Mga Buhat 10, Bahin 2

Mga Baroganan sa Pagdawat og Pagpadayag

Usa ka mahigugmaong Langitnong Amahan mipanalangin kang Cornelio ug Pedro og pagpadayag aron matabangan sila nga mas makasabot sa Iyang kabubut-on. Sa ilang paglihok sumala sa pagpadayag nga ilang nadawat, gipanalanginan sila og dugang nga kahayag ug kahibalo. Kini nga leksiyon makatabang ninyo nga molambo ang inyong pagsabot kon unsaon sa Langitnong Amahan pagpadayag sa Iyang kabubut-on nganha kaninyo.

Pagdapit sa mga estudyante sa pagpangutana. Ang pagdapit sa mga estudyante sa pagpangutana sa tibuok nga leksiyon mahimong makatabang nimo sa pagpahiangay sa leksiyon sigon sa panginahanglanon sa mga estudyante ug mahimong mas may kalabotan ang mga hilisgotan alang kanila.

Pagpangandam sa estudyante: Dapita ang mga estudyante sa pag-ila sa mga panginahanglan o mga kabalaka sa ilang kinabuhi nga gusto nilang makadawat og pagpadayag kabahin niini.

Posible nga mga Kalihokan sa Pagkat-on

Pagpadala og importante nga mensahe

Pagdapit og usa ka boluntaryo nga moduol sa atubangan sa klase. Hatagi kini nga estudyante ug tahas sa paghatag ug mensahe nga “Ang Langitnong Amahan nahigugma kanimo” ngadto sa ubang mga estudyante nga dili isulti. Ang estudyante mahimong mosulat, molihok, o mogamit og bisan unsang klase sa komunikasyon gawas sa pagsulti.

Handurawa nga kamo kinahanglang mohatag og usa ka importanteng mensahe ngadto sa usa ka tawo nga wala ninyo ikauban.

• Unsa ang pipila sa mga paagi nga inyong mapaabot ang maong mensahe ngadto kanila?

• Unsa ang pipila sa mga paagi nga ang Langitnong Amahan makapadala og importanteng mga mensahe nganha kaninyo?

Ang Langitnong Amahan adunay daghang importanteng mga mensahe nga ipaambit sa Iyang mga anak. Ang pipila sa mga mensahe alang sa tanan, samtang ang uban kay gipahaom alang lamang kaninyo. Ang Langitnong Amahan makigsulti sa mga indibidwal pinaagi sa personal nga pagpadayag. Sa inyong pagtuon niini nga leksiyon, pangita og mga paagi nga ang Dios mahimong magpadayag sa Iyang importanteng mga mensahe aron kamo mahimong makaila sa maong pagpadayag sa pag-abot niini.

Ang Langitnong Amahan nagpadayag sa Iyang kabubut-on nila ni Pedro ug Cornelio

Irebyo ang sugilanon ni Cornelio ug Pedro sa Mga Buhat 10:1-28, 44-48 (tan-awa usab ang leksiyon “Mga Buhat 10, Bahin 1”). Sa inyong pagrebyo, pangita kon giunsa nila pagkasabot sa unsa ang gipadayag sa Langitnong Amahan kanila.

Ang mga estudyante mahimong magrebyo sa Mga Buhat 10 isip usa ka klase, magbasa sa asoy ug mohunong matag karon og unya aron mopaambit sa unsa ang ilang nakat-onan. Sa laing paagi, ang mga estudyante mahimong magtinabangay isip magkapares, nga ang usa ka estudyante magpokus sa kasinatian ni Cornelio ( mga bersikulo 1–8, 44–48) ug ang usa magpokus sa kasinatian ni Pedro ( mga bersikulo 9–28, 44–48). Sa ilang pagrebyo, mahimo nilang ipaambit sa usag usa ang unsay ilang nakat-onan.

• Unsa ang inyong nakat-onan mahitungod sa pagpadayag gikan niini nga asoy?

