Mga Buhat 17:16–34

“Mga Anak man Kita sa Dios”

Samtang naghulat sa iyang misyonaryong mga kauban sa pag-uban kaniya sa Atenas, si Apostol Pablo nabalaka pag-ayo nga ang mga tawo sa Atenas nagsimba og dios-dios [idolatrous] ug wala makasabot sa tinuod nga kinaiya sa Dios. Aron matabangan ang mga taga Atenas nga makasabot ug mahiduol sa Dios, si Pablo nagtudlo sa ebanghelyo ni Jesukristo diha sa mga sinagoga ug sa mga merkado. Ang mga pilosopo dayon midapit ni Pablo sa pagpasabot “niining bag-ong doktrina” (Mga Buhat 17:19) sa usa ka dapit nga gitawag og Mars’ Hill. Si Pablo nagtudlo sa mga pilosopo sa tinuod nga kinaiya sa Dios ug nagmatuod sa ilang diosnon nga relasyon Kaniya. Kini nga leksiyon makatabang kaninyo nga mabati ang importansiya sa inyong pagkatawo isip usa ka anak sa Dios.  

Mosalig sa mga estudyante. Saligi ang abilidad sa inyong mga estudyante nga matuman nila ang ilang mga papel diha sa ilang pagkat-on, pagtudlo, ug paggamit sa doktrina ug mga baroganan sa ebanghelyo.

Pagpangandam sa estudyante: Dapita ang mga estudyante sa paghimo og listahan sa mga pulong o hugpong sa mga pulong [phrases] nga labing naghulagway kanila ug sa pagpamalandong kon hain sa mga pulong o hugpong sa mga pulong ang labing importante alang kanila.

Posible nga mga Kalihokan sa Pagkat-on

Ako anak sa Dios

Mahimong kantahon ang “Ako Anak sa Dios” (Mga Himno, nu. 189) kauban sa mga estudyante sa dili pa sugdan ang leksiyon.

Paminawa ang himno nga “Ako Anak sa Dios” (Mga Himno, nu. 189) sa Gospel Library nga app o sa ChurchofJesusChrist.org. Sa inyong pagpaminaw o pagkanta, pamalandongi ang kamahinungdanon sa mensahe niini nga himno.

Unsa nga mga pulong o hugpong sa mga pulong gikan niini nga himno ang inyong nakita nga mahinungdanon? Ngano man?

2:54

Si Elder Donald L. Hallstrom sa Kapitoan nagdapit kanato sa pagpamalandong sa mensahe sa “Ako Anak sa Dios”:

Kining pinalanggang himno usa sa kanunay gayod nga kantahon niini nga Simbahan. Apan ang importanteng pangutana mao, nasayod ba gayod kita niini? Nasayod ba gayod kita niini diha sa atong hunahuna ug sa atong kasingkasing ug sa atong kalag? Ang atong langitnong kagikan ba ang nag-una ug labing importante nga ilhanan sa atong kaugalingon?

(Donald L. Hallstrom, “Ako Anak sa Dios,” Ensign o Liahona, Mayo 2016, 26)

Ikonsiderar ang pagsulat sa pisara sa mosunod nga mga pangutana, nga gikuha gikan sa pamahayag ni Elder Hallstrom. Hatagi og panahon ang mga estudyante sa pagpamalandong sa pangutana. Pagdapit og andam nga mga estudyante sa pagpaambit giunsa nila pagkasayod nga sila mga anak sa Dios. Pagmatngon nga dili mapakaulawan ang mga estudyante kinsa lagmit nagduhaduha pa sa ilang pagtuo ug relasyon sa Dios.

Ang mosunod nga mga pangutana gipahiangay gikan sa pamahayag ni Elder Hallstrom ug mahimong matubag og “oo” o “dili” nga tubag. Sa inyong pagtubag niini nga mga pangutana, ipasabot nganong gitubag ninyo ang matag pangutana sa paagi nga inyong gihimo.

Nasayod ba gayod ka nga ikaw anak sa Dios?
Nahibalo kaba niini diha sa imong hunahuna, kasingkasing, ug kalag?
Nakita ba nimo ang imong kaugalingon isip usa ka anak sa Dios sa dili pa nimo ilhon ang imong kaugalingon bisan unsa?

Sa kinatibuk-an niini nga leksiyon, hunahunaa ang inyong mga tubag sa miaging mga pangutana ug sa unsa nga paagi nga ang inyong mga tubag nagpasabot sa inyong mga pagbati ngadto sa Langitnong Amahan. Pangita og inspirasyon gikan sa inyong Langitnong Amahan, pinaagi sa Espiritu Santo, aron matabangan kamo nga mas makasabot sa inyong diosnon nga pagkatawo isip usa ka anak sa Dios ug makabati sa lawom nga paghigugma Niya alang kaninyo.

