Ngāue 16–21
Vakai Fakalūkufuá
ʻOku tau lau ʻi he Ngāue 16–21, fekauʻaki mo e fononga fakafaifekau hono ua mo e tolu ʻa e ʻAposetolo ko Paulá. Naʻe aʻusia ʻe Paula mo hono ngaahi hoá ha ngaahi mana fakaofo mo tokoniʻi ha kakai tokolahi ke nau haʻu kia Kalaisi, maʻu e ouau ʻo e papitaisó, mo maʻu ʻa e meʻafoaki ʻo e Laumālie Māʻoniʻoní. Naʻe aʻusia foki ʻe Paula mo hono ngaahi hoá ʻa e loto-mamahí, fakatangá, mo e fakasītuʻaʻí.
Teuteu ke Akoʻi
ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fiemaʻu ke teuteuʻi kimuʻa ʻi he lēsoni takitaha:
Ngāue 16
Taumuʻa ʻo e lēsoní: ʻE tokoni ʻa e lēsoni ko ʻení ki he kau akó ke nau ʻiloʻi ʻa e tokoni ʻoku finangalo e Fakamoʻuí ke foaki kiate kinautolú ʻi heʻenau feinga ke vahevahe ʻEne ongoongoleleí mo e niʻihi kehé.
-
Teuteu ʻa e tokotaha akó: Fakaafeʻi e kau akó ke nau kole ʻi he faʻa lotu ki he Tamai Hēvaní ke tokoniʻi kinautolu ke nau ʻiloʻi ha taha kuó Ne teuteuʻi ke fanongo ki he ongoongolelei ʻo Sīsū Kalaisí.
-
ʻĪmisí: “Ko Ia Ke ʻAlu ʻa Kimoutolu”
-
Mape: “ Ko e Ngaahi Fononga Fakafaifekau ʻa e ʻAposetolo ko Paulá ”
-
Fokotuʻu ki hono akoʻi ʻi he konifelenisi vitioó: Hili hono maʻu ha ngaahi fakangofuá, fakaafeʻi ha tokotaha lea ke faiako lolotonga e konga hono ua ʻo e kalasí fekauʻaki mo e founga ʻe lava ke fakahoko ai ʻe he kāingalotu ʻo e Siasí e ngāue fakafaifekaú. Fakakaukau ke kole ki he fakaafe ko ʻení ke talanoa fekauʻaki mo e ngaahi tefitoʻi moʻoni ʻo e ngāue fakafaifekaú naʻe fakatātaaʻi ʻe Paula mo hono ngaahi hoá ʻi he Ngāue 16. Ko e tokotaha lea fakalāngilangí, ʻe lava pē ko ha taki ngāue fakafaifekau, taha toki ʻosi ngāue fakafaifekau, pe ko ha hoa ngāue fakafaifekau lolotonga. Tuku ha taimi ʻi he fakaʻosinga ʻo e kalasí ke fai ai ʻe he kau akó ha ngaahi fehuʻi. Talanoa mo e kouʻotineita fakalotofonua ʻo e S&I, ʻa ia ʻe fiemaʻu ha fakangofua ki he tokotaha lea fakalāngilangi ko ʻení.
Ngāue 17:1–14
Taumuʻa ʻo e lēsoní: ʻE lava ke tokoni e lēsoni ko ʻení ke ongoʻi ʻe he kau akó ha holi lahi ange ke aʻusia e ngaahi tāpuaki ʻo hono ako fakaʻaho ʻo e folofolá.
-
Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe ha meʻa mahuʻinga ne nau maʻu kimuí ni ʻi heʻenau ako folofola fakaʻahó.
Ngāue 17:16–34
Taumuʻa ʻo e lēsoní: ʻE tokoni e lēsoni ko ʻení ki he kau akó ke nau ongoʻi e mahuʻinga honau tuʻunga ko e fānau ʻa e ʻOtuá.
-
Teuteu ʻa e tokotaha akó: Fakaafeʻi e kau akó ke nau hiki ha lisi ʻo e ngaahi foʻi lea pe kupuʻi lea ʻokú ne fakamatalaʻi lelei taha kinautolú pea fakakaukau pe ko e fē ʻa e ngaahi foʻi lea pe kupuʻi lea ʻoku mahuʻinga taha kiate kinautolú.
