កិច្ចការ ១

សេចក្ដីណែនាំចំពោះព្រះគម្ពីរកិច្ចការ

អស់រយៈពេល ៤០ ថ្ងៃបន្ទាប់ពីការមានព្រះជន្មរស់ឡើងវិញរបស់ទ្រង់ ព្រះយេស៊ូវគ្រីស្ទបានបម្រើដល់ពួកសិស្សរបស់ទ្រង់ ។ ក្នុងអំឡុងពេលនេះ ទ្រង់បានរៀបចំពួកសាវករបស់ទ្រង់ ដើម្បីដឹកនាំសាសនាចក្ររបស់ទ្រង់បន្ទាប់ពីការយាងឡើងទៅកាន់ស្ថានសួគ៌របស់ទ្រង់វិញ ។ ដូចជាទ្រង់បានធ្វើពីបុរាណដែរ ព្រះយេស៊ូវគ្រីស្ទបន្តដឹកនាំសាសនាចក្ររបស់ទ្រង់តាមរយៈពួកសាវកដែលទ្រង់បានជ្រើសរើសនាសព្វថ្ងៃនេះ ។ មេរៀននេះអាចជួយអ្នកឲ្យមានអារម្មណ៍ថាវាសំខាន់ប៉ុណ្ណាដែលព្រះយេស៊ូវគ្រីស្ទដឹកនាំសាសនាចក្ររបស់ទ្រង់តាមរយៈពួកសាវក និងពួកព្យាការី ។

ការទទួលស្គាល់ការរួមចំណែករបស់សិស្ស ។ សិស្សម្នាក់ៗមានប្រវត្តិ ចំណាប់អារម្មណ៍ ក្តីសង្ឃឹម និងបញ្ហាប្រឈមពិសេសរៀងៗខ្លួន ។ នៅពេលសិស្សចែកចាយបទពិសោធន៍ និងការយល់ដឹងនៅក្នុងថ្នាក់ ជារឿយៗពួកគេនឹងទទួលឥទ្ធិពលពីស្ថានភាពជីវិតពិសេសរៀងៗខ្លួនរបស់ពួកគេ ។ បទពិសោធន៍ និងការយល់ដឹងទាំងនេះអាចផ្តល់ពរដល់សិស្សផ្សេងទៀត ហើយអាចជួយគ្រូបង្រៀនឲ្យវាយតម្លៃពីតម្រូវការរបស់សិស្ស និងបង្រៀនទៅតាមនោះ ។

ការរៀបចំរបស់សិស្ស ៖ សូមអញ្ជើញសិស្សឲ្យមករៀនដោយបានត្រៀមខ្លួនដើម្បីចែកចាយគំរូ ដែលបង្ហាញពីព្រះយេស៊ូវគ្រីស្ទដឹកនាំសាសនាចក្ររបស់ទ្រង់នៅថ្ងៃចុងក្រោយនេះ ។

សកម្មភាពរៀនសូត្រដែលអាចមាន

ការយាងឡើងទៅកាន់ស្ថានសួគ៌វិញរបស់ព្រះគ្រីស្ទ

សូមពិចារណាកែសម្រួលសាច់រឿងខាងក្រោមដោយផ្អែកលើតម្រូវការរបស់សិស្ស ។ សិស្សអាចដើរតួសម្ដែង និងប្តូរវេនគ្នាឆ្លើយតបទៅមិត្តភក្តិនៅក្នុងសាច់រឿងនេះបាន ។

សូមស្រមៃថាមិត្តរបស់អ្នក ដែលមិនមែនជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ សួរអ្នកថា « តើអ្នកណាបានចាប់ផ្ដើមព្រះវិហារដែលអ្នកចូលរួម ហើយអ្នកណាដឹកនាំសាសនាចក្រនៅសព្វថ្ងៃនេះ ? »

• តើអ្នកនឹងឆ្លើយយ៉ាងដូចម្ដេច ? ហេតុអ្វីទៅ ?

