Seminare
Galuega 10–15

Galuega 10–15

Vaaiga Aoao

Ina ua mavae Lona Toetu, sa poloaiina e Iesu Keriso Ana Aposetolo e aoao ma papatiso tagata mai nuu uma (tagai i le Mataio 28:19). Na amata ona faataunuuina lenei poloaiga ina ua maua e se tagata Nuu Ese amiotonu e igoa ia Konelio ma le Aposetolo o Peteru ia faaaliga ma sa taialaina faalelagi le tasi i le isi. Sa papatiso e Peteru ia Konelio, ma na afua mai iina na salalau atu ai le talalelei i tagata Nuu Ese. Ae o nisi sa tetee pea i le galuega a Aposetolo, e pei o le mea lea na tupu ina ua faamaturoina le Aposetolo o Iakopo ma tuuina atu Peteru i le falepuipui. Ina ua mavae le tele o tatalo a e amiotonu, sa faasaolotoina Peteru mai le falepuipui e se agelu. I le mananao ai e fesoasoani e faataunuu le poloaiga ia aoao atu atunuu uma, sa tuuvaa atu ai le Aposetolo o Paulo ma Panapa i se misiona. Sa la feagai foi ma le tele o faatauteega ae sa faamanuiaina i manuia e tele; o le toatele o tagata Nuu Ese sa laua aoaoina na taliaina le talalelei a Keriso. Na aliae fesili e uiga i le pe manaomia e tagata Nuu Ese ua liua ona peritomeina ma tausisi i le tulafono a Mose. Sa tuuina atu le fesili ia Peteru ma isi taitai o le Ekalesia, o e sa feutagai faatasi ma maua ai faaaliga e uiga i le mataupu.  

Sauni e Aoao Atu

O nei faamatalaga e tuuina atu ai i faiaoga ni manatu o ni mea latou te manaomia e ao ona saunia mamao i ai mo lesona taitasi.

Galuega 10, Vaega 1

Faamoemoega o le lesona: O lenei lesona e mafai ona fesoasoani i tagata aoga e vaai atili ai i isi tagata e pei foi ona silasila i ai le Tama Faalelagi ma Iesu Keriso ia i latou.

  • Sauniuniga a le tagata aoga: Valaaulia tagata aoga e tagai totoa pe faapefea ona latou vaai ma taulima tagata o loo latou fegalegaleai ma pe aisea latou te amio ai faapena i ia tagata. Fai atu ia i latou e sauni e faasoa mai ni nai malamalamaga mai mea na latou matauina.

  • Ata: Ata o ao

  • Anomea mo tagata aoga: O anomea e pei o pepa ma penivali mo tagata aoga e tusi ai ni ata

  • Fautuaga faafaiaoga i fesootaiga i vitio: Afai e valaaulia tagata aoga e tusi se ata o le faaaliga a Peteru, valaaulia i latou e fetuunai le latou vaai atu i tagata auai pe a oo ina faasoa mai ma faamatala mai tagata taitoatasi, e ao ona faatele le ata o lena tagata ina ia faatumulia ai le vaega vaaia o lau masini. O lenei faiga o le a faigofie ai i tagata aoga uma ona vaai atu i ata a le tasi ma le isi.

Galuega 10, Vaega 2

Faamoemoega o le lesona: O lenei lesona e mafai ona fesoasoani i tagata aoga e faateleina ai lo latou malamalama i le ala e mafai ai e le Tama Faalelagi ona faaali atu Lona finagalo ia te i latou.

  • Sauniuniga a le tagata aoga: Valaaulia tagata aoga e faailoa mai manaoga po o atugaluga i o latou olaga ua latou manaomia ai se faaaliga e faatatau i ai.

