1 Juan 1–5
“Ang Dios Gugma”
Sa unsang paagi nga ang imong kinabuhi giimpluwensiyahan sa gugma? Nganong nagkinahanglan man kitang tanan nga makabati og gugma, ilabi na ang gugma sa Dios? Si Apostol Juan nagsulat og mga espitola ngadto sa mga Santos kinsa nahisalaag sa bakak nga mga pagtulun-an. Siya nagpokus sa gugma sa Dios alang sa mga Santos ug sa unsang paagi kini nga gugma gipakita pinaagi sa pagluwas nga misyon ni Jesukristo. Kini nga leksiyon gituyo aron matabangan ka nga mabati ang gugma sa Dios alang kanimo.
Paghatag og gibug-aton sa nakasentro sa panimalay nga pagkat-on sa ebanghelyo. Ang pagkat-on sa ebanghelyo usa ka nakasentro sa panimalay nga kalihokan. Pangita og mga kahigayonan sa pagdasig sa mga estudyante sa pagpaambit sa klase unsa ang ilang nakat-onan sa panimalay. Dasiga usab sila sa pagpaambit kauban sa ilang mga pamilya unsa ang ilang nakat-onan ug nasinati sa seminary.
Pagpangandam sa estudyante: Dapita ang mga estudyante nga motambong nga andam mopaambit og lainlaing mga paagi nga sila tukma nga makakompleto sa mosunod nga pamahayag: “Ang Dios …”
Posible nga mga Kalihokan sa Pagkat-on
Ang Dios …
Ipakita ang hugpong sa pulong nga “Ang Dios …” Dapita ang mga estudyante sa pagpamalandong sa ilang pagpangandam sa klase diha sa ilang pag-ila sa daghang mga paagi kutob sa mahimo aron tukma nga makompleto kini nga pamahayag. Ang mga estudyante mahimong mobuhat diha sa manag paresan o sa gagmayng mga grupo ug mahimong mosulat sa pisara og mga paagi nga ilang makompleto ang pamahayag. Pagdapit og pipila ka mga boluntaryo sa pagpaambit nganong ilang gikompleto ang pamahayag sa paagi nga ilang gibuhat.
Sa imong journal sa pagtuon, isulat ang hugpong sa pulong nga “Ang Dios …” Isulat ang daghang mga paagi kutob sa imong mahunahunaan aron tukma nga makompleto ang kini nga pamahayag. Pananglitan, mahimo nimong isulat ang “Ang Dios nahibalo sa tanan” o “Ang Dios gamhanan sa tanan.”
Basaha ang 1 Juan 4:8, 16 , nga mangita sa mga paagi nga si Juan mihulagway sa Dios.
-
Unsa man ang imong nakit-an?
-
Ngano sa imong hunahuna ang Dios mahimong mahulagway isip gugma?
Usa sa mga talagsaon nga kinaiya sa Dios mao ang Iyang gugma alang kanato. Hunahunaa ang mosunod nga mga pangutana:
-
Nabati ba nimo nga ang Langitnong Amahan ug si Jesukristo personal nga nahigugma kanimo? Ngano o nganong dili?
-
Nagtuo ka ba nga Sila nasayod kanimo ug sa imong personal nga mga kalamposan ug mga pagpanglimbasog? Ngano o nganong dili?
-
Unsa ang mga paagi nga Sila nagpakita o lagmit magpakita sa Ilang gugma alang kanimo?
Diha sa imong pagtuon sa epistola ni Juan, pangita og mga kamatuoran nga mahimong makatabang kanimo nga matubag kini nga mga pangutana. Pamalandong usab kon sa unsang paagi nga ang pagsabot ug pagbati sa gugma sa Langitnong Amahan ug ni Jesukristo alang kanimo makahimo og kalahian sa imong kinabuhi.
Ikonsiderar ang pagdapit og usa ka estudyante sa pagbasa o pagsuma [summarize] sa mosunod nga parapo.
Ang mga pagtulun-an ni Juan mahitungod sa gugma sa Dios
Lagmit nga misulat si Juan sa iyang mga epistola tali sa AD 80 ug AD 100 gikan sa Efeso. Pipila sa mga miyembro sa Simbahan ang misagop sa mga gituohan gikan sa usa ka grupo nga gitawag og Gnostics. Kini nga grupo mitudlo nga si Jesus walay pisikal nga lawas ug nga ang kaluwasan miabot pinaagi sa espesyal nga kahibalo kay sa pinaagi sa hugot nga pagtuo kang Kristo. Gipanghimakak ni Juan ang kining mga bakak nga doktrina pinaagi sa pagtudlo og daghang importanteng mga tema, lakip ang giunsa pagpakita sa Langitnong Amahan ni Jesukristo ang Ilang hingpit nga gugma pinaagi sa kinabuhi sa Manluluwas, Pag-ula, ug Pagkabanhaw (tan-awa ang 1 Juan 1:1–3 ; 3:16 ; 4:9–10).