គម្ពីរកិច្ចការពិពណ៌នាអំពីបទពិសោធន៍របស់សាវកទាំងឡាយ បន្ទាប់ពីការយាងឡើងទៅកាន់ស្ថានសួគ៌វិញរបស់ព្រះយេស៊ូវគ្រីស្ទ ។ វាច្បាស់ជាកិច្ចការដ៏គួរឲ្យព្រួយបារម្ភមួយសម្រាប់ថ្នាក់ដឹកនាំសាសនាចក្រក្នុងការជំរុញសាសនាចក្ររបស់ព្រះអង្គសង្គ្រោះឲ្យរីកចម្រើនទៅមុខ នៅពេលដែលទ្រង់លែងគង់នៅដោយផ្ទាល់ជាមួយពួកគេទៀតហើយនោះ ។ ប៉ុន្តែសាវកទាំងឡាយមិនមែនខិតខំតែម្នាក់ឯងនោះទេ ។ បទពិសោធន៍របស់សាវកទាំងឡាយដែលបានកត់ត្រានៅក្នុងគម្ពីរកិច្ចការបង្ហាញពីសេចក្ដីពិតថា ព្រះយេស៊ូវគ្រីស្ទដឹកនាំសាសនាចក្ររបស់ទ្រង់តាមរយៈសាវក និងព្យាការីទាំងឡាយរបស់ទ្រង់ ។

សូមពិចារណាពីអារម្មណ៍ផ្ទាល់ខ្លួនរបស់អ្នកអំពីព្រះយេស៊ូវគ្រីស្ទដែលដឹកនាំសាសនាចក្ររបស់ទ្រង់ ។ នៅក្នុងសៀវភៅកំណត់ហេតុការសិក្សារបស់អ្នក សូមឆ្លើយដូចខាងក្រោមនេះ ៖

1. ហេតុអ្វីបានជាវាសំខាន់ដើម្បីដឹងថា ព្រះយេស៊ូវគ្រីស្ទដឹកនាំសាសនាចក្ររបស់ទ្រង់ ?

2. តើអ្នកនឹងរំពឹងថាឃើញអ្វីខ្លះក្នុងព្រះវិហារដែលដឹកនាំដោយព្រះយេស៊ូវគ្រីស្ទ ?

3. ដោយប្រើមាត្រដ្ឋានខាងក្រោមនេះ សូមកំណត់ថាតើអ្នកយល់ស្របនឹងសេចក្តីថ្លែងការណ៍នេះកម្រិតណា ៖ « ព្រះយេស៊ូវគ្រីស្ទដឹកនាំសាសនាចក្ររបស់ទ្រង់នៅថ្ងៃនេះ តាមរយៈពួកសាវក និងព្យាការី » ។ សូមពន្យល់ពីចម្លើយរបស់អ្នក ។

នៅពេលអ្នកសិក្សាមេរៀននេះ សូមយកចិត្តទុកដាក់លើការបំផុសគំនិតនៃព្រះវិញ្ញាណ ដែលអាចជួយអ្នកឲ្យមានអារម្មណ៍ថា ព្រះយេស៊ូវគ្រីស្ទបានដឹកនាំសាសនាចក្ររបស់ទ្រង់ បន្ទាប់ពីទ្រង់បានយាងឡើងទៅកាន់ស្ថានសួគ៌ ហើយថាទ្រង់បន្តដឹកនាំសាសនាចក្ររបស់ទ្រង់នៅថ្ងៃនេះ ។

ព្រះយេស៊ូវគ្រីស្ទបន្តដឹកនាំសាសនាចក្ររបស់ទ្រង់ បន្ទាប់ពីការយាងឡើងទៅកាន់ស្ថានសួគ៌របស់ទ្រង់វិញ

សូមបង្កើតកំណត់ហេតុប្រចាំថ្ងៃមួយដែលមានចំណងជើងថា « គំរូនៃព្រះយេស៊ូវគ្រីស្ទដឹកនាំសាសនាចក្ររបស់ទ្រង់ » ។ ពេញមួយមេរៀននេះ សូមបន្ថែមឧទាហរណ៍ទៅក្នុងកំណត់ហេតុប្រចាំថ្ងៃរបស់អ្នក ហើយសញ្ជឹងគិតពីរបៀបដែលវាពង្រឹងទីបន្ទាល់របស់អ្នកអំពីព្រះយេស៊ូវគ្រីស្ទ និងសាសនាចក្ររបស់ទ្រង់ ។

