Galuega 10, Vaega 1

“E Lē Faailogaina Tagata e Le Atua”

Ina ua faaali atu Iesu i Ona soo ina ua mavae Lona Toetu, sa Ia poloa’iina i latou e tala’i atu le talalelei i le lalolagi atoa (taga’i i le Mataio 28:19–20). O le taimi muamua sa tele ina faasoa atu le talalelei i tagata Iutaia, ma sa faaauau pea e Peteru ma isi soo ona taula’i atu a latou taumafaiga faafaifeautalai ia i latou. O Konelio, o se tagata Nuu Ese sa alofa i le Atua ma sailia Lana taitaiga, sa faatonuina e ala i se avefeau faalelagi e saili le Aposetolo o Peteru. I le taimi lava lea, sa maua ai e Peteru se faaaliga lea na fesoasoani ia te ia e malamalama atili ai i lagona o le Tama Faalelagi e uiga i Ana fanau uma. O lenei lesona e mafai ona fesoasoani ia te oe e vaai atili ai i isi tagata e faapei o le silasila a le Tama Faalelagi ma Iesu ia i latou.

O le avea ai atili e faapei o Keriso. Fesoasoani i tamaiti a’oga ia iloa le sootaga i le va o le ola ai i le talalelei ma le avea ai atili e faapei o Iesu Keriso. “O le avea ai, o se faagasologa lea o le suiga i le amio faaletagata ma le natura tonu lava o le tamaitiiti a’oga. E oo mai e ala i le mana togiola ma le mana faamalosi’au o Iesu Keriso” (Kim B. Clark, “Deep Learning and Joy in the Lord” [lauga na fai i le faasalalauga o aoaoga faamasani faaletausaga o Seminare ma Inisituti Ekalesia], Iuni 13, 2017, broadcasts.ChurchofJesusChrist.org).

Sauniuniga a le tamaitiiti a’oga: Valaaulia tamaiti a’oga e taga’i toto’a pe faapefea ona latou vaai atu ma taulimaina tagata o loo latou fegalegalea’i ma pe aisea latou te faia ai faapea. Fai atu ia i latou e sauni e faasoa mai ni nai malamalamaga mai mea na latou mātauina.

O a mea o loo ua e vaaia?

Vaai atu i ao (i fafo pe i le ata lenei) ma faamatala mea o loo e vaaia.

• Aisea e ono tilotilo ai ni tagata se toalua i ao lava e tasi ae eseese mea la te vaaia?

• Aisea e ono tilotilo atu ai ni tagata se toalua i se isi tagata ae eseese la laua vaaiga i lena lava tagata?

• O le a se mea ua e iloa e uiga i le silasila a le Tama Faalelagi ma Iesu Keriso ia i tatou taitoatasi?

Valaaulia tamaiti a’oga e faasoa mai a latou maitauga ma malamalamaga pe afai ua mae’a ona latou faia le gaoioiga sauniuni a le tamaitiiti a’oga.

A o e suesue, manatua o lou vaai atu i tagata atonu e ese i nisi taimi mai le silasila a le Tama Faalelagi ma Iesu Keriso ia i latou. Faataga le Agaga Paia e taiala oe i mea atonu e manaomia ona e faia ina ia faaōgatusa atoatoa ai au vaaiga ma silafaga a le Tama Faalelagi ma Iesu Keriso.

Ua aoao atu e Peteru ia Konelio, o se tagata Nuu Ese

E oo mai i le taimi lea i ona po o le Feagaiga Fou, sa folafola atu le talalelei, ma ni nai tuusaunoaga, ia tau lava na o tagata Iutaia, e pei ona faatonuina ai e le Faaola (taga’i i le Mataio 10:5–6). Sa i ai ni nai tagata o le Ekalesia a Keriso na fananau mai o ni tagata Nuuese (e le o ni tagata Iutaia), ae ua uma ona latou liliu atu i le talitonuga faa-Iutaia a o le’i mulimuli ia Keriso. Peitai, sa ta’u atu e le Faaola i Ona soo a afio ifo le Agaga Paia i luga ia te i latou, ona latou folafola atu lea o le talalelei “i le tulu’iga o le lalolagi” ( Galuega 1:8). I le Galuega 10 tatou te faitau ai i se suiga maoa’e i le ala na faagaoioia ai le Ekalesia ina ia faataunuu ai lenei mea.

