Galuega 10, Vaega 2

Mataupu Faavae o le Mauaina o Faaaliga

Sa faamanuiaina e se Tama Faalelagi alofa ia Konelio ma Peteru i se faaaliga e fesoasoani ai ia i laua ia malamalama atili i Lona finagalo. A o la faatinoina le faaaliga na la mauaina, sa faamanuiaina i laua i le malamalama ma le poto faaopoopo. O lenei lesona e mafai ona fesoasoani ia te oe e faateleina ai lou malamalama i le ala e mafai ai e le Tama Faalelagi ona faaali atu Lona finagalo ia te oe.

Valaauliaina o tamaiti a’oga e fai ni fesili. O le valaauliaina o tamaiti a’oga e fai ni fesili i le lesona atoa e mafai ona fesoasoani ia te oe e fetuuna’i ai le lesona i manaoga o tamaiti a’oga ma faatulaga le autū ia sili atu ona talafeagai mo tamaiti a’oga.

Sauniuniga a le tamaitiiti a’oga: Valaaulia tamaiti a’oga e faailoa mai manaoga po o atugaluga i o latou olaga latou te mananao e maua faaaliga e faatatau i ai.

Gaoioiga e Ono Mafai Ona Aoao Mai Ai

Auina atu o se sāvali tāua

Valaaulia se isi o fia ofo mai e sau i luma o le vasega. Tuu atu i lenei tamaitiiti a’oga le galuega o le faaoo atu o le sāvali e faapea “E alofa le Tama Faalelagi ia te outou” i isi tamaiti a’oga e aunoa ma le faaleoina. E mafai e le tamaitiiti a’oga ona tusitusi, fai taga, pe faaaoga soo se isi lava ala fesoota’i e ese mai le tautala.

Manatu faalemafaufau e tatau ona e tuuina atu se sāvali tāua i se tasi e le o faatasi ma oe.

• O a nisi o auala e mafai ona e faaoo atu ai le sāvali ia i latou?

• O a nisi o auala e ono faaoo atu ai e le Tama Faalelagi ni sāvali tāua ia te oe?

E tele sāvali tāua a le Tama Faalelagi e faasoa atu i Ana fanau. O nisi sāvali e mo tagata uma, ae o isi e patino mo na o oe lava. E fesoota’i mai le Tama Faalelagi i tagata taitoatasi e ala i faaaliga patino mo le tagata lava ia. A o e suesueina lenei lesona, vaavaai mo auala e mafai ai e le Atua ona faaali mai Ana sāvali tāua ina ia mafai ai ona e iloa faaaliga i taimi e oo mai ai.

Ua faaali mai e le Tama Faalelagi Lona finagalo ia Peteru ma Konelio

Toe faamanatu le tala ia Peteru ma Konelio i le Galuega 10:1–28, 44–48 (taga’i foi i le lesona “Galuega 10, Vaega 1”). A o e toe faamanatu, vaavaai pe na faapefea ona la malamalama i le mea na faaali mai e le Tama Faalelagi ia i la’ua.

E mafai e tamaiti a’oga ona toe faamanatu faatasi le Galuega 10, ma faitau le tala ma taofi mai lea taimi i lea taimi ina ia faasoa mai mea ua latou aoaoina. I se isi faiga, e mafai ona galulue tamaiti a’oga i ni paga, e avea ai le tasi o tamaitiiti a’oga e taula’i atu i le mea na oo ia Konelio ( fuaiupu 1–8, 44–48) ae o le isi e taula’i atu i le mea na oo ia Peteru ( fuaiupu 9–28, 44–48). A o latou toe faamanatuina, e mafai ona fefaasoaa’i tamaiti a’oga i le tasi ma le isi i mea latou te mauaina.

• O le a se mea ua e aoaoina e uiga i faaaliga mai lenei tala?