សូមអានវគ្គបទគម្ពីរខាងក្រោមអំពី កិច្ចការ ១–៥ ដោយរកមើលពីរបៀបដែលព្រះយេស៊ូវគ្រីស្ទបានបន្តជួយដល់ពួកសាវករបស់ទ្រង់បន្ទាប់ពីការយាងឡើងទៅវិញរបស់ទ្រង់ ។ សូមគិតអំពីរបៀបដែលព្រឹត្តិការណ៍ទាំងនេះបង្ហាញថា ព្រះយេស៊ូវគ្រីស្ទកំពុងដឹកនាំសាសនាចក្ររបស់ទ្រង់ ។ សូមបន្ថែមការយល់ដឹងរបស់អ្នកទៅក្នុងកំណត់ហេតុប្រចាំថ្ងៃរបស់អ្នក ។

សូមផ្តល់ឲ្យសិស្សនូវសំណៅចែកខាងក្រោម ។ សូមពិចារណាបែងចែកពួកគេទៅជាក្រុមដែលមានគ្នាបួននាក់ ។ មនុស្សម្នាក់ៗក្នុងក្រុមអាចសិក្សាដំណើររឿងមួយ ហើយរកមើលភស្តុតាងអំពីព្រះយេស៊ូវដឹកនាំសាសនាចក្ររបស់ទ្រង់តាមរយៈសាវកទាំងឡាយ ។ បន្ទាប់មក ពួកគេម្នាក់ៗអាចចែកចាយចម្លើយរបស់ពួកគេជាមួយអ្នកផ្សេងទៀតនៅក្នុងក្រុមរបស់ពួកគេ ។

ខគម្ពីរដែលត្រូវសិក្សា	ព័ត៌មានលម្អិតដែលអ្នកត្រូវដឹងមុននឹងសិក្សាខគម្ពីរទាំងនេះ
កិច្ចការ ១:២៣–២៦	ពួកសាវក និងអ្នកដើរតាមព្រះគ្រីស្ទផ្សេងទៀតបានប្រមូលផ្តុំគ្នាដើម្បីពិភាក្សាថាតើអ្នកណានឹងជំនួស យូដាស អ៊ីស្ការីយ៉ុត ជាសាវកម្នាក់ក្នុងចំណោមសាវកដប់ពីរនាក់ ។
កិច្ចការ ២:៣៧–៤៣	ខណៈដែលពួកសាវកត្រូវបានប្រមូលផ្តុំគ្នានៅក្រុងយេរូសាឡិមមិនយូរប៉ុន្មានបន្ទាប់ពីការយាងឡើងទៅកាន់ស្ថានសួគ៌របស់ព្រះគ្រីស្ទ ព្រះវិញ្ញាណបរិសុទ្ធបានយាងមកសណ្ឋិតលើពួកគេម្នាក់ៗតាមរបៀបដ៏មានឥទ្ធិពល ( សូមមើល កិច្ចការ ២:១–៨ ) ។ ដោយពោរពេញទៅដោយព្រះវិញ្ញាណ នោះពេត្រុសបានធ្វើទីបន្ទាល់អំពីព្រះយេស៊ូវគ្រីស្ទ ( សូមមើល កិច្ចការ ២:១៤–៣៦ ) ។ វគ្គបទគម្ពីរនេះពិពណ៌នាអំពីឥទ្ធិពលនៃការចាក់ស្រោចខាងវិញ្ញាណទៅលើបណ្តាជនជាច្រើន ដែលបានធ្វើជាសាក្សីអំពីវា ។
កិច្ចការ ៣:១–៨ ; ៤:៨–១០	ពេត្រុស និងយ៉ូហានបានជួបបុរសពិការម្នាក់នៅព្រះវិហារបរិសុទ្ធក្នុងក្រុងយេរូសាឡិម ។
កិច្ចការ ៥:១២–១៦	កាលពីមុនសាវកទាំងឡាយបានទទួលការព្រមានមកពីអ្នកដឹកនាំសាសន៍យូដាថា កុំឲ្យនិយាយអំពីព្រះយេស៊ូវគ្រីស្ទទៀតឡើយ ( សូមមើល កិច្ចការ ៤:១៣–១៨ ) ។
កិច្ចការ ៥:១៧–២៥	ពេត្រុស និងយ៉ូហានត្រូវបានគេចាប់ដាក់គុក បន្ទាប់ពីបានបន្តថ្លែងទីបន្ទាល់អំពីព្រះយេស៊ូវគ្រីស្ទ ហើយបង្ហាញអព្ភូតហេតុក្នុងព្រះនាមទ្រង់ ។

• តើអ្នកបានរៀនអ្វីខ្លះអំពីព្រះយេស៊ូវគ្រីស្ទពីខគម្ពីរទាំងនេះ ដែលជះឥទ្ធិពលដល់សេចក្តីជំនឿ និងការទុកចិត្តរបស់អ្នកលើទ្រង់ ?

• តើព្រឹត្តិការណ៍ទាំងនេះបង្ហាញថា ព្រះអង្គសង្គ្រោះកំពុងដឹកនាំសាសនាចក្ររបស់ទ្រង់តាមរយៈសាវករបស់ទ្រង់យ៉ាងដូចម្ដេច ?

ព្រះយេស៊ូវគ្រីស្ទបន្តដឹកនាំសាសនាចក្ររបស់ទ្រង់សព្វថ្ងៃនេះ

ប្រធាន រ័សុល អិម ណិលសុន បានបង្រៀនអំពីរបៀបដែលព្រះអង្គសង្គ្រោះបន្តដឹកនាំសាសនាចក្ររបស់ទ្រង់សព្វថ្ងៃនេះ ។

ក្នុងនាមយើងជាសមាជិកសាសនាចក្ររបស់ព្រះអម្ចាស់ យើងដឹងថា អង្គដែលគង់ជាសិរសានៃសាសនាចក្រនេះគឺ ៖ ព្រះយេស៊ូវគ្រីស្ទផ្ទាល់ ។ …

ដូច្នេះ តើឈ្មោះមួយមានតម្លៃយ៉ាងណា ? នៅពេលមានសំណួរដែលទាក់ទងនឹងឈ្មោះនៃសាសនាចក្ររបស់ព្រះអម្ចាស់ ចម្លើយគឺ « អ្វីៗគ្រប់យ៉ាង ! » ព្រះយេស៊ូវគ្រីស្ទបានដឹកនាំឲ្យហៅសាសនាចក្រនេះតាមព្រះនាមរបស់ទ្រង់ ដោយសារនេះគឺជាសាសនាចក្ររបស់ទ្រង់ ហើយវាពោរពេញដោយព្រះចេស្ដារបស់ទ្រង់ ។

ខ្ញុំដឹងថា ព្រះមានព្រះជន្មរស់ ។ ព្រះយេស៊ូវជាព្រះគ្រីស្ទ ។ ទ្រង់ដឹកនាំសាសនាចក្ររបស់ទ្រង់នៅសព្វថ្ងៃនេះ ។

( រ័សុល អិម ណិលសុន « The Correct Name of the Church » Ensign ឬ លីអាហូណា ខែ វិច្ឆិកា ឆ្នាំ ២០១៨ ទំព័រ ៨៨–៨៩ )

• តើការដឹងថា ព្រះយេស៊ូវគ្រីស្ទដឹកនាំសាសនាចក្ររបស់ទ្រង់នៅសព្វថ្ងៃនេះអាចជះឥទ្ធិពលដល់ជីវិតរបស់អ្នកយ៉ាងដូចម្ដេច ?

សូមរំឭកសិស្សឲ្យប្រើប្រាស់ការរៀបចំរបស់ពួកគេសម្រាប់ចូលរៀន នៅពេលពួកគេឆ្លើយតបទៅនឹងសំណួរខាងក្រោមនេះ ។ ប្រសិនបើសិស្សត្រូវការជំនួយក្នុងការឆ្លើយតប សូមពិចារណាចែកចាយឧទាហរណ៍មួយចំនួន ដូចជាការរីកចម្រើននៃសាសនាចក្រ ការចេញមក និងការបកប្រែព្រះគម្ពីរមរមន វិវរណៈដែលនាំមកនូវពរជ័យបព្វជិតភាពដល់បុរសដែលមានភាពស័ក្តិសមទាំងអស់ អព្ភូតហេតុដែលកើតឡើងក្នុងជីវិតសមាជិកនៃសាសនាចក្រ ឬឧទាហរណ៍ផ្សេងទៀត ។

• តើគំរូអ្វីខ្លះពីជីវិតផ្ទាល់ខ្លួនរបស់អ្នក ឬពីប្រវត្តិសាសនាចក្រ ដែលជួយអ្នកឲ្យមើលឃើញថា ព្រះយេស៊ូវគ្រីស្ទបន្តដឹកនាំសាសនាចក្ររបស់ទ្រង់សