Usa sa labing dako nga mga gasa nga gitanyag sa Langitnong Amahan ngadto sa mga disipulo sa pakigsaad ni Jesukristo mao ang gasa sa Espiritu Santo. Busa, si Pablo natingala sa dihang nakahimamat siya og mga disipulo sa Efeso kinsa miingon nga sila nabunyagan apan wala makadungog sa Espiritu Santo. Kini tungod diay kay, sila nabunyagan apan dili sa ngalan ni Jesukristo. Human sila nabunyagan sa “ ngalan sa Ginoong Jesus,” si Pablo mipandong sa iyang mga kamot ngadto kanila ug mihatag kanila sa gasa sa Espiritu Santo (Mga Buhat 19:5). Kini nga leksiyon mahimong makatabang kanimo nga makadawat og mga panalangin nga gitinguha sa Langitnong Amahan ug ni Jesukristo nga mahatag diha kanimo pinaagi sa gasa sa Espiritu Santo.
Mainampoong mangita sa panabang sa Dios sa imong pagtudlo. Ang pagtudlo sa ebanghelyo buhat sa Ginoo, ug gusto Niya nga magmalamposon ka niana nga buluhaton. Kon ikaw magtinguha sa panabang sa Langitnong Amahan, Iyang ipadala ang Espiritu Santo aron pagdasig kaninyo sa pag-andam og usa ka kasinatian sa pagkat-on nga makapanalangin sa imong mga estudyante.
Pagpangandam sa estudyante: Dapita ang mga estudyante sa paghunahuna og mga kinaiya nga nagdapit sa pakig-uban sa Espiritu Santo ug sa pagpaningkamot sa makanunayon nga pagbuhat niadtong mga butanga diha sa ilang kinabuhi.
Ikonsiderar ang pagsulat sa wala pa mahuman nga pamahayag sa pisara ug ipakita ang mosunod nga hulagway sa ubos sa dili pa ipangutana ang mosunod.
Unsa nga tambag sa inyong hunahuna ang lagmit gihatag ni Joseph Smith aron matabangan ang mga miyembro sa Simbahan?
Imahe
Brigham Young seeing Joseph Smith in a vision.
Si Joseph Smith mitambag kang Brigham Young nga “[sultihan] ang mga tawo sa pagseguro sa pagbaton sa Espiritu sa Ginoo ug sa pagsunod niini, kay kini mogiya gyod kanila sa matarong” (Mga Santos, 2:49).
Ikonsiderar ang pagdapit sa mga estudyante sa pagpaambit sa ilang mga hunahuna pinasubay sa mosunod nga pangutana ug sugyot sa entry sa journal. Base sa mga tubag sa estudyante, tinoa kon ang leksiyon kinahanglan bang ipahiangay.
Sa tanang tambag nga mahimong ikahatag ni Joseph ngadto kang Brigham Young, ngano kaha sa inyong hunahuna nga iyang gihatagan pag-ayo og gibug-aton ang pagpangita sa pakig-uban sa Espiritu Santo?
Irekord sa inyong journal ang mga rason nganong sa inyong hunahuna ang mensahe ni Joseph Smith ngadto sa Simbahan gikinahanglan gihapon sa atong panahon ug sa inyong kinabuhi.Sa inyong pagtuon niini nga leksiyon, hunahunaa kon unsaon sa Langitnong Amahan ug ni Jesukristo pagpanalangin sa inyong kinabuhi pinaagi sa gasa sa Espiritu Santo.
Ang gasa sa Espiritu Santo
Sa pagsugod ni Pablo sa iyang ikatulong misyonaryong panaw, siya mibiyahe sa tibuok Galacia ug Frigia. Siya dayon mibiyahe ngadto sa Efeso (tan-awa ang Mga Mapa sa Bibliya, nu.13, “Ang Misyonaryong Mga Panaw ni Apostol Pablo”). Didto iyang nahimamat ug gitudloan ang mga disipulo nga wala pa makadungog sa Espiritu Santo. Kining mga tawhana gibunyagan kaniadto sa usa ka tawo nga walay tukma nga awtoridad (tan-awa sa Joseph Smith, “Baptism,” Times and Seasons, Sept. 1, 1842, 904, josephsmithpapers.org).
Basaha ang Mga Buhat 19:1–7 , pangitaa kon giunsa ni Pablo pagtabang niining mga disipulo.
Ngano kaha sa inyong hunahuna nga gipunting man ni Pablo sa iyang pagtudlo ang bahin kang Jesukristo sa wala pa bunyagi og balik ang mga disipulo?
Sa unsang paagi ninyo mahulagway niining mga tawhana ang importansya sa pagdawat sa gasa sa Espiritu Santo human sa pagbunyag?
Unsa nga mga kamatuoran gikan niining asoy ang lagmit ninyong mapaambit sa usa ka tawo nga gibunyagan kaniadto sa lahi nga relihiyon?