Faalogo ma le toto’a i tali a tamaiti a’oga ina ia saunia e fai atu ni fesili tulitatao musuia.Mafaufau e valaaulia tamaiti a’oga e tusi upumoni i luga o le laupapa. O nisi o upumoni e uiga i faaaliga e ono faailoa mai e tamaiti a’oga e aofia ai le e faaali mai e le Tama Faalelagi Lana upumoni i lea fuaitau i luga o lea fuaitau ma e mafai e le Tama Faalelagi ona faamanuiaina i tatou i faaaliga faaopoopo a o tatou mulimulita’ia faaaliga tatou te mauaina. E mafai foi e tamaiti a’oga ona tusi nei upumoni i a latou api faamaumau o suesuega po o tusitusiga paia.Mafaufau e faasoa atu se aafiaga patino ma valaaulia tamaiti a’oga e faasoa mai ni aafiaga e faapupula mai ai upumoni na faailoa mai.

• O le a se mea e mafai ona e aoaoina e uiga i le Tama Faalelagi mai upumoni e uiga i faaaliga ua e iloaina?

• O a faamanuiaga ma upumoni na semanū e lē maua e Peteru ma Konelio pe ana la le faatinoina mea na la mauaina?

Lea fuaitau i luga o lea fuaitau

Fetuuna’i le talanoaga lenei e faavae i mea ua uma ona malamalama i ai tamaiti a’oga e uiga i lenei upumoni. Afai ua i ai se malamalamaga lelei o nisi o tamaiti a’oga e uiga i lenei upumoni, mafaufau e valaaulia i latou e aoao atu i isi tamaiti a’oga e uiga i ai.

E mafai ona faamanuiaina tamaiti a’oga mai le faitauina o le 2 Nifae 28:30 ma talanoaina pe na faapefea ona maua e Peteru ma Konelio le faaaliga i lea fuaitau i luga o lea fuaitau.

O se upumoni e uiga i faaaliga o loo faapupula mai i lenei tala e faapea e faaali mai e le Tama Faalelagi Lana upumoni i lea fuaitau i luga o lea fuaitau (taga’i i le 2 Nifae 28:30).

Ia mātau e le’i vave maua e Konelio po o Peteru ia faamatalaga uma sa tuuina mai e le Atua mo soo se tasi o i la’ua. Na ta’u atu e le agelu ia Konelio e saili ia Peteru, ma “o ia na te ta’u atu ia te oe mea e tusa ona e faia” ( Galuega 10:5–6). Ina ua uma ona maua e Peteru lana faaaliga vaaia, sa “masalosalo Peteru i lona lava loto pe se a lea faaaliga ua iloa e ia” ( Galuega 10:17). Sa le’i malamalama atoatoa o ia i le uiga o le faaaliga vaaia seia oo ina ua feiloa’i ma Konelio.

O Elder David A. Bednar o le Korama a Aposetolo e Toasefululua, na faamatala mai pe faape’ī lenei mea mo i tatou. Matamata le vitiō “Patterns of Light: Spirit of Revelation” (3:04), o loo maua i le ChurchofJesusChrist.org, pe faitau le faamatalaga lenei.

O le faateleina malie o le susulu o le malamalama mai le oso a’e o le la, e faapei lava o le mauaina o se fe’au mai le Atua i “lea fuaitau i luga o lea fuaitau, ma lea mataupu i luga o lea mataupu” ( 2 Nifae 28:30). O le tele lava o taimi, e oo mai faaaliga i nai faaopoopoga laiti mo sina taimi, ma e tuuina mai e tusa ma o tatou manaoga, agavaa, ma tapenapenaga. … O lenei mamanu o faaaliga e matele ina taatele atu nai lo le lē aumaua.

(David A. Bednar, “O Le Agaga o Faaaliga,” Ensign po o le Liahona, Me 2011, 88)

• E mafai faapefea ona avea o se faamanuiaga le tuuina mai e le Tama Faalelagi ia i tatou o faaaliga e faasolosolo mālie mai nai lo le aumai uma i le taimi e tasi?

• O a ni uiga faa-Keriso e mafai e lenei mamanu ona fesoasoani ia i tatou ia atiina a’e?

