A young woman sits in her bedroom and reads her scriptures
Nakahunahuna na ba kamo nganong importante ang pagtuon sa mga kasulatan? Pipila sa mga kasinatian nga nasinati ni Pablo ug sa iyang mga kauban diha sa ikaduhang misyonaryong panaw ni Pablo naghulagway sa gahom sa pulong sa Dios ngari kanato. Kini nga leksiyon makatabang kaninyo nga mobati og mas dakong tinguha nga makasinati sa mga panalangin sa inadlaw nga pagtuon sa kasulatan.
Pagdasig og matag adlaw nga pagtuon sa kasulatan. Ang matag adlaw nga personal nga pagtuon sa kasulatan maghatag og makanunayong oportunidad alang sa mga magtutudlo ug mga estudyante sa pagkat-on sa ebanghelyo, pagpalambo sa pagpamatuod, ug sa pagpaminaw sa tingog sa Ginoo. Pangita og regular nga mga kahigayonan sa klase aron madasig ang matag adlaw nga pagtuon sa kasulatan. Ang paghatag sa mga estudyante og mga kahigayonan sa pagpaambit kon unsa ang ilang nakat-onan mahimong makadasig usab sa uban sa pagsalmot sa matag adlaw nga pagtuon sa kasulatan.
Pagpangandam sa estudyante: Dapita ang mga estudyante nga motambong nga andam sa pagpaambit ug usa ka makahuluganong butang nga ilang nakit-an bag-ohay lang diha sa ilang matag adlaw nga pagtuon sa kasulatan.
Posible nga mga Kalihokan sa Pagkat-on
Mga panabot gikan sa inyong pagtuon sa kasulatan
Dapita ang mga estudyante sa pagpamalandong sa ilang bag-ohay lang nga pagtuon sa kasulatan ug mopaambit og mahinungdanong mga panabot nga ilang nakutlo. Ikonsiderar ang paggamit sa mosunod nga mga pangutana aron mogiya sa diskusyon. Mahimong makatabang ang pagpahinumdom sa mga estudyante sa sayong bahin niining leksiyon sa tumong sa pagtuon sa kasulatan nga ilang gitakda sa ilang kaugalingon sa seminaryo. Makabaton sila og kahigayonan sa pagtimbang-timbang sa ilang tumong sa kataposan niini nga leksiyon.
Unsa ang pipila sa mga panabot mahitungod ni Jesukristo ug sa Iyang ebanghelyo ang inyong nakutlo gikan sa inyong pagtuon sa kasulatan?
Unsa ang pipila sa mga bersikulo o mga asoy nga bag-o ninyong natun-an nga nahimong mahinungdanon alang kaninyo? Ngano man?
Kon adunay usa ka higala nga mangutana kaninyo nganong inyong nabati nga importante ang kanunay nga pagtuon sa mga kasulatan, unsaon man ninyo sa pagtubag?
Mga pananglitan sa bili sa mga kasulatan
Pipila sa mga kasinatian ni Pablo panahon sa iyang ikaduhang misyonaryong panaw naghulagway sa bili sa pagtuon sa mga kasulatan. Isulat ang mosunod nga ulohan sa inyong journal sa pagtuon: Sa unsang paagi nga ang pagtuon sa kasulatan makapanalangin sa akong kinabuhi. Sa imong pagtuon karon, pangita og mga panabot nga imong malista ubos niining ulohan.
Mahimo usab nga isulat kini nga ulohan sa pisara ug dungagan ang lista sa kinatibuk-an sa leksiyon.
Kon anaa, gamita ang Mapa sa Biblia, nu. 13, “ Ang Misyonaryong mga Panaw ni Apostol Pablo ,” aron makita ang Tesalonica ug ang ubang mga lugar diin si Pablo miadto panahon sa iyang ikaduhang misyonaryong panaw.
Basaha ang Mga Buhat 17:1–4 ug pangitaa kon unsa ang gihimo ni Pablo taliwala sa mga Judio sa Tesalonica.
Unsa sa inyong hunahuna ang mahinungdanon mahitungod sa mga paningkamot ni Pablo?
Unsa ang gikatabang niini nga asoy sa inyong pagsabot mahitungod sa bili sa mga kasulatan?
