Toe Faamanatu 14 o le Atamai i Aoaoga Faavae
Malamalama ma Faamatala
O se tasi o faamoemoega o le atamai i aoaoga faavae o le fesoasoani lea ia e malamalama i aoaoga a le Faaola o loo i ai i fuaitau o le atamai i aoaoga faavae ma mafai ona faamatala i au lava upu. O lenei lesona o le a tuuina atu ai ia te oe se avanoa e faalautele ai lou malamalama i upumoni ma faamatala atu e uiga i se tasi pe sili atu o fuaitau o le atamai i aoaoga faavae mai le Feagaiga Fou.
Sauniuniga a le tagata aoga: Valaaulia tagata aoga e toe faamanatu ia fuaitau o le atamai i aoaoga faavae o le a suesueina i lenei lesona ma ia o mai saunia e talanoaina ia fuaitau. E mafai e tagata aoga ona faaaoga le Pepa Autu o le Atamai i Aoaoga Faavae (2022) po o le polokalama o le Atamai i Aoaoga Faavae e fesoasoani ai ia i latou e toe faamanatu.
Gaoioiga e ono Mafai ona Aoao Ai
O se lesona i fuaitau o le atamai i aoaoga faavae atonu e manaomia ona aoao atu e suitulaga i lenei lesona toe faamanatu. Tagai i le faasologa faatulagaina o lesona ua saunia e le faatonu o le eria po o le risone po o le taitai faamaopoopo ina ia mautinoa o lesona taitasi o fuaitau o le atamai i aoaoga faavae o le a aoaoina a o faia vasega seminare. Afai e manaomia, sui soo se fuaitau o loo toe faamanatuina i lenei lesona i isi fuaitau atonu e manaomia ona taulai atu i ai tagata aoga.
Toe Faamanatu
Tuu atu se avanoa mo tagata aoga e toe faamanatu ai fuaitau o le atamai i aoaoga faavae o lenei lesona ma a latou fasifuaitau autu tuufaatasi o mau. Mafaufau e faaaoga le gaoioiga faafetaui lenei po o se isi gaoioiga. (O tali sao mo lenei gaoioiga o le 1-e, 2-o, 3-a, 4-i.)
a. O nisi o tagata o lou aiga o loo lagonaina le faanoanoa ona o se tasi e pele na maliu talu ai nei ma ua latou lagona o le a latou le toe vaai lava ia te ia.
e. O nisi tagata e talitonu o o latou tino o ni a latou lava ia ma e mafai ona latou faia i ai soo se mea latou te mananao e faia i ai. Latou te le iloa na totogi e le Faaola le tau e togiola ai i tatou, o lona uiga moni lava o le “toe faatauina mai o i tatou.” Ona o lenei faapogai, e le ana e i tatou i tatou lava ae tatou te nofo aitalafu i le Faaola.
i. E toatele tagata e talitonu i le lagi ma seoli ae le malamalama i upumoni e uiga i le olaga pe a mavae le oti ma tino toetutu.
o. Ua fesili atu se uo ia te oe pe aisea e te ono faamuamua ai mafutaga faaipoipoga malosi ma sootaga faaleaiga nai lo le manuia o galuega totogi atoa ma tupe.
Malamalama ma faamatala
Na aoao mai e Peresitene Russell M. Nelson le ala e mafai ai e tusitusiga paia ona faafesootai atu i tatou ia Iesu Keriso. Atonu e te manao e matamata i le vitio “President Nelson—The Scriptures Teach Us about Jesus Christ (for Youth)” (0:59), o loo maua i le ChurchofJesusChrist.org, pe faitau le faamatalaga lenei.
