ចំណេះចំណានខាងគោលលទ្ធិ ៖ កូរិនថូស ទី១ ១១:១១

ទាំងបុរស និងស្ត្រីគឺមានសារៈសំខាន់នៅក្នុងផែនការរបស់ព្រះវរបិតាសួគ៌

នៅក្នុងការសិក្សា កូរិនថូស ទី១ ១១ របស់អ្នក នោះអ្នកបានរៀនពីរបៀបដែលព្រះទតឃើញតួនាទីដ៏ពិសេស និងដ៏ទេវភាពរបស់ស្ត្រី និងបុរស ។ គោលបំណងនៃមេរៀននេះគឺដើម្បីជួយអ្នកបង្កើនចំណេះចំណានរបស់អ្នកលើការបង្រៀនទាំងនេះ នៅពេលអ្នកទន្ទេញនូវសេចក្ដីយោង និងឃ្លានៃបទគម្ពីរគន្លឹះសម្រាប់ កូរិនថូស ទី១ ១១:១១ ពន្យល់ពីគោលលទ្ធិ និងអនុវត្តតាមគោលការណ៍នៃការទទួលបានចំណេះដឹងខាងវិញ្ញាណទៅនឹងស្ថានភាពជីវិតជាក់ស្ដែង ។

ការរៀបចំរបស់សិស្ស ៖ សូមអញ្ជើញសិស្សឲ្យអាននៅវគ្គទី ៣ នៅក្នុងអត្ថបទ « Men and Women in the Work of the Lord » ដោយប្រធាន អិម. រ័សុល បាឡឺដ ក្នុងកូរ៉ុមនៃពួកសាវកដប់ពីរនាក់ ( New Era ខែ មេសា ឆ្នាំ ២០១៤ ទំព័រ ២–៥ ) ដោយរកមើលសេចក្តីពិតដែលយើងត្រូវការ ដើម្បីយល់ពីគោលលទ្ធិរបស់ព្រះទាក់ទងនឹងបុរស និងស្ត្រី ។

សកម្មភាពរៀនសូត្រដែលអាចមាន

វគ្គបទគម្ពីរចំណេះចំណានខាងគោលលទ្ធិនេះត្រូវបានរៀបរៀងឡើងដើម្បីបង្រៀនបន្ទាប់ពីមេរៀន « កូរិនថូស ទី១ ១១ » ដែលជាមេរៀនបរិបទសម្រាប់វគ្គបទគម្ពីរចំណេះចំណានខាងគោលលទ្ធិ កូរិនថូស ទី១ ១១ ។ ប្រសិនបើមេរៀនវគ្គបទគម្ពីរចំណេះចំណានខាងគោលលទ្ធិនេះត្រូវប្តូរទៅសប្តាហ៍ផ្សេង សូមប្រាកដថា មេរៀនបរិបទដែលត្រូវគ្នានេះត្រូវបានបង្រៀននៅអំឡុងសប្តាហ៍នោះផងដែរ ។

ពន្យល់ និងទន្ទេញ

ការសង្កេតខាងក្រោមអំពីដៃដែលត្រូវបានកែសម្រួលពីសុន្ទរកថារបស់ លីនដា ខេ ប៊ើតុន « We’ll Ascend Together » ( Ensign ឬ Liahona ខែ ឧសភា ឆ្នាំ ២០១៥ ទំព័រ ២៩–៣២ ) ។

សូមមើលដៃរបស់អ្នក ។ សូមសង្កេតមើលពីរបៀបដែលដៃរបស់អ្នកដូចគ្នា និងរបៀបដែលដៃរបស់អ្នកខុសគ្នា ។

• ប្រសិនបើដៃនីមួយៗអាចដំណើរការដោយឡែកពីគ្នា ហេតុអ្វីអ្នកគិតថា ព្រះវរបិតាសួគ៌បានបង្កើតបុត្រាបុត្រីរបស់ទ្រង់ឲ្យមានដៃពីរ ?

• តើភាពខុសគ្នានៅក្នុងដៃរបស់អ្នក ជួយអ្នកឲ្យសម្រេចកិច្ចការ ឬប្រើទេពកោសល្យរបស់អ្នកដោយរបៀបណា ?

• តើការសង្កេតទាំងនេះអំពីដៃរបស់អ្នកទាក់ទងនឹង កូរិនថូស ទី១ ១១:១១ យ៉ាងដូចម្ដេច ?