  • Ovitio: “Patterns of Light” (3:04); “Let the Holy Spirit Guide” (15:45; matamata mai le faailotaimi 14:41 seia oo i le 15:18)

  • Fautuaga faafaiaoga o fesootaiga i vitio: A o toefaamanatu e le vasega mea na tutupu i le Galuega 10:1–28, 44–48, fuafua e faaali atu le faamatalaga tusitusia o nei fuaiupu ma faataga le vasega e faailoga pe maka ia fuaiupu latou te fiafia i ai faatasi ma le vasega atoa e faaaoga ai le auaunaga o le “Faamatalaga Faaopoopo”.

Galuega 11, 15

Faamoemoega o le lesona: O lenei lesona e mafai ona fesoasoani i tagata aoga e faaloloto atili ai lo latou malamalama i le auala e taitaia ai e le Faaola Lana Ekalesia e ala i faaaliga i Lana perofeta ma aposetolo.

  • Sauniuniga a le tagata aoga: Valaaulia tagata aoga e faitau le Taiala i Tusitusiga Paia, “Faaaliga,” scriptures.ChurchofJesusChrist.org, ma o mai sauni e faasoa mai mea ua latou malamalama i ai e uiga i le ala e faaali mai ai e le Alii Lona finagalo i Ana perofeta.

Galuega 12:1–19

Faamoemoega o le lesona: O lenei lesona e mafai ona fesoasoani i tagata aoga e atiina ae ai se faatuatuaga sili i le Tama Faalelagi ma Ana tali mai i talosaga.

  • Sauniuniga a le tagata aoga: Valaaulia tagata aoga e o mai saunia e faasoa mai se aafiaga na taliaina ai talosaga i le ala na latou faamoemoe i ai pe na faamoemoe foi i ai isi ma se aafiaga sa foliga mai e lei taliaina ai talosaga pe sa taliaina foi i se auala e ese mai le mea sa latou faamoemoe i ai.

  • Fautuaga faafaiaoga o fesootaiga i vitio: Mafaufau e valaaulia se taitai o le Ekalesia i le lotoifale e iloa e tagata aoga e auai ma faasoa mai ni aafiaga o tatalo na taliaina i auala na faamoemoe i ai ma i ni auala e lei faamoemoe i ai. A le o lena, valaaulia se tagata aoga e tuuina atu i se tagata o le latou aiga e faasoa ane i le vasega o latou aafiaga i le tatalo. Ia mautinoa ua maua faatagaga talafeagai mai taitai o le Ekalesia i le lotoifale ma le taitai faamaopoopo o Seminare ma Inisitituti i le lotoifale a o lei valaauliaina tagata asiasi e talanoa atu i lau vasega.

Toe Faamanatu 14 o le Atamai i Aoaoga Faavae

Faamoemoega o le lesona: O lenei lesona o le a tuuina atu ai i tagata aoga se avanoa e faaloloto atili ai lo latou malamalama ma faamatala atu upumoni e uiga i se tasi pe sili atu o fuaitau o le atamai i aoaoga faavae mai le Feagaiga Fou.

  • Sauniuniga a le tagata aoga: Valaaulia tagata aoga e toe faamanatu ia fuaitau o le atamai i aoaoga faavae o le a suesueina i lenei lesona ma ia o mai saunia e talanoaina. E mafai e tagata aoga ona faaaoga le Pepa Autu o le Atamai i Aoaoga Faavae (2022) po o le polokalama o le Atamai i Aoaoga Faavae e fesoasoani i ai latou e toe faamanatu ai.

Manatua: O se lesona o fuaitau o le atamai i aoaoga faavae e ono manaomia ona aoaoina e sui tulaga i lenei lesona toe faamanatu. Tagai i le faasologa faatulagaina o lesona ua saunia e le faatonu o le eria po o le risone po o le taitai faamaopoopo ina ia mautinoa o lesona taitasi o fuaitau o le atamai i aoaoga faavae o le a aoaoina a o faia vasega seminare.

  • Fautuaga faafaiaoga o fesootaiga i vitio: E mafai ona vaevaeina tagata aoga i ni potu e taape i ai e talanoaina ai fesili o loo i le faaiuga o le lesona.