ទតឃើញពួកគេ ។

ការរៀបចំរបស់សិស្ស ៖ សូមអញ្ជើញសិស្សឲ្យគិតអំពីសមាជិកគ្រួសារ មិត្តភក្តិ ឬបុគ្គលផ្សេងទៀតដែលពួកគេចង់មានទំនាក់ទំនងជាមួយកាន់តែល្អ ។ សូមឲ្យសិស្សពិចារណាអំពីឥទ្ធិពលដែលអាចមានលើទំនាក់ទំនងនោះតាមរយៈការបង្ហាញសេចក្ដីស្រឡាញ់កាន់តែខ្លាំងចំពោះបុគ្គលនេះ ។

សកម្មភាពរៀនសូត្រដែលអាចមាន

ទំនាក់ទំនងរបស់យើងជាមួយអ្នកដទៃ

សូមអញ្ជើញសិស្សឲ្យសញ្ជឹងគិតដោយស្ងៀមស្ងាត់អំពីការរៀបចំរបស់ពួកគេសម្រាប់ថ្នាក់រៀន និងសំណួរខាងក្រោម ។

សូមគិតពីនរណាម្នាក់ដែលអ្នកចង់មានទំនាក់ទំនងជាមួយកាន់តែល្អ ។

• ហេតុអ្វីអ្នកចង់ឲ្យទំនាក់ទំនងនេះបានប្រសើរឡើង ?

• តើអ្នកបានធ្វើអ្វីខ្លះ ដើម្បីជួយដល់ទំនាក់ទំនងនេះ ? តើអ្វីដែលមានប្រសិទ្ធភាព ? តើអ្វីដែលគ្មានប្រសិទ្ធភាព ?

• តើអ្នកគិតថាការបង្ហាញសេចក្ដីស្រឡាញ់ខ្លាំងជាងនេះអាចមានឥទ្ធិពលអ្វីដល់ទំនាក់ទំនងនោះ ?

នៅពេលអ្នកសិក្សា កូរិនថូស ទី១ ១៣ សូមរកមើលវិធីដែលអ្នកអាចស្រឡាញ់អ្នកដទៃដូចព្រះអង្គសង្គ្រោះស្រឡាញ់ដែរ ។ សូមស្វែងរកការបំផុសគំនិតពីព្រះវិញ្ញាណបរិសុទ្ធ ដើម្បីដឹងពីអ្វីដែលអ្នកអាចធ្វើបានដើម្បីអនុវត្តអ្វីដែលអ្នកកំពុងរៀនចំពោះស្ថានភាពបច្ចុប្បន្នរបស់អ្នក ។

សេចក្តីស្រឡាញ់ដ៏សុទ្ធសាធរបស់ព្រះយេស៊ូវគ្រីស្ទ

បន្ទាប់ពីបង្រៀនសមាជិកសាសនាចក្រនៅក្រុងកូរិនថូសអំពីអំណោយទានខាងវិញ្ញាណរួច នោះសាវកប៉ុលបានមានប្រសាសន៍ថា លោកនឹងបង្ហាញពួកគេនូវ « ផ្លូវមួយដ៏ប្រសើរលើសលែងទៅទៀត » ដើម្បីរស់នៅ ( កូរិនថូស ទី១ ១២:៣១ ) ។ សូមអាន កូរិនថូស ទី១ ១៣:១–៣ ដោយស្វែងរកផ្លូវដ៏ប្រសើរលើសលែងនេះ ។

• តើអ្នកដឹងអ្វីខ្លះអំពីសេចក្ដីសប្បុរសដែលជួយអ្នកឲ្យយល់ថាហេតុអ្វីវាសំខាន់ម៉្លេះ ?

ព្រះគម្ពីរមរមនអាចជួយយើងឲ្យយល់កាន់តែច្បាស់អំពីសារៈសំខាន់នៃសេចក្តីសប្បុរស ។ នៅជិតការបញ្ចប់នៃកំណត់ត្រាបុរាណនេះ មរ៉ូណៃបានបញ្ចូលពាក្យខ្លះរបស់មរមនជាឪពុកលោក ។ មរមនបានគូសបញ្ជាក់ពីធាតុនៃសេចក្តីសប្បុរស ហើយបានផ្តល់និយមន័យនៃសេចក្តីសប្បុរស ( សូមមើល មរ៉ូណៃ ៧:៤៣–៤៨ ) ។