សូមផ្តល់ឱកាសដល់សិស្សដើម្បីទន្ទេញសេចក្ដីយោង និងឃ្លាបទគម្ពីរគន្លឹះសម្រាប់ កូរិនថូស ទី១ ១១:១១ ។ ខាងក្រោមនេះគឺជាសកម្មភាពការទន្ទេញមួយដែលអាចធ្វើបាន ។ តាមដែលសមស្រប សូមលើកទឹកចិត្តសិស្សឲ្យប្រើកម្មវិធីចំណេះចំណានខាងគោលលទ្ធិដើម្បីរំឭក និងទន្ទេញវគ្គបទគម្ពីរនេះ ។

សកម្មភាពខាងក្រោមអាចជួយអ្នកឲ្យទន្ទេញសេចក្តីយោងនៃចំណេះចំណានខាងគោលលទ្ធិ កូរិនថូស ទី១ ១១:១១ និងឃ្លាបទគម្ពីរគន្លឹះរបស់វាថា « ក្នុងព្រះអម្ចាស់ នោះបុរសមិនមែនជាឥតពឹងអាស្រ័យដល់ស្ត្រីឡើយ ហើយស្ត្រីក៏មិនមែនជាឥតពឹងអាស្រ័យដល់បុរសដែរ » ។

សូមសរសេរឃ្លាបទគម្ពីរគន្លឹះ និងសេចក្ដីយោងបទគម្ពីរ ។ សូមអាន ឬសូត្រឃ្លា និងសេចក្ដីយោងឲ្យបានច្រើនដង ដោយលុប ឬយកពាក្យចេញរាល់ពេលអាន ឬសូត្រ ។ សូមបន្តរហូតដល់អ្នកមានភាពងាយស្រួលក្នុងការសូត្រឡើងវិញនូវឃ្លាគន្លឹះ និងសេចក្ដីយោងបទគម្ពីរដោយមិនចាំបាច់មើលពាក្យទាំងនោះឡើយ ។

រៀនអនុវត្ត

នៅពេលសិស្សពិនិត្យមើលគោលការណ៍នៃការទទួលបានចំណេះដឹងខាងវិញ្ញាណ សូមដឹងពីអ្នកដែលអាចត្រូវការជំនួយ ឬការណែនាំបន្ថែម ។ ខាងក្រោមនេះគឺជាឧទាហរណ៍មួយដែលអាចប្រើបាន ។ បន្ទាប់ពីសិស្សកត់ត្រាគំនិតរបស់ពួកគេ សូមពិចារណាបែងចែកពួកគេជាក្រុមតូចៗ ដើម្បីពិភាក្សាអំពីគោលការណ៍ជាមួយគ្នា ។

នៅក្នុងសៀវភៅកំណត់ហេតុការសិក្សារបស់អ្នក សូមកត់ត្រាគោលការណ៍ខាងក្រោមនៃការទទួលបានចំណេះដឹងខាងវិញ្ញាណ ៖

1. ធ្វើសកម្មភាពដោយសេចក្ដីជំនឿ

2. ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏នៅអស់កល្បជានិច្ច

3. ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព

សូមពិពណ៌នាអំពីគោលការណ៍នីមួយៗជាពីរ ឬបីប្រយោគ ។ អ្នកអាចចង់មើលកថាខណ្ឌទី ៥–១២ នៅក្នុង ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២២ ) ដើម្បីពិនិត្យមើលចំណេះដឹងរបស់អ្នក និងបន្ថែមព័ត៌មានសំខាន់ៗណាមួយដែលអ្នកប្រហែលជាបានខកខាន ។

សូមលើកទឹកចិត្តសិស្សឲ្យនឹកដល់អ្វីដែលពួកគេបានរៀននៅក្នុងការរៀបចំរបស់សិស្សរបស់ពួកគេ ។ នៅពេលសិស្សពិភាក្សាអំពីសំណួរខាងក្រោម សូមពិចារណាសរសេរ ( ឬឲ្យសិស្សសរសេរ ) ចម្លើយរបស់ពួកគេនៅលើក្ដារខៀន ។ ការកត់ត្រាគំនិតរបស់ពួកគេនឹងជួយសិស្សឲ្យផ្សារភ្ជាប់នឹងអ្វីដែលពួកគេកំពុងរៀន ។

នៅក្នុង កូរិនថូស ទី១ ១១:១១ អ្នកបានរៀនថា ទាំងបុរស និងស្ត្រីគឺមានសារៈសំខាន់នៅក្នុងផែនការរបស់ព្រះវរបិតាសួគ៌ ។

• តើសេចក្តីពិតនេះត្រូវបានគេយល់ខុស ឬមិនយកចិត្តទុកដាក់ក្នុងសង្គមយ៉ាងណា ?