Pamati og maayo sa mga tubag sa estudyante aron maandam sa sunod nga pagpangutana.Ikonsiderar ang pagdapit sa mga estudyante sa pagsulat og mga kamatuoran sa pisara. Pipila ka mga kamatuoran mahitungod sa pagpadayag nga maila sa mga estudyante mahimong maglakip sa ang Langitnong Amahan mopadayag sa Iyang kamatuoran linya sa linya [pagtulun-an human sa usa ka pagtulun-an] ug ang Langitnong Amahan mahimong mopanalangin nato og dugang nga pagpadayag diha sa atong pagsunod sa pagpadayag nga atong nadawat. Ang mga estudyante mahimo usab nga magrekord niini nga mga kamatuoran sa ilang journal sa pagtuon o mga kasulatan.Ikonsiderar ang pagpaambit og personal nga kasinatian ug dapita ang mga estudyante sa pagpaambit og mga kasinatian nga naghulagway sa mga kamatuoran nga naila.

• Unsa ang inyong makat-onan mahitungod sa Langitnong Amahan gikan sa mga kamatuoran mahitungod sa pagpadayag nga inyong naila?

• Unsa nga mga panalangin ug mga kamatuoran ang lagmit napakyas pagkab-ot nila ni Pedro ug Cornelio kon sila wala molihok sa kon unsa ang ilang nadawat?

Pagtulun-an human sa usa ka pagtulun-an

Ipahiangay ang mosunod nga hilisgotan base sa unsa ang nasabtan sa mga estudyante mahitungod niining kamatuoran. Kon pipila sa mga estudyante aduna nay hustong pagsabot niini nga kamatuoran, mahimong dapiton sila sa pagtudlo sa ubang mga estudyante mahitungod niini.

Ang mga estudyante mahimong makabenepisyo gikan sa pagbasa sa 2 Nephi 28:30 ug paghisgot giunsa ni Pedro ug Cornelio pagkadawat og pagpadayag sa hinayhinay.

Usa ka kamatuoran mahitungod sa pagpadayag nga gihulagway niining giasoy mao nga ang Langitnong Amahan nagpadayag sa Iyang kamatuoran pinaagi sa paghatag og pagtulun-an human sa usa ka pagtulun-an (Tan-awa ang 2 Nephi 28:30).

Timan-i nga si Cornelio ni si Pedro wala dayon makadawat sa tanang impormasyon nga gitagana sa Dios alang kanila. Si Cornelio gisultihan sa anghel sa pagpangita kang Pedro, ug “siya maga-ingon kaniya unsa ang iyang angayan nga buhaton” ( Mga Buhat 10:5–6). Human si Pedro makadawat sa iyang panan-awon, siya “nagduha-duha sa iyang kaugalingon unsa ang gipasabot niining panan-awon nga iyang nakita” ( Mga Buhat 10:17). Siya wala kaayo makasabot sa kahulogan sa maong panan-awon hangtod iyang nahimamat si Cornelio.

Si Elder David A. Bednar sa Korum sa Napulog Duha ka Apostoles naghulagway unsa kini alang kanato. Basaha ang mosunod nga pamahayag.

Ang hinay-hinay nga pagtubo sa kahayag gikan sa nagsubang nga adlaw sama sa pagdawat og mensahe gikan sa Dios “pagtulun-an human sa usa ka pagtulun-an, lagda human sa usa ka lagda” ( 2 Nephi 28:30). Kasagaran, ang pagpadayag motubo sa hinay-hinay sa pagdagan sa panahon ug ihatag sumala sa atong tinguha, katak[o]s, ug pagpangandam. … Kini nga sumbanan sa pagpadayag lagmit nga mahimong mas sagad kay sa panagsa ra.

(David A. Bednar, “Ang Espiritu sa Pagpadayag,” Liahona, Mayo 2011, 88)

• Sa unsang paagi nga mamahimong panalangin ang paghatag kanato sa Langitnong Amahan og pagpadayag sa hinay-hinay kaysa idungan tanan?

• Unsa ang Kristohanong mga hiyas diin kini nga sumbanan makatabang kanato sa pagpalambo?

