Galuega 11, 15

E Taitaia e le Faaola Lana Ekalesia e ala i Faaaliga

Sa ta’u atu e Iesu i Ana Aposetolo o le a tala/i atu le talalelei i atunuu uma. Peitai, o le faia o lenei mea, o le a manaomia ai ni suiga faigata i tu ma aga masani faa-Iutaia ua loa ona tausisia. I le Afio A’e ai o Iesu i le lagi, na manaomia loa ona faia nei suiga e ala i faaaliga. O le faamoemoega o lenei lesona o le faalolotoina lea o lou malamalama i le ala e taitaia ai e le Faaola Lana Ekalesia e ala i faaaliga i Ana perofeta ma aposetolo.

Filifili po o a mea e aoao atu. O le a masani ona sili atu anomea e i ai i se poloka o mau nai lo mea e mafai ona talanoaina ‘anoa i se taimi o se vasega. Suesue ma le lototatalo i tusitusiga paia ma mataupu aoaoina ia iloatino ai pe o le fea o upumoni faaleaoaoga faavae ma mataupu faavae e sili ona taūa mo au tamaiti a’oga ia iloa, malamalama ai, ma faaaogaina.

Sauniuniga a le tamaitiiti aoga: Valaaulia tamaiti aoga e faitau le Taiala i Tusitusiga Paia, “Faaaliga,” scriptures.ChurchofJesusChrist.org, ma o mai saunia e faasoa mai mea ua latou malamalama i ai e uiga i le ala e faaali mai ai e le Alii Lona finagalo i Ana perofeta.

O se fesili a se uo

Vaai faalemafaufau e faapea, ua iloa e se uo e lē auai i lau ekalesia e uiga i ou talitonuga i perofeta ma aposetolo o aso nei. E ui e talitonu lau uo i perofeta ma aposetolo o le Tusi Paia, ae e faigata ia te ia ona taliaina le manatu faapea e galue le Atua e ala mai ia i latou i aso nei. Ua ia fesili atu ia te oe, “E faapefea ona fetalai mai Iesu i le perofeta ma aposetolo?”

• O le a lou mautinoa i lou gafatia e tali atu ai i lenei fesili?

• O le a sau tala o le a fai i lau uo?

E ui e tele ni auala e tali atu ai, ae o le Galuega11 ma le 15 o loo faapupula mai ai ni auala se lua e taitaia ai e Iesu Keriso Lana Ekalesia e ala i faaaliga.

Faaaliga i le perofeta

Ina ua mavae le faaaliga ma le aafiaga o Peteru ia Konelio (taga’i i le Galuega10), sa malaga o ia i Ierusalema ma aoao atu nei upumoni fou faato‘ā faaalia mai i isi taitai o le Ekalesia.

E ono fesoasoani le fai i tamaiti aoga e galulue taitoalua e toe faamanatu vave le faaaliga vaaia a Peteru ma le aafiaga ma Konelio i le Galuega 10 . O le isi auala o le valaaulia lea o se tamaitiiti aoga e aotele mai le tala mo le vasega.

Ina ua taunuu Peteru i Ierusalema, sa toe faamatala lana faaaliga vaaia ma le aafiaga ma Konelio (taga’i i le Galuega 11:1–18).

Faitau le Galuega 11:4–18, ma vaavaai mo auala o e vaaia ai le taialaina e le Atua o le Ekalesia.

• O le a se mea o e aoaoina mai lenei tala e uiga i le ala e taitaia ai e le Alii Lana Ekalesia?

Mafaufau e valaaulia tamaiti a’oga e taga’i i mea sa latou aoaoina i a latou faitauga o sauniuniga a tamaitiiti aoga. Fesoasoani i tamaiti a’oga ia malamalama o faaaliga na oo sa’o mai lava i le perofeta, o le Aposetolo sinia, e ala i se faaaliga vaaia.

Mafaufau e tusi pe faaali atu le upumoni lenei i luga o le laupapa:

Mai le aafiaga o Peteru ua tatou aoao ai e taitai e Iesu Keriso Lana Ekalesia e ala i faaaliga i Lana perofeta, le Aposetolo sinia.

