Galuega 12:1–19

An angel assisting Peter in his release from prison. The prison guards are unconscious on the ground.

Sa feagai Aposetolo ma faatauteega a o latou taumafai e faagasolo i luma le galuega a le Faaola. Sa faamāturo Iakopo i le faatonuga a Herota, a o faafalepuipuiina Peteru ae sa lavea’iina ai o ia e se agelu o se tali i tatalo a tagata o le Ekalesia. O lenei lesona ua faamoemoe e fesoasoani ia te oe e atiina a’e ai se faatuatuaga sili atu i le Tama Faalelagi ma Ana tali mai i talosaga.

Taliaina lelei o tali a tamaiti a’oga. Faaaloa’ia tali a tamaiti a’oga i se “faafetai” faigofie pe faamalo atu i se mea faapitoa o a latou tali. O le faia o lena mea o le a fesoasoani e faaali atu ai i tamaiti aoga o a latou faasoa e aogā ma taūa i le aafiaga faaleaoaoga. E mafai ona fesoasoani lenei mea i tamaiti a’oga e lagona atili ai le to’a e faasoa mai tali, malamalamaaga, ma aafiaga i le lumana’i.

Sauniuniga a le tamaitiiti a‘oga: Valaaulia tamaiti a’oga e ō mai saunia e faasoa mai se aafiaga lea na taliina ai a latou tatalo po o tatalo a isi i le ala na latou faamoemoe i ai ma se aafiaga sa foliga mai sa le’i taliina pe sa taliina mai i se auala e ese mai nai lo le mea sa latou faamoemoe i ai.

Gaoioiga e Ono Mafai Ona Aoao Mai Ai

Taunuuga eseese

Ia nofouta i tulaga o tamaiti a’oga, ma fetuuna’i ata faataitai nei i ni faiga talafeagai. Faamanatu i tamaiti a’oga e vaavaai i a latou sauniuniga mo le vasega i le faagasologa o le lesona.

Mafaufau i ni auala eseese e ono tali atu ai tagata i tulaga nei:

Ua tatalo ma le naunauta’i se alii talavou mo le tele o tausaga mo lona tama ina ia faamaloloina mai le kanesa, ae e le’i toe malosi lona tama.

Ua tatalo faatauanau se tamaitai talavou mo lona tina ina ia faamaloloina mai le kanesa, ma i le mavae ai o tausaga o tauiviga, sa toe malosi faavavega lona tina.

O anafea na i ai ai ni au tatalo po o tatalo a nisi e le’i taliina i le ala na faamoemoe i ai?
Na faapefea ona e tali atu?
Na faapefea ona avea le tulaga o lou faatuatua i le Tama Faalelagi e aafia ai lau tali?

I lau api faamaumau o suesuega, faailoa mai ni vavega po o ni faamanuiaga o loo e sa’ilia. Mafaufau pe mafai faapefea e le tuuina atu o le faalagolago sili atu i le Atua ona aafia ai lou olaga mo le lelei e sili atu. A o e suesue, vaavaai mo upumoni ma faataitaiga e mafai ona fesoasoani ia te oe e atiina a’e ai le faalagolago sili atu i le Tama Faalelagi ma Ana tali mai i tatalo.

Sauāina o tagata o le Ekalesia

A o faaauau pea ona tupu le talalelei, sa sauāina tagata ma taitai o le Ekalesia e taitai Roma ma Iutaia. O nisi o taitai o le Ekalesia, e pei o Peteru ma Ioane, sa lavea’iina faavavega e le Atua (taga’i i le Galuega 5:17–21), ae o isi, e pei o Setefano, e le’i lavea’iina (taga’i i le Galuega 7:54–60).

Vaai faalemafaufau e faapea, o oe o se tagata o le Ekalesia i le taimi o nei mea na tutupu a o e faitauina le Galuega 12:1–4 . O le uiga o le fuaiupu 4 na tuu e Herota ni fitafita se to’a 16 e leoleo ia Peteru a o fuafua e faatino faalaua’itele le fasiotia o ia i se taimi mulimuli ane.

O a ni lagona ma ni fesili atonu e i ai ia te oe i le avea ai ma se tagata o le Ekalesia i lena taimi?

Faitau le Galuega 12:5, ma vaavaai pe na faapefea ona tali atu tagata o le Ekalesia.

Aisea atonu na faigata ai ona faatino le faatuatua e ala i le tatalo ai mo Peteru?
O le a sou manatu i mea na malamalama ai tagata o le Ekalesia e uiga i le Tama Faalelagi lea na uuna’ia i latou e faia lenei mea?

Faitau le Galuega 12:6–11, ma vaavaai pe na faapefea ona taliina tatalo a tagata o le Ekalesia.