Usa sa mga kamatuoran nga atong makat-onan gikan niini nga asoy mao nga aron makompleto ang pagbunyag, kini gikinahanglang ubanan og pagkompirma ug pagdawat sa Espiritu Santo.
Paggahin og pipila ka minuto sa pagpamalandong kon ngano kaha sa inyong hunahuna nga ang Langitnong Amahan ug si Jesukristo gusto nga maangkon ninyo ang Espiritu Santo isip inyong kauban. Pamalandongi kini samtang magbasa kamo sa mosunod nga mga kasulatan:
Ngano kaha sa imong hunahuna nga ang Langitnong Amahan ug si Jesukristo gusto nga ang Espiritu Santo kanunay ninyong ikauban?
Sa unsang mga paagi nga ang Espiritu Santo dako og gikatabang sa imong kinabuhi? Ngano man?
Ang mosunod nga sugyot mahimong makatabang sa mga estudyante sa paghisgot unsa ang atong angayang buhaton aron mas makadawat sa giya sa Espiritu Santo. Gawasnon kamong mogamit og uban pang mga paagi sa pagtuman niini nga tumong.
Aron matabangan kamo nga mahanduraw ug masabtan ang panginahanglan sa pag-andam sa inyong kaugalingon sa pagdawat sa giya gikan sa Espiritu Santo, kompletoha o handurawa ang mosunod nga kalihokan.
Pagbutang og tulo ka walay sulod nga mga tasa sa usa ka lababo o sa usa ka tray nga kasudlan og tubig. Tabuni pag-ayo ang usa ka tasa og papel o taklob. Pagbutang og butang (sama sa usa ka bato) sa lahi nga tasa nga makaokupar sa halos tibuok sulod sa tasa. Dayon sulayi pagpuno ang kada tasa og tubig.
Kon ang mga tasa nagrepresentar kanato ug ang tubig nagrepresentar sa Espiritu Santo, unsa kaha ang girepresentar sa piraso sa papel (o tabon) ug sa bato (o ubang butang) sa kinabuhi sa tawo?
Basaha kining duha ka mga pamahayag ni Elder David A. Bednar sa Korum sa Napulog Duha ka Apostoles mahitungod sa Espiritu Santo:
Imahe
Elder David A. Bednar, Quorum of the Twelve Apostles official portrait. 2020.
Ang Espiritu Santo wala himoa nga kanunayng maglihok sa atong kinabuhi tungod lamang kay gipandungan na kita sa mga kamot sa atong ulo ug gipamulong na kadtong importanteng mga pulong [“dawata ang Espiritu Santo”].
Elder David A. Bednar, Quorum of the Twelve Apostles official portrait. 2020.
Kon adunay butang nga atong mahunahuna, makita, madungog, o mabuhat nato nga makapalayo sa Espiritu Santo, nan moundang kita sa paghunahuna, pagtan-aw, pagpaminaw, o pagbuhat sa mao nga butang. Kon kanang butang gituyo aron sa paglingaw, pananglitan, makapabulag kanato sa Balaang Espiritu, nan sigurado kana nga kalingawan dili para kanato. Tungod kay ang Espiritu dili makapuyo nianang bulgar, mahugaw, o dili ligdong, nan klaro nga ang ingon nga mga butang dili gayud para kanato.
(David A. Bednar, “Nga Kita Unta sa Kanunay Makabaton sa Iyang Espiritu Uban Kanato,” Ensign o Liahona, Mayo 2006, 30)
Unsa ang gitudlo ni Elder Bednar nga sa inyong hunahuna labing importanteng masabtan sa kabatan-onan karon? Ngano man?
Pahinumdomi ang mga estudyante sa sugyot sa pagpangandam sa estudyante diha sa ilang pagtubag sa mosunod nga mga pangutana.
Unsaon ninyo pag-ila ang pagpakig-uban sa Espiritu Santo sa inyong kinabuhi? Kanus-a ang pinakabag-ong higayon nga inyong naila ang Iyang impluwensiya?
Unsa nga mga desisyon ang inyong nabuhat nga nakatabang kaninyo nga kanunayng ikauban ang Espiritu Santo? Sa unsang paagi nga ang Langitnong Amahan nakapanalangin kaninyo pinaagi niini nga gasa?
Mahimong mopaambit og usa ka personal nga kasinatian nga nakapanalangin kaninyo pinaagi sa impluwensiya sa Espiritu Santo.
Paghimo og plano sa pagdawat sa impluwensiya sa Espiritu Santo nga mas bug-os ug mas makanunayon sa inyong kinabuhi. Pangayoa ang tabang sa Langitnong Amahan sa inyong plano ug aron panalanginan ka nga maila ang Iyang impluwensiya pinaagi sa Espiritu Santo diha sa inyong pagbuhat sa katumanan niini.
Komentaryo ug Background nga Impormasyon
Nganong importante man nga ako modawat sa impluwensiya sa Espiritu Santo sa akong kinabuhi?
