Seminary
Mga Buhat 16–21

Mga Buhat 16–21

Kinatibuk-ang Pagpasabot

Diha sa Mga Buhat 16–21, atong mabasa ang mahitungod sa ikaduha ug ikatulong misyonaryong panaw ni Apostol Pablo. Si Pablo ug ang iyang mga kauban nakasinati og katingalahang mga milagro ug nakatabang sa daghang mga tawo nga moduol ngadto kang Kristo, modawat og ordinansa sa bunyag, ug modawat sa gasa sa Espiritu Santo. Si Pablo ug ang iyang mga kauban nakasinati usab og kasakit, pagpanglutos, ug pagsalikway.

Pangandam sa Pagtudlo

Ang mosunod nga impormasyon naghatag sa mga magtutudlo og mga ideya kon unsa ang mahimong kinahanglan nga andamon nang daan para sa kada leksiyon:

Mga Buhat 16

Tumong sa leksiyon: Kini nga leksiyon makatabang sa mga estudyante nga maila ang mga tabang nga gitinguha sa Manluluwas nga ihatag kanila diha sa ilang pagpaningkamot sa pagpaambit sa Iyang ebanghelyo ngadto sa uban.

  • Pagpangandam sa estudyante: Dapita ang mga estudyante nga mainampoong mangayo sa Langitnong Amahan nga tabangan sila nga maila ang tawo nga Iyang giandam aron mamati sa ebanghelyo ni Jesukristo.

  • Sugyot sa pagtudlo pinaagi sa videoconference: Human makuha ang tukmang mga pagtugot, pagdapit og usa ka bisitang mamumulong [guest speaker] sa pagtudlo atol sa ikaduhang bahin sa klase kon unsaon sa mga miyembro sa Simbahan pagbuhat og misyonaryo nga buhat. Mahimong hangyoon kini nga bisita nga maghisgot mahitungod sa mga baroganan sa misyonaryong buhat nga gipakita ni Pablo ug sa iyang mga kauban diha sa Mga Buhat 16. Ang bisitang mamumulong mahimong usa ka lider sa misyon, usa ka misyonaryo nga bag-ohay lang nahuman sa iyang misyon, o usa ka kasamtangang nangalagad nga managkauban nga mga misyonaryo. Hatagi og oras sa kataposan sa klase ang mga estudyante nga makapangutana. Pakigsulti kauban sa lokal nga S&I koordinitor, kang kinsang pagtugot ang gikinahanglan alang niini nga bisitang mamumulong.

Mga Buhat 17:1–14

Tumong sa leksiyon: Kini nga leksiyon mahimong makatabang sa mga estudyante nga mobati og mas dakong tinguha aron masinati ang mga panalangin sa inadlaw-adlaw nga pagtuon sa kasulatan.

  • Pagpangandam sa estudyante: Dapita ang mga estudyante nga motambong nga andam sa pagpaambit ug usa ka makahuluganong butang nga ilang nakit-an bag-ohay lang sa ilang matag adlaw nga pagtuon sa kasulatan.

Mga Buhat 17:16–34

Tumong sa leksiyon: Kini nga leksiyon makatabang sa mga estudyante nga mobati sa kaimporte sa ilang pagkatawo isip usa ka anak sa Dios.

  • Pagpangandam sa estudyante: Dapita ang mga estudyante sa paghimo og listahan sa mga pulong o hugpong sa mga pulong [phrases] nga labing naghulagway kanila ug sa pagpamalandong kon unsang mga pulong o mga hugpong sa mga pulong ang labing importante alang kanila.

Mga Buhat 19:1–7

Tumong sa leksiyon: Kini nga leksiyon makatabang sa mga estudyante nga makadawat og mga panalangin nga gitinguha sa Langitnong Amahan ug ni Jesukristo nga ihatag kanila pinaagi sa gasa sa Espiritu Santo.

  • Pagpangandam sa estudyante: Dapita ang mga estudyante sa paghunahuna og mga kinaiya nga nagdapit sa pakig-uban sa Espiritu Santo ug sa pagpaningkamot sa makanunayon nga pagbuhat niadtong mga butanga diha sa ilang kinabuhi.

  • Hulagway nga ipakita: Usa ka hulagway ni Joseph Smith dihang nagpakita kang Brigham Young

  • Mapa: “ Ang Misyonaryong mga Panaw ni Apostol Pablo ”

  • Butang gamiton sa leksiyon: Tulo ka tasa, usa ka sudlanan alang sa moawas nga tubig (sama sa usa ka tray), usa ka palid sa papel o usa ka takob, ug usa ka gahi nga butang nga maka-okupar hapit sa tibuok luna sa sulod sa usa sa mga tasa (sama sa usa ka bato)

Doctrinal Mastery Review 15

Tumong sa leksiyon: Kini nga leksiyon makahatag sa mga estudyante og mga oportunidad sa pagbansay sa paggamit sa ubang mga tudling sa doktrinal nga kahanas sa nagkalain-laing sitwasyon sa pagpanudlo.

Pahinumdom: Ang usa ka tudling sa doktrinal nga kahanas nga leksiyon tingali gikinahanglang itudlo isip puli niini nga leksiyon sa pagrebyo. Tan-awa ang eskedyul kon kanus-a itudlo ang leksiyon nga gihatag sa direktor sa lugar o rehiyon o koordinitor aron maseguro nga matudlo ang kada leksiyon sa tudling sa doktrinal nga kahanas samtang anaa sa sesyon ang seminary.

  • Pagpangandam sa estudyante: Dapita ang mga estudyante sa paghunahuna og mga kasinatian gamit ang mga kasulatan sa pagtubag sa mga pangutana o sa pagtudlo sa ebanghelyo ni Jesukristo ngadto sa uban.

  • Tsart: Usa ka tsart sa mga tudling sa doktrinal nga kahanas ug ang ilang mahinungdanon nga hugpong sa mga pulong sa kasulatan

  • Kalihokan sa grupo: Paghimo og mga timaan alang sa upat ka mga sitwasyon sa kalihokan sa grupo. Pag-andam og paagi sa pagpakita sa mga instruksiyon ug mga pangutana nga hisgotan sa mga estudyante diha sa kalihokan sa grupo.

  • Sugyot sa pagtudlo pinaagi sa videoconference: Aron paghatag og kahigayonan sa daghang mga estudyante nga makapaambit sa ilang mga hunahuna, mahimong bahinon ang mga estudyante ngadto sa upat ka breakout rooms ug i-assign ang matag grupo og usa sa mga senaryo gikan sa kalihokan sa grupo.

Iprinta