O a ni lagona po o ni manatu atonu e i ai ia te oe pe ana e molimauina lenei tali i le tatalo?
E mafai faapefea e se mea faapenei ona aafia ai lou faatuatua i le Tama Faalelagi?
O a ni upumoni e uiga i le tatalo e mafai ona tatou aoaoina mai lenei tala?

Tatalo faamaoni ma le faatauanau

O se tasi o upumoni e mafai ona tatou aoaoina mai lenei tala e faapea o a tatou tatalo faamaoni ma le faatauanau e valaaulia ai vavega ma faamanuiaga a le Atua i o tatou olaga ma olaga o isi.

Afai o le a faamanuiaina tamaiti aoga mai se faataitaiga, mafaufau e faasoa atu se aafiaga patino, le faataitaiga lenei na faasoa mai e Peresitene Ballard, po o le “Mataupu Faavae o le Filemu: Tatalo” (2:49), o loo maua i le ChurchofJesusChrist.org.

O vavega e mafua mai i tatalo faamaoni e masani lava ina itiiti ma faatauvaa ae le tetele ma maoa’e.

Atonu e te manao e matamata i le “Watch Ye Therefore, and Pray Always” mai le faailotaimi 12:17 seia oo i le 13:07, o loo maua i le ChurchofJesusChrist.org, pe faitau le faamatalaga lenei e vaai ai i se vavega mai le tatalo i le soifuaga o Peresitene M. Russell Ballard o le Korama a Aposetolo e Toasefululua.

15:1

Ua ou iloa le mamana o le tatalo mai i o’u lava aafiaga. Talu ai nei, sa ou i ai na o a’u i lo’u ofisa. E le’i leva ona uma se togafitiga faafoma’i o lo’u lima. Sa uno’oa ma totolia, fula, ma sa tiga tele. A o ou saofai ai i la’u kesi, sa le mafai ona ou taula’i atu i mataupu taua ma le tatau aua sa faalavelave mai le tiga lea.

Sa ou tootuli i le tatalo ma ole atu i le Alii e fesoasoani mai ia mafai ona ou taula’i atu e faatino la’u galuega. Sa ou tu a’e i luga ma toe foi i le faaputuga o pepa sa i luga o la’u kesi. Toetoe o le taimi lava lea, sa oo mai le manino ma le matala o lo’u mafaufau, ma sa mafai ona ou faamae’aina mataupu fitā sa i o’u luma.

(M. Russell Ballard, “Ia Outou Mataala ma Tatalo e le Aunoa,” Ensign po o le Liahona, Nov. 2020, 79)

O a ni aafiaga na e oo i ai pe na oo i ai isi lea na tali mai ai le Atua i tatalo?
O a ni mea na aoao atu e nei aafiaga ia te oe e uiga i manaoga ma lagona o le Tama Faalelagi mo oe ma isi?
Na faapefea ona uuna’ia e nei aafiaga lou manao ma lou gafatia e faalagolago ai i le Tama Faalelagi?

A o tali mai tamaiti aoga, faafetai atu ia i latou mo le faasoaina mai o o latou aafiaga ma malamalamaga, ma fesoasoani ia latou malamalama i le taua o a latou faasoa mo le vasega.

Faalagolago i le Atua

Faitau le Galuega 12:12–17 e iloa ai pe faapefea ona faai’uina lenei tala. Ia manatua o le Iakopo o loo ta’ua i le fuaiupu 17 e lē o le Iakopo lava lea e tasi o loo ta’ua i le fuaiupu 2 .

O nisi taimi e lē taliina ai tatalo i le ala tatou te faamoemoe i ai. O le faamaturoina o Iakopo atonu o se tasi lea o faataitaiga faapena. Atonu sa tatalo foi le Au Paia i le taimi lea mo Iakopo, ae sa fasiotia lava o ia e Herota (taga’i i le Galuega 12:2).

Mafaufau i tulaga faataitai mai le amataga o le lesona ma i taimi i lou lava olaga sa lē tali mai ai le Atua i au tatalo i le ala sa e faamoemoe i ai.

O le a se mea ua e iloa e uiga i le Tama Faalelagi e mafai ona fesoasoani ia te oe e faalagolago ai ia te Ia i nei tulaga?

Na aoao mai e Peresitene Dallin H. Oaks o le Au Peresitene Sili se mea e mafai ona fesoasoani pe a lē taliina mai a tatou tatalo i le ala tatou te faamoemoe i ai. Atonu e te manao e matamata i le “Healing the Sick” mai le faailotaimi 15:19 seia oo i le 16:55 pe faitau i le faamatalaga lenei.