Ang mensahe ni Pablo ngadto sa mga Judio sa Tesalonica nagpahinumdom kanato nga ang kasulatan nagpamatuod kang Jesukristo ug sa Iyang diosnong misyon (tan-awa sa Juan 5:39). Ikonsiderar ang pagdugang sa mosunod nga kamatuoran diha sa listahan sa inyong journal sa pagtuon.
Si Elder D. Todd Christofferson sa Korum sa Napulog Duha ka Apostoles mitudlo sa mosunod mahitungod sa katuyoan sa mga kasulatan. Mahimo nimong tan-awon ang bidyo nga “Ang [Mga] Panalangin sa Kasulatan” gikan sa time code 10:49–11:21 o basahon ang pamahayag sa ubos.
Imahe
Portrait of Elder D. Todd Christofferson. Photographed in March 2020.
Sa kataposan, ang sentrong katuyoan sa tanang kasulatan mao ang pagbusog sa atong mga kalag uban sa hugot nga pagtuo diha sa Dios nga Amahan ug sa Iyang Anak, si Jesukristo—hugot nga pagtuo nga Sila anaa; hugot nga pagtuo nga ang plano sa Amahan alang sa atong pagka-imortal ug kinabuhi nga dayon, hugot nga pagtuo sa Pag-ula ug Pagkabanhaw ni Jesukristo, nga mipalihok niining plano sa kalipay; hugot nga pagtuo sa paghimo sa ebanghelyo ni Jesukristo nga atong pamaagi sa kinabuhi; ug hugot nga pagtuo nga makaila “sa bugtong tinuod nga Dios, ug kang Jesukristo, nga [Iyang] pinadala ( Juan 17:3).”
(D. Todd Christofferson, “Ang Panalangin sa Kasulatan,” Ensign o Liahona, Mayo 2010, 34)
Hain sa mga panalangin nga nahisgotan ni Elder Christofferson ang inyong nasinati sa tibuok ninyong pagtuon sa kasulatan?
Unsa ang pipila sa mga bersikulo sa kasulatan ang nakapadugang sa inyong pagtuo sa Langitnong Amahan ug kang Jesukristo? Giunsa sa mga kamatuoran nga gitudlo niini nga mga bersikulo pagtabang kaninyo nga madugangan ang inyong pagtuo?
Samtang daghang mga babaye ug lalaki sa Tesalonica ang nagtuo ug nahimong nakabig pinaagi sa mga pagpanudlo ni Pablo, ang uban naghimo og usa ka panon sa pagsulay sa pagdakop kang Pablo ug kang Silas (tan-awa sa Mga Buhat 17:4–5). Si Pablo ug Silas nakaikyas gikan sa panon [mob] ug miadto sa duol nga lungsod sa Berea, diin sila nagpadayon sa pagsangyaw.
Basaha ang Mga Buhat 17:10–12 , nga mangita giunsa sila si Pablo ug Silas pagdawat sa mga tawo sa Berea. Ikonsiderar ang pagmarka sa mga pulong o hugpong sa mga pulong nga inyong gibati nga mahinungdanon.
Giunsa sa makanunayon nga pagtuon sa mga kasulatan pagtabang niining mga tawhana?
Usa ka kamatuoran nga maila gikan niini nga asoy mao kini: ang pagtuon kanunay sa mga kasulatan mahimong makaandam kanato sa pag-ila ug pagtuo sa kamatuoran. Ikonsiderar ang pagdugang sa mosunod nga kamatuoran diha sa listahan sa inyong journal sa pagtuon.
Aron matabangan ang mga estudyante nga mas makasabot niini nga kamatuoran ikonsiderar ang pagpangutana:
Unsa ang pipila sa mga pananglitan kon unsaon niini nga kamatuoran paggamit sa mga sitwasyon nga lagmit inyong maatubang sa inyong kinabuhi?
Kon ang mga estudyante nagkinahanglan og tabang, mahimong gamiton ang mosunod nga mga senaryo:
Paghunahuna kon sa unsa nga paagi nga ang makanunayong pagtuon sa mga kasulatan mahimong makatabang kaninyo sa mosunod nga mga sitwasyon:
Usa sa inyong mga magtutudlo sa tulunghaan nagpasabot sa usa ka konsepto nga sukwahi sa inyong gituohan.