សូមអាន មរ៉ូណៃ ៧:៤៦–៤៧ ដោយស្វែងរកអ្វីដែលអ្នកអាចរៀនអំពីសេចក្ដីសប្បុរស ។

សូមអញ្ជើញសិស្សឲ្យគូសសម្គាល់ពាក្យ ឬឃ្លាដែលជួយពួកគេឲ្យយល់អត្ថន័យនៃសេចក្ដីសប្បុរស ។

• តើសេចក្ដីពិតអ្វីខ្លះដែលអ្នករៀនអំពីសេចក្ដីសប្បុរសពីខគម្ពីរទាំងនេះ ?

សូមពិចារណាអញ្ជើញសិស្សឲ្យសរសេរនៅលើក្តារខៀន នូវសេចក្ដីពិតដែលពួកគេបានរកឃើញពីការអានអំពីសេចក្ដីសប្បុរស ។ សេចក្តីពិតមួយដែលពួកគេអាចរកឃើញនោះគឺថា សេចក្តីសប្បុរស គឺជាសេចក្តីស្រឡាញ់ដ៏សុទ្ធសាធនៃព្រះគ្រីស្ទ ដែលស្ថិតស្ថេរជារៀងរហូត ។ សូមជួយសិស្សឲ្យយល់អំពីមូលហេតុដែលវាសំខាន់ក្នុងការមានសេចក្ដីសប្បុរស ។ សូមពិចារណាប្រើសេចក្តីថ្លែងការណ៍ និងសកម្មភាពខាងក្រោម ដើម្បីជួយសិស្សធ្វើកិច្ចការនេះ ។

ប្រធាន ដាល្លិន អេក អូក ក្នុងគណៈប្រធានទីមួយបានបង្រៀន ៖

សេចក្ដីសប្បុរសគឺជា « សេចក្តីស្រឡាញ់ដ៏សុទ្ធសាធនៃព្រះគ្រីស្ទ » [ មរ៉ូណៃ ៧:៤៧ ] មិនមែនជា អំពើ ឡើយ ប៉ុន្តែជា លក្ខខណ្ឌ ឬសភាពនៃជីវិត ។ សេចក្ដីសប្បុរសគឺទទួលបានតាមរយៈភាពជោគជ័យនៃទង្វើដែលបានមកពីការប្រែចិត្តជឿ ។ សេចក្ដីសប្បុរសគឺជាអ្វីមួយដែលមនុស្សម្នាក់ប្រែក្លាយ ។

( ដាល្លិន អេក អូក « The Challenge to Become » Ensign ខែ វិច្ឆិកា ឆ្នាំ ២០០០ ទំព័រ ៣៤ ) 

• តើសេចក្ដីថ្លែងការណ៍របស់ប្រធាន អូក បន្ថែមដល់ការយល់ដឹងរបស់អ្នកអំពីសេចក្ដីសប្បុរសដោយរបៀបណា ?

ទាំងប៉ុល នៅក្នុងព្រះគម្ពីរសញ្ញាថ្មី និង មរមន នៅក្នុងព្រះគម្ពីរមរមន បានប្រើពាក្យ និងឃ្លាស្រដៀងគ្នា ដើម្បីពិពណ៌នាអំពីសេចក្តីសប្បុរស ។ តាមរយៈការយល់ពីពាក្យសម្ដីរបស់ពួកលោក នោះយើងអាចដឹងពីអ្វីដែលត្រូវធ្វើ ហើយទីបំផុតដឹងពីរបៀបក្លាយកាន់តែដូចជាព្រះយេស៊ូវគ្រីស្ទ ។

សកម្មភាពខាងក្រោមអាចត្រូវបានធ្វើឡើងជាថ្នាក់ ឬបង្ហាញសម្រាប់សិស្សបំពេញដោយខ្លួនឯង ។ ប្រសិនបើសិស្សកំពុងធ្វើសកម្មភាពនេះជាលក្ខណៈផ្ទាល់ខ្លួន សូមពិចារណាធ្វើគំរូជំហាន គ ដោយជ្រើសរើសការពិពណ៌នាមួយដើម្បីសរសេរឡើងវិញជាមួយគ្នាជាថ្នាក់ ។