Faatinoina o faaaliga

Ona sa faatino e Konelio ma Peteru faaaliga na la mauaina muamua, sa faamanuiaina i laua i se malamalama atoatoa. Ua faapupula mai e lenei mea se isi upumoni o loo maua i le Galuega 10 : O le a faamanuiaina i tatou e le Tama Faalelagi i faaaliga faaopoopo a o tatou mulimulita’ia faaaliga tatou te mauaina.

O Elder Ronald A. Rasband o le Korama a Aposetolo e Toasefululua, sa famalamalama mai le tāua o le faatinoina o faaaliga mai le Tama Faalelagi. Matamata le vitiō “Let the Holy Spirit Guide,” o loo maua i le ChurchofJesusChrist.org, mai le faailotaimi 14:41 seia oo i le 15:19, pe faitau le faamatalaga lenei.

A tatou gaua’i toto’a atu i uuna’iga lea e oo mai ia i tatou, o le a tatou tuputupu a’e i le agaga o faaaliga ma maua atili se malamalamaga ma taitaiga e uuna’ia e le Agaga. Na fetalai mai le Alii, “Ia tuu atu lou faalagolago i le Agaga lena lea na te taitai ia fai mea lelei” [ Mataupu Faavae ma Feagaiga 11:12 ].

Ia ao ai ona tatou manatu mamafa i le valaau a le Alii ina “ia fiafia, ona o le a Ou taitaia outou i le ala” [ Mataupu Faavae ma Feagaiga 78:18 ]. Na te taitaiina i tatou e ala i le Agaga Paia. Ia ao ai ona tatou nonofo faalatalata i le Agaga, i le vave ona galulue ai i o tatou ulua’i uuna’iga, i le iloaina ai e mai le Atua ia.

(Ronald A. Rasband, “Tuu Atu i le Agaga Paia e Taitai,” Ensign po o le Liahona, Me 2017, 96)

• E mafai faapefea ona e saunia ia maua faaaliga?

Faaaliga mo lou olaga

• O le a se mea ua e aoaoina e uiga i faaaliga e mafai ona fesoasoani ia te oe i ou tulaga patino?

• O le a se faaaliga ua tuuina mai e le Tama Faalelagi ia te oe e manaomia ona e galue i ai, ma e mafai faapefea ona e faatinoina?

• O le a se mea ua e aoaoina e mafai ona fesoasoani ia te oe e iloa ai le alofa o lou Tama Faalelagi mo oe?

Talatalaga ma Faamatalaga o Talaaga

E mafai faapefea ona ou iloa faaaliga e ala i le Agaga Paia?

Mafaufau e matamata le vitiō “Feeling the Holy Ghost” (3:17), o loo maua i le ChurchofJesusChrist.org, e faalogo ai e uiga i auala eseese e lagona ma iloa ai e tagata le Agaga Paia.

O le a se mea e tatau ona ou faia pe afai ou te lē lagonaina o o’u maua faaaliga mai le Tama Faalelagi, e tusa lava pe ou te sailia?

O Elder David A. Bednar o le Korama a Aposetolo e Toasefululua, na faamalamalama mai:

I le tele o faalēmautonu ma lu’itau tatou te fetaia’i i o tatou olaga, e manaomia e le Atua i tatou ina ia faia le mea sili tatou te mafaia, ia galue oe lava e faatino, ae aua le tau faatonuina, (taga’i i le 2 Nifae 2:26), ma ia faatuatuaina o Ia. Atonu tatou te lē vaai i ni agelu, faalogo i ni leo mai le lagi, pe mauaina foi ni uuna’iga maoa’e faaleagaga. Tatou te ono fetaomi soo foi i luma ma le faamoemoe ma le tatalo—ae e aunoa ma se mautinoa a’ia’i—o loo tatou faia e tusa ma le finagalo o le Atua. Ae a tatou faamamaluina a tatou feagaiga ma tausi i poloaiga, a o tatou taumafai atili e lē aunoa e faia mea lelei ma atili pea ona lelei, e mafai ona tatou savavali ma le mautinoa o le a taialaina e le Atua la tatou savaliga.