Si Presidente Russell M. Nelson mitanyag sa mosunod nga imbitasyon alang sa matag usa kanato.
Imahe
Official portrait of President Russell M. Nelson taken January 2018
Sa umaabot nga mga adlaw, dili na posible ang espirituhanong pagsugakod kon wala ang giya, direksiyon, ug makahupay nga impluwensiya sa Espiritu Santo.
Akong minahal nga mga kaigsoonan, mohangyo ko kaninyo sa pagpalambo sa inyong espirituhanong kapasidad sa pagdawat og pagpadayag. Himoa kining [adlawa] nga higayon nga makapausab gayod sa inyong kinabuhi. Pilia ang paghimo sa espiritwal nga buhat nga maoy gikinahanglan aron sa pagtagamtam sa gasa sa Espiritu Santo ug mas kanunay ug mas klaro nga pagpaminaw sa tingog sa Espiritu.
Sa unsa nga paagi ako mas duol sa pagbaton og makanunayong pakig-uban sa Espiritu Santo?
Si Presidente Henry B. Eyring sa Unang Kapangulohan miingon:
Imahe
Official Portrait of President Henry B. Eyring taken March 2018.
Alang sa daghang mga rason, gikinahanglan nato ang kanunay nga pakig-uban sa Espiritu Santo. Kita nagtinguha niini, apan nasayod kita gikan sa kasinatian nga dili sayon ang pagmentinar niini. Matag usa nato makahunahuna, makasulti, ug makabuhat og mga butang sa atong inadlaw nga pagpakabuhi nga makapasilo sa Espiritu. Ang Ginoo mitudlo nato nga ang Espiritu Santo makauban nato sa kanunay kon ang atong mga kasingkasing puno sa gugma nga putli ug kon ang hiyas modayan-dayan sa atong hunahuna nga walay paghunong [tan-awa sa Doktrina ug Mga Pakigsaad 121:45 ]. …
… Ang pinakabililhong inspirasyon mao nga kamo mahibalo sa unsay gustong ipabuhat kaninyo sa Dios. Kon pabayaron mo og ikapulo o pabisitahon og nagsubo nga higala, kinahanglang buhaton ninyo kini. Bisan unsa pa man, buhata kini. Kon inyong gipakita ang inyong kaandam sa pagsunod, ang Espiritu mopadala ninyo og dugang nga mga pag-aghat kon unsay ipabuhat sa Dios kaninyo.
Kon mosunod kamo, ang mga pag-aghat sa Espiritu mas kanunayng moabot, mas magkaduol ngadto sa kanunay nga pagpakig-uban.
(Henry B. Eyring, “Ang Espiritu Santo isip Inyong Kauban,” Ensign o Liahona, Nob. 2015, 105)
Sa iyang pakigpulong nga “Dawata ang Espiritu Santo” (Ensign o Liahona, Nob. 2010, 95–97), si Elder David A. Bednar sa Korum sa Napulog Duha ka Apostoles mipaambit usab sa iyang mga panabot kon unsaon nato pagdapit ang pakig-uban sa Espiritu Santo.
Dugang nga mga Kalihokan sa Pagkat-on
Pag-ila sa impluwensiya sa Espiritu Santo mahimong madugay
Dasiga ang mga estudyante nga magmapailubon sa ilang kaugalingon ug dili moundang sa ilang pagkat-on sa pagdawat ug pag-ila sa impluwensiya sa Espiritu Santo sa ilang kinabuhi.
Dapita ang mga estudyante sa pagbasa sa 3Nephi 9:20 aron makita ang usa ka pananglitan sa matinud-anong mga disipulo kinsa wala dayon makaila sa bug-os nga impluwensiya sa Espiritu Santo sa ilang mga kinabuhi. Dayon dapita ang mga estudyante sa pagpaambit kon unsa ang nakatabang kanila sa pagsugod sa pag-ila niini sa ilang mga kinabuhi, lakip na ang paghulagway sa lainlaing mga paagi nga nabati nila ang impluwensiya sa Espiritu Santo.
Mga posibleng hinungdan nga gibunyagan pag-usab ang Efesohanong mga disipulo
Dapita ang mga estudyante sa pagbasa sa 3Nephi 11:18–28 , pangitaa kon unsa ang gitudlo ni Jesukristo mahitungod sa mga gikinahanglan sa pagbunyag aron madawat ngadto Kaniya. Unsa niining mga gikinahanglan ang lagmit nawala gikan sa miaging pagbunyag sa Mga Efesohanon? Sa unsang paagi nga ang binunyagan sa tukmang awtoridad nag-andam kanato sa pagdawat sa gasa sa Espiritu Santo?
Pagpamatuod nga ang awtoridad sa pagkapari sa Dios sa pagbunyag ug paghatag sa gasa sa Espiritu Santo kay gipahiuli sa kalibotan pinaagi ni Propeta Joseph Smith.