ក. សូមអាន កូរិនថូស ទី១ ១៣:៤–៧ ឬ មរ៉ូណៃ ៧:៤៥ ដោយរកមើលពីរបៀបដែលសេចក្ដីសប្បុរសត្រូវបានពិពណ៌នា ។

សូមពិចារណាផ្តល់ឲ្យសិស្សនូវសេចក្តីថ្លែងការណ៍ដោយអែលឌើរ ម៉ាវីន ជេ អាស្តុន ដែលរកឃើញនៅក្នុងផ្នែក « វិចារណកថា និងព័ត៌មានសាច់រឿង » ដើម្បីអានបន្ថែមលើវគ្គបទគម្ពីរ ។

ខ. សូមជ្រើសរើសពាក្យ ឬឃ្លាពីរ ឬបីដែលពិពណ៌នាអំពីសេចក្តីសប្បុរស ហើយសរសេរវានៅក្នុងសៀវភៅកំណត់ហេតុការសិក្សារបស់អ្នក ។

គ. នៅក្បែរនឹងការពិពណ៌នានីមួយៗ សូមសរសេរអត្ថន័យរបស់វាជាពាក្យផ្ទាល់ខ្លួនរបស់អ្នក ។ អ្នកអាចប្រើឧបករណ៍សិក្សាណាមួយដែលមានសម្រាប់អ្នក ។ ឧទាហរណ៍ អ្នកអាចប្រើវចនានុក្រមដើម្បីរកមើលនិយមន័យសម្រាប់ពាក្យដូចជា អត់ធន់ ឬ អួត ។ សូមសរសេរផងដែរអំពីរបៀបដែលការធ្វើដូចនេះអាចជួយអ្នកឲ្យក្លាយដូចជាព្រះអង្គសង្គ្រោះ ។

• តើអ្នករៀនអ្វីខ្លះអំពីព្រះអង្គសង្គ្រោះតាមរយៈការពិពណ៌នាផ្សេងៗដែលអ្នកបានសិក្សា ?

គំរូដ៏ល្អឥតខ្ចោះ

ព្រះយេស៊ូវគ្រីស្ទគឺជាគំរូដ៏ល្អឥតខ្ចោះនៃការពិពណ៌នាទាំងអស់អំពីសេចក្តីសប្បុរស ។ ដោយប្រើអ្វីដែលអ្នកបានសរសេរអំពីសេចក្ដីសប្បុរសនៅក្នុងសៀវភៅកំណត់ហេតុការសិក្សារបស់អ្នក សូមគិតអំពីឧទាហរណ៍នៅក្នុងព្រះគម្ពីរ នៅពេលព្រះយេស៊ូវគ្រីស្ទបានបង្ហាញសេចក្ដីស្រឡាញ់ដ៏សុទ្ធសាធរបស់ទ្រង់តាមរបៀបនេះ ។ រូបភាពខាងក្រោមអាចជួយអ្នកភ្ជាប់ព្រះអង្គសង្គ្រោះទៅនឹងឃ្លាដែលអ្នកបានសិក្សា ។

សូមពិចារណាបង្ហាញរូបភាពមួយចំនួនរបស់ព្រះគ្រីស្ទនៅជុំវិញថ្នាក់រៀន ។ សូមអញ្ជើញសិស្សឲ្យគិតអំពីការពិពណ៌នាស្តីពីសេចក្ដីសប្បុរសមួយណាដែលពួកគេមានអារម្មណ៍ថាត្រូវគ្នានឹងរូបភាពនីមួយៗ និងមូលហេតុរបស់ពួកគេ ។

• តើព្រះអង្គសង្គ្រោះបានបង្ហាញសេចក្តីសប្បុរសក្នុងស្ថានភាពនីមួយៗដោយរបៀបណា ?

• តើអ្នកបានឃើញដោយផ្ទាល់ភ្នែកនូវសេចក្តីស្រឡាញ់របស់ព្រះអង្គសង្គ្រោះចំពោះអ្នក ឬអ្នកដទៃយ៉ាងដូចម្ដេច ?

• តើការគិតអំពីសេចក្តីស្រឡាញ់របស់ព្រះអង្គសង្គ្រោះចំពោះអ្នកជះឥទ្ធិពលលើអារម្មណ៍របស់អ្នកចំពោះទ្រង់យ៉ាងដូចម្ដេច ?

