Mga Buhat 16

“Gitawag Kami sa Dios … sa Pagmantala sa Maayong Balita”

Sa Iyang pagpanamilit sa Iyang Apostoles ang Manluluwas mimando kanila sa “pagtudlo sa tanang kanasoran, pagpamautismo kanila sa ngalan sa Amahan ug sa Anak ug sa Espiritu Santo” (Mateo 28:19). Si Pablo ug ang iyang mga kauban nakahimo og talagsaon nga paglambo sa pagtuman niini nga sugo. Ang katuyoan niini nga leksiyon mao ang pagtabang kanimo sa pag-ila sa tabang nga gitinguha sa Manluluwas nga ikahatag kanimo diha sa imong pagpaningkamot sa pagpaambit sa Iyang ebanghelyo ngadto sa uban.

Paggamit sa doktrina ug mga baroganan. Ang mga magtutudlo kinahanglang magdasig sa mga estudyante sa paggamit sa kamatuoran sa ilang kinabuhi. Ang paggamit mahitabo kon ang mga estudyante maghunahuna, mosulti, ug magpuyo sumala sa mga baroganan nga ilang nakat-onan. Samtang gamiton sa mga estudyante ang mga baroganan sa ebanghelyo diha sa ilang mga kinabuhi, madawat nila ang gisaad nga mga panalangin ug makaangkon og mas lawom nga panabot ug pagpamatuod bahin sa unsay ilang gigamit.

Pagpangandam sa estudyante: Dapita ang mga estudyante nga mainampoong mangayo sa Langitnong Amahan nga tabangan sila nga maila ang tawo nga Iyang giandam aron mamati sa ebanghelyo ni Jesukristo.

Posible nga mga Kalihokan sa Pagkat-on

Kini nga leksiyon nagtino sa duha ka mga asoy sa misyonaryong buhat ni Pablo nga natala diha sa Mga Buhat 16 . Hatagig pagtagad ang mga pag-aghat sa Espiritu ug ang panginahanglan sa mga estudyante sa pag-ila kon labing maayo ba ang paggahin sa tanang oras sa klase nga magpokus sa usa niining mga asoy o sa pagpokus sa duha.

Pagpaambit sa ebanghelyo sa uban

Ipakita ang mosunod nga hulagway, ug hangyoa ang mga estudyante sa pagpamubo sa unsay ilang nasayran mahitungod sa unsa ang gipasabot niini nga hulagway. Kon gikinahanglan, dapita sila sa pagbasa sa Mateo 28:19 agig tabang.

Lagmit inyong nahinumdoman nga human sa Pagkabanhaw sa Manluluwas, Iyang gitigom ang Iyang Apostoles ug gihatagan sila sa mosunod nga sugo: “Busa panglakaw kamo, ug himoa ninyong mga tinun-an ang tanang kanasoran, sa pagpamautismo kanila sa ngalan sa Amahan, ug sa Anak, ug sa Espiritu Santo” ( Mateo 28:19).

Si Elder Dieter F. Uchtdorf sa Korum sa Napulog Duha ka Apostoles mipaambit sa mosunod nga mga hunahuna mahitungod sa sugo sa Manluluwas sa pagsangyaw sa ebanghelyo. Mahimo ninyong tan-awon ang bidyo nga “Misyonaryo nga Buhat: Pagpakigbahin sa Unsay Anaa sa Inyong Kasingkasing” gikan sa time code 2:46 hangtod 3:30 o basaha ang pamahayag sa ubos.

Misyonaryo nga Buhat: Pagpakigbahin sa Unsay Anaa sa Inyong Kasingkasing

Si Elder Uchtdorf naghatag og lima ka mga sugyot kon unsaon pag-apil sa misyonaryo nga buhat.

Kanunay akong namalandong ug nag-ampo mahitungod sa dakong sugo sa Manluluwas ngadto sa iyang mga disipulo … nga “busa panglakaw kamo ug himoa ninyong mga tinun-an ang tanang kanasuran, sa pagpamawtismo kanila sa ngalan sa Amahan ug sa Anak ug sa Espiritu Santo” [ Mateo 28:19 ].

