កិច្ចការ ១៦

« ព្រះអម្ចាស់ទ្រង់ហៅយើង … ឲ្យទៅផ្សាយដំណឹងល្អ »

នៅក្នុងព្រះបន្ទូលចុងក្រោយរបស់ទ្រង់ទៅកាន់សាវករបស់ទ្រង់ ព្រះអង្គសង្គ្រោះបានត្រាស់បង្គាប់ពួកសិស្សរបស់ទ្រង់ឲ្យ « ទៅបញ្ចុះបញ្ចូលឲ្យមានសិស្សនៅគ្រប់ទាំងសាសន៍ ព្រមទាំងធ្វើបុណ្យជ្រមុជទឹកឲ្យ ដោយនូវព្រះនាមព្រះវរបិតា ព្រះរាជបុត្រា និងព្រះវិញ្ញាណបរិសុទ្ធចុះ » ( ម៉ាថាយ ២៨:១៩ ) ។ ប៉ុល និងដៃគូរបស់លោកបានរីកចម្រើនគួរឲ្យកត់សម្គាល់ក្នុងការបំពេញបទបញ្ញត្តិនេះ ។ គោលបំណងនៃមេរៀននេះគឺដើម្បីជួយអ្នកឲ្យស្គាល់ជំនួយដែលព្រះអង្គសង្គ្រោះមានព្រះរាជបំណងប្រទានឲ្យអ្នក នៅពេលអ្នកព្យាយាមចែកចាយដំណឹងល្អរបស់ទ្រង់ជាមួយអ្នកដទៃ ។

ការអនុវត្តតាមគោលលទ្ធិ និង គោលការណ៍ទាំងឡាយ ។ គ្រូបង្រៀនគួរលើកទឹកចិត្តសិស្សឲ្យអនុវត្តតាមសេចក្ដីពិតនៅក្នុងជីវិតរបស់ពួកគេ ។ ការអនុវត្តធ្វើឡើង នៅពេលសិស្សទាំងឡាយគិត និយាយ និងរស់នៅស្របតាមគោលការណ៍ទាំងឡាយដែលពួកគេបានរៀន ។ បន្ទាប់ពីសិស្សអនុវត្តតាមគោលការណ៍នៃដំណឹងល្អនៅក្នុងជីវិតរបស់ពួកគេហើយ នោះពួកគេនឹងទទួលបានពរជ័យដែលបានសន្យាទុក ហើយនឹងទទួលបានការយល់ដឹងកាន់តែជ្រៅជ្រះមួយ ព្រមទាំងទីបន្ទាល់អំពីអ្វីដែលពួកគេបានអនុវត្តនោះ ។

ការរៀបចំរបស់សិស្ស ៖ សូមអញ្ជើញសិស្សឲ្យទូលសូមព្រះវរបិតាសួគ៌ដោយការអធិស្ឋានដើម្បីជួយពួកគេឲ្យស្គាល់នរណាម្នាក់ដែលទ្រង់បានរៀបចំដើម្បីស្ដាប់ដំណឹងល្អនៃព្រះយេស៊ូវគ្រីស្ទ ។

សកម្មភាពរៀនសូត្រដែលអាចមាន

មេរៀននេះរំលេចនូវដំណើររឿងពីរនៃកិច្ចការផ្សព្វផ្សាយសាសនារបស់ប៉ុលដែលបានកត់ត្រានៅក្នុង កិច្ចការ ១៦ ។ សូមយកចិត្តទុកដាក់លើការបំផុសគំនិតពីព្រះវិញ្ញាណ និងតម្រូវការរបស់សិស្សដើម្បីកំណត់ថាតើវាល្អបំផុតក្នុងការចំណាយពេលទាំងអស់ក្នុងថ្នាក់ដើម្បីផ្តោតលើដំណើររឿងមួយក្នុងចំណោមដំណើររឿងទាំងនេះ ឬផ្តោតទៅលើទាំងពីរ ។

ការចែកចាយដំណឹងល្អជាមួយអ្នកដទៃ

សូមបង្ហាញរូបភាពខាងក្រោមនេះ ហើយសុំឲ្យសិស្សម្នាក់សង្ខេបអ្វីដែលពួកគេដឹងអំពីអ្វីដែលកំពុងបង្ហាញនៅក្នុងរូបភាពនោះ ។ បើចាំបាច់ សូមអញ្ជើញពួកគេឲ្យអាន ម៉ាថាយ ២៨:១៩ ដើម្បីទទួលបានជំនួយ ។

