Mga Buhat 12:1–19

Imahe

An angel assisting Peter in his release from prison. The prison guards are unconscious on the ground.

Ang mga Apostoles miatubang og pagsupak diha sa ilang pagsulay sa pagpadayon sa buhat sa Manluluwas. Si Santiago gimartir ubos sa mando ni Herodes, samtang si Pedro gibilanggo apan dayon giluwas sa usa ka anghel agig tubag sa mga pag-ampo gikan sa mga miyembro sa Simbahan. Kini nga leksiyon gituyo aron sa pagtabang kaninyo sa pagpalambo og mas dako nga pagsalig sa Langitnong Amahan ug sa Iyang mga tubag sa pag-ampo.

Positibo nga pasidunggan ang mga tubagsa mga estudyante. Pasidunggi ang mga tubag sa estudyante pinaagi sa yanong “pasalamat” o pinaagi sa pagdayeg sa usa ka pihong butang sa ilang tubag. Ang paghimo niini makatabang sa pagpakita sa mga estudyante nga ang ilang mga kontribusyon adunay bili ug importante alang sa kasinatian sa pagtuon. Kini mahimong makatabang sa mga estudyante nga mas komportableng mopaambit og mga tubag, mga panabot, ug mga kasinatian sa umaabot.

Pagpangandam sa etudyante: Dapita ang mga estudyante nga motambong sa klase nga andam mopaambit og usa ka kasinatian diin ang mga pag-ampo natubag sa paagi nga gilaoman nila og sa uban ug usa ka kasinatian diin ang mga pag-ampo lagmit wala matubag o natubag sa lain nga paagi kay sa gilaoman.

Posible nga mga Kalihokan sa Pagkat-on

Lainlain nga mga resulta

Pagbantay sa mga kahimtang sa mga estudyante, ug ipahiangay ang mosunod nga mga senaryo sumala niana. Pahinumdomi ang mga estudyante sa pagsunod sa mga instruksiyon nga anaa sa ilang pagpangandam sa klase sa tibuok nga leksiyon.

Paghunahuna mahitungod sa lainlaing mga paagi nga posibleng matubag sa mga tawo niining mosunod nga mga sitwasyon:

Usa ka batan-ong lalaki makugihon nga nag-ampo sulod sa daghang mga katuigan alang sa kaayohan sa iyang amahan sa balatian nga kanser, apan ang iyang amahan wala maayo.

Usa ka batan-ong babaye mainitong nag-ampo alang sa kaayohan sa iyang inahan sa balatian nga kanser, ug human sa daghang mga tuig nga pag-antos, ang iyang inahan milagrosong naulian.

Kanus-a ka o ang uban adunay mga pag-ampo nga wala matubag sa paagi nga gilaoman?
Giunsa ninyo sa pagtubag?
Giunsa sa kalig-on sa imong pagsalig sa Langitnong Amahan pag-impluwensya ang inyong tubag?

Sa inyong journal sa pagtuon, ilha ang mga milagro o mga panalangin nga inyong gipangita. Paghunahuna kon unsaon ang pagbutang og dakong pagsalig sa Dios makaimpluwesya sa inyong kinabuhi alang sa mas dakong kaayohan. Sa inyong pagtuon, pangita og mga kamatuoran ug mga pananglitan nga makatabang ninyo aron mapalambo ang mas dakong pagsalig sa Langitnong Amahan ug sa Iyang mga tubag sa mga pag-ampo.

Pagpanggukod sa mga miyembro sa Simbahan

Diha sa pagpadayon pagkuyanap sa ebanghelyo, ang mga miyembro sa Simbahan ug mga lider gipanggukod sa mga lider nga Romanhon ug Judio. Pipila ka mga lider sa Simbahan, sama nila ni Pedro ug Juan, milagrosong naluwas sa Dios (tan-awa sa Mga Buhat 5:17–21), samtang ang uban, sama ni Esteban, wala (tan-awa sa Mga Buhat 7:54–60).

Handurawa ang inyong kaugalingon isip usa ka miyembro sa Simbahan panahon niining mga hitaboa diha sa inyong pagbasa sa Mga Buhat 12:1–4 . Ang pulong nga vex nagpasabot sa pagdaogdaog o pagpasipala. Ang bersikulo 4 nagpasabot nga si Herodes nagbutang og 16 ka mga sundalo sa pagbantay kang Pedro samtang nagplano nga silotan unya siya sa publiko.

Unsa nga mga pagbati ug mga pangutana ang lagmit anaa kaha kaninyo isip miyembro sa Simbahan karong panahona?

Basaha ang Mga Buhat 12:5 , ug pangitaa kon giunsa pagtubag sa mga miyembro sa Simbahan.

Nganong lagmit makapahagit ang pagbansay og hugot nga pagtuo pinaagi sa pag-ampo alang kang Pedro?
Unsa sa inyong hunahuna ang nasabtan sa mga miyembro sa Simbahan mahitungod sa Langitnong Amahan nga nakapadasig nila sa pagbuhat niini?