ការរស់នៅក្នុងជីវិតប្រកបដោយសេចក្ដីសប្បុរស

ព្យាការីមរមនបានបញ្ចប់ការបង្រៀនរបស់លោកអំពីសេចក្ដីសប្បុរស ដោយមានការអញ្ជើញជាបន្ទាន់មួយឲ្យធ្វើតាម ។ សូមអាន មរ៉ូណៃ ៧:៤៨ ដោយរកមើលការអញ្ជើញនេះ ។

• តើពាក្យ ឬឃ្លាអ្វីខ្លះដែលជួយអ្នកឲ្យយល់ពីអ្វីដែលត្រូវធ្វើដើម្បីទទួលបានអំណោយទាននៃសេចក្ដីសប្បុរស ?

ពេញមួយព្រះជន្មរបស់ទ្រង់ ព្រះយេស៊ូវគ្រីស្ទបានបង្ហាញថា វាអាចទៅរួចដើម្បីមានសេចក្តីសប្បុរសក្នុងគ្រប់ស្ថានភាព ។ សូមព្យាយាមស្រមៃមើលថា តើវានឹងមានឥទ្ធិពលអ្វីខ្លះកើតមានដល់ជីវិតរបស់អ្នក ប្រសិនបើអ្នកធ្វើតាមគំរូរបស់ព្រះអង្គសង្គ្រោះអំពីសេចក្តីសប្បុរសក្នុងគ្រប់ស្ថានភាពទាំងអស់ ។ សូមគិតពីទំនាក់ទំនងជាក់លាក់ដែលអ្នកបានគិតនៅពេលចាប់ផ្តើមមេរៀន ។ សូមពិចារណាពីរបៀបដែលការមានសេចក្ដីសប្បុរសកាន់តែច្រើននឹងផ្តល់ពរដល់ទំនាក់ទំនងនោះ ។

នៅពេលសិស្សឆ្លើយសំណួរខាងក្រោមនេះ សូមលើកទឹកចិត្តពួកគេឲ្យធ្វើតាមជម្រើសដែលពួកគេជ្រើសរើស ។

• តើអ្នកអាចធ្វើអ្វីខ្លះដើម្បីបង្ហាញពីសេចក្ដីសប្បុរសបន្ថែមទៀត ?

• តើអ្នកនឹងធ្វើអ្វីដើម្បីបង្ហាញព្រះវរបិតាសួគ៌ថា អ្នកប្រាថ្នាចង់បានជំនួយរបស់ទ្រង់ ?

សូមថ្លែងទីបន្ទាល់ថា ព្រះវរបិតាសួគ៌សព្វព្រះទ័យប្រទានពរដល់យើងជាមួយនឹងអំណោយទាននៃសេចក្ដីសប្បុរស ដើម្បីជួយយើងឲ្យក្លាយកាន់តែដូចជាទ្រង់ និងព្រះរាជបុត្រារបស់ទ្រង់ ។ ព្រះវរបិតាសួគ៌នឹងជួយយើងអភិវឌ្ឍសេចក្ដីសប្បុរស នៅពេលយើងងាកទៅរកទ្រង់ ។

វិចារណកថា និងព័ត៌មានសាច់រឿង

តើយើងអាចបង្ហាញសេចក្ដីសប្បុរសចំពោះអ្នកដទៃដោយរបៀបណា ?

អែលឌើរ ម៉ាវិន ជេ អាស្តុន ( ឆ្នាំ ១៩១៥–១៩៩៤ ) ក្នុងកូរ៉ុមនៃពួកសាវកដប់ពីរនាក់បានបង្រៀន ៖

សេចក្តីសប្បុរសកើតឡើងនៅពេលយើងមានចិត្តសប្បុរសចំពោះគ្នាទៅវិញទៅមក នៅពេលយើងមិនវិនិច្ឆ័យ ឬចាត់ថ្នាក់អ្នកដទៃ ពោលគឺនៅពេលយើងគ្រាន់តែទទួលយកគ្នាយ៉ាងសាមញ្ញ ឬនៅស្ងៀមស្ងាត់ ។ សេចក្ដីសប្បុរសគឺជាការទទួលយកភាពខុសគ្នា ភាពទន់ខ្សោយ និងភាពខ្វះចន្លោះរបស់នរណាម្នាក់ ការមានភាពអត់ធន់ដល់នរណាម្នាក់ដែលមិនគាំទ្រយើង ឬការរារាំងមិនឲ្យកំហឹងឆាប់កើតឡើង នៅពេលនរណាម្នាក់មិនព្រមដោះស្រាយអ្វីមួយតាមរបៀបដែលយើងសង្ឃឹមចង់បាន ។ សេចក្ដីសប្បុរសជាការបដិសេធមិនកេងចំណេញលើភាពទន់ខ្សោយរបស់អ្នកដទៃ និងការមានឆន្ទៈក្នុងការអភ័យទោសដល់នរណាម្នាក់ដែលបានធ្វើឲ្យយើងឈឺចាប់ ។ សេចក្ដីសប្បុរសគឺជាការរំពឹងចង់បានអ្វីដែលល្អបំផុតពីគ្នាទៅវិញទៅមក ។