អ្នកប្រហែលជាចាំថាបន្ទាប់ពីការមានព្រះជន្មរស់ឡើងវិញរបស់ព្រះអង្គសង្គ្រោះ ទ្រង់បានប្រមូលពួកសាវករបស់ទ្រង់ជុំគ្នា ហើយបានប្រទានបទបញ្ញត្តិដូចខាងក្រោមនេះដល់ពួកលោក ៖ « ចូរទៅបញ្ចុះ‌បញ្ចូលឲ្យមានសិស្សនៅគ្រប់ទាំងសាសន៍ ព្រមទាំងធ្វើបុណ្យជ្រមុជ‌ទឹកឲ្យ ដោយនូវព្រះ‌នាមព្រះវរ‌បិតា ព្រះ‌រាជ‌បុត្រា នឹងព្រះ‌វិញ្ញាណបរិសុទ្ធចុះ ( ម៉ាថាយ ២៨:១៩ ) ។

អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់បានចែកចាយគំនិតខាងក្រោមអំពីបទបញ្ញត្តិរបស់ព្រះអង្គសង្គ្រោះក្នុងការផ្សាយដំណឹងល្អ ។ អ្នកប្រហែលជាចង់មើលវីដេអូ « Missionary Work: Sharing What Is in Your Heart » ពីលេខកូដម៉ោង ២:៤៦ ដល់ ៣:៣០ ឬអានសេចក្ដីថ្លែងការណ៍ខាងក្រោម ។

Missionary Work: Sharing What Is in Your Heart

អែលឌើរ អុជដូហ្វ ផ្ដល់​យោបល់​ប្រាំយ៉ាង​អំពី​របៀប​ចូលរួម​នៅ​ក្នុង​កិច្ចការ​ផ្សព្វផ្សាយសាសនា ។

ជាញឹកញាប់ ខ្ញុំបានពិចារណា និងអធិស្ឋានអំពីការបង្គាប់ដ៏អស្ចារ្យរបស់ព្រះអង្គសង្គ្រោះដល់ពួកសិស្សរបស់ទ្រង់ … ឲ្យ « ចូរទៅបញ្ចុះ‌បញ្ចូលឲ្យមានសិស្សនៅគ្រប់ទាំងសាសន៍ ព្រមទាំងធ្វើបុណ្យជ្រមុជ‌ទឹកឲ្យ ដោយនូវព្រះ‌នាមព្រះវរ‌បិតា ព្រះ‌រាជ‌បុត្រា នឹងព្រះ‌វិញ្ញាណបរិសុទ្ធចុះ » [ ម៉ាថាយ ២៨:១៩ ] ។

ខ្ញុំបានពុះពារនឹងសំណួរនេះថា « ក្នុងនាមជាសមាជិក និងជាសិស្សរបស់ព្រះគ្រីស្ទ តើយើងអាចបំពេញតាមការបង្គាប់ដ៏អស្ចារ្យនោះនៅក្នុងជីវិតប្រចាំថ្ងៃរបស់យើងបានដោយរបៀបណា ? »

ថ្ងៃនេះ ខ្ញុំសូមអញ្ជើញបងប្អូនឲ្យពិចារណាសំណួរដូចគ្នានេះនៅក្នុងចិត្ត និងគំនិតបងប្អូន ។

( ឌៀថើរ អេហ្វ អុជដូហ្វ « Missionary Work: Sharing What Is in Your Heart » Ensign ឬ Liahona ខែ ឧសភា ឆ្នាំ ២០១៩ ទំព័រ ១៥–១៦ )

បន្ថែមពីលើសំណួរនេះ អែលឌើរ អុជដូហ្វ បានអញ្ជើញអ្នកឲ្យពិចារណា និងគិតអំពីចម្លើយរបស់អ្នកចំពោះសំណួរខាងក្រោមនេះ ។ សូមពិចារណាកត់ត្រាទុកចម្លើយរបស់អ្នកនៅក្នុងសៀវភៅកំណត់ហេតុការសិក្សារបស់អ្នក ។

• នៅលើមាត្រដ្ឋាន ១–៥ តើអ្នកមានបំណងប្រាថ្នាប៉ុណ្ណាដើម្បីចែកចាយដំណឹងល្អជាមួយអ្នកដទៃ ? ហេតុអ្វីពួកគេឆ្លើយតបបែបនេះ ?