Ikonsiderar ang pagdrowing og dako nga kasingkasing diha sa pisara. Samtang ang mga estudyante mobuhat sa mosunod nga kalihokan sa pagtuon ug makompleto ang ilang kaugalingong mga kasingkasing sa ilang mga journal, mahimo silang moduol ngadto sa pisara ug magsulat sa ilang paboritong bersikulo ug hugpong sa pulong diha sa kasingkasing sa klase.
Basaha ang 1 Juan 4:19 , ug ikonsiderar ang pagmarka nganong gihigugma nato ang Dios, sumala ni Juan.
Sa imong journal sa pagtuon, pagdrowing og usa ka dakong kasingkasing. Sa tunga sa kasingkasing, pagsulat og “Ako nasayod nga ang Langitnong Amahan ug si Jesukristo nahigugma kanako tungod …” Pagbilin og igong luna sa pagsulat sa mga pakisayran sa kasulatan ug mga hugpong sa pulong. Pamalandong giunsa sa Langitnong Amahan ug ni Jesukristo “unang nahigugma kanato.”
Basaha ang mosunod nga mga tudling. Pangitaa ug markahi ang mga hugpong sa pulong nga nagpakita sa gugma sa Langitnong Amahan ug ni Jesukristo alang kanimo. Isulat ang kadtong mga hugpong sa pulong kauban sa ilang natukma nga pakisayran sa kasulatan sa sulod sa kasingkasing.
Seguroha ang pagpakita sa mosunod nga mga pakisayran sa kasulatan diin ang mga estudyante makakita nila.
1 Juan 2:1–2 (Timan-i: Ang usa ka manlalaban mao ang usa ka tawo kinsa nangamuyo alang kanato, naghupay, ug nagsuporta kanato. Ang halad-pasig-uli nagpasabot og pag-ula nga sakripisyo nga nagtagbaw sa hustisya sa Dios.)
Rebyoha ang mga hugpong sa pulong ug mga pakisayran nga imong gimarkahan ug gisulat. Pilia ang hugpong sa pulong nga labing makahuluganon alang kanimo, ug kompletoha ang duha o tulo sa mosunod:
Ipakita ang mosunod nga mga instruksiyon aron makita sa mga estudyante samtang sila nagkompleto sa kalihokan.
Mahimong maghatag og usa ka ehemplo alang sa mga estudyante kon unsaon pagkompleto ang mosunod nga bahin sa ilang journal nga entry.
-
Ipasabot sa unsang paagi nga ang hugpong sa pulong nga imong napili makahuluganon alang kanimo.
-
Kon mahimo, ihulagway ang usa ka kasinatian diin imong nabati ang gugma sa Langitnong Amahan o ni Jesukristo niana nga paagi. Mahimo usab nimong mapaambit ang usa ka ehemplo gikan sa mga kasulatan, usa ka video sa Simbahan, o usa ka pakigpulong sa kinatibuk-ang komperensiya. (Aron makakita og pananglit, mahimong tan-awon ang pakigpulong ni Elder Dale G. Renlund sa Korum sa Napulog Duha ka Apostoles nga ““Nga Ako Unta Makadala sa Tanan nga mga Tawo ngari Kanako” gikan sa time code 7:32 hangtod sa 9:14.)
//media.ldscdn.org/webvtt/general-conference/april-2016-general-conference/2016-04-1070-dale-g-renlund-eng.vtt
Ihulagway kon sa unsang paagi nga ang pagkahibalo sa kamatuoran niini nga hugpong sa pulong mihimo, naghimo, o makahimo og usa ka kalahian sa imong kinabuhi. Mahimong idugang ang imong personal nga pagpamatuod sa gugma sa Dios.
Hatagi ang mga estudyante og igong panahon sa pagkompleto sa ilang journal nga mga entry. Dapita ang pipila ka mga boluntaryo nga ipaambit sa klase ang unsay ilang gisulat.