( ម៉ាវីន ជេ អាស្តុន « The Tongue Can Be a Sharp Sword » Ensign ខែ ឧសភា ឆ្នាំ ១៩៩២ ទំព័រ ១៩ )

ប្រធាន ថូម៉ាស អេស ម៉នសុន ( ឆ្នាំ ១៩២៧–២០១៨ ) បានបង្រៀនអំពីសេចក្ដីសប្បុរសនៅក្នុងសារលិខិតសន្និសីទទូទៅរបស់លោក « Charity Never Faileth » ( Ensign ឬ Liahona ខែ វិច្ឆិកា ឆ្នាំ ២០១០ ទំព័រ ១២២–១២៥ ) ។ អ្នកប្រហែលជាចង់មើលវីដេអូនៃសារលិខិតនេះ ដែលមាននៅលើគេហទំព័រ ChurchofJesusChrist.org ចាប់ពីលេខកូដម៉ោង ១៥:០៥ ដល់ ១៧:២២ ។

ហេតុអ្វីសេចក្ដីសប្បុរសដែលជាសេចក្ដីស្រឡាញ់ដ៏សុទ្ធសាធនៃព្រះយេស៊ូវគ្រីស្ទនឹងមិនចេះផុតរលត់ឡើយ ?

អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖

សេចក្ដីសប្បុរស ពិត … ត្រូវបានបង្ហាញយ៉ាងច្បាស់ និងយ៉ាងបរិសុទ្ធនៅក្នុងសេចក្ដីស្រឡាញ់ដ៏ពិតប្រាកដ ដ៏ខ្ពង់ខ្ពស់បំផុត និងដ៏ធួនរបស់ព្រះគ្រីស្ទសម្រាប់យើង ។ … វាគឺជាសេចក្ដីសប្បុរស—ជាសេចក្ដីស្រឡាញ់ដ៏សុទ្ធសាធរបស់ទ្រង់មានសម្រាប់យើង—គឺថាបើគ្មានវាទេ យើងនឹងគ្មានជាអ្វីទាំងអស់ គ្មានសង្ឃឹម ជាបុរស និងស្ត្រីដែលវេទនាបំផុត ។ ពិតណាស់ ពួកអ្នកដែលមានសេចក្ដីសប្បុរស នឹងទទួលបានពរជ័យនៃសេចក្ដីស្រឡាញ់របស់ទ្រង់នៅថ្ងៃចុងក្រោយ—ដង្វាយធួន ដំណើររស់ឡើងវិញ ជីវិតដ៏នៅអស់កល្បជានិច្ច ការសន្យាដ៏អស់កល្ប—ពិតណាស់ នឹងបានស្រួលទាំងអស់ដល់អ្នកនោះហើយ ។ …

ជីវិតមានបំណែករបស់វាជាការភ័យខ្លាច និងបរាជ័យ ។ ពេលខ្លះអ្វីៗខកខានមិនបានដល់គោលដៅ ។ ជួនកាលមនុស្សខ្លះធ្វើឲ្យយើងបរាជ័យ ការបរាជ័យខាងសេដ្ឋកិច្ច ឬពាណិជ្ជកម្មក៏មាន ឬរដ្ឋាភិបាលធ្វើឲ្យយើងបរាជ័យក៏មាន ។ ប៉ុន្ដែរឿងមួយទោះក្នុងពេលនេះ ឬភាពដ៏នៅអស់កល្បជានិច្ចដែល មិន ធ្វើឲ្យយើងបរាជ័យនោះ—គឺសេចក្ដីស្រឡាញ់ដ៏សុទ្ធសាធនៃព្រះគ្រីស្ទ ។

( ជែហ្វ្រី អ័រ ហូឡិន Christ and the New Covenant [ ឆ្នាំ ១៩៩៧ ] ទំព័រ ៣៣៦–៣៣៧ )

សកម្មភាពរៀនសូត្របន្ថែម

តើអ្វីជំរុញទឹកចិត្តខ្ញុំឲ្យធ្វើសកម្មភាព ?