• តើអ្នកជួបឧបសគ្គអ្វីខ្លះក្នុងការចែកចាយដំណឹងល្អជាមួយអ្នកដទៃ ?

សាវកប៉ុលជាអ្នកផ្សព្វផ្សាយសាសនាដ៏មានឥទ្ធិពលម្នាក់ដែលបាននាំព្រលឹងជាច្រើនមករកព្រះយេស៊ូវគ្រីស្ទ តាមរយៈការផ្សព្វផ្សាយរបស់លោក ។ អំឡុងសប្តាហ៍នេះ អ្នកនឹងរៀនអំពីព្រឹត្តិការណ៍មួយចំនួនដែលបានកើតឡើងអំឡុងពេលនៃការធ្វើដំណើររបស់ប៉ុលទៅផ្សាយសាសនាជាលើកទីពីរ និងទីបី ( សូមមើល កិច្ចការ ១៥:៣៦–១៨:២២ និង កិច្ចការ ១៨:២៣–២១:១៥ ) ។ផែនទីខាងក្រោមនេះបង្ហាញពីការធ្វើដំណើររបស់ប៉ុល ក្នុងអំឡុងពេលនៃការធ្វើដំណើរទាំងនេះ ៖

Missionary Work: Sharing What Is in Your Heart

អែលឌើរ អុជដូហ្វ ផ្ដល់​យោបល់​ប្រាំយ៉ាង​អំពី​របៀប​ចូលរួម​នៅ​ក្នុង​កិច្ចការ​ផ្សព្វផ្សាយសាសនា ។

នៅពេលអ្នកសិក្សាបទពិសោធន៍មួយចំនួនរបស់ប៉ុលពីបេសកកម្មលើកទីពីររបស់លោកនៅក្នុងមេរៀននេះ អ្នកនឹងឃើញឧទាហរណ៍នៃសេចក្ដីពិតដូចតទៅនេះ ៖ ព្រះអម្ចាស់អាចដឹកនាំយើងឲ្យទៅជួបអ្នកដែលទ្រង់បានរៀបចំដើម្បីទទួលដំណឹងល្អរបស់ទ្រង់ ។ សូមយកចិត្តទុកដាក់លើការបំផុសគំនិតពីព្រះវិញ្ញាណ ដែលអាចជួយអ្នកក្នុងការខិតខំរបស់អ្នកដើម្បីចែកចាយដំណឹងល្អជាមួយអ្នកដទៃ ។

ប៉ុល និងដៃគូរបស់លោកផ្សព្វផ្សាយនៅស្រុកម៉ាសេដូន

សូមអាន កិច្ចការ ១៦:៦–១៥ ដោយរកមើលអ្វីដែលប៉ុល និងដៃគូរបស់លោកបានជួបប្រទះដំបូងគេ ក្នុងដំណើររបស់ប៉ុលទៅផ្សាយសាសនាជាលើកទីពីរ ។

• តើអ្នកអាចរៀនអ្វីខ្លះអំពីព្រះវរបិតាសួគ៌ មកពីដំណើររឿងនេះ ដែលអាចជួយអ្នកក្នុងការខិតខំរបស់អ្នកដើម្បីស្វែងរកអ្នកដែលព្រះអម្ចាស់បានរៀបចំដើម្បីទទួលដំណឹងល្អរបស់ទ្រង់ ?

• តើអ្នកបានឃើញព្រះអម្ចាស់កំពុងរៀបចំអ្នកដទៃដើម្បីទទួលដំណឹងល្អរបស់ទ្រង់ដោយរបៀបណា ? តើទ្រង់បានរៀបចំដោយរបៀបណា ឬតើទ្រង់អាចរៀបចំអ្នកដោយរបៀបណាដើម្បីស្វែងរកបុគ្គលដែលកំពុងស្វែងរកទ្រង់ ?