Pipila sa inyong mga higala nag-awhag kaninyo sa pag-apil sa mga kinaiya nga supak sa inyong mga sumbanan pinaagi sa pagsulti, “Kausa ra bitaw ok ra na.”
Sa kinatibuk-ang komperensiya, usa ka Apostol nagtudlo og usa ka butang nga misukwahi sa bag-ong uso sa kalibotan.
Uban pang mga panalangin sa pagtuon sa kasulatan
Ang mga kamatuoran nga inyong naila gikan sa Mga Buhat 17 naghulagway lamang og pipila ka mga panalangin nga atong madawat pinaagi sa pagtuon sa mga kasulatan.
Paggahin og pipila ka minuto sa pagtuon sa pipila o tanan sa mosunod nga mga tudling sa kasulatan, og pangitaa ang uban pang mga panalangin nga atong madawat gikan sa Dios pinaagi sa pagtuon sa Iyang mga pulong ug sa mga pulong sa Iyang mga propeta, nga makita sa mga kasulatan. Idugang ang inyong mga panabot diha sa listahan sa inyong journal sa pagtuon.
Ikonsiderar ang pagbahin sa mga estudyante ngadto sa mga grupo ug i-assign ang usa ka bersikulo sa matag grupo. Dapita ang mga estudyante gikan sa matag grupo sa pagdugang sa ilang mga panabot gikan sa tudling nga ilang natun-an diha sa listahan sa pisara.
Unsa ang mipatigbabaw kaninyo gikan sa listahan nga inyong namugna?
Hain sa mga panalangin gikan sa inyong listahan ang mas gusto ninyong masinati karon? Ngano man?
Unsay inyong buhaton aron ang inyong pagtuon sa mga kasulatan mahimong mas mahinungdanon ug sagrado nga kasinatian?
Unsa nga mga panalangin ang inyong nasinati pinaagi sa kanunay nga pagtuon sa mga pulong sa Dios diha sa mga kasulatan?
Mahimong mopaambit og usa ka personal nga kasinatian ug pagpamatuod mahitungod sa mga panalangin nga nadawat gikan sa kanunay nga pagtuon sa mga kasulatan.
Paghimo og plano
Isip kabahin sa inyong pagsalmot sa seminary, kamo gidapit sa pagmugna og usa ka tumong nga may kalabotan sa inyong inadlaw nga pagtuon sa kasulatan. Paggahin og higayon sa pagtimbang-timbang sa inyong kalamboan niini nga tumong ug paghimo og gikinahanglan nga mga pagpahiangay nga makatabang kaninyo aron mahimong malamposon sa inyong pagpadayon sa unahan.
Gamita ang mosunod nga mga pangutana sa pagtabang sa mga estudyante nga matimbang-timbang ang ilang kalamboan:
Unsa ang tumong sa pagtuon sa kasulatan nga inyong namugna alang sa inyong kaugalingon?
Giunsa niini nga tumong pagtabang kaninyo aron makaangkon og mas mahinungdanong kasinatian sa personal nga pagtuon sa kasulatan?
Unsa nga mga kausaban ang gikinahanglan ninyong himoon?
Dasiga ang mga estudyante sa pagpadayon sa paghimo og kalamboan sa ilang pagtuon sa kasulatan. Mahimong maghunahuna og mga paagi sa tibuok tuig sa pagpahinumdom kanila sa ilang tumong sa pagtuon ug sa pagdayeg kanila sa ilang pag-uswag.
Komentaryo ug Background nga Impormasyon
Unsa ang ubang mga panalangin nga makuha gikan sa inadlaw-adlaw nga pagtuon sa kasulatan?
Sa paghisgot bahin sa pagbasa sa Basahon ni Mormon matag adlaw, si Presidente Russell M. Nelson misaad sa mosunod:
Imahe
Official portrait of President Russell M. Nelson taken January 2018
Minahal kong mga igsoon, mosaad ko kaninyo nga kon mainampoon kamo nga magtuon sa Basahon ni Mormon kada adlaw, makahimo kamo og mas maayong mga desisyon—kada adlaw. Mosaad ako kaninyo nga kon mamalandong kamo sa unsay inyong gitun-an, ang mga bintana sa langit mobukas, ug makadawat kamo sa mga tubag sa inyong mga pangutana ug direksiyon sa inyong kinabuhi. Mosaad ako nga kon inyong isub-sob ang inyong kaugalingon sa Basahon ni Mormon, mapanalipdan kamo batok sa mga dautan niining panahona, bisan ang grabeng pagtakboy sa pornograpiya ug sa ubang matang sa adiksyon.
