Jesus Christ is standing on a hill over looking a river
Ko e taumuʻa ʻe taha ʻo e fakataukei fakatokāteliné ke tokoni ke mahino kiate koe ʻa e ngaahi akonaki ʻa e Fakamoʻuí ʻoku ʻi he ngaahi potufolofola fakataukei fakatokāteliné pea lava ke fakamatalaʻi kinautolu ʻi hoʻo lea pē ʻaʻau. ʻE ʻoatu ʻe he lēsoni ko ʻení ha faingamālie ke fakaloloto hoʻo mahinó mo fakamatalaʻi e ngaahi moʻoni fekauʻaki mo ha potufolofola fakataukei fakatokāteline ʻe taha pe lahi ange mei he Fuakava Foʻoú.
Teuteu ʻa e tokotaha akó: Fakaafeʻi e kau akó ke toe vakaiʻi e ngaahi potufolofola fakataukei fakatokāteline ʻe ako ʻi he lēsoni ko ʻení pea haʻu mateuteu ke aleaʻi kinautolu. ʻE lava ke fakaʻaongaʻi ʻe he kau akó ʻa e Fakamatala ki he ʻElito ʻo e Fakataukei Fakatokāteliné (2022) pe ko e app Fakataukei Fakatokāteliné ke tokoni ki hono fakamanatú.
Ngaahi ʻEkitivitī Ako ʻOku Ala Fakahokó
ʻE ala fiemaʻu ke akoʻi ha lēsoni fakataukei fakatokāteline ke fetongi ʻaki ʻa e lēsoni fakamanatu ko ʻení. Vakai ki he taimi-tēpile ki he vave hono akoʻí ʻa ia ʻoku ʻomi ʻe he talēkita fakaʻēliá pe vahefonuá pe kouʻotineitá ke fakapapauʻi ʻe akoʻi e lēsoni fakataukei fakatokāteline takitaha lolotonga e fakataha ʻa e seminelí. Kapau ʻe fiemaʻu, fetongi ha taha ʻo e ngaahi potufolofola naʻe toe vakaiʻi ʻi he lēsoni ko ʻení ʻaki ha ngaahi potufolofola kehe ʻe ala fiemaʻu ke tokanga taha ki ai ʻa e kau akó.
Fakamanatu
ʻOange ha faingamālie ki he kau akó ke nau fakamanatu ʻa e ngaahi potufolofola fakataukei fakatokāteline ʻo e lēsoni ko ʻení mo honau ngaahi kupuʻi folofola mahuʻinga ʻoku fekauʻaki mo iá. Fakakaukau ke fakaʻaongaʻi ʻa e ʻekitivitī fakatauhoa ko ʻení pe ko ha ʻekitivitī kehe. (Ko e ngaahi tali tonu ki he ʻekitivitī ko ʻení ko e 1-e, 2-h, 3-a, 4-f.)
a. ʻOku ongoʻi loto-mamahi ha niʻihi ʻo e kau mēmipa ho fāmilí koeʻuhí ko ha ʻofaʻanga ne toki mālōlō pea ʻoku nau ongoʻi he ʻikai ke nau toe mamata kiate ia.
e. ʻOku tui ha kakai ʻe niʻihi ʻoku ʻanautolu honau sinó pea te nau lava ʻo fai ha meʻa pē ʻoku nau loto ke fai ki aí. ʻOku ʻikai ke nau fakatokangaʻi naʻe fuesia ʻe he Fakamoʻuí ʻa hono huhuʻi kitautolú, ʻa ia ko hono ʻuhingá ke “fakatau mai kitautolu.” ʻI he ʻuhinga ko ʻení, ʻoku ʻikai haʻatautolu ʻetau moʻuí ka ʻoku tau moʻua ki he Fakamoʻuí.
f. ʻOku tui ha kakai tokolahi ki hēvani mo heli ka naʻe ʻikai mahino kiate kinautolu ʻa e ngaahi moʻoni fekauʻaki mo e moʻui hili ʻa e maté mo e ngaahi sino toetuʻú.
h. ʻOku fehuʻi atu ʻe ha kaungāmeʻa pe ko e hā e ʻuhinga te ke fakamuʻomuʻa ai ha nofomali mo e ngaahi vā fetuʻutaki fakafāmili mālohí ʻi he lavameʻa fakapalofesinalé mo e paʻangá.
Mahino pea Fakamatalaʻi
Naʻe akoʻi ʻe Palesiteni Lāsolo M. Nalesoni ʻa e founga ʻe lava ke fakafehokotaki ai kitautolu ʻe he folofolá kia Sīsū Kalaisí.
ʻĪmisi
Official portrait of President Russell M. Nelson taken January 2018
ʻOku akoʻi [‘e he folofolá] kitautolu kau kia Sīsū Kalaisi mo ʻEne ongoongoleleí, maʻongoʻonga ʻo ʻEne Fakaleleí, mo e palani lahi ʻo e fiefia mo e huhuʻi ʻa ʻetau Tamaí. ʻOku mātuʻaki mahuʻinga e femoʻuekina fakaʻaho ʻi he folofola ʻa e ʻOtuá ki heʻetau moʻui fakalaumālié ʻo tautautefito ʻi he ngaahi ʻaho ko ʻeni ʻo e fakautuutu e moveuveú. ʻI heʻetau keinanga fakaʻaho he folofola ʻa Kalaisí, ʻe fakahā mai ʻe he folofola ʻa Kalaisí e founga ke tau tali ʻaki e ngaahi faingataʻa naʻe ʻikai ke tau lavelaveʻiloa te tau fehangahangai mo iá.