Si Pablo nagsangyaw sa Atenas

Si Apostol Pablo nagsangyaw sa Atenas panahon sa iyang ikaduhang misyonaryong panaw. Ang mga tawo sa Atenas adunay daghang lainlaing mga opinyon, mga pilosopiya, ug mga tinuohan. Si Pablo nakakita nga ang mga tawo “nalukop sa mga diosdios” ( Mga Buhat 17:16), pasabot nga sila nagdayeg sa mga butang gawas sa Dios. Maong si Pablo nagsangyaw matag adlaw mahitungod ni Jesukristo ug sa Iyang Pagkabanhaw. Dayon si Pablo gidala ngadto sa Mars’ Hill, diin siya giawhag sa pagsangyaw atubangan sa usa ka grupo sa mga pilosopo (tan-awa sa Mga Buhat 17:17–21).

Basaha ang Mga Buhat 17:22–23 , og pangitaa giunsa ni Pablo pagpaila ang iyang mensahe.

4:26

Unsa ang gisugyot sa kinulit diha sa altar nga gihisgotan ni Pablo nagpasabot kabahin sa pagtuo sa mga taga-Atenas mahitungod sa Dios?
Sa unsang paagi nga kini nga kinulit matandi sa unsa ang gitudlo sa mga kasulatan mahitungod sa Dios?

Ang karaang taga-Atenas nagtuo sa daghang mga dios-dios ug nagtukod og mga estatuwa ug mga templo alang sa pagpasidungog kanila. Ang altar “alang sa dios nga wala hiilhi” ( Mga Buhat 17:23) mao ang pagsulay sa mga taga Atenas sa paghupay sa wala hiilhi nga dios o bisan kinsa nga dios kinsa wala mailhi pinaagi sa ngalan.

Mahimong ipakita sa mga estudyante ang hulagway (nalakip unya sa leksyon) sa usa ka seminaryo nga klase sa Mars’ Hill. Ang mga nagun-ob sa luyo maoy usa ka pananglitan sa mga templo nga gitukod aron sa pagpasidungog sa mga dios sa Gresya.

Unsa ang pipila sa komon nga mga sayop nga pagsabot nga inyong namatikdan sa kalibotan karon mahitungod sa Dios ug sa atong relasyon Kaniya?
Kon aduna kamoy kahigayonan sa pagtudlo sa usa ka tawo kinsa wala kaayo masayod mahitungod sa Langitnong Amahan, unsa ang inyong gustong masayran nila mahitungod Kaniya?

Hatagi ang mga estudyante og igong panahon nga makompleto ang mosunod nga kalihokan nga binagsa, managpares, o sa gagmayng mga grupo. Samtang nagtuon ang mga estudyante, ikonsiderar ang paglista sa matag numero sa bersikulo 24–31 diha sa pisara. Dapita ang mga estudyante sa pagduol sa pisara ug isulat sunod sa kada numero sa bersikulo ang usa o daghang mga kamatuoran nga ilang nadiskobrehan sa matag bersikulo. Ang mga estudyante mahimong dapiton sa pagpaambit unsa nga mga kamatuoran ang labing mahinungdanon kanila og ngano.

Basaha ang Mga Buhat 17:24–31 ug paglista og mga kamatuoran nga gitudlo ni Apostol Pablo mahitungod sa tinuod nga kinaiya sa Dios ug sa inyong relasyon Kaniya. Mahimong nganlan ang inyong listahan og “Ang Tinuod ug Buhing Dios ug Akong Relasyon Kaniya.” Timan-i nga adunay Paghubad ni Joseph Smith alang sa bersikulo 27 (tan-awa sa Mga Buhat 17:27). Human mahimo ang inyong listahan, tubaga ang mosunod nga pangutana:

Unsa nga kamatuoran gikan sa inyong listahan ang labing mahinungdanon alang kaninyo, ug ngano?

Mga Anak man Kita sa Dios

Usa sa mga kamatuoran nga inyong naila gikan sa mga pagtulun-an ni Pablo mao nga “mga anak kita sa Dios” ( bersikulo 29).

Sa unsa nga paagi nga ang pagkaanak sa Dios lahi gikan sa usa lang sa Iyang mga nilalang?

Si Presidente M.Russell Ballard sa Korum sa Napulog Duha ka Apostoles nagpamatuod sa kamahinungdanon sa kamatuoran nga “kita mga anak sa Dios.”

Ang lig-ong kamatuoran bahin sa langitnong ginikanan dili lamang ako o inyo nga kamatuoran. Kini mahangtorong kamatuoran. Nahisulat kini diha sa dako, pinabaga, dagkong mga letra. Ang pagsabot niini nga kamatuoran—tinuoray nga pagsabot niini ug ang paghangop niini—makapausab sa kinabuhi. Makahatag kini kaninyo og talagsaong kailhanan nga wala gayoy tawo nga makakuha gikan kaninyo. Apan labaw pa niana, makahatag kini kaninyo og nindot nga pagbati nga bililhon ug pamati sa inyong walay kinutobang bili. Sa kataposan, makahatag kini kaninyo og usa ka balaanon, halangdon, ug takos nga katuyoan sa kinabuhi.