(Russell M. Nelson, “Ang Basahon ni Mormon: Unsa Kaha ang Imong Kinabuhi Kon wala Kini?,” Ensign o Liahona, Nob. 2017, 62–63)
Si Presidente Dallin H. Oaks nagtandi sa mga kasulatan sa usa ka Urim ug Thummim nga atong magamit sa pagdawat sa pagpadayag gikan sa Ginoo:
Imahe
Official Portrait of President Dallin H. Oaks taken March 2018.
Dili nato palabihon ang punto kung kita moingon nga ang mga kasulatan mahimong usa ka Urim ug Thummim aron pagtabang sa matag usa kanato aron makadawat og personal nga pagpadayag.
Tungod kay nagtuo kita nga ang pagbasa sa kasulatan makatabang kanato nga makadawat og pagpadayag, giawhag kita sa pagbasa og balik-balik sa mga kasulatan. Niining paagiha, atong maangkon ang kasayoran sa unsay gusto sa atong Langitnong Amahan nga atong mahibaloan ug buhaton diha sa atong personal nga kinabuhi karon. Mao kana ang usa ka hinungdan nga ang Santos sa Ulahing Adlaw nagtuo sa inadlaw nga pagtuon sa kasulatan.
(Dallin H. Oaks, “Scripture Reading and Revelation,” Ensign, Ene. 1995, 8)
Dugang nga mga Kalihokan sa Pagkat-on
Pagsalikway sa Kalibotan
Aron matabangan ang mga estudyante nga makahimo og koneksiyon tali sa pagtuon sa kasulatan ug pagdawat sa mga pulong sa buhing mga propeta, mahimong basahon ang Mga Buhat 17:5–7 kauban ang mga estudyante ug hisgotan ang mosunod nga mga pangutana:
Ngano kaha sa inyong hunahuna nga ang dili matuohon nga mga Judio mibati nga ang mga pagtulun-an ni Pablo mahitungod sa Manluluwas “nakapagubot sa kalibotan” ( Mga Buhat 17:6)?
Sa unsang paagi nga ang kanunay nga pagtuon sa mga kasulatan makaandam sa inyong hunahuna ug kasingkasing sa pagdawat sa mga pagtulun-an sa buhing mga propeta?
Unsa ang pipila sa mga kinadak-an nga kalainan tali sa mga pagtulun-an sa Manluluwas pinaagi sa buhing mga propeta ug mga tinuohan og kultura sa kalibotan karon?
Mga Buhat 17:11 . “Ilang gidawat ang mga pulong uban sa bug-os nga pagkamasinabuton”
Ikonsiderar ang paggahin og pipila ka oras sa paghisgot sa Mga Buhat 17:10–12 , nga nagpokus sa pagkaandam sa mga tawo sa Berea sa pagdawat sa ebanghelyo.
Sa dili pa magtuon niini nga mga bersikulo, mahimong magamit ang pagdapit og mga boluntaryo sa paggamit og mga lihok aron pagpakita unsa ang hulagway sa andam mobuhat og pihong mga tahas, sama sa pagsalo og bola, pagdagan sa lumba, pagkaon, pag-alsa og usa ka butang nga bug-at, o pagkalot og lungag. Ikonsiderar ang pagdapit og usa o daghang mga estudyante aron pagpakita unsa ang hulagway kon ang tawo andam nga makakat-on sa ebanghelyo sa paggamit lamang og mga lihok. Ang nahibilin sa klase mahimong mosulay sa pagtag-an kon unsa ang nahitabo.
Ang mga estudyante mahimong dapiton sa paghimo og listahan sa mga lihok, o mga kinaiya nga lagmit makapaila kon unsa kaandam ang usa ka tawo sa pagkat-on sa ebanghelyo. Sunod, dapita ang mga estudyante sa pagbasa sa Mga Buhat 17:10–12 , og ipapangita kon unsa ang nakatabang sa mga tawo sa Berea aron maandam sa pagtuo ug pagdawat sa mga pagtulun-an nila ni Pablo ug Silas.