ដើម្បីមើលរូបភាពអំពីរបៀបដែលព្រះអម្ចាស់រៀបចំមនុស្សឲ្យទទួល និងចែកចាយដំណឹងល្អរបស់ទ្រង់ សូមមើលវីដេអូ « Prayer » ( ៤:១២ ) ដែលមាននៅលើគេហទំព័រ ChurchofJesusChrist.org ។

សូមពិចារណាផងដែរអំពីការចែកចាយបទពិសោធន៍ផ្ទាល់ខ្លួនមួយទាក់ទងនឹងការចែកចាយដំណឹងល្អ ។

ប៉ុល និង ស៊ីឡាសបានជាប់គុក ហើយនៅបន្តផ្សព្វផ្សាយ

បន្ទាប់ពីប៉ុល និងដៃគូរបស់លោកបានបង្រៀន និងធ្វើបុណ្យជ្រមុជទឹកឲ្យលីឌា ប៉ុលបានបណ្ដេញវិញ្ញាណអាក្រក់ចេញពីបាវស្រីវ័យក្មេងម្នាក់ ( សូមមើល កិច្ចការ ១៦:១៦–១៨ ) ។ បន្ទាប់មក លោក និងដៃគូរបស់លោក ស៊ីឡាស ត្រូវបានគេវាយដំ និងដាក់គុក ( សូមមើល កិច្ចការ ១៦:១៩–២៤ ) ។ ការដែលត្រូវជាប់គុក ដោយសារតែការផ្សាយដំណឹងល្អ ហាក់ដូចជាមូលហេតុមួយដែលសមហេតុផលដើម្បីបោះបង់ការផ្សាយដំណឹងល្អ ។ ប៉ុន្តែសម្រាប់ប៉ុល និងស៊ីឡាស វាបានក្លាយជាឱកាសមួយដើម្បីជួយអ្នកដទៃឲ្យមករកព្រះគ្រីស្ទទៅវិញ ។

សូមអាន កិច្ចការ ១៦:២៥–៣៦ ដើម្បីរកមើលពីរបៀបដែលព្រះអម្ចាស់បានប្រែក្លាយការជាប់ឃុំឃាំងរបស់ប៉ុល និងស៊ីឡាស ទៅជាឱកាសមួយសម្រាប់ពួកលោកដើម្បីផ្សព្វផ្សាយដំណឹងល្អទៅវិញ ។

• តើប៉ុល និងស៊ីឡាសបានបង្ហាញលក្ខណៈដូចព្រះគ្រីស្ទអ្វីខ្លះក្នុងដំណើររឿងនេះ ?

• តើគុណលក្ខណៈទាំងនេះអាចឲ្យពួកលោកចែកចាយដំណឹងល្អកាន់តែមានប្រសិទ្ធភាពដោយរបៀបណា ?

• តើអ្នកបានរៀនអ្វីខ្លះពីដំណើររឿងនេះ ដែលអាចជួយអ្នកក្នុងការខិតខំរបស់អ្នកដើម្បីស្វែងរកអ្នកដែលព្រះអម្ចាស់បានរៀបចំដើម្បីទទួលដំណឹងល្អរបស់ទ្រង់ ?

ការអនុវត្តតាមអ្វីដែលអ្នកបានរៀន

បន្ទាប់ពីបានសិក្សាដំណើររឿងចេញពី កិច្ចការ ១៦ សូមពិចារណាចំណាយពេលបន្តិចដើម្បីពិភាក្សាអំពីរបៀបដែលយើងអាចចែកចាយដំណឹងល្អជាមួយអ្នកដទៃកាន់តែមានប្រសិទ្ធភាព ។ ដោយជាផ្នែកមួយនៃការពិភាក្សានេះ នោះអាចអញ្ជើញសិស្សឲ្យចែកចាយបទពិសោធន៍ដែលពួកគេមានជាមួយនឹងការចែកចាយដំណឹងល្អ ។ វាក៏អាចមានប្រយោជន៍ផងដែរក្នុងការមើលវីដេអូ « 6 Brothers » ( ៣:៤៣ ) មាននៅលើគេហទំព័រ ChurchofJesusChrist.org ។

តាមរយៈព្រះវិញ្ញាណបរិសុទ្ធ សូមស្វែងរកការបំផុសគំនិតពីព្រះវរបិតាសួគ៌ដើម្បីកំណត់នូវអ្វីមួយដែលអ្នកអាចធ្វើដើម្បីចែកចាយដំណឹងល្អនៃព្រះយេស៊ូវគ្រីស្ទជាមួយអ្នកដទៃ ។ សូមជ្រើសរើសការអញ្ជើញមួយក្នុងចំណោមការអញ្ជើញខាងក្រោមនេះដែលអ្នកគិតថានឹងមានអត្ថប្រយោជន៍បំផុតសម្រាប់អ្នក ៖