Naningkamot ako sa pagtubag sa pangutana kon “Unsaon nato, isip mga sakop ug mga disipulo ni Kristo, pagtuman niana nga dakong sugo sa atong inadlaw-adlaw nga kinabuhi sa pinakamaayong paagi?”

Karon, dapiton ko kamo sa pagpamalandong niana nga pangutana sa inyong kasingkasing ug hunahuna.

(Dieter F. Uchtdorf, “Misyonaryo nga Buhat: Pagpakigbahin sa Unsay Anaa sa Inyong Kasingkasing,” Ensign o Liahona, Mayo 2019, 15–16)

Agi og dugang sa pangutana nga gidapit kamo ni Elder Uchtdorf nga inyong pamalandongan, mao ang paghunahuna mahitungod sa inyong mga tubag sa mosunod nga mga pangutana. Ikonsiderar ang pagrekord sa inyong mga hunahuna diha sa inyong journal sa pagtuon.

• Sa sukod nga 1–5, unsa kadako ang tinguha ninyo nga mapaambit ang ebanghelyo ngadto sa uban? Nganong ingon niini man ang inyong tubag?

• Unsa nga mga babag ang inyong giatubang sa pagpaambit sa ebanghelyo ngadto sa uban?

Si Apostol Pablo usa kanhi ka gamhanang misyonaryo nga nakadala og daghang mga kalag ngadto kang Jesukristo pinaagi sa iyang pagsangyaw. Niining semanaha, inyong makat-onan ang mahitungod sa pipila ka mga panghitabo nga nahitabo panahon sa ikaduha ug ikatulong misyonaryong mga pagpanaw ni Pablo (tan-awa sa Mga Buhat 15:36–18:22 ug Mga Buhat 18:23–21:15).Ang mosunod nga mapa naghulagway sa mga biyahe ni Pablo panahon niining mga pagpanaw:

Misyonaryo nga Buhat: Pagpakigbahin sa Unsay Anaa sa Inyong Kasingkasing

Si Elder Uchtdorf naghatag og lima ka mga sugyot kon unsaon pag-apil sa misyonaryo nga buhat.

Sa inyong pagtuon sa pipila sa mga kasinatian ni Pablo gikan sa iyang ikaduhang misyon niini nga leksiyon, inyong makita ang mga pananglitan sa mosunod nga kamatuoran: ang Ginoo magdala kanato ngadto sa Iyang mga giandam nga modawat sa Iyang ebanghelyo. Hatagi og pagtagad ang mga pag-aghat sa Espiritu nga mahimong makatabang kaninyo sa inyong mga paningkamot sa pagpaambit sa ebanghelyo ngadto sa uban.

Si Pablo ug ang iyang mga kauban misangyaw sa ebanghelyo didto sa Macedonia

Basaha ang Mga Buhat 16:6–15 , pangitaa kon unsa ang nasinati ni Pablo ug sa iyang mga kauban sa sayong bahin sa ikaduhang misyonaryong panaw ni Pablo.

• Unsa ang inyong makat-onan mahitungod sa Langitnong Amahan gikan niining asoy nga makatabang kaninyo sa inyong mga paningkamot sa pagpangita niadtong mga giandam sa Ginoo nga modawat sa Iyang ebanghelyo?

• Giunsa ninyo pagkakita sa pag-andam sa Ginoo sa uban aron modawat sa Iyang ebanghelyo? Giunsa Niya pag-andam o unsaon Niya pag-andam kaninyo aron makakaplag og mga tawo nga nangita Kaniya?

Ikonsiderar usab ang pagpaambit og usa ka personal nga kasinatian nga may kalabotan sa pagpaambit sa ebanghelyo.

Si Pablo ug si Silas gibilanggo ug nagpadayon sa pagsangyaw

Human si Pablo ug ang iyang mga kauban mitudlo ug mibunyag ni Lydia, si Pablo nanghingilin og daotang espiritu pagawas sa usa ka batan-ong babaye nga sulogoon (tan-awa sa Mga Buhat 16:16–18). Siya ug ang iyang kauban nga si Silas kay gilatos ug gibilanggo (tan-awa sa Mga Buhat 16:19–24). Ang pagkabalhog sa bilanggoan tungod sa pagsangyaw sa ebanghelyo mahimo tingali nga salabtonon nga rason nga moundang sa pagsangyaw. Apan alang kang Pablo ug Silas, kini naghatag og kahigayonan sa pagtabang sa uban nga moduol kang Kristo.

