Pagpakita og Gugma alang sa Langitnong Amahan ug ni Jesukristo
Imahe
A women with her hands upward in prayer
Kon ang usa ka tawo mibati nga gihigugma o naghigugma sa laing tawo, ang iyang mga lihok kasagaran mausab. Si Juan mitudlo nga ang atong gugma alang sa Langitnong Amahan ug ni Jesukristo mahimong makadasig kanato sa paghupot sa Ilang mga sugo. Kini nga leksiyon gituyo aron makatabang kanimo nga makasabot unsaon nimo pagpakita og gugma alang sa Langitnong Amahan ug ni Jesukristo pinaagi sa pagtuman sa mga sugo.
Pagdapit sa mga estudyante aron mahimong mas mahisama kang Jesukristo. Ang pagdapit sa mga estudyante sa pagbuhat og makahagit nga mga butang mahimong makatabang kanila nga mulambo ug mahimong mas mahisama sa Langitnong Amahan ug ni Jesukristo. Diha sa pagpaabot og pagdapit, tahora ang kabubut-on ug pagpakita og gugma alang sa mga estudyante, bisan kon sila dili modawat sa mga pagdapit.
Pagpangandam sa estudyante: Dapita ang mga estudyante sa pagpamalandong unsa ang ilang gibati mahitungod sa pagtuman sa mga sugo. Mahimo usab silang mangutana sa ilang mga kaila unsa ang nakapadasig kanila sa pagtuman sa mga sugo.
Posible nga mga Kalihokan sa Pagkat-on
Ang mahigugmaong pagprotekta sa Dios
Ipakita ang mosunod nga video, o bahina ang asoy ngadto sa mga bahin aron basahon sa mga estudyante sa makusog.
Samtang anaa sa usa ka beach sa Australia, si Elder Von G. Keetch (1960–2018) sa Kapitoan nakahimamat og pipila ka mga surfer kinsa nakabiyahe didto sa talagsa ra kaayo mahitabo sa kinabuhi [once-in-a-lifetime] nga pagbiyahe. Sila mireklamo mahitungod sa usa ka bug-at nga pukot nga nagbabag sa tubig, nagbalda kanila sa pag-surf sa dagkong mga balod.
Aron mahibaloan unsa ang nahitabo, tan-awa ang video nga “Bulahan ug Malipayon Kadtong Nagtuman sa mga Sugo sa Dios” (5:41) gikan sa time code nga 0:00 hangtod 2:34. Kini nga video anaa sa ChurchofJesusChrist.org. O basaha ang mosunod nga asoy.
Imahe
Official Portrait of Elder Von G. Keetch. Photographed March 2017.
Samtang ang mga surfer nga Amerikano nag-anam sa kasagmuyo, ang akong pagtagad nabaling ngadto sa laing surfer sa duol—mas edaran nga lalaki ug klaro nga residente didto. Murag nawad-an siya og pailob samtang naminaw siya sa nag-anam kadaghan nga reklamo bahin sa ali.
Sa kataposan mibarog siya ug miduol sa grupo. Walay bisan unsa nga gisulti, gikuha niya ang teleskopyo gikan sa iyang backpack ug gitunol kini sa usa sa mga surfer, nagtudlo ngadto sa ali. Ang matag usa sa mga surfer mitan-aw sa teleskopyo. Sa dihang miabot na ang akong turno, pinaagi sa pagpadako sa view, nakita nako ang wala pa nako makita sa una: mga dorsal fin—dagkong mga iho nga nangaon duol sa kapansilan reef sa pikas bahin sa ali.
Ang grupo kalit lang nahilom. Ang tigulang nga surfer mikuha sa iyang teleskopyo ug milakaw palayo. Sa pagbuhat niya sa ingon, militok siya og mga pulong nga dili gayod nako makalimtan. “Ayaw dayon hukmi ang ali,” miingon siya. “Kana lang ang nakapugong aron dili mo matukob.”
Samtang nagbarog mi nianang nindot nga baybayon, ang among panglantaw kalit nga nausab. Ang ali nga daw gahi ug higpit—nga daw mipugong sa kalingawan ug kadasig sa pagsakay sa dagko gayod nga balod—nahimong lahi na kaayo. Uban sa among bag-ong panabot bahin sa kapeligro nga naghulat sa tago diha sa tubig, ang ali nagtanyag na karon og proteksiyon, kasiguroan, ug kalinaw.
Unsa ang pipila sa mga kinaiya sa mga tawo mahitungod sa pagtuman sa mga sugo sa Dios?
Mahimong isulat ang imong mga tubag sa mosunod nga mga pangutana diha sa imong journal sa pagtuon.
Unsay akong gibati mahitungod sa mga sugo sa Dios? Nganong gituman ko man kini o wala gituman kini?