• E mafai faapefea e le iloaina o lenei upumoni ona fesoasoani e faamalosia ai lau molimau ia Iesu Keriso ma Lana perofeta?

• Aisea e te talitonu ai ua taialaina le Ekalesia i aso nei e ala i faaaliga i le perofeta a le Alii?

Faaaliga e ala mai i aufono

O se isi faataitaiga o le ala e tuuina mai ai e le Faaola faaaliga i Ana perofeta ma aposetolo o loo faapupula mai i le Galuega15 .

Sa aoao atu ma papatisoina e faifeautalai o Paulo ma Panapa le toatele o tagata Nuuese. O nisi tagata Kerisiano Iutaia na o mai i Anetioka ma aoao atu faapea o tane o tagata Nuu Ese ua liliu mai e manaomia ona tausia le tulafono a Mose e ala i le peritomeina e faaopoopo i le ola ai i le talalelei na aoao mai e Iesu Keriso ma Ana Aposetolo (taga’i i le Galuega 15:1,5 ; taga’i foi i le Taiala i Tusitusiga Paia, “ Peritomeina,” scriptures.ChurchofJesusChrist.org).

Faitau le Galuega 15:2 e iloa ai pe na faapefea ona saili Paulo ma Panapa e fo’ia le faafitauli.

• Aisea e te manatu ai na sailia e Paulo ma Panapa le taitaiga mai taitai o le Ekalesia i Ierusalema?

O le upumoni e tasi o loo faapupula mai i le Galuega15 o loo faapea mai, o le fefautuaa’i faatasi ma le sailia o faaaliga mai le Atua, e maua ai e taitai o le Ekalesia musumusuga e uiga i faafitauli faigata. A o fefautuaai faatasi Peteru ma isi taitai o le Ekalesia, sa latou maua le taitaiga mai le Atua. Sa latou lafoina ni tusi e faailoa atu ai i tagata o le Ekalesia a latou faaiuga musuia e aua nei faamalosia le peritomeina o tagata Nuu Ese ua liua, ma sa latou faaaofia ai se valaaulia e usitai i isi poloaiga.

O se aufono o se vaega o tagata e o mai faatasi e talanoaina mataupu e taua ma auala e tali atu ai i na mataupu. Ina ia malamalama atili e uiga i le auala e galuea’ina ai se aufono i le Ekalesia, faitau mea nei mai le Tusitaulima Aoao:

O le taitai [o se aufono] e uuna’ia sui tōfia ia tautatala tuusaoloto ma le faamaoni. O talaaga, tausaga, aafiaga, ma manatu eseese o sui o le aufono e faatamaoaigaina ai le aufono. E fefaasoaa’i e sui o le aufono o fautuaga ma le faaaloalo ma faalogo le tasi i le isi. A o latou saili ia iloa le finagalo o le Alii, e mafai ona manumalo se agaga o musumusuga ma le lotogatasi.

(Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 4.4.3, ChurchofJesusChrist.org)

• E faapefea ona e aoteleina pe o le a le mea e ta’u o le aufono i le Ekalesia?

Ia saunia faamatalaga nei o se tufaaga mo tamaiti a’oga pe faaali atu i luga o le laupapa.

O Le Aufono a Ierusalema

Faitau le Galuega 15:6–15, 22–28, ma vaavaai mo faamaoniga o vaega eseese o se aufono. Kopi le siata lenei i lau api faamaumau o suesuega. I le koluma taumatau, tusi ai upu po o fasifuaitau mai fuaiupu e o faatasi ma fasifuaitau i le koluma agavale.

Galue i lalo o ki o le perisitua
Taula’i atu i le lelei o tagata taitoatasi ma aiga
Faatagaina manatu faaalia mai sui auai o le aufono
Taitai atu i le lotogatasi

E faaaoga foi e taitai o aso nei ia aufono e valaaulia ai le taitaiga a le Alii i mataupu o le Ekalesia. O Peresitene RussellM. Nelson, na faasoa mai mea nei:

A matou potopoto o se Aufono a le Au Peresitene Sili ma le Korama a le Toasefululua, e avea a matou potu fono ma potu o faaaliga. E faalogoina le afio ai o le Agaga. A matou tauivi ai ma ni mataupu lavelave, e matala mai se faagasologa faagaeetiaina a o faaalia ma le saoloto e Aposetolo taitoatasi ona mafaufauga ma manatu. E ui atonu e eseese i matou i o matou uluai manatu, ae o le alofa matou te lagonaina mo le tasi ma le isi e tumau. E fesoasoani lo matou lotogatasi ia i matou e iloatino le finagalo o le Alii mo Lana Ekalesia.