Faitau le Galuega 10:1–8 e aoao ai e uiga ia Konelio. Vaavaai mo faailoga o le ala na silasila ai le Tama Faalelagi ia Konelio.

• O le a se mea sa e aoaoina e uiga ia Konelio mai nei fuaiupu?

• O le a se mea na e maua e ta’u mai ai lagona o le Tama Faalelagi e uiga ia Konelio?

A o malaga atu auauna a Konelio e su’e le Aposetolo o Peteru, sa aoao e le Alii ia Peteru e uiga i Lana silafaga i tagata uma.Faitau le Galuega 10:9–16 ma tusi se ata o le mea e te manatu atonu na foliga i ai le faaaliga a Peteru.

E mafai e tamaiti a’oga ona tusi ni ata taitasi, pe mafai foi e se tamaitiiti a’oga se toatasi ona tusi le faaaliga i luga o le laupapa. Faapuupuu le taimi e tusi ai le ata ina ia lava le taimi o tamaiti a’oga mo le vaega o totoe o le lesona.

Valaaulia tamaiti a’oga e faasoa ane e uiga i ata sa latou tusia. Mafaufau e valaaulia tamaiti a’oga e faasoa mai o latou manatu e faatatau i le uiga o le faaaliga.

• Aisea na popole ai Peteru e uiga i le mea na faatonuina o ia e fai i le faaaliga?

Sa ola a’e Peteru o se tagata Iutaia, ma mulimuli i poloaiga ma uputuu o le tulafono a Mose. O lenei tulafono o loo i ai ni tuutuuga mamafa i mea e mafai ma e lē mafai ona aai ai tagata (taga’i i le Levitiko 11). O manu sa faatagaina tagata Iutaia e aai ai sa taua e “mamā,” a o manu sa faasa e le Atua ia tagata Iutaia ona aai ai sa taua e “lē mama.”

Sa le’i malamalama muamua Peteru i le uiga atoa o le faaaliga. A o ia mafaufau loloto i ai, sa taunuu mai auauna na auina mai e Konelio. Na ta’u atu e le Agaga ia Peteru e o atu ma nei alii i le fale o Konelio (taga’i i le Galuega 10:17–20).

Faitau le Galuega 10:25–29, 34–35, ma vaavaai mo mea na oo ina aoaoina ai Peteru i le uiga o le faaaliga vaaia na ia mauaina. Pe e mafai foi ona e matamata i le vitiō “Peter’s Revelation to Take the Gospel to the Gentiles” (o loo maua i le ChurchofJesusChrist.org) mai le faailotaimi 3:29 seia oo i le 5:29.

Vaavaai i le fuaiupu 34 mo le upumoni na aoaoina e Peteru e uiga i le silasila a le Tama Faalelagi i Ana fanau uma. Mafaufau e faailoga le upumoni na e mauaina.

Sa malamalama Peteru e lē faailogaina tagata e le Atua. Afai o le a faamanuiaina tamaiti a’oga mai le faitauina o isi mau o loo faamamafa mai ai lenei upumoni, faitau faatasi le 2 Nifae 26:13, 28, 33 ; Mataupu Faavae ma Feagaiga 1:34–35 .

Mafaufau e faasoa atu faamatalaga mai le vaega o “Talatalaga ma Faamatalaga o Talaaga” pe a manaomia i le taimi o lenei talanoaga.

Tusi i lau api faamaumau o suesuega le uiga ia te oe o le “E lē faailogaina tagata e le Atua.”

• O le a sou manatu na faapefea ona suia e le faaaliga a le Tama Faalelagi le loto ma le vaaiga a Peteru? E mafai faapefea e le malamalama ai i lenei faaaliga ona suia loto o tagata i aso nei?

Valaaulia ni nai volenitia e faasoa mai mea na latou tusia.

Ina ua malamalama Peteru sa finagalo le Atua ia aoao atu le talalelei i tagata uma, sa ia tala’i atu le sāvali a Iesu Keriso ia Konelio ma ona aiga ma uo (taga’i i le Galuega 10:36–43).