Pagtuman sa mga sugo sa Dios
Aduna kitay atong kaugalingong mga rason nga nakaapekto kon kita mopili ba sa pagtuman sa mga sugo sa Dios. Basaha ang mosunod nga mga bersikulo, nga mangita kon unsa ang gitudlo ni Apostol Juan nga makapadasig kanato sa pagtuman kanila. Mahimong makatabang ang paghinumdom nga si Juan misulat sa iyang epistola ngadto sa mgamagtutuo [believers] kinsa nag-atubang sa bakak nga mga pagtulun-an.
Mahimong dapiton ang mga estudyante sa pagtinabangay sa pagbasa sa mga tudling. Ang mga estudyante matag usa mahimong mobasa og pipila sa mga tudling ug dayon ipaambit sa usag usa unsa ang ilang nakat-onan.
(Mahimo usab nga mapuslanon ang pagbasa sa mga pagtulun-an sa Manluluwas sa Juan 14:15, 23–24 .)
Unsa nga mga kamatuoran ang imong nakit-an?
Ang mga estudyante mahimong makaila og lain-laing mga baroganan. Ikonsiderar ang pagfollow up og pangutana sama sa mosunod:
Sa unsang paagi kaha nga ang pagkahibalo niining mga kamatuoran nakapadugang sa tinguha sa usa ka tawo sa pagtuman sa mga sugo?
Si Juan mitudlo og nagkalain-laing mga kamatuoran niini nga mga bersikulo. Usa kanila nga mahimo nimong maila mao nga kon mas nakaila ug nahigugma kita sa Langitnong Amahan ug ni Jesukristo, mas andam kitang mosunod sa ilang mga sugo (tan-awa ang 1 Juan 1:5–7 ; 2:3–6 ; 2 Juan 1:6–9).
Kon anaa, mahimong gamiton ang teknolohiya aron ipahiangay ang mosunod nga kalihokan. Pananglitan, ang mga estudyante mahimong magmugna og usa ka video, usa ka post sa social media, o usa ka text aron ipaambit ang ilang mga tubag. Kini mahimong makadugang sa pagsalmot sa estudyante ug magtugot sa mga mensahe sa mga estudyante mahitungod sa Langitnong Amahan ug ni Jesukristo nga makaabot sa daghan pang mga tawo.
Isip alternatibo nga paagi, ang mga estudyante mahimong maghanduraw nga ang ilang Sunday School nga magtutudlo gustong motabang sa mga miyembro sa ilang klase nga mobati og kadasig sa pagtuman sa mga sugo. Siya mihangyo sa mga estudyante sa pagpamalandong sa mosunod nga mga pangutana ug pag-andam sa pagpaambit sa ilang mga hunahuna sa klase.
Samtang ang mga estudyante nag-andam unsa ang lagmit nilang isulti, mahimo usab nilang ilakip ang mga panabot gikan sa ilang pagpangandam sa estudyante.
Nganong ang pagtuman sa mga kasugoan usa man ka paagi sa pagpakita og gugma alang sa Langitnong Amahan ug ni Jesukristo?
Unsa ang imong nahibaloan mahitungod sa Langitnong Amahan ug ni Jesukristo nga nakapadasig kanimo sa pagtuman sa Ilang mga kasugoan? Nganong ang pagkahibalo niana makadasig kanimo?
Unsa ang imong nakat-onan mahitungod Kanila diha sa imong pagtuman sa Ilang mga kasugoan?
Pagdapit og mga boluntaryo sa pagpaambit sa unsay ilang giandam. Kini mahimong buhaton isip usa ka klase o sa ginagmay nga mga grupo. Human mopaambit ang mga estudyante, ikonsiderar ang pagpangutana og mga follow-up nga pangutana, sama sa “Sa unsang paagi kaha makatabang ang imong gipaambit sa usa ka tawo aron magtinguha sa pagtuman sa mga kasugoan?”
Dapita ang mga estudyante sa pagkonsiderar sa pagpaambit sa ilang mga hunahuna sa usa ka tawo sa gawas sa klase.
Sa unsang paagi nimo mapakita ang imong gugma ngadto sa Langitnong Amahan?
Tan-awa kini nga larawan ug paghunahuna mahitungod sa unsa ang imong nahibaloan mahitungod kang Jesukristo ug sa Langitnong Amahan ug unsa ang Ilang gibati nganha kanimo. Mahimo usab nimong hunahunaon kon unsa ang imong gibati ngadto Kanila.
Ipakita ang mosunod nga hulagway.
Imahe
A man standing and embracing Christ after being healed.
Samtang tingali lisod ang pagpakita sa atong gugma alang sa Langitnong Amahan ug ni Jesukristo tungod kay Sila wala uban kanato sa pisikal, mahimo kitang magpakita sa atong gugma alang Kanila pinaagi sa pagtuman sa Ilang mga kasugoan. Paggahin og higayon sa pagpamalandong unsa ang gusto nimong mahinumdoman o buhaton tungod niini nga leksiyon. Ang mosunod mao ang pipila ka paagi aron mabuhat kini:
Pagsulat og usa ka paagi nga gusto nimong mas makahibalo ug mas mahigugma sa Langitnong Amahan ug ni Jesukristo.