I a matou fonotaga, e matua le mafai lava ona pule tutu le itu e toatele. Matou te faalogo ma le agaga tatalo i le tasi ma le isi ma talanoa ma le tasi ma le isi seia oo ina matou autasi. A oo loa ina matou ausia le tasi atoatoa, o le faatosinaga autasi a le Agaga Paia e matua faamaniti tino lava! Matou te oo i le mea na iloa e le Perofeta o Iosefa Samita ina ua ia aoao mai, “O le tuufaatasia o lagona tatou te maua ai le mana faatasi ma le Atua” [Aoaoga a Peresitene o le Ekalesia: Iosefa Samita (2007), 393–94]. E leai se uso o le Au Peresitene Sili po o le Korama a le Toasefululua na te faia ni faaiuga mo le Ekalesia a le Alii i sana ia lava faaiuga sili na o ia!

(Russell M. Nelson, “Faaaliga mo le Ekalesia, Faaaliga mo o Tatou Olaga,” Ensign po o le Liahona, Me 2018, 95)

E mafai ona avea lenei mea o se taimi lelei e tuu atu ai i tamaiti a’oga e fai mai ai soo se latou fesili atonu o i ai e uiga i auala e taitaia ai e le Alii Lana Ekalesia. Taga’i i le “ Faaaliga ” i le Taiala i Tusitusiga Paia (scriptures.ChurchofJesusChrist.org) ma anomea i le vaega o “Tala Auiliili ma Faamatalaga o Talaaga” o le lesona mo ni malamalamaga aoga.

• E faapefea ona e tali atu i le tulaga faataitai i le amataga o le lesona lea e fesili atu ai se uo pe faapefea ona fetalai atu Iesu Keriso i le perofeta ma aposetolo?

• E faapefea e lou iloaina o upumoni o loo faailoa mai i nei mau ona aafia ai ou lagona e uiga i le perofeta ma isi taitai o le Ekalesia?

• E mafai faapefea e le iloaina e taitaia e Iesu Keriso Lana Ekalesia i nei auala ona aafia ai le ala e te vaai ai i faaiuga e faia e le perofeta ma aposetolo i aso nei?

• O a aufono atonu o le a e auai ai i le faagasologa o lou olaga?

• O le a se mea e mafai ona e faia e fesoasoani ai i se aufono ia maua faaaliga?

Pe a uunaia ai oe, molimau atu i upumoni na aoao atu i lenei lesona.

Talatalaga ma Faamatalaga o Talaaga

Faaaliga i taitai o le Ekalesia

I lana saunoaga “O Le Mataupu Faavae a Keriso,” na faaaoga ai e Elder D. Todd Christofferson o le Korama a Aposetolo e Toasefululua ia tala o loo tusia i le Galuega 11 ma le 15 e aoao atu ai e uiga i faaaliga i taitai o le Ekalesia. Mafaufau e suesue le lauga atoa pe matamata le vitiō lenei mai le faailotaimi 6:10 seia oo i le 11:34.

O a ni faataitaiga o faaaliga faaauau pea?

O Elder QuentinL. Cook o le Korama a Aposetolo e Toasefululua, na aoao mai e uiga i le mauaina o faaaliga mo le Ekalesia. Matamata i le “The Blessings of Continuing Revelation to Prophets and Personal Revelation to Guide Our Lives” mai le faailotaimi 4:55 seia oo i le 6:42, o loo maua i ChurchofJesusChrist.org.

Na aoao mai foi Elder Cook e faapea e maua e le perofeta ma aposetolo musumusuga mai le Agaga ma faaaliga tuusa’o mai le Faaola. Matamata i le “Prepare to Meet God” mai le faailotaimi 13:37 seia oo i le 14:15.