(Russell M. Nelson, “Fanongo Kiate Ia,” Ensign pe Liahona, Mē 2020, 89)
Tokoni ke mahino lelei ange ki he kau akó ʻa e tokāteline ʻi he ngaahi potufolofola fakataukei fakatokāteliné. Ko e ʻekitivitī ko ʻení ko ha founga ia ʻe taha ʻe lava ke fakahoko ai ʻeni. ʻE lava ke nofotaha e tokanga ʻa e kau akó ʻi he ngaahi potufolofola ʻoku toe vakaiʻi ʻi ʻolungá pe ko ha taha pē ʻo e ngaahi potufolofola fakataukei fakatokāteline ki he Fuakava Foʻoú.
Kapau ʻoku fakaʻaongaʻi ʻa e ʻekitivitī ko ʻení, fakaʻataʻatā ho taimí ke tokoni ki he kau akó ke nau maʻu ha ngaahi fehokotaki ʻoku mahuʻingamālie kia Sīsū Kalaisi ʻi he ngaahi potufolofola kuo nau filí. ʻE ala tokoni ke fakakulupu iiki e kau akó pea fakaafeʻi kinautolu ke vahevahe ʻenau tali ki he ngaahi fehuʻí mo ʻenau kulupú.
Fakakaukauloto angé, kuo kole atu ke ke vahevahe ha potufolofola kuó ne tokoniʻi koe ke ke ako pe ongoʻi ha meʻa fekauʻaki mo Sīsū Kalaisi, ke kamata ʻaki ha ʻekitivitī ʻa e toʻu tupú. Fili ha taha ʻo e ngaahi potufolofola fakataukei fakatokāteline mei he lēsoni ko ʻení pe ko ha taha mei he Fuakava Foʻoú. Fakaafeʻi e Laumālie Māʻoniʻoní ke tokoni atu ke ke ʻiloʻi e ngaahi moʻoni fekauʻaki mo e Fakamoʻuí ʻokú ne fakaloloto hoʻo mahino kiate Iá, ko ʻEne ongoongoleleí, ko ʻEne Fakaleleí, pe palani ʻo e fakamoʻui ʻa e Tamai Hēvaní.
Ko e potufolofola fakataukei fakatokāteline fē naʻá ke filí?
Ko e hā e moʻoni pe tokāteline naʻá ke ʻilo mei he potufolofola ko ʻení?
Naʻe mei kehe fēfē nai e moʻui ʻa ha taha kapau naʻe ʻikai ke nau ʻilo ʻa e moʻoni naʻá ke ʻiló?
ʻE tokoni fēfē ʻa e mahino kiate koe ʻa e moʻoni ko ʻení ke ke ofi ange ai ki he Fakamoʻuí?
Ngaahi ʻEkitivitī Fakalahi ki he Akó
Fakamanatu mo e app Fakataukei Fakatokāteliné
Fakakaukau ki ha ngaahi founga ke fakaʻaongaʻi ai ʻa e app Fakataukei Fakatokāteliné ke tokoni ki he kau akó ke fakamanatu pe ako maʻuloto e ngaahi potufolofola fakataukei fakatokāteliné.
Ngaahi founga kehe ke tokoni ke mahino mo lava ke fakahoko ai ʻe he kau akó ha fakamatalá
Mahinó—ʻE lava ke kumi ʻe he kau akó ʻa e ʻuhinga ʻo e ngaahi foʻi leá ʻi heʻenau ngaahi potufolofola fakataukei fakatokāteline kuo filí pea lipooti ha ngaahi fakakaukau kehe ne nau maʻu. ʻE lava ke fakaʻaongaʻi ʻe he kau akó ha tikisinale pe ko e Fakahinohino ki he Ngaahi Folofolá ke kumi e ngaahi foʻi leá.
Mahino—ʻE lava ke toe hiki ʻe he kau akó e ngaahi potufolofola fakataukei fakatokāteline ne nau filí ʻi he lea pē ʻanautolu.
Fakamatalaʻí—Ke tokoni ke fakamatalaʻi ʻe he kau akó e ngaahi moʻoni ʻi he ngaahi potufolofola fakataukei fakatokāteliné, fakakaukau ke ʻomi ha ngaahi meʻa iiki ki he kalasí pea fakaafeʻi e kau akó ke fili ha meʻa ʻoku nau ongoʻi ʻokú ne fakatātaaʻi e moʻoní ʻi he potufolofola fakataukei fakatokāteline kuo nau filí. Te nau lava leva ʻo fakaʻaongaʻi ʻa e meʻa naʻa nau filí ke tokoni ki hono fakamatalaʻi ʻo e moʻoní.