• តើស្ថានភាពអ្វីខ្លះក្នុងជីវិតរបស់អ្នក ដែលអ្នកអាចមានឱកាសបង្រៀន ឬការពារសេចក្ដីពិតនេះ ?

ដើម្បីបង្កើនការផ្សារភ្ជាប់ផ្ទាល់ខ្លួន សូមពិចារណាអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ ចំពោះការឆ្លើយតបរបស់សិស្សទៅនឹងសំណួរពីមុនៗ ។ ប្រសិនបើចាំបាច់ សូមប្រើស្ថានភាពនានាដែលមានរួចហើយក្នុងមេរៀន ។

វាអាចមានប្រយោជន៍ក្នុងការបង្ហាញសំណួរខាងក្រោមសម្រាប់ការពិភាក្សា ឬផ្តល់ឲ្យសិស្សនូវសំណៅចែកដែលភ្ជាប់មកជាមួយ ។

សូមពិចារណាពីរបៀបដែលសិស្សអាចរៀនបានល្អបំផុតពីសកម្មភាពនេះ ។ ពួកគេអាចធ្វើការម្នាក់ឯង ជាក្រុមតូចៗ ឬជាថ្នាក់តែម្តង ។ វាអាចមានប្រយោជន៍ក្នុងការទុកពេលវេលាខ្លះនៅចុងថ្នាក់ ដើម្បីពិភាក្សាពីការរកឃើញរបស់ពួកគេ ។

សូមជ្រើសរើសស្ថានភាពមួយខាងក្រោម ហើយគិតអំពីរបៀបដែលការអនុវត្តតាមគោលការណ៍នៃការទទួលបានចំណេះដឹងខាងវិញ្ញាណអាចជួយនរណាម្នាក់ឲ្យយល់ពីសេចក្ដីពិតពី កូរិនថូស ទី១ ១១:១១ អំពីតួនាទីរបស់បុរស និងស្ត្រីនៅក្នុងផែនការរបស់ព្រះវរបិតាសួគ៌ ។

1. ប្អូនស្រីរបស់ ឃេលី ឈ្មោះ អ៊ែលលី បានឮក្មេងប្រុសមួយចំនួននៅសាលានិយាយថា បុរសសំខាន់ជាងស្ត្រី ។ អ៊ែលលី សួរ ឃេលីថា « តើខ្ញុំមិនមានតម្លៃដូចក្មេងប្រុសទេឬអី ? »

2. រីដ មានការព្រួយបារម្ភដោយសារគាត់បានឮសមាជិកកូរ៉ុមរបស់គាត់មួយចំនួននិយាយមិនគោរពដល់ស្ត្រី ។

3. បន្ទាប់ពីបានមើលខ្សែភាពយន្តដ៏ពេញនិយមមួយរួច មិត្តភក្តិមួយក្រុមបានសើចចំអកចំពោះទង្វើដ៏គួរឲ្យអស់សំណើចរបស់តួអង្គឪពុក ។ មនុស្សជាច្រើនយល់ស្របថាមិនបាច់មានឪពុកនោះទេ ហើយមិត្តម្នាក់និយាយថា « នេះជាមូលហេតុដែលអ្នកមិនត្រូវការបុរសម្នាក់ដើម្បីចិញ្ចឹមគ្រួសារដ៏រីករាយនោះទេ » ។

4. អេស្តេបាន និង ឃ្លែរ៉ា កំពុងរៀបចំខ្លួនរៀបអាពាហ៍ពិពាហ៍នៅក្នុងព្រះវិហារបរិសុទ្ធ ។ ឪពុកម្តាយរបស់ពួកគេណែនាំថា ពួកគេនិយាយអំពីរបៀបដែលពួកគេម្នាក់ៗនឹងបំពេញតួនាទី និងទំនួលខុសត្រូវផ្សេងៗគ្នានៅក្នុងគ្រួសារនាពេលអនាគតរបស់ពួកគេ ។

ធ្វើសកម្មភាពដោយសេចក្ដីជំនឿ

• តើមានវិធីអ្វីខ្លះដែលអ្នក ឬបុគ្គលនៅក្នុងស្ថានភាពនេះអាចធ្វើសកម្មភាពដោយជំនឿ ដើម្បីឆ្លើយតបទៅនឹងបញ្ហាដែលត្រូវបានលើកឡើង ?

• តើការឲ្យតម្លៃតួនាទីពិសេស និងសំខាន់របស់ស្ត្រី និងបុរសអាចជួយអ្នកឲ្យដើរតាមព្រះយេស៊ូវគ្រីស្ទយ៉ាងដូចម្ដេច ?

ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏នៅអស់កល្បជានិច្ច

• តើអ្នកដឹងអ្វីខ្លះអំពីព្រះវរបិតាសួគ៌ និងផែនការរបស់ទ្រង់ ដែលអាចមានប្រយោជន៍ ប្រសិនបើអ្នកជួបប្រទះស្ថានភាពបែបនេះ ?

• តើបុរស និងស្ត្រីមានតួនាទីអ្វីខ្លះនៅក្នុងផែនការរបស់ព្រះវរបិតាសួគ៌ ?

ព្យាយាមស្វែងរកព័ត៌មានបន្ថែមតាមរយៈប្រភពដែលបានតែងតាំងដ៏ទេវភាព

• តើការយល់ដឹង និងទីបន្ទាល់របស់អ្នកអំពីសេចក្តីពិតដែលបានបង្រៀននៅក្នុង កូរិនថូស ទី១ ១១:១១ អាចជួយអ្នកឲ្យឆ្លើយតបទៅនឹងស្ថានភាពនេះយ៉ាងដូចម្តេច ?

នេះអាចជាឱកាសសម្រាប់សិស្សដើម្បីចែកចាយអ្វីដែលពួកគេបានរៀននៅក្នុងការរៀបចំរបស់ពួកគេសម្រាប់ថ្នាក់ ។

• តើមានការបង្រៀនដែលបំផុសគំនិតអ្វីផ្សេងទៀតមកពីបទគម្ពីរ ឬថ្នាក់ដឹកនាំសាសនាចក្រដែលអាចជួយអ្នកឲ្យឆ្លើយតបដោយស្មោះត្រង់ ?

ការរំឭកចំណេះចំណានខាងគោលលទ្ធិ

សកម្មភាពពិនិត្យមើលឡើងវិញខាងក្រោមនេះ គប្បីប្រើប្រាស់នៅក្នុងមេរៀនមួយដែលត្រូវបង្រៀននៅក្នុងពេលឆាប់ៗខាងមុខនេះ ។

សូមសរសេរឃ្លាបទគម្ពីរគន្លឹះសម្រាប់ កូរិនថូស ទី១ ១១:១១ នៅលើក្ដារខៀន ជំនួសពាក្យគន្លឹះដោយចន្លោះទទេសម្រាប់ទុកបំពេញ ។ សូមអញ្ជើញសិស្សឲ្យសរសេរ ឬសូត្រវគ្គបទគម្ពីរគន្លឹះ និងសេចក្ដីយោង ដោយបំពេញចន្លោះនោះឲ្យបានត្រឹមត្រូវ ។ សូមអញ្ជើញសិស្សឲ្យសូត្រសេចក្ដីយោង និងឃ្លាបទគម្ពីរគន្លឹះឲ្យបានច្រើនលើកច្រើនសា ។

សកម្មភាពរៀនសូត្របន្ថែម

ប្រភពដែលបានតែងតាំងដ៏ទេវភាព

សូមពិចារណាលើការផ្តល់យោបល់ទាំងនេះ ឬប្រភពដែលបានតែងតាំងដ៏ទេវភាពផ្សេងទៀត នៅពេលសិស្សឆ្លើយតបទៅនឹងស្ថានភាពនានា ៖

អិម រ័សុល បាឡឺដ « Men and Women in the Work of the Lord » New Era ខែ មេសា ឆ្នាំ ២០១៤ ទំព័រ ២–៥លីនដា ខេ ប៊ើតុន « We’ll Ascend Together » Ensign ឬ Liahona ខែ ឧសភា ឆ្នាំ ២០១៥ ទំព័រ ២៩–៣២ជីន ប៊ី ប៊ីងហាំ « United in Accomplishing God’s Work » Ensign ឬ Liahona ខែ ឧសភា ឆ្នាំ ២០២០ ទំព័រ ៦០–៦៣

រឿងរបស់ម៉ូនីកា

នៅក្នុងការចាក់ផ្សាយវគ្គបំពាក់បំប៉នសម្រាប់ថ្នាក់សិក្ខាសាលា និងថ្នាក់វិទ្យាស្ថានសាសនា បងប្រុស ឆាត អេច វិប បានថ្លែងអំពីរបៀបដែលគោលការណ៍នៃការទទួលបានចំណេះដឹងខាងវិញ្ញាណអាចអនុវត្តចំពោះស្ថានភាពមួយអំពីយុវនារីម្នាក់ឈ្មោះ ម៉ូនីកា ។ បន្ទាប់ពីប្រឈមមុខនឹងការចោទប្រកាន់ថា សាសនាចក្រមិនឲ្យតម្លៃលើស្ត្រី នោះ ម៉ូនីកា មិនប្រាកដថាត្រូវឆ្លើយតបយ៉ាងណានោះទេ ។