E mafai faapefea ona galulue aufono i totonu o se aiga?

Sa aoao mai Peresitene M. Russell Ballard o le Korama a Aposetolo e Toasefululua e uiga i aufono faaleaiga i lana lauga “Aufono Faaleaiga” (Ensign po o le Liahona, Me 2016, 63–65).

Galuega Faatino Faaopoopo e Aoao Mai Ai

E auai talavou i aufono

E toatele talavou na maua pe o le a maua le avanoa e auai ai i aufono o ni vaega o o latou valaauga i se au peresitene o se vasega po o se korama. Valaaulia tamaiti a’oga e talanoaina aafiaga na latou maua i le auai ai i nei aufono ma pe mafai faapefea e mea na latou aoaoina i lenei lesona ona fesoasoani ia i latou a o latou fefautuaa’i ma isi i o latou valaauga.

E mafai faapefea ona oo mai faaaliga patino i le tagata lava ia e ala i fautuaga?

Valaaulia tamaiti a’oga e fai se lisi o ni nai faaiuga taua ua tatau ona latou faia nei ma i le lumanai. Fai atu i tamaiti a’oga fesili e pei o nei: E mafai faapefea e le fefautuaai ma isi ona fesoasoani ia te oe e maua ai le taitaiga musuia e uiga i le faia o nei faaiuga? O ai tagata e ono mafai ona e fefautuaa’i i ai e uiga i nei faaiuga? O nisi o puna’oa e aofia ai matua ma tagata o le aiga (taga’i i le M. Russell Ballard, “Aufono Faaleaiga,” Ensign po o le Liahona, Me 2016, 63–65), taitai o le Ekalesia, ma le Alii (taga’i i le Alema 37:37).

Mafaufau e faasoa atu le faamatalaga lenei a Elder Quentin L. Cook o le Korama a Aposetolo e Toasefululua: “O le toatele o outou talavou faapelepele, atonu e le o i ai se malamalama manino pe o ai outou ma pe o ai e mafai ona avea ai outou. Ae peitai ua outou i ai i le faitotoa o faaiuga aupito sili ona taua o ō outou olaga. Faamolemole fefautuaa’i ma ou mātua uma e toalua, ma lau epikopo e uiga i filifiliga taua o i ou luma. Faataga le epikopo e avea ma au uo ma fautua” (“Epikopo—O Leoleo Mamoe i Lafu Mamoe a le Alii,” Liahona, Me 2021, 60). Valaaulia tamaiti a’oga e tusi e uiga i auala e mafai ona latou faaaogaina ai le mataupu faavae o le fefautuaa’i e valaaulia ai le taitaiga a Iesu Keriso i o latou olaga.

O le auala e valaaulia ai e tusitusiga paia ia faaaliga i aufono taitai o le Ekalesia

E mafai ona fesiligia tamaiti a’oga e uiga i isi auala e oo mai ai faaaliga. Fuafua e faitau e tamaiti a’oga le Galuega 15:13–18 . O a punāvai o le pule na faasino i ai Iakopo?

Na aoao mai Elder D. Todd Christofferson o le Korama a Aposetolo e Toasefululua: “O felafolafoa’iga a le aufono o le a masani ona aofia ai se soalaupuleina o tusitusiga paia ua faamaonia, o aoaoga a taitai o le Ekalesia, ma faiga ua tuana’i. Ae i le faaiuga, e pei ona sa i ai i le Ekalesia i le Feagaiga Fou, o le faamoemoega e lē faapea ua na o se maliega autasi i sui o le aufono ae o faaaliga mai le Atua. O se faagasologa e aofia ai le faautautaga ma le faatuatua mo le mauaina o le mafaufau ma le finagalo o le Alii” (“O Le Mataupu Faavae a Keriso,” Ensign po o le Liahona, Me 2012, 88). E mafai e tamaiti a’oga ona faitau le Galuega 10:28, ma vaavaai pe faapefea ona talanoaina ai uma le maliega autasi ma faaaliga mai le Atua.