Atonu e te manao e matamata le vitiō “Peter’s Revelation to Take the Gospel to the Gentiles,” o loo maua i le ChurchofJesusChrist.org, mai le faailotaimi 5:30 seia oo i le 7:44.

• O le a sou manatu e faapefea e le soifuaga ma le misiona a Iesu Keriso ona faaalia ai le alofa o le Atua mo tagata uma?

• E mafai faapefea e le manatuaina e faatauaina e le Tama Faalelagi ma Iesu Keriso tagata uma ona aafia ai lau vaai ma le taulimaina o isi?

• O le a se mea e mafai ona e faia e saili ai le fesoasoani a le Tama Faalelagi e vaai atu ai i isi e pei ona Ia faia?

A o molimau atu Peteru e uiga ia Iesu Keriso, sa afio ifo le Agaga Paia i luga o Konelio ma lona aiga. Ona valaaulia lea o i latou e Peteru ina ia papatisoina (taga’i i le Galuega 10:44–48). O le faaaliga a le Atua ia Peteru na suia ai faiga masani a le Ekalesia, ma sa amata ona tala’i atu le talalelei i tagata uma.

E mafai ona faamae’a e tamaiti a’oga le gaoioiga lenei i totonu o a latou api faamaumau o suesuega. Mafaufau foi e valaaulia tamaiti a’oga e faasoa atu i o latou aiga mea na latou aoaoina mai lenei lesona.

Mafaufau pe o le a faapefea ona ese le lalolagi po o lou atunuu, lotoifale, aoga, po o le aiga pe afai o le vaai atu o fanau uma a le Tama Faalelagi, o le tasi i le isi, e tutusa ma Lana silasila mai ai ia i tatou.

Filifili se tasi o nei siosiomaga. Faamatala po o a eseesega e te ono vaaia pe ana vaai tagata i lenei siosiomaga i isi e pei o le silasila a le Tama Faalelagi ma Iesu Keriso ia i latou.

Talatalaga ma Faamatalaga o Talaaga

O ai o le a taliaina e Iesu Keriso i Lana Ekalesia ma Lona mālo?

O Peresitene Russell M. Nelson, na faamatalaina mai:

E tofu i tatou ma se gafatia paia ona o tagata taitoatasi o se atalii po o se afafine o le Atua. E tutusa tagata taitoatasi uma i Lana silafaga. O uiga o lenei upumoni e loloto. Uso e ma tuafafine, faamolemole faalogo ma le toto’a i le mea o le a ou fai atu ai. E lē sili atu le alofa o le Atua i le tasi ituaiga nai lo le isi. Ua manino Lana aoaoga faavae i lenei mataupu. Ua Ia valaaulia tagata uma e o atu ia te Ia, “e uliuli ma paepae, e pologa ma saoloto, o tane ma fafine” [ 2 Nifae 26:33 ].

Ou te faamautinoa ia te outou o lo outou tulaga i luma o le Atua e lē o fuaina i le lanu o lou pa’u. O le lelei po o le lē lelei ma le Atua e faalagolago i lou tuuto atu i le Atua ma Ana poloaiga ae e lē o le lanu o lou pa’u.

(Russell M. Nelson, “Ia Faamuamua le Atua,” Ensign po o le Liahona, Nov. 2020, 94)

Galuega 10:45 . O le a le uiga o le “alofa o le Agaga Paia”?

I le Galuega 10:45, o le fasifuaitau “o le alofa o le Agaga Paia” e faasino i le mana o le Agaga Paia, lea na afio ifo i luga o nei tagata o Nuuese. E ese lea mai i le meaalofa a le Agaga Paia, lea tatou te maua e ala i le sauniga o le faamauga pe a uma le papatisoga (taga’i i le Galuega 8:14–17 ; taga’i foi i le Aoaoga a Peresitene o le Ekalesia: Iosefa Samita [2007], 97).

Na faapefea ona suia e le faaaliga vaaia a Peteru ia faiga masani a le Ekalesia?