វាអាចជាប្រយោជន៍សម្រាប់សិស្សក្នុងការប្រើរឿងរបស់ ម៉ូនីកា ដើម្បីពិភាក្សាអំពីសេចក្ដីពិតដែលបានបង្រៀននៅក្នុង កូរិនថូស ទី១ ១១:១១–១២ ហើយអនុវត្តតាមគោលការណ៍នៃការទទួលបានចំណេះដឹងខាងវិញ្ញាណ ។ សូមពិចារណាបង្កើតផ្នែកខ្លះនៃសុន្ទរកថារបស់បងប្រុស វិប ឲ្យមានសម្រាប់សិស្សប្រើជាធនធាន ។

សូមមើល ឆាត អេច វិប « Doctrinal Mastery » ( ការចាក់ផ្សាយស្តីពីការប្រជុំបំពាក់បំប៉នប្រចាំឆ្នាំរបស់ថ្នាក់សិក្ខាសាលា និងថ្នាក់វិទ្យាស្ថានសាសនា ថ្ងៃទី ១៤ ខែ មិថុនា ឆ្នាំ ២០១៦ ) នៅលើគេហទំព័រ broadcasts.ChurchofJesusChrist.org ។

ការថ្លែងអំពីអាពាហ៍ពិពាហ៍ភេទដូចគ្នា

នៅពេលសិស្សពិភាក្សាអំពីស្ថានភាពដែលសេចក្តីពិតនៃ កូរិនថូស ទី១ ១១:១១ អាចត្រូវបានបង្រៀន ឬការពារ នោះពួកគេប្រហែលជាចង់លើកឡើងអំពីប្រធានបទនៃអាពាហ៍ពិពាហ៍ភេទដូចគ្នាផងដែរ ។ ត្រូវប្រាកដថា ត្រូវថ្លែងពីប្រធានបទនេះដោយការយល់ចិត្ត ការអាណិតអាសូរ និងការស្រឡាញ់ ។ សូមពិចារណាមើល « Same-Sex Marriage » នៅលើគេហទំព័រ topics.ChurchofJesusChrist.org ។ រួមទាំង កូរិនថូស ទី១ ១១:៨–៩, ១២ និងកថាខណ្ឌ ទី២ និង ទី៧ នៃ « ក្រុមគ្រួសារ ៖ ការប្រកាសដល់ពិភពលោក » ( នៅលើគេហទំព័រ ChurchofJesusChrist.org ) ក៏អាចមានប្រយោជន៍ផងដែរ ។

សូមចងចាំថា គោលបំណងសម្រាប់សកម្មភាពទាំងនេះ មិនមែនដើម្បីសម្រាប់គ្រូបង្រៀនផ្តល់ចម្លើយទាំងអស់នោះទេ ប៉ុន្តែសម្រាប់សិស្សដើម្បីអនុវត្តតាមដោយប្រើគោលការណ៍នៃការទទួលបានចំណេះដឹងខាងវិញ្ញាណ ។ សូមស្វែងរកការណែនាំពីព្រះវិញ្ញាណ នៅពេលអ្នកស្តាប់សិស្ស ហើយត្រូវបានបំផុសឲ្យសួរសំណួរដើម្បីជួយពួកគេស្វែងយល់ពីកង្វល់របស់ពួកគេ ។

ស្ថានភាពដូចខាងក្រោមនេះអាចត្រូវបានប្រើជំនួសស្ថានភាពនានាដែលមាននៅក្នុងមេរៀននេះ ៖

អូលីវៀមានមិត្តភក្តិពីរបីនាក់ដែលមានអារម្មណ៍ប្រតិព័ទ្ធភេទដូចគ្នា ។ នាងបាននិយាយថា « វាពិបាកណាស់សម្រាប់ខ្ញុំដើម្បីយល់ថា ហេតុអ្វីក៏សាសនាចក្របន្ដបង្រៀនថា អាពាហ៍ពិពាហ៍ភេទដូចគ្នាគឺជារឿងខុសឆ្គង ។ ហេតុអ្វីក៏បដិសេធមនុស្សដែលមានសុភមង្គលកើតមកពីការមានទំនាក់ទំនងភេទដូចគ្នាដូច្នេះ ?