• ចូរអធិស្ឋានជារៀងរាល់ថ្ងៃឲ្យព្រះអម្ចាស់ដឹកនាំអ្នកទៅរកនរណាម្នាក់ដែលទ្រង់បានរៀបចំដើម្បីទទួលដំណឹងល្អ ។

• សូមពិចារណាក្នុងការរាយឈ្មោះមិត្តភក្តិ ឬមិត្តរួមថ្នាក់ពីរនាក់នៅសាលា ដែលអាចនឹងព្រមស្តាប់ដំណឹងល្អរបស់ព្រះយេស៊ូវគ្រីស្ទ ។ បន្ទាប់មកទូលសុំព្រះវរបិតាសួគ៌ឲ្យជួយអ្នកដឹងពីរបៀបដែលអ្នកអាចជាជាឧបករណ៍មួយ នៅក្នុងព្រះហស្តទ្រង់ ដើម្បីនាំពួកគេឲ្យទៅរកព្រះអង្គសង្គ្រោះ ។

• ដោយមានការអនុម័តត្រឹមត្រូវពីឪពុកម្តាយ និងអ្នកដឹកនាំរបស់អ្នក សូមធ្វើការជាមួយដៃគូផ្សព្វផ្សាយសាសនារយៈពេលពីរបីម៉ោង ។ សូមចែកចាយបទពិសោធន៍របស់អ្នកជាមួយថ្នាក់នៅពេលក្រោយ ។

• សូមគិតពីគំនិតផ្ទាល់ខ្លួនរបស់អ្នកអំពីអ្វីមួយដែលអ្នកអាចធ្វើដើម្បីចែកចាយដំណឹងល្អជាមួយអ្នកដទៃ ។

បន្ទាប់ពីផ្តល់ពេលវេលាដល់សិស្សក្នុងការដាក់ផែនការមួយហើយ សូមអញ្ជើញពួកគេឲ្យគិតអំពីឧបសគ្គដែលពួកគេអាចនឹងប្រឈមមុខ ដែលអាចធ្វើឲ្យមានការលំបាកក្នុងការធ្វើតាមផែនការរបស់ពួកគេ ។ សូមលើកទឹកចិត្តពួកគេឲ្យគិតអំពីរបៀបដែលពួកគេអាចយកឈ្នះលើឧបសគ្គទាំងនេះដោយមានជំនួយពីព្រះអម្ចាស់ ។ សូមផ្តល់ការលើកទឹកចិត្ត និងការគាំទ្រ ហើយថ្លែងទីបន្ទាល់អំពីសេចក្តីពិតដែលបានពិភាក្សា ។

វិចារណកថា និង ព័ត៌មានសាច់រឿង

តើប្រព័ន្ធផ្សព្វផ្សាយសង្គមអាចជួយខ្ញុំក្នុងការចែកចាយដំណឹងល្អដោយរបៀបណា ?

នៅក្នុងវីដេអូ « To Sweep the Earth as with a Flood » ( ២:៥៦ ) អែលឌើរ ដេវីឌ អេ បែដណា នៃកូរ៉ុមនៃពួកសាវកដប់ពីរនាក់មានប្រសាសន៍អំពីការប្រើប្រាស់ប្រព័ន្ធផ្សព្វផ្សាយសង្គមដើម្បីផ្សព្វផ្សាយដំណឹងល្អ ។ វីដេអូនេះមាននៅលើគេហទំព័រ ChurchofJesusChrist.org ។

ចុះប្រសិនបើមនុស្សបដិសេធការអញ្ជើញរបស់ខ្ញុំដើម្បីស្វែងយល់បន្ថែមនៅពេលនេះ ?

អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់បានបង្រៀន ៖

ព្រះមិនត្រូវការឲ្យអ្នក « លក់ » ដំណឹងល្អដែលបានស្ដារឡើងវិញ ឬសាសនាចក្ររបស់ព្រះយេស៊ូវគ្រីស្ទនោះទេ ។ ទ្រង់គ្រាន់តែរំពឹងថាអ្នកមិនលាក់វានៅក្រោមថាំងតែប៉ុណ្ណោះ ។ ហើយបើមនុស្សសម្រេចចិត្តថាសាសនាចក្រនេះពុំមែនសម្រាប់ពួកគេទេ នោះគឺជាការសម្រេចចិត្តរបស់ពួកគេ ។ វាពុំមានន័យថាអ្នកបរាជ័យនោះទេ ។ អ្នកបន្ដប្រព្រឹត្តល្អចំពោះពួកគេ ។ វាក៏មិនរាប់បញ្ចូលការអញ្ជើញពួកគេម្ដងទៀតដែរ ។ ភាពខុសគ្នារវាងទំនាក់ទំនងសង្គមធម្មតា និងដោយក្តីមេត្តា ការធ្វើជាសិស្សដែកក្លាហានគឺត្រូវ —ហ៊ានធ្វើការអញ្ជើញ !