17:35

I le avea ai ma ni fanau a le Atua, o le iloa o Lona alofa tele ma Lona silafia uma o le mea e sili ona lelei mo lo tatou manuia e faavavau, tatou te faatuatua ai ia te Ia. O le uluai mataupu faavae o le talalelei o le faatuatua i le Alii o Iesu Keriso, ma o le faatuatua o lona uiga o le talitonuina. Sa ou lagonaina lena talitonuina i se lauga na tuuina atu e lo’u tausoga i le maliu o se tamaitai talavou ona o se gasegase tigaina. Sa ia tautalagia upu nei na mua’i faateia ai a’u ona faatoa faagaeetia ai lea o a’u: “Ou te iloa o le finagalo lea o le Alii e maliu o ia. Sa lelei lona tausiga faafomai. Sa tuuina atu ia te ia ni faamanuiaga faaperisitua. Sa tusia lona igoa i lisi tatalo i le malumalu. O ia o le faatumutumuga o le faitau selau o talosaga mo le toe faafoisia mai o lona malosi. Ma ou te iloa, ua lava ma totoe le faatuatua o lenei aiga e ao ai lava ona faamaloloina o ia, vagana ai o le finagalo o le Alii e foi atu o ia i le taimi nei.” Na ou lagonaina foi lena talitonuina i upu a se tamā o se isi teineitiiti lelei na maliu ona o le kanesa, i tausaga o lona talavou. Sa ia tautino: “O le faatuatua o lo matou aiga o loo ia Iesu Keriso, ae e lē faalagolago i ni taunuuga.” Ou te lagonaina le moni o na aoaoga Tatou te faia mea uma tatou te mafaia mo le faamaloloina o sē e pele, ona tatou faalagolago lea i le Alii mo le taunuuga.

(Dallin H. Oaks, “Faamaloloina o e Mama’i,” Ensign po o le Liahona, Me 2010, 50)

O le a le mea na aoao mai e Peresitene Oaks e te lagona o le a taua pe a manatuaina? Aisea?

E faavae i mea ua e aoaoina i le asō, tusi se tusiga i totonu o se api talaaga e talanoaina ai se tasi pe sili atu foi o uuna’iga nei:

1. O mea na e aoaoina e uiga i le Tama Faalelagi e faatupulaia ai lou faalagolago ia te Ia

2. O mea na e aoaoina e uiga i le tatalo e te manao e manatua

3. Uuna’iga na e maua mai le Agaga Paia i le auala e faaleleia ai au lava tatalo po o le auala e mafai ona e saili ai e faalagolago atili i le Tama Faalelagi

A mae’a ona tuuina atu se taimi talafeagai i tamaiti aoga e tusitusi ai, valaaulia i latou e faasoa a latou tusiga i a latou api talaaga i ni paga po o ni vaega to’alaiti. Faaiu i le tuuina atu o se molimau patino e uiga i le Tama Faalelagi ma Lona gafatia ma le naunauta’i e tali i tatalo i Lana lava taimi ma Lana lava ala. Valaaulia tamaiti aoga ua loto i ai e faasoa mai foi a latou molimau.

Talatalaga ma Faamatalaga o Talaaga

O le a se mea e manaomia ona tatou malamalama i ai pe a foliga mai e lē oo mai tali o tatalo?

O Elder Richard G. Scott o le Korama a Aposetolo e Toasefululua, sa faamalamalamaina mai:

A le maua tali i tatalo faanatinati, atonu tatou te le o malamalama i nisi o mea moni e uiga i le tatalo, pe ona tatou te le o iloaina foi ia tali pe a oo mai. …

… E faafofoga o Ia i tatalo uma ma tali mai i Lana lava auala.

(Richard G. Scott, “Learning to Recognize Answers to Prayer,” Ensign, Nov. 1989, 30–31)

E mafai faapefea e a’u tatalo ona faamanuiaina taitai o le Ekalesia i aso nei?

I tusitusiga paia ua tatou aoao ai o le Au Peresitene Sili e lagolagoina e “le talitonuga, faatuatua, ma le tatalo a le ekalesia” (taga’i i le Mataupu Faavae ma Feagaiga 107:22). A o auauna ai o se Peresitene o le Ekalesia, na faasoa mai Thomas S. Monson (1927–2018), “E pei ona sa ou ta’ua i konafesi ua mavae, ou te faafetai atu mo a outou tatalo mo a’u. Ou te manaomia lava na tatalo; Ou te lagonaina foi” (“Ia Mafuta le Atua ma Outou Se’ia Tatou Toe Feiloa’i,” Ensign po o le Liahona, Nov. 2012, 111).