Basaha ang Mga Buhat 16:25–36 aron makita giunsa sa Ginoo paghimo nga kahigayon ang pagkabilanggo nila Pablo ug Silas aron sila makasangyaw sa ebanghelyo.

• Unsa nga mga Kristohanong hiyas ang gipakita ni Pablo ug Silas dinhi niini nga asoy?

• Giunsa man niining mga hiyas paghimo kanila nga mas epektibo sa pagpaambit sa ebanghelyo?

• Unsa ang inyong nakat-onan gikan niini nga asoy nga makatabang kaninyo sa inyong mga paningkamot nga makakita sa kadtong mga giandam sa Ginoo nga modawat sa Iyang ebanghelyo?

Paggamit sa inyong nakat-onan

Human matun-i ang mga asoy gikan sa Mga Buhat 16 , ikonsiderar ang paggahin og panahon sa paghisgot og mga paagi nga kita mas epektibong makapaambit sa ebanghelyo ngadto sa uban. Isip kabahin niini nga diskusyon, mahimong dapiton ang mga estudyante sa pagpaambit og ilang mga kasinatian sa pagpaambit sa ebanghelyo.

Pinaagi sa Espiritu Santo, pangita og inspirasyon gikan sa Langitnong Amahan aron maila ang usa ka butang nga inyong mahimo aron makapaambit sa ebanghelyo ni Jesukristo ngadto sa uban. Pagpili og usa sa mosunod nga mga imbitasyon nga pamati ninyo mas labing makabenepisyo kaninyo:

• Pag-ampo matag adlaw sa Ginoo aron magiyahan kamo ngadto sa tawo nga Iyang giandam nga modawat sa ebanghelyo.

• Ikonsiderar ang paglista og duha ka mga ngalan sa higala o mga klasmeyt sa tulunghaan nga posibleng madinawaton sa pagpaminaw sa ebanghelyo ni Jesukristo. Dayon hangyoa ang Langitnong Amahan sa pagtabang kaninyo kon unsaon ninyo pagkahimong instrumento sa Iyang mga kamot aron madala sila ngadto sa Manluluwas.

• Inubanan sa hustong pagtugot gikan sa inyong mga ginikanan ug mga lider, pagtrabaho kuyog sa magkaubang misyonaryo sulod sa pipila ka oras. Ipaambit ang inyong kasinatian ngadto sa klase sa umaabot nga panahon.

• Paghunahuna og inyong kaugalingong ideya sa usa ka butang nga inyong mahimo aron mapaambit ang ebanghelyo sa uban.

Human mahatagan ang mga estudyante og panahon sa paghimo og usa ka plano, dapita sila sa paghunahuna og mga babag nga lagmit ilang atubangon nga maoy makapalisod sa pagtuman sa ilang mga plano. Dasiga sila sa paghunahuna og mga paagi nga ilang mabuntog kining mga babag inubanan sa tabang sa Ginoo. Paghatag og pagdasig ug suporta, ug pagpamatuod sa mga kamatuoran nga nahisgotan.

Komentaryo ug Background nga Impormasyon

Unsaon man pagtabang sa social media kanako aron mapaambit ang ebanghelyo?

Unsa kaha kon ang mga tawo mosalikway sa inyong imbitasyon nga magkat-on og dugang niining panahona?

Si Elder Dieter F. Uchtdorf sa Korum sa Napulog Duha ka Apostoles mitudlo:

Ako mong pahinumdoman nga wala magkinahanglan ang Dios nga inyong “ibaligya” ang gipahiuli nga ebanghelyo o ang Simbahan ni Jesukristo. Nagpaabot lamang Siya nga dili ninyo kini itago ilawom sa gantangan. Ug kon ang mga tawo mohukom nga ang Simbahan dili alang kanila, ila kanang desisyon. Wala kana magpasabut nga napakyas kamo. Padayon ninyo silang trataron sa mabinationg paagi. Ni kini wala na magpalakip nila aron inyo silang dapiton pag-usab. Ang kalainan tali sa kaswal nga sosyal nga pakigkontak ug maloloy-on, maisugong pagkadisipulo mao ang—pagdapit!