[O tusitusiga paia] e aoao i tatou e uiga ia Iesu Keriso ma Lana talalelei, le maoae o Lana Togiola, ma le fuafuaga sili a lo tatou Tama mo le fiafia ma le togiolaina. O le tofupunouai ai i aso taitasi i le afioga a le Atua e taua tele mo le ola faaleagaga, aemaise lava i nei aso o le faateteleina o fevesiaiga. A o tatou taumamafa ai i afioga a Keriso i aso taitasi, o le a ta’u mai e afioga o Keriso ia i tatou le auala e tali atu ai i faigata tatou te le’i mafaufauina o le a tatou fetaia’i.
(Russell M. Nelson, “Faalogo ia te Ia,” Ensign po o le Liahona, Me 2020, 89)
Fesoasoani i tagata aoga ia malamalama atili i aoaoga faavae o i totonu o fuaitau o le atamai i aoaoga faavae. O le gaoioiga lenei o se tasi lea o auala e mafai ona faia ai lenei mea. E mafai e tagata aoga ona taulai atu i fuaitau o loo toe faamanatuina i luga po o soo se fuaitau o le atamai i aoaoga faavae mo le Feagaiga Fou.
Afai e faaaoga le gaoioiga lenei, ia e avanoa e fesoasoani i tagata aoga e sue ni fesootaiga anoa ia Iesu Keriso i a latou fuaitau filifilia. E ono fesoasoani le tuu o tagata aoga i ni vaega toalaiti ma valaaulia i latou e faasoa a latou tali i fesili ma a latou vaega.
Mafaufau faapea, ina ia amata se gaoioiga a le autalavou, ua talosagaina oe e faasoa atu se mau i tusitusiga paia na fesoasoani ia te oe e aoao pe lagona ai se mea e uiga ia Iesu Keriso. Filifili se tasi o fuaitau o le atamai i aoaoga faavae mai lenei lesona po o se isi mai le Feagaiga Fou. Ole atu i le Agaga Paia e fesoasoani ia te oe ia iloa upumoni e uiga i le Faaola e faalolotoina ai lou malamalama e uiga ia te Ia, Lana talalelei, Lana Togiola, po o le ata o le faaolataga a le Tama Faalelagi.
-
O le fea o fuaitau o le atamai i aoaoga faavae na e filifilia?
-
O le a se upumoni po o se aoaoga faavae na e maua mai i lenei fuaitau?
-
Mata e faapefea ona suia le olaga o se tasi pe afai latou te le iloa le upumoni ua e mauaina?
-
E mafai faapefea e le malamalama i lenei upumoni ona fesoasoani ia te oe e faalatalata atili atu ai i le Faaola?
Galuega Faatino Faaopoopo e Aoao Mai Ai
Toe faamanatu e faaaoga ai le polokalama o le Atamai i Aoaoga Faavae
Mafaufau i ni auala e faaaoga ai le polokalama o le Atamai i Aoaoga Faavae e fesoasoani ai i tagata aoga e toe faamanatu pe tauloto fuaitau o le atamai i aoaoga faavae.
Auala eseese e fesoasoani ai i tagata aoga ia malamalama ma faamatala
Malamalama—E mafai e tagata aoga ona sue le uiga o upu i a latou fuaitau o le atamai i aoaoga faavae ua filifilia ma lipoti mai ni malamalamaga faaopoopo na latou mauaina. E mafai e tagata aoga ona faaaoga se lomifefiloi po o le Taiala i Tusitusiga Paia e sue ai upu.
Malamalama—E mafai e tagata aoga ona toe tusi ia fuaitau o le atamai i aoaoga faavae sa latou filifilia i a latou lava upu.
Faamatala—Ina ia fesoasoani i tagata aoga e faamalamalama upumoni i fuaitau o le atamai i aoaoga faavae, mafaufau e aumai se vaega o mea faitino laiti i le vasega ma valaaulia tagata aoga e filifili se mea faitino latou te lagona e faapupula mai ai le upumoni i a latou fuaitau o le atamai i aoaoga faavae ua filifilia. Ona mafai lea ona latou faaaogaina le mea faitino na latou filifilia e fesoasoani e faamatala ai le upumoni.