Na faamalamalama mai e Elder D. Todd Christofferson o le Korama a le Au Aposetolo e Toasefululua:

E ala i lenei aafiaga ma le faaaliga na oo ia Peteru, sa fetuuna’i ai e le Alii le faiga masani a le Ekalesia ma faaali mai ai se malamalamaga atoatoa o le mataupu faavae i Ona soo. Ma o lea na faalautele atu ai le tala’iina o le talalelei ina ia faaaofia ai fanauga a tagata uma lava.

(D. Todd Christofferson, “O Le Mataupu Faavae a Keriso,” Ensign po o le Liahona, Me 2012, 88)

O a ni mea e tutusa ai le faaaliga vaaia a Peteru i le faaaliga e tuuina atu le perisitua i alii agavaa uma o le Ekalesia?

E mafai ona fesoasoani punaoa nei pe afai e te manao ia malamalama atili e uiga i le faaaliga i le 1978 lea na tuuina mai ai e le Tama Faalelagi le faaeega o le perisitua i alii agavaa uma o le Ekalesia:

• Folafolaga Aloa’ia 2

• Dallin H. Oaks, “ Opening Remarks” [saunoaga na tuuina atu i le “Be One—a Celebration of the Revelation on the Priesthood,” June 1, 2018], broadcasts.ChurchofJesusChrist.org

• Elizabeth Maki, “‘I Will Take It in Faith’: George Rickford and the Priesthood Restriction,” Apr. 20, 2018, history.ChurchofJesusChrist.org

Galuega Faatino Faaopoopo e Aoao Mai Ai

O le Faaola sa femaliua’i ma agalelei

Mafaufau e valaaulia tamaiti a’oga e faitau le Galuega 10:38 ma mafaufau pe na faapefea e le Faaola ona “femaliua’i ma agalelei” i le ala na Ia silasila atu ai ma taulimaina ai isi. Ona mafai lea ona valaaulia tamaiti aoga e mafaufau e uiga i mea e mafai ona latou faia e faataitai ai i le Faaola i le faia o mea lelei.

Aoao atu i isi e uiga i le Faaola

Ina ua aoao atu Peteru ia Konelio ma i latou na faatasi ma ia, sa ia saunoa muamua e uiga ia Iesu Keriso ma Lana Togiola ona valaaulia lea o i latou sa ia aoaoina e faatino nei aoaoga e ala i le taliaina o sauniga (taga’i i le Galuega 10:35–48). O isi faifeautalai ua latou toe faatino lenei mamanu (taga’i i le Mosaea 18:1–10 ; Alema 18:24–39). E mafai ona valaaulia tamaiti a’oga e faitau ia aoaoga a Peteru ia Konelio ma saunia a latou lava otootoga o mea e mafai ona latou faasoa atu i se uo o fia iloa atili e uiga i le talalelei. E mafai foi ona latou mafaufau i le saunoaga lenei a Peresitene Dallin H. Oaks o le Au Peresitene Sili:

A tatou talanoa atu i isi, e manaomia ona tatou manatua o se valaaulia ia aoao atili e uiga ia Iesu Keriso ma Lana talalelei e sili atu nai lo se valaaulia ia aoao atili e uiga i la tatou Ekalesia. Tatou te mananao i tagata ia liua i le talalelei. O le matafaioi tele lena a le Tusi a Mamona. O lagona e uiga i la tatou Ekalesia e mulita’i i le liua atu ia Iesu Keriso; e lē tatau ona muamua. E ui e toatele ē e masalosalo i lotu, ae e i ai lava lo latou alofa mo le Faaola. Faamuamua mea e tatau ona faamuamua.

(Dallin H. Oaks, “Faasoaina Atu o le Talalelei Toefuataiina,” Ensign po o le Liahona, Nov. 2016, 59)

O se faataitaiga i ona po nei

Mafaufau e faaaoga le vitiō “Jesus is Real: Calyann’s Experience with the Book of Mormon” (12:02) o se faataitaiga o le ala na iloa ai e se tasi o tamaitai e lē faailogaina tagata e le Atua. E mafai ona vaavaai tamaiti a’oga mo tala po o aoaoga i le Tusi a Mamona o loo faaali mai ai o loo valaaulia e le Tama Faalelagi Ana fanau uma e o atu ia te Ia (taga’i i le 2 Nifae 9:21–22 ; 2 Nifae 26:28 ; Mosaea 27:23–25 ; Mosaea 28:1–3).