( ឌៀថើរ អេស្វ អុជដូហ្វ « Your Great Adventure » Ensign ឬ Liahona ខែ វិច្ឆិកា ឆ្នាំ ២០១៩ ទំព័រ ៨៨ )

អែលឌើរ នែល អិល អាន់ឌើរសិន ក្នុងកូរ៉ុមនៃពួកសាវកដប់ពីរនាក់បានមានប្រសាសន៍ ៖

ទោះបីជាមានបំណងប្រាថ្នាដ៏ខ្លាំងក្លា ក្នុងការចែកចាយដំណឹងល្អក៏ដោយ អ្នកប្រហែលជាមិនសូវសប្បាយចិត្តនឹងជោគជ័យនៃការខិតខំកន្លងមករបស់អ្នកឡើយ។ អ្នកអាចនឹងមានអារម្មណ៍ដូចជាមិត្តម្នាក់ដែលបាននិយាយថា « ខ្ញុំបាននិយាយជាមួយគ្រួសារ និងមិត្តភក្តិរបស់យើងអំពីសាសនាចក្រ ប៉ុន្តែមានមនុស្សប៉ុន្មាននាក់ប៉ុណ្ណោះណាស់ដែលបានបង្ហាញការចាប់អារម្មណ៍ ហើយដោយសារការបដិសេធនីមួយៗ ខ្ញុំកាន់តែមានចិត្តស្ទាក់ស្ទើរ ។ ខ្ញុំដឹងថាខ្ញុំគួរធ្វើអ្វីច្រើនជាងនេះ ប៉ុន្តែខ្ញុំជាប់គាំង ហើយអ្វីដែលខ្ញុំមានអារម្មណ៍នោះ គឺថាខ្ញុំមានកំហុសធ្ងន់ធ្ងរ » ។ …

ខ្ញុំសូមផ្តល់យោបល់ ឲ្យអ្នកឈប់មានអារម្មណ៍ថាមានកំហុសចំពោះភាពមិនគ្រប់គ្រាន់ណាមួយដែលអ្នកគិតថាអ្នកមានក្នុងការចែកចាយដំណឹងល្អ ។ ផ្ទុយទៅវិញ សូមអធិស្ឋានដូចអាលម៉ាបានបង្រៀនដើម្បីទទួលបានឱកាស « ឈរជា [ សាក្សី ] ដល់ព្រះនៅគ្រប់ពេល និងគ្រប់សេចក្ដី និងគ្រប់ទីកន្លែង … ដើម្បីឲ្យ [ អ្នកដទៃទៀត ] អាចបានប្រោសលោះដោយព្រះ ហើយបានរាប់ជាមួយនឹងពួកអ្នកនៃដំណើររស់ឡើងវិញទីមួយ [ ហើយ ] មានជីវិតដ៏នៅអស់កល្បជានិច្ច » [ ម៉ូសាយ ១៨:៩ ] ។ នេះជាការលើកទឹកចិត្តច្រើនជាងការទម្លាក់កំហុស ។

( នែល អិល អាន់ឌើរសិន « A Witness of God » Ensign ឬ Liahona ខែ វិច្ឆិកា ឆ្នាំ ២០១៦ ទំព័រ ៣៦–៣៧ )

តើខ្ញុំអាចស្វែងរកមនុស្សដើម្បីបង្រៀនដោយរបៀបណា ?