Mahimong dapiton ang mga estudyante kinsa makahimo sa pag-share og usa ka hulagway sa ilang panid sa journal sa social media kauban sa ilang personal nga pagpamatuod sa gugma sa Dios.
Ikonsiderar ang pagpaambit niini nga entry sa journal ngadto sa mga higala ug pamilya o bisan sa social media.
Pamalandong unsa ang imong nakat-onan diha sa imong pagbasa sa mosunod nga pamahayag ni Elder Robert C. Gay sa Kapitoan mahitungod sa gahom sa gugma Dios:
Iyang gugma mas labaw pa kay sa atong mga kahadlok, atong mga samad, atong pagkaadik, atong mga pagduha-duha, atong mga pagtintal, atong mga sala, atong masulub-on nga mga pamilya, atong depresyon ug mga kabalaka, atong grabe nga sakit, atong kawad-on, atong pag-abuso, atong pagka-walay paglaum, ug atong pag-inusara. Gusto niya nga masayod ang tanan nga wala ug walay usa nga dili Niya mahimong ayohon ug matubos ngadto sa malungtarong kalipay.
(Robert C. Gay, “Pagdala ngari Kanato sa Ngalan ni Jesukristo,” Liahona, Nob. 2018, 99)
-
Unsa ang labing importante alang kanimo niini nga pamahayag? Ngano man?
Pagbati sa gugma sa Dios
Handurawa nga ang usa ka tawo nga imong kaila wala naghunahuna nga nabati niya ang gugma sa Dios o wala nakamatikod niini hapit kanunay. Paghunahuna mahitungod sa unsa ang imong nakat-onan karon, ingon man usab ang imong personal nga mga kasinatian.
-
Unsa ang imong mapaambit kaniya nga lagmit makatabang kaniya nga mabati ang gugma sa Dios?
Mahimong epektibo ang paghatag sa mga estudyante og panahon sa pagpamalandong sa miaging mga pangutana sa dili pa sila motubag. Mahimo usab nga mapuslanon ang pagtugot sa mga estudyante sa pagpaambit og mga ideya diha sa gagmayng mga grupo sa dili pa hisgotan ang pangutana isip usa ka klase.
Sa mga leksiyon nga mosunod, imong matun-an ang dugang nga mga pagtulun-an ni Juan kon unsaon nato pagpakita sa atong gugma sa Langitnong Amahan ug ni Jesukristo, lakip na ang pagtuman sa Ilang mga kasugoan ug paghigugma sa usag usa.
Mahimong kantahon ang “Ako Nagpabilin nga Natingala” (Mga Himno, nu. 114) isip usa ka klase o pagpaambit og usa ka personal nga ehemplo sa impluwensya sa gugma sa Dios.
Pagtinguha sa panabang sa Langitnong Amahan ug paminawa ug pamatia ang mga pangaghat gikan Kaniya pinaagi sa Balaang Espiritu. Paghunahuna og mga paagi nga imong maangkon o madawat ang gugma sa Dios ug unsaon nimo mas kasagarang mamatikdan ang Iyang gugma sa imong kinabuhi. Pamalandong kon sa unsang paagi nga ang makanunayong pagbuhat sa ingon makadugang sa kalipay nga imong nasinati sa imong kinabuhi.
Komentaryo ug Background nga Impormasyon
Asa pa ako makakat-on og dugang mahitungod sa gugma sa Dios?
Sa unsang paagi nga ang pag-ila ug pagkabati sa gugma sa Dios makaimpluwensiya sa atong kinabuhi?
Samtang nag-alagad isip sakop sa Kapitoan, si Elder John H. Groberg mipasabot:
Kon kita puno sa gugma sa Dios, makabuhat kita ug makakita ug makasabot sa mga butang nga dili unta nato mabuhat o makita o masabot. Kon puno sa Iyang gugma, makalahutay kita sa kasakit, makapiog sa kahadlok, makapasaylo dayon, makalikay og panagbingkil, makabag-o sa kusog, ug makapanalangin ug makatabang sa uban sa mga paagi nga makapatingala bisan gani kanato.
Si Jesukristo puno sa dili masukod nga gugma samtang Siya milahutay sa dili masabtan nga kasakit, pagpangdagmal, ug inhustisya alang kanato. Pinaagi sa Iyang gugma alang kanato, gibuntog Niya kadtong dili unta mabuntog nga mga babag. Ang Iyang gugma wala makaila og mga babag. Midapit siya kanato sa pagsunod Kaniya ug pag-ambit sa Iyang walay kinutuban nga gugma, aron kita usab, mahimong mobuntog sa kasakit ug pagdagmal ug sa inhustisya niini nga kalibotan ug motabang ug mopasaylo ug mopanalangin.