-
Vitiō: “Ko e Fānau Kitautolu ʻa e ʻOtuá” (4:26; sio mei he taimi 0:00 ki he 1:54); “Ko e Fānau Koā Au ʻa e ʻOtuá?” (10:24; sio mei he taimi 3:24 ki he 5:23)
Ngāue 19:1–7
Taumuʻa ʻo e lēsoní: ʻE tokoni e lēsoni ko ʻení ki he kau akó ke nau maʻu e ngaahi tāpuaki ʻoku finangalo e Tamai Hēvaní mo Sīsū Kalaisi ke foaki kiate kinautolu ʻo fakafou ʻi he meʻafoaki ʻo e Laumālie Māʻoniʻoní.
-
Teuteu ʻa e tokotaha akó: Fakaafeʻi e kau akó ke nau fakakaukau ki he ngaahi ʻulungaanga ʻokú ne fakaafeʻi e takaua ʻo e Laumālie Māʻoniʻoní pea feinga ke toutou fai e ngaahi meʻa ko iá ʻi heʻenau moʻuí.
-
ʻĪmisi ke fakaʻaliʻalí: Ko ha ʻīmisi ʻo e hā ʻa Siosefa Sāmita kia Pilikihami ʻIongí
-
Mape: “ Ko e Ngaahi Fononga Fakafaifekau ʻa e ʻAposetolo ko Paulá ”
-
Lēsoni fakataumuʻá: Ipu ʻe tolu, ko ha meʻa ke ne fakatali e hake ʻa e vaí (hangē ko ha laulau), laʻipepa pe tāpuni, pea mo ha meʻa fefeka ʻokú ne fakafonu e konga lahi ʻo e taha ʻo e ngaahi ipú (hangē ko ha foʻi maka)
-
Fokotuʻu ki hono akoʻi ʻi he konifelenisi vitioó: Fakakaukau ke huluʻi ʻa e foʻi vitiō “Tafaʻaki ʻo e Filí” (3:38), ʻoku ʻi he ChurchofJesusChrist.org, ke fakaʻaliʻali ki he kau akó ha sīpinga ʻo e founga naʻe hoko ai ʻa e Laumālie Māʻoniʻoní ko ha tāpuaki kia Palesiteni Poiti K. Peeka (1924–2015) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi heʻene ngāue ʻi he Tau Lahi Hono II ʻa Māmaní.
Fakamanatu ʻo e Fakataukei Fakatokāteliné 15
Taumuʻa ʻo e lēsoní: ʻE ʻoange ʻe he lēsoni ko ʻení ha ngaahi faingamālie ki he kau akó ke nau akoako fakaʻaongaʻi ha niʻihi ʻo e ngaahi potufolofola fakataukei fakatokāteliné ki ha ngaahi tūkunga fakafaiako kehekehe.
Fakatokangaʻi ange: ʻE ala fiemaʻu ke akoʻi ha lēsoni fakataukei fakatokāteline ke fetongi ʻaki ʻa e lēsoni fakamanatu ko ʻení. Vakai ki he taimi-tēpile ki he vave hono akoʻí ʻa ia ʻoku ʻomi ʻe he talēkita fakaʻēliá pe vahefonuá pe kouʻōtineitá ke fakapapauʻi ʻe akoʻi e lēsoni fakataukei fakatokāteline takitaha lolotonga e fakataha ʻa e seminelí.
-
Teuteu ʻa e tokotaha akó: Fakaafeʻi e kau akó ke nau fakakaukau ki ha ngaahi aʻusia kuo nau maʻu ʻi hono fakaʻaongaʻi ʻo e folofolá ke tali ha ngaahi fehuʻi pe akoʻi e ongoongolelei ʻo Sīsū Kalaisí ki he niʻihi kehé.
-
Saati: Ko ha saati ʻo e ngaahi potufolofola fakataukei fakatokāteliné mo honau ngaahi kupuʻi lea mahuʻinga he folofolá.
-
ʻEkitivitī fakakulupú: Faʻu ha ngaahi fakaʻilonga ki he ngaahi tūkunga ʻe fā ʻi he ʻekitivitī fakakulupú. Teuteu ha founga ke fakaʻaliʻali ai e ngaahi fakahinohinó mo e ngaahi fehuʻi ʻe aleaʻi ʻe he kau akó ʻi he ʻekitivitī fakakulupú.
-
Fokotuʻu ki hono akoʻi ʻi he konifelenisi vitioó: Ke ʻoange ha ngaahi faingamālie ki ha kau ako tokolahi ange ke vahevahe ʻenau ngaahi fakakaukaú, ʻe lava ke ke vahevahe e kau akó ki ha loki ʻe fā pea vahe ki he kulupu takitaha ha taha ʻo e ngaahi tūkunga mei he ʻekitivitī fakakulupú.