Basaha ang Mga Buhat 12:6–11 , ug pangitaa giunsa pagkatubag ang mga pag-ampo sa mga miyembro sa Simbahan.

Unsa nga mga pagbati o mga hunahuna ang lagmit ninyong masinati kon kamo nakasaksi niini nga tubag sa pag-ampo?
Sa unsang paagi nga ang usa ka hitabo nga sama niini makaapekto sa inyong pagsalig sa Langitnong Amahan?
Unsa nga mga kamatuoran mahitungod sa pag-ampo ang atong makat-onan gikan niini nga asoy?

Sinsero ug kinasingkasing nga pag-ampo

Usa ka kamatuoran nga atong nakat-onan niini nga asoy mao nga ang atong sinsero ug mainitong mga pag-ampo nagdapit sa mga milagro ug mga panalangin sa Dios sa atong mga kinabuhi ug sa mga kinabuhi sa uban.

Ang mga milagro nga resulta gikan sa matuohong pag-ampo kanunayng gagmay ug yano inay nga dagko ug dramatiko.

Mahimo ninyong tan-awon ang “Panagtukaw Kamo sa Tanang Panahon, ug Manag-ampo” gikan sa time code 12:17 hangtod 13:07, nga anaa makita sa https://www.churchofjesuschrist.org/study/general-conference/2020/10/41ballard?lang=ceb, o basaha ang mosunod nga pamahayag aron makakita og usa ka milagro gikan sa pag-ampo diha sa kinabuhi ni Presidente M. Russell Ballard sa Korum sa Napulog Duha ka Apostoles.

Imahe
Official portrait of President M. Russell Ballard of the Quorum of the Twelve Apostles, 2004.

Nahibalo ako sa gahom sa pag-ampo tungod sa akong kaugalingon nga kasinatian. Bag-ohay lang nag-inusara ako sa akong opisina. Bag-o lang ko nahuman sa usa ka proseso sa pagpatambal sa akong kamot. Nangitom kini ug nilagom, naghubag, ug sakit kaayo. Samtang naglingkod ko dapit sa akong lamesa, dili ako makatutok sa importante ug kritikal nga mga butang tungod kay nabalda ako sa kasakit niini.

Miluhod ako sa pag-ampo ug mihangyo ako sa Ginoo nga iya akong tabangan nga makatutok sa akong trabahoon aron kini mahuman. Mibarog ko ug mibalik ngadto sa nagtipun-og nga papel sa akong lamesa. Diha-diha dayon, ang katin-aw ug ang pagpokus miabot sa akong hunahuna, ug akong nahuman ang dinalian kaayong mga butang sa akong atubangan.

(M. Russell Ballard, “Panagtukaw Kamo sa Tanang Panahon, ug Manag-ampo,” Liahona, Nob. 2020, 79)

Unsa nga mga kasinatian ang nasinati ninyo o sa uban diin ang Dios mitubag sa mga pag-ampo?
Unsa ang gitudlo niini nga mga kasinatian kaninyo mahitungod sa mga tinguha ug mga pagbati sa Langitnong Amahan alang kaninyo ug sa uban?
Giunsa niini nga mga kasinatian pag-impluwensya sa inyong tinguha ug abilidad sa pagsalig sa Langitnong Amahan?

Sa pagtubag sa mga estudyante, pasalamati sila sa pagpaambit og mga kasinatian og mga panabot, ug tabangi sila nga makasabot unsa ka mahinungdanon ang ilang kontribusyon ngadto sa klase.

Pagsalig sa Dios

Basaha ang Mga Buhat 12:12–17 aron makita giunsa pagtapos kini nga asoy. Ibutang sa hunahuna nga ang Santiago nga gihisgotan sa bersikulo 17 dili parehas sa Santiago nga gihisgotan sa bersikulo 2 .

Usahay ang mga pag-ampo dili matubag sa paagi nga atong gilaoman. Ang pagpakamartir ni Santiago mahimong usa sa pananglitan. Ang mga Santos niining panahona lagmit nag-ampo usab alang kang Santiago, apan gipatay gihapon siya ni Herodes (tan-awa sa Mga Buhat 12:2).

Pamalandong niining mga senaryo gikan sa sinugdanan sa leksiyon ug mga panahon sa inyong kinabuhi diin ang Dios wala mitubag sa inyong mga pag-ampo sa paagi nga inyong gilaoman.

Unsa ang inyong nahibaloan mahitungod sa Langitnong Amahan nga makatabang ninyo sa pagsalig ngadto Kaniya niining mga sitwasyona?

Si Presidente Dallin H. Oaks sa Unang Kapangulohan nagtudlo og usa ka butang nga makatabang kon ang atong mga pag-ampo mahimong dili matubag sa paagi nga atong gilaoman. Basaha ang mosunod nga pamahayag.

Imahe
Official portrait of President M. Russell Ballard of the Quorum of the Twelve Apostles, 2004.