ប្រធាន ដាល្លិន អេក អូក ក្នុងគណៈប្រធានទីមួយបានបង្រៀន ៖

យើងត្រូវតែអធិស្ឋានទូលសូមជំនួយ និងការដឹកនាំពីព្រះអម្ចាស់ដើម្បីឲ្យយើងអាចក្លាយជាឧបករណ៍នៅក្នុងព្រះហស្ដរបស់ទ្រង់សម្រាប់មនុស្សម្នាក់ដែលបានត្រៀមខ្លួននៅពេលនេះ—ជាមនុស្សម្នាក់ដែលទ្រង់សព្វព្រះទ័យឲ្យយើងជួយនៅថ្ងៃនេះ ។ បន្ទាប់មកយើងត្រូវត្រងត្រាប់ស្ដាប់ ហើយធ្វើតាមការបំផុសគំនិតពីព្រះវិញ្ញាណអំពីរបៀបដែលយើងត្រូវចាប់ផ្ដើម ។

ការបំផុសគំនិតទាំងនោះនឹងកើតមានឡើង ។ យើងដឹងមកពីទីបន្ទាល់ផ្ទាល់ខ្លួនជាច្រើនថា តាមរបៀបរបស់ទ្រង់ផ្ទាល់ និងតាមពេលវេលារបស់ទ្រង់ នោះព្រះអម្ចាស់កំពុងរៀបចំមនុស្សឲ្យទទួលយកដំណឹងល្អរបស់ទ្រង់ ។ មនុស្សទាំងនេះកំពុងស្វែងរកដំណឹងល្អ ហើយនៅពេលយើងខិតខំរកពួកគេ នោះព្រះអម្ចាស់នឹងឆ្លើយតបដល់ការអធិស្ឋានរបស់ពួកគេតាមរយៈការឆ្លើយតបនឹងការអធិស្ឋានរបស់យើង ។ ទ្រង់នឹងបំផុស ហើយដឹកនាំមនុស្សដែលមានបំណងប្រាថ្នា និងមនុស្សដែលស្វែងរកការដឹកនាំដោយចិត្តស្មោះឲ្យដឹងពីរបៀប ទីកន្លែង ពេលវេលា និងនរណាដែលត្រូវចែកចាយដំណឹងល្អ ។

( ដាល្លិន អេក អូក « Sharing the Gospel » Ensign ខែ វិច្ឆិកា ឆ្នាំ ២០០១ ទំព័រ ៨ )

សកម្មភាពរៀនសូត្របន្ថែម

មធ្យោបាយផ្សេងដើម្បីចាប់ផ្តើមមេរៀន

សូមបង្ហាញសិស្សនូវវីដេអូ « Sharing the Gospel » ( ៣:៤៩ ) ដែលមាននៅលើ ChurchofJesusChrist.org ។ សូមអញ្ជើញពួកគេឲ្យមានសំណួរទាំងពីរនេះក្នុងចិត្ត នៅពេលពួកគេមើលវីដេអូ ៖ ហេតុអ្វីបានជាយើងចែកចាយដំណឹងល្អនៃព្រះយេស៊ូវគ្រីស្ទ ? តើខ្ញុំអាចចែកចាយដំណឹងល្អជាមួយមនុស្សដទៃតាមរបៀបណា ? បន្ទាប់ពីមើលហើយ សូមចំណាយពេលបន្តិចដើម្បីពិភាក្សាសំណួរទាំងនេះ ។

Sharing the Gospel

What we call “member missionary work” is not a program but an attitude of love and outreach to help those around us.

សូមអញ្ជើញវាគ្មិនឲ្យចូលរួមនៅក្នុងថ្នាក់

សូមអញ្ជើញវាគ្មិនម្នាក់ឲ្យចែកចាយក្នុងអំឡុងពេលវគ្គទីពីរនៃថ្នាក់ពីរបៀបដែលសមាជិកសាសនាចក្រអាចធ្វើកិច្ចការផ្សព្វផ្សាយសាសនា ។ សូមចងចាំថាត្រូវទទួលការអនុម័តពីអ្នកសម្របសម្រួលថ្នាក់សិក្ខាសាលា និងវិទ្យាស្ថានក្នុងតំបន់ ក៏ដូចជាអ្នកដឹកនាំបព្វជិតភាពក្នុងតំបន់របស់វាគ្មិន មុនពេលអញ្ជើញវាគ្មិនមក ។

សូមពិចារណាស្នើសុំវាគ្មិនរូបនេះឲ្យបញ្ចូលគោលការណ៍នៃកិច្ចការផ្សព្វផ្សាយសាសនាដែលប៉ុល និងដៃគូរបស់លោកបានធ្វើជាគំរូនៅក្នុង កិច្ចការ ១៦ ។