(David A. Bednar, “O Le Agaga o Faaaliga,” Ensign po o le Liahona, Me 2011, 90)

O a ni aga masani po o ni amioga e ono mafai ona taotaomia ai a’u mai le mauaina o faaaliga?

O Elder David A. Bednar o le Korama a Aposetolo e Toasefululua, sa faapea mai:

I tusitusiga paia, o le faatosina a le Agaga Paia e tele ona ta’ua o se “leo filemu ma le itiiti” ( 1 Tupu 19:12 ; 1 Nifae 17:45 ; taga’i foi i le 3 Nifae 11:3) ma se “siufofoga filemu o le fimalie atoatoa” ( Helamana 5:30). Talu ai e musumusu lemu mai lava ma le lē gaoiā le Agaga, e faigofie ona malamalama i le mafuaaga e tatau ai ona tatou aloese mai faasalalauga e lē talafeagai, ponokalafi, ma amioga ma mea faatauma’oi ua fai ma vaisu. O nei meafaigaluega a le fili e mafai ona faaitiitia ai ma i’u ai lava ina faatamaia lo tatou gafatia e iloa ai ma tali atu i fe’au maaleale mai le Atua, ia e auina mai e ala i le mana o le Agaga Paia.

(David A. Bednar, “O Le Agaga o Faaaliga,” Ensign po o le Liahona, Me 2011, 88)

O a ni mea e mafai ona ou faia e faatupula’ia ai lo’u gafatia e maua faaaliga?

O Peresitene Dallin H. Oaks o le Au Peresitene Sili, sa aoao mai:

O le aga’i i luma i a tatou auaunaga ma galuega o se auala taua e agavaa ai mo faaaliga. I a’u suesuega o tusitusiga paia ua ou matauina ai, o le tele o faaaliga i fanau a le Atua e oo mai i taimi o loo latou galulue ai, e le o taimi latou te nofonofo ai i o latou apitaga ma faatalitali i le Alii e ta’u atu ia i latou le laasaga muamua e faia. …

O le a tatou mauaina uuna’iga a le Agaga pe a tatou faia mea uma tatou te mafaia, pe a tatou galulue i fafo i le la nai lo le nofonofo i le paolo ma tatalo mo se taitaiga po o le a le laasaga muamua e fai. E oo mai faaaliga pe a o galulue fanau a le Atua.

O lea la, tatou te faia ai mea uma tatou te mafaia. Ona tatou faatalitali lea i le Alii mo Lana faaaliga. E i ai lava le taimi faatulagaina a le Alii ia.

(Dallin H. Oaks, “In His Own Time, In His Own Way,” Ensign, Aug. 2013, 22, 24)

Mo nisi fautuaga i le ala e faateleina ai lou gafatia ona lagona le Agaga ma maua faaaliga, mafaufau e faitau le “Feeling the Spirit” (Paul VanDenBerghe, New Era, Oct. 2011, 26–29).

Galuega Faatino Faaopoopo e Aoao Mai Ai

Faataitaiga o isi o loo mauaina faaaliga

Mafaufau e valaaulia tamaiti a’oga e faailoa mai faataitaiga mai tusitusiga paia o isi tagata sa mauaina faaaliga (taga’i, mo se faataitaiga, i le, 1 Nifae 4:6–18 ; Enosa 1:1–18 ; Alema 5:43–47). Fai i tamaiti a’oga e lisi ni faataitaiga i luga o le laupapa. Ona mafai lea ona latou filifili se faataitaiga se tasi, su’e i totonu o tusitusiga paia, ma suesue i ai, ma vaavaai mo malamalamaga e uiga i faaaliga mai le Tama Faalelagi.

• Faatusatusa le tala na e filifilia ma aafiaga o Konelio ma Peteru. O a ni mea e tutusa ai na e vaaia? O a ni eseesega?