Paghunahuna mahitungod sa mga kasugoan nga imong kasamtangang gituman ug nganong imo ni silang gituman. Ikonsiderar kon ikaw nadasig ba gumikan sa gugma alang sa Langitnong Amahan ug ni Jesukristo o kon ikaw makapalambo niana nga dapita.
Pag-ila og usa o daghan pang mga sugo nga imong mas hingpit nga matuman aron mapakita ang imong gugma alang sa Langitnong Amahan ug ni Jesukristo. Paghimo og plano kon unsaon nimo nga mas hingpit nga matuman kini nga mga kasugoan.
Dasiga ang mga estudyante sa paglihok sa mga pagbati ug mga impresyon nga ilang nadawat aron sila makapakita sa ilang gugma ngadto sa Langitnong Amahan ug ni Jesukristo. Pagpamatuod bahin sa mga baroganan nga gitudlo niini nga leksiyon.
Komentaryo ug Background nga Impormasyon
Sa unsang paagi nga ang mga sugo usa ka pagpadayag sa gugma sa Dios alang kanato?
Si Presidente Thomas S. Monson (1927–2018) mipahayag:
Imahe
Official portrait of President Thomas S. Monson, 2008.
Ang kasugoan sa Dios wala gihatag aron sa pagpugong kanato o aron mahimong mga babag sa atong kalipay. Ang sukwahi mao ang tinuod. Siya nga naglalang kanato ug nahigugma kanato hingpit nga nasayod kon sa unsang paagiha kita magpakabuhi aron maangkon ang labing dakong kalipay kutob sa mahimo. Siya mihatag kanato og mga sumbanan diin, kon kita mosunod niini, luwas nga mogiya kanato niining makuyaw nga mortal nga panaw. …
…Siya nakasabot nga kon atong sundon ang kasugoan, ang atong kinabuhi mas malipayon, mas makatagbaw, ug dili kaayo komplikado. Ang atong mga hagit ug mga problema mas sayon pas-anon, ug atong madawat ang Iyang gisaad nga mga panalangin.
(Thomas S. Monson, “Sunda ang Kasugoan,” Ensign o Liahona, Nob. 2015, 83)
Sa unsang paagi nga ang pagtuman sa mga kasugoan nagpakita sa Dios sa akong gugma?
Si Elder Von G. Keetch (1960–2018) sa Kapitoan mipahayag:
Imahe
Official Portrait of Elder Von G. Keetch. Photographed March 2017.
Atong gipakita ang atong gugma alang sa Dios—ug ang atong pagtuo diha Kaniya—pinaagi sa pagbuhat sa atong pinakamaayo kada adlaw sa pagsunod sa dalan nga Iyang gitakda alang kanato ug pinaagi sa pagtuman sa mga kasugoan nga Iyang gihatag kanato. Labi pa gayod natong gipakita kanang pagtuo ug gugma diha sa mga sitwasyon diin wala nato masabti sa hingpit ang rason sa kasugoan sa Dios o sa partikular nga dalan nga Iyang paagian kanato.
Unsaon nako nga madugangan ang akong gugma alang sa Dios?
Si Presidente Dieter F. Uchtdorf, kanhi sakop sa Unang Kapangulohan, mipasabot:
Imahe
Official portrait of Elder Dieter F. Uchtdorf of the Quorum of the Twelve Apostles, 2006. Called as Second Counselor in the First Presidency, 3 February 2008. Made official portrait in 2008 replacing portrait taken in 2004.
Kita makapatubo sa atong gugma alang sa atong Langitnong Amahan ug ikapakita kana nga gugma pinaagi sa pagpauyon sa atong mga hunahuna ug mga buhat sa pulong sa Dios. Ang Iyang tiunay nga gugma naggiya ug nagdasig kanato sa pagkahimong labaw nga lunsay ug balaan. Nagdasig kini kanato sa paglakaw diha sa katarong—dili kay tungod sa kahadlok o obligasyon apan gumikan sa labing dako nga tinguha nga mas mahisama Kaniya tungod kay kita nahigugma Kaniya.
(Dieter F. Uchtdorf, “Ang Gugma sa Dios,” Liahona, Nob. 2009, 21-24)
Dugang nga Kalihokan sa Pagkat-on
3 Juan 1:1–4. Ang hingpit nga kalipay moabot samtang motabang kita sa uban sa “pagkinabuhi sumala sa kamatuoran”
Kon ang mga estudyante mahimong makabenepisyo gikan sa pagtuon mahitungod sa pagpaambit sa ebanghelyo ngadto sa uban, mahimo silang mobasa sa 3 Juan 1:1–4 mahitungod sa mga pagbati ni Juan diha sa iyang pagtabang sa uban nga moduol sa Manluluwas. Mahimo dayon nilang i-link kini nga mga bersikulo ngadto sa Doktrina ug mga Pakigsaad 18:15–16 .
Sultihi ang mga estudyante sa paghunahuna sa mga tawo nga ilang kaila kinsa mahimo nilang dapiton aron mas mahiduol sa Manluluwas. Dasiga sila sa paghimo og plano sa pagdapit niadtong mga tawhana.