(Dieter F. Uchtdorf, “Ang Inyong Mahinungdanong Pagpanimpalad,” Ensign o Liahona, Nob. 2019, 88)

Si Elder Neil L. Andersen sa Korum sa Napulog Duha ka Apostoles nag-ingon:

Bisan anaa ang dakong tinguha sa pagpaambit sa ebanghelyo, tingali mas minus ang inyong kalipay sa mga kalampusang milabay. Tingali mobati ka sama sa higala nga miingon, “nakig-istorya na ko sa akong pamilya ug mga higala bahin sa Simbahan, apan diyutay ra ang nagpakita’g interes ug sa matag balibad, magpanuko na hinoon ko. Nasayod kong angay pa kong mohimo og daghan, apan wa na ko molihok ug mibati nga sad-an kaayo ko.” …

Mosugyot ko, ayaw pagbati nga sad-an ka tungod kay nagkulang ka sa imong pagpaambit sa ebanghelyo. Hinoon, pag-ampo, sama sa gitudlo ni Alma, sa mga oportunidad, “aron makabarog ka [nga usa ka] saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit … nga [ang uban] matubos sa Dios, ug malakip uban niadto nga diha sa unang pagkabanhaw, [ug] makabaton og kinabuhi nga dayon.” [Mosiah 18:9]. Mas makadasig kini kay sa mobati nga sad-an.

(Neil L. Andersen, “Usa ka Saksi sa Dios,” Liahona, Nob. 2016, 36–37)

Unsaon nako pagpangita og mga tawo nga katudloan?

Si Presidente Dallin H. Oaks sa Unang Kapangulohan mitudlo:

Kita kinahanglan gayod nga mag-ampo alang sa panabang ug mga direksiyon sa Ginoo aron kita mahimong mga instrumento diha sa Iyang mga kamot alang sa usa ka tawo kinsa andam na karon—usa ka tawo nga gusto Niya nga atong tabangan karon. Niana, kinahanglan gayod nga kita magmabinantayon sa pagpaminaw ug sa pagtagad sa mga pag-aghat sa Iyang Espiritu kon unsaon nato sa pagpadayon.

Kadto nga mga pag-aghat moabot. Nahibalo kita gikan sa dili maihap nga personal nga mga pagpamatuod nga sa Iyang kaugalingon nga paagi ug sa Iyang kaugalingon nga panahon ang Ginoo nag-andam og mga tawo nga modawat sa Iyang ebanghelyo. Ang maong mga tawo nagsiksik, ug kon kita maningkamot sa pag-ila kanila ang Ginoo motubag sa ilang mga pag-ampo pinaagi sa pagtubag sa atoa. Siya moaghat ug mogiya niadtong kinsa nagtinguha ug kinsa sa sinsero nga paagi naninguha og paggiya kon unsaon, asa, kanus-a, ug kang kinsa makigbahin sa Iyang ebanghelyo.

(Dallin H. Oaks, “Sharing the Gospel,” Ensign, Nob. 2001, 8)

Dugang nga mga Kalihokan sa Pagkat-on

Usa ka alternatibong paagi sa pagsugod sa klase

Sharing the Gospel

What we call “member missionary work” is not a program but an attitude of love and outreach to help those around us.

Pagdapit og usa ka bisita nga mamumulong ngadto sa klase

Pagdapit og usa ka bisita nga mamumulong aron mopaambit panahon sa ikaduhang bahin sa klase og mga paagi nga ang mga miyembro sa Simbahan makahimo og misyonaryong buhat. Hinumdomi ang pagkuha og pagtugot gikan sa lokal nga S&I koordinitor ingon man sa lokal nga lider sa pagkapari sa mamumulong sa dili pa dapiton ang mamumulong.

Ikonsiderar ang paghangyo niini nga bisita sa paglakip sa mga baroganan sa misyonaryong buhat nga gipakita ni Pablo ug iyang mga kauban sa Mga Buhat 16.