Isip mga anak sa Dios, nga nasayod sa Iyang dakong gugma ug sa Iyang dili masukod nga kahibalo kon unsay labing maayo alang sa atong mahangturon nga kaayohan, mosalig kita Kaniya. Ang unang baroganan sa ebanghelyo mao ang hugot nga pagtuo diha ni Ginoong Jesukristo, ug ang hugot nga pagtuo nagkahulogan og pagsalig. Akong gibati kana nga pagsalig sa usa ka pagpamulong nga gihatag sa akong ig-agaw sa panahon sa usa ka lubong sa batan-ong babaye kinsa namatay sa grabe nga sakit. Namulong siya niini nga mga pulong, nga sa sinugdan mipahingangha kanako ug dayon milig-on kanako: “Nasayod ako nga kabubut-on kadto sa Ginoo nga siya namatay. Siya adunay maayo kaayo nga medikal nga pag-atiman. Gihatagan siya og mga panalangin sa priesthood. Ang iyang ngalan gibutang sa listahanan sa mga ngalan sa nagkinahanglan og pag-ampo [prayer roll] sa templo. Siya ang gihisgotan sa gatosan ka mga pag-ampo aron mahimsog og balik. Ug nasayod ako nga adunay igo nga hugot nga pagtuo niini nga pamilya nga mamaayo unta siya gawas kon kabubut-on sa Ginoo nga pagakuhaon siya niining higayona.” Akong gibati kanang sama nga pagsalig diha sa mga pulong sa amahan sa usa ka laing pinili nga batang babaye kansang kinabuhi gikuha tungod sa kanser sa iyang batan-on nga pangedaron. Siya mipahayag, “Ang hugot nga pagtuo sa among pamilya anaa kang Jesukristo, ug wala magdepende sa mga resulta.” Kadto nga mga pagtulun-an tinuod gayod alang kanako. Atong himoon kutob sa atong mahimo aron ayohon ang usa ka minahal, ug dayon mosalig kita sa Ginoo alang sa resulta.

(Dallin H. Oaks, “Pag-ayo sa Masakiton,” Ensign o Liahona, Mayo 2010, 50)

Unsa ang gitudlo ni Presidente Oaks nga pamati ninyo importanteng hinumdoman? Ngano man?

Base sa unsa inyong nakat-onan karon, pagsulat og entry sa inyong journal agig tubag sa usa o daghan pa sa mosunod nga mga pag-aghat:

1. Unsa ang inyong nakat-onan mahitungod sa Langitnong Amahan nga nakapadugang sa inyong pagsalig Kaniya

2. Unsa ang inyong nakat-onan mahitungod sa pag-ampo nga gusto ninyong mahinumdoman

3. Mga pagbati nga inyong nadawat gikan sa Espiritu Santo kon unsaon pagpalambo sa inyong kaugalingong mga pag-ampo o unsaon ninyo pagpangita og mas dakong pagsalig sa Langitnong Amahan

Human sa igong panahon sa pagsulat sa mga estudyante, dapita sila sa pagpaambit sa ilang mga entry sa journal ngadto sa ilang kapares o sa gagmay nga mga grupo. Taposa pinaagi sa paghatag og personal nga pagpamatuod sa Langitnong Amahan ug sa Iyang abilidad ug pagkaandam nga motubag sa mga pag-ampo sa Iyang panahon ug paagi. Dapita ang andam nga mga estudyante sa pagpaambit usab og pagpamatuod.

Komentaryo ug Background nga Impormasyon

Unsa ang angay natong masabtan kon ang mga tubag sa pag-ampo ingon og wala moabot?

Si Elder Richard G. Scott sa Korum sa Napulog Duha ka Apostoles mipasabot:

Imahe
Final official portrait of Elder Richard G. Scott of the Quorum of the Twelve Apostles, 2004. Passed away 22 September 2015.

Kon ang mga tubag sa dinalian nga pag-ampo ingon og wala moabot, mahimong wala kita makasabot sa pipila ka mga kamatuoran mahitungod sa pag-ampo o tungod kay kita wala makamatikod sa mga tubag [dihang] kini m[i]ab[o]t. …

… Maminaw Siya sa kada pag-ampo ug motubag niini sa Iyang pamaagi.

(Richard G. Scott, “Kabubut-on ug mga Tubag:Pag-ila sa Pagpadayag,” Liahona, Hunyo 2014, 48–49)

Unsaon sa akong mga pag-ampo pagpanalangin sa mga lider sa Simbahan karon?

Diha sa mga kasulatan atong nakat-onan nga ang Unang Kapangulohan gisuportahan sa “pagsalig, pagtuo, ug pag-ampo sa simbahan” (tan-awa sa Doktrina ug Mga Pakigsaad 107:22). Samtang nag-alagad isip Presidente sa Simbahan, si Thomas S. Monson (1927–2018) mipaambit, “Sa akong gisulti sa nangaging mga komperensya, nagpasalamat ako ninyo sa inyong mga pag-ampo alang nako. Gikinahanglan ko kini, gibati nako kini.” (“Ang Dios Maga-uban Ninyo Hangtod nga Magkita Kita Pag-usab,” Liahona, Nob. 2012, 111).