ជាវិធីជំនួសដើម្បីចាប់ផ្តើមមេរៀន សូមពិចារណាអញ្ជើញសិស្សពីរបីនាក់សម្តែងតាមស្ថានភាពនានា ដែលបុគ្គលសម្តែងនោះអាចមានហេតុផលជំរុញចិត្តផ្សេងៗ ។ សូមអញ្ជើញសិស្សក្នុងថ្នាក់រៀនឲ្យទាយសកម្មភាពនេះ ហើយផ្តល់ហេតុផលពីមូលហេតុដែលមនុស្សម្នាក់អាចជ្រើសរើសសកម្មភាពនេះ ។ ស្ថានភាពមួយចំនួនដែលអាចមាន គួររួមបញ្ជូលការណ៍ទាំងនេះ ៖

• យុវនារីម្នាក់ហុចស្រោមសំបុត្រដង្វាយមួយភាគក្នុងដប់ទៅប៊ីស្សព ។

• យុវជនម្នាក់ជូនអាហារដល់គ្រួសារដែលគ្មានផ្ទះសម្បែង ។

បន្ទាប់មក សិស្សអាចពិភាក្សាអំពីមូលហេតុដែលការជំរុញចិត្តនៅពីក្រោយសកម្មភាពរបស់យើងមានសារៈសំខាន់ ។សិស្សអាចមើលវីដេអូ « Charity: An Example of the Believers » ( ៤:៥០ ) ដើម្បីមើលគំរូនៃយុវនារីដែលត្រូវបានជំរុញចិត្តដោយសារសេចក្ដីសប្បុរស ។

វីដេអូបង្ហាញពីការបង្រៀនរបស់ប៉ុល

នៅចុងបញ្ចប់នៃមេរៀននេះ សូមពិចារណាបង្ហាញវីដេអូ « Charity Never Faileth » ( ៣:៣២ ) ដែលមាននៅលើគេហទំព័រ ChurchofJesusChrist.org ។ វីដេអូនេះរំឭកពីអ្វីៗទាំងអស់ដែលប៉ុលបានបង្រៀននៅក្នុង កូរិនថូស ទី១ ១៣ ហើយអាចជួយរៀបចំសិស្សឲ្យឆ្លើយសំណួរចុងក្រោយពីរនៅក្នុងមេរៀននេះ ។

ការបោះចោលរបស់ដែលមិនបានការ

សូមអញ្ជើញសិស្សឲ្យនិយាយអំពីសកម្មភាពផ្សេងៗដែលពួកគេស្រឡាញ់កាលពីក្មេង ប៉ុន្តែលែងចាប់អារម្មណ៍ទៀតហើយ ។ សូមប្រើពាក្យរបស់ប៉ុលនៅក្នុង កូរិនថូស ទី១ ១៣:១១ ដើម្បីជួយសិស្សឲ្យឃើញថា នៅពេលយើង « ធំឡើងនៅក្នុងព្រះអម្ចាស់ » ( ហេលេមិន ៣:២១ ) យើងអាចជំនួសទម្លាប់ចាស់ជាមួយនឹងជម្រើសដែលមានឥទ្ធិពលដោយសារសេចក្ដីសប្បុរស សេចក្ដីស្រឡាញ់ដ៏សុទ្ធសាធរបស់ព្រះគ្រីស្ទ ( សូមមើល មរ៉ូណៃ ៧:៤៧ ) ។

សេចក្តីថ្លែងការណ៍ដ៏មានប្រយោជន៍លើប្រធានបទនេះអាចរកឃើញនៅក្នុងសារលិខិតរបស់ ស៊ីស្ទើរ អ៊ែន ស៊ី ភីងគ្រី « To Grow Up to the Lord » ( Ensign ឬ Liahona ខែ ឧសភា ឆ្នាំ ២០០៦ ទំព័រ ៧៤–៧៦ ) ។