(John H. Groberg, “The Power of God’s Love,” Ensign o Liahona, Nob. 2004, 11)
Dugang nga mga Kalihokan sa Pagkat-on
Ang mga saksi sa Pagkabanhaw sa Manluluwas mipamatuod sa Iyang reyalidad ug nagtabang kanato nga maila ang Iyang personal nga gugma
Kon ang mga estudyante makabenepisyo gikan sa paghisgot sa personal nga kinaiya sa gugma sa Manluluwas, dapita sila sa pagbasa sa 1 Juan 1:1–3 ug 3 Nephi 11:13–17. Kini nga mga tudling naghulagway sa mga kasinatian ni Juan ug sa mga katawhan sa America kauban sa nabanhaw nga Manluluwas.
Dapita ang mga estudyante sa pagpaambit unsa ang gitudlo niining mga kasinatian kanato mahitungod kang Jesukristo ug sa Iyang gugma.
Pagpamatuod nga bisan tuod og kita dili pisikal nga makahikap sa Manluluwas, Siya mahimong makatabang kanato nga makaila Kaniya pinaagi sa laing mga paagi sama sa mga kasulatan ug sa Espiritu Santo. Siya magpakita kanato sa Iyang gugma pinaagi sa daghang malumo nga mga kaluoy nga Iyang gipaabot kanato (tan-awa ang 1 Nephi 1:20). Dapita ang mga estudyante sa pagpaambit og personal nga mga ehemplo diin sila nakasinati sa gugma sa Manluluwas alang kanila.
1 Juan 2:1. “Kita adunay manlalaban”
Kon ang mga estudyante makabenepisyo gikan sa usa ka mas maayong pagsabot sa tahas sa Manluluwas isip atong manlalaban kauban sa Amahan, dapita sila sa pagtuon sa 1 Juan 2:1–2. Ipaambit nga ang manlalaban nagpasabot og usa ka tawo nga nangamuyo alang kanato, naghupay, ug nagsuporta kanato. Dapita ang mga estudyante sa pagbasa sa Doktrina ug mga Pakigsaad 45:3–5 , nga mangita kon giunsa nga ang Manluluwas mao ang atong manlalaban. Mahimo usab nga makatabang sa mga estudyante ang pagbasa sa epistola ni Filemon aron makita giunsa nga si Pablo mao ang manlalaban alang ni Onesimo diha sa iyang paghangyo sa mga miyembro sa Simbahan sa pagdawat kang Onesimo tungod ni Pablo. O mahimo nilang basahon ang asoy ni Abigail, Nabal, ug David sa 1 Samuel 25:1–35 aron makita giunsa ni Abigail paglihok isip usa ka manlalaban pinaagi sa pagtanyag sa pagdawat sa responsibilidad sa mga kasaypanan ni Nabal aron nga siya [Nabal] dili makadawat sa silot nga ipahamtang ni David. Dapita ang mga estudyante sa pagpaambit og mga paagi nga ang Manluluwas nahimo, mao, ug mahimong usa ka manlalaban alang kanila ug nganong kini importante nga masabtan.
Ang Dios mao ang kahayag ug gugma
Kon ang mga estudyante makabenepisyo gikan sa pagpokus sa kahayag sa Dios agig dugang sa gugma sa Dios, mahimong dapiton sila sa pagtuon sa 1 Juan 2:8–11 ; 3:16, 23–24 ; 4:7–21. Dapita sila sa pagpamalandong sa mga kasinatian ni Juan sa kahayag ug gugma sa Manluluwas (sama sa kadtong mga natala sa Juan 2:1–11 o Juan 5:1–9). Mahimo sab nilang ikonsiderar kon unsa ang nakat-onan ni Juan gikan sa mga pagtulun-an ni Jesus nga na-rekord sa Juan 3:16–17 ; 8:12 ; 12:35–36, 46 ; 15:9–14 ; 19:25–27. Dapita ang mga estudyante sa pagpaambit og mga pagkasusama tali niini nga mga pagtulun-an ug unsa ang gitudlo sa 1 Juan mahitungod sa kahayag ug gugma sa Dios. Dapita ang mga estudyante sa pagpaambit og mga kasinatian nga mitudlo kanila nga ang Dios mao ang kahayag ug gugma.