(M. Russell Ballard, “Children of Heavenly Father” [debosyonal sa Brigham Young University, Mar. 3, 2020], 2, speeches.byu.edu)

Unsa nga kalainan ang mahimo niini sa inyong kinabuhi ug sa mga desisyon nga inyong himoon aron makahibalo nga kamo literal nga “ang anak sa Dios”?
Unsa nga mga kasinatian ang nakatabang kaninyo nga mas makasabot sa inyong diosnong kinaiya isip usa ka anak sa Dios?

2:3

Human ang mga estudyante nahatagan og panahon sa pagpamalandong ug pagtubag sa mosunod nga mga pangutana, dapita ang andam nga mga estudyante sa pagpaambit sa ilang mga tubag sa klase. Ikonsiderar ang pagpaambit og pagpamatuod sa mga kamatuoran nga gitudlo.

Unsa ang inyong nakat-onan o nabati karon mahitungod sa inyong diosnon nga kinaiya nga gusto ninyong mahinumdoman?
Unsa nga mga aksyon ang inyong gibati nga nadasig nga buhaton base sa inyong nakat-onan?
Unsa ang inyong mahimo aron makakita og mga tubag sa mga pangutana nga anaa pa kaninyo mahitungod sa inyong relasyon sa Dios?

Komentaryo ug Background nga Impormasyon

Unsaon sa Basahon ni Mormon pagpalig-on sa akong relasyon sa Dios?

Si Presidente Russell M. Nelson nagdeklarar:

Adunay impluwensyal kaayong panghitabo kon ang usa ka anak sa Dios magtinguha og dugang nga kahibalo bahin Kaniya ug sa Iyang Pinalangga nga Anak. Walay laing dapit diin kana nga mga kamatuoran mas tin-aw nga gitudlo ug sa impluwensyal nga paagi kay sa diha sa Basahon ni Mormon.

(Russell M. Nelson, “Ang Basahon ni Mormon: Unsa Kaha ang Imong Kinabuhi Kon wala Kini?,” Ensign o Liahona, Nob. 2017, 61)

Nganong importante man nga masabtan ang tinuod nga kinaiya isip usa ka anak sa Dios?

Si Elder Brian K. Taylor sa Kapitoan nagtudlo sa mosunod:

Nakat-onan ni Moises ang balaan niyang panulundon pinaagi sa pagpakig-istorya sa Ginoo nawong sa nawong. Human niana nga kasinatian, “si Satanas miabot nga nagtintal,” uban sa igmat, apan sa binagis nga tuyo sa pagtuis sa pagkatawo ni Moises, “nag-ingon: Moises, anak sa tawo, simba kanako. Ug … si Moises mitan-aw diha kang Satanas ug miingon: Kinsa ikaw? Kay tan-awa, ako mao ang usa ka anak sa Dios” [Moises 1:12–13].

Kining dako nga gubat batok sa balaang pagkatawo pintas nga miulbo isip nagkamaayong paagi ni Satanas sa pagguba sa atong gituohan ug kahibalo sa atong relasyon sa Dios. Mapasalamaton, kita gipanalanginan og tin-aw nga panan-aw ug pagsabot sa atong tinuod nga kinaiya gikan sa sinugdanan. …

Ang atong pagkaila sa Amahan makausab sa tanan, ilabi na sa atong kasingkasing, samtang ang Iyang maaghop nga Espiritu momatuod sa atong tinuod nga pagkatawo ug talagsaong bili sa Iyang panan-aw. Ang Dios magauban kanato sa pagsubay sa dalan sa pakigsaad kon pangitaon nato Siya pinaagi sa maninampoong pagpangamuyo, pagsiksik sa kasulatan ug masulundong pagpaningkamot.

(Brian K. Taylor, “Ako ba Anak sa Dios?,” Ensign o Liahona, Mayo 2018, 12, 14)

NaN:NaN

Dugang nga mga Kalihokan sa Pagkat-on

Pagsunod sa ehemplo ni Jesukristo sa pagsimba sa Amahan

Sa dihang si Apostol Pablo nagtudlo mahitungod sa tinuod nga kinaiya sa Dios, siya usab nagtambag sa mga Taga-Atenas batok sa dili insaktong pagdayeg sa Langitnong Amahan (tan-awa sa Mga Buhat 17:23–30). Si Jesukristo mao ang hingpit nga ehemplo kon unsaon sa pagsimba ang Dios. Ikonsiderar ang pagpahinumdom sa mga estudyante kon sa unsang paagi ang Manluluwas kanunay nga miila ug midayeg sa Langitnong Amahan ug gani mitugyan sa Iyang Kabubut-on ngadto sa kabubut-on sa Amahan. Bahina ang mosunod nga mga tudling sa kasulatan sa mga estudyante ug dapita sila sa pag-ila unsa ang ilang nakat-onan gikan kang Jesukristo mahitungod sa pagsimba sa Langitnong Amahan. Dapita ang mga estudyante sa pagpaambit unsa ang ilang nadiskobrehan ug dayon hisgotan ang lainlaing mga paagi nga kita makasimba ug makasaksi sa Langitnong Amahan sa atong inadlaw-adlaw nga kinabuhi.