Paglihok sa pagpadayag

Tungod kay si Cornelio ug Pedro milihok sumala sa mga pagpadayag nga ilang unang nadawat, sila gipanalanginan og usa ka mas buhong nga pagsabot. Kini naghulagway og lain pang kamatuoran nga anaa makita sa Mga Buhat 10 : ang Langitnong Amahan magapanalangin kanato og dugang nga pagpadayag diha sa atong pagsunod sa pagpadayag nga atong nadawat.

Si Elder Ronald A. Rasband sa Korum sa Napulog Duha ka Apostoles mipasabot sa kamahinungdanon sa paglihok sumala sa pagpadayag gikan sa Langitnong Amahan. Tan-awa ang video nga “Tug[o]ti ang Balaang Espiritu nga mao ang Mogiya,” nga anaa sa https://www.churchofjesuschrist.org/study/general-conference/2017/04/let-the-holy-spirit-guide?lang=ceb, gikan sa time code 14:41 hangtod 15:19, o basaha ang mosunod nga pamahayag.

Kon hatagan nato og pagtagad ang mga pag-aghat nga moab[o]t kanato, molambo kita diha sa diwa sa pagpadayag ug makadawat ug mas daghan pa nga panab[o]t ug direksyon nga dinasig sa Espiritu. Ang Ginoo nagsulti, “Itugyan ang imong pagsalig diha niana nga Espiritu nga nagtultol sa pagbuhat og maayo” [ Doktrina ug mga Pakigsaad 11:12 ].

Hina[o]t nga sery[o]so natong dawaton ang panawagan sa Ginoo nga “paglipay, kay Ako mogiya kaninyo.”[ Doktrina ug Mga Pakigsaad 78:18 ]. Siya mogiya kanato pinaagi sa Espiritu Santo. Hina[o]t nga magpakabuhi kita nga duol sa Espiritu, molihok dayon sa atong una nga mga pag-aghat, kay kita nasay[o]d nga kini nagagikan sa Dios.

(Ronald A. Rasband, “Tuguti ang Balaang Espiritu nga Mao ang Mogiya,” Liahona, Mayo 2017, 96)

• Unsaon ninyo pag-andam ang inyong kaugalingon sa pagdawat og pagpadayag?

Pagpadayag alang sa inyong kinabuhi

• Unsa ang inyong nakat-onan mahitungod sa pagpadayag nga nakatabang kaninyo sa inyong personal nga mga kahimtang?

• Unsa nga pagpadayag ang gihatag sa Langitnong Amahan kaninyo nga inyong kinahanglang lihokon, ug unsaon ninyo paglihok niana?

• Unsa ang inyong nakat-onan nga makatabang kaninyo nga makakita sa gugma sa Langitnong Amahan alang kaninyo?

Komentaryo ug Background nga Impormasyon

Unsaon nako pag-ila sa pagpadayag pinaagi sa Espiritu Santo?

Unsa ang angay nakong buhaton kon akong gibati nga morag wala ko makadawat og pagpadayag gikan sa Langitnong Amahan, bisan kon nangita ako niini?

Si Elder David A. Bednar sa Korum sa Napulog Duha ka Apostoles mipasabot:

Diha sa daghan nga walay mga kasegurohan ug sa mga hagit nga atong masugatan sa atong kinabuhi, gikinahanglan sa Dios kanato ang pagbuhat sa atong labing maayo, sa pagbuhat ug dili pagaaghaton (tan-awa sa 2 Nephi 2:26), ug sa pagsalig diha Kaniya. Tingali kita dili makakita og mga anghel, makadungog og langitnong mga tingog, o makadawat og hilabihan ka espirituhanong mga hunahuna. Sa kanunay kita mahimong mopadayon nga nanghinaot ug nag-ampo—apan walay hingpit nga kasegurohan—nga kita naglihok subay sa kabubut-on sa Dios. Apan samtang kita nagtahod sa atong mga pakigsaad ug nagsunod sa mga sugo, samtang kita kanunay gay[o]d nga naningkamot sa pagbuhat og maayo ug mahimo nga mas maayo, makalakaw kita uban ang pagsalig nga ang Dios mogiya sa atong mga lakang.

(David A. Bednar, “Ang Espiritu sa Pagpadayag,” Ensign o Liahona, Mayo 2011, 90)

Unsa nga mga batasan o mga lihok ang makababag kanako sa pagkadawat og pagpadayag?

Si Elder David A. Bednar sa Korum sa Napulog Duha ka Apostoles miingon:

Diha sa mga kasulatan, ang impluwensya sa Espiritu Santo sa kasagaran gihulagway isip “usa ka hinay nga hinagawhaw nga tingog” ( 1 Mga Hari 19:12 ; 1 Nephi 17:45 ; tan-awa usab sa 3 Nephi 11:3) ug sa “tingog nga hingpit sa kalumo” ( Helaman 5:30). Tungod kay ang Espiritu mohagawhaw ngari kanato sa hinay ug sa kalumo, sayon rang sabton nganong gikinahanglan nato nga maglikay sa dili maayo nga media, pornograpiya, ug makada[o]t, makaadik nga mga butang ug mga kinaiya. Kini nga mga himan sa kaaway makada[o]t ug sa kadugayan moguba sa atong kapasidad sa pag-ila ug sa pagtubag sa malumo nga mga mensahe gikan sa Dios nga gihatod pinaagi sa gahom sa Iyang Espiritu.

(David A. Bednar, “Ang Espiritu sa Pagpadayag,” Liahona, Mayo 2011, 88)

Unsa man ang akong mahimo aron madugangan ang akong abilidad sa pagdawat og pagpadayag?

Si Presidente Dallin H. Oaks sa Unang Kapangulohan mipahayag:

Usa ka importante nga paagi nga makasarang alang sa pagpadayag mao ang pagpadayon sa atong pagserbisyo ug pagbuhat. Sa akong pagtuon sa mga kasulatan akong namatikdan nga kadaghanan sa mga pagpadayag ngadto sa mga anak sa Dios moabot kon sila naglihok, dili kay naglingkod lang diha sa ilang nahimutangan nga nagpaab[o]t sa Ginoo sa pagsulti kanila sa unsay unang buhaton. …

Kita dasigon sa Espiritu kon atong buhaton ang tanan natong mahimo, kon kita nagkugi og maayo kaysa maglingkod lang nga nag-ampo og direksyon para sa unang lakang nga pagabuhaton. Ang pagpadayag moabot kon ang mga anak sa Dios kanunay nga maglihok.

Mao nga atong buhaton ang tanan natong mahimo. Dayon magpaabot kita sa pagpadayag sa Ginoo. Siya adunay iyang kaugalingong panahon.

(Dallin H. Oaks, “Sa Iyang Kaugalingong Panahon, sa Iyang Kaugalingong Paagi,” Ensign, Ago. 2013, 24, 26)

Alang sa daghan pang mga sugyot kon unsaon pagdugang sa inyong abilidad nga makabati sa Espiritu ug makadawat og pagpadayag, ikonsiderar ang pagbasa sa “Feeling the Spirit” (Paul VanDenBerghe, New Era, Okt. 2011, 26–29).

Dugang nga mga Kalihokan sa Pagkat-on

Mga ehemplo sa uban nga nakadawat og pagpadayag

Ikonsiderar ang pagdapit sa mga estudyante sa pag-ila og mga ehemplo gikan sa mga kasulatan mahitungod sa ubang tawo nga nakadawat og pagpadayag (tan-awa, pananglitan sa, 1 Nephi 4:6–18 ; Enos 1:1–18 ; Alma 5:43–47). Hangyoa ang mga estudyante sa paglista og mga pananglitan diha sa pisara. Mahimo dayon silang mopili og usa ka ehemplo, pangitaon kini diha sa mga kasulatan, ug tun-an kini, nga mangita sa mga panabot mahitungod sa pagpadayag gikan sa Langitnong Amahan.

• Itandi ang asoy nga inyong gipili diha sa mga kasinatian nila ni Cornelio ug ni Pedro. Unsa nga mga pagkaparehas ang inyong nakit-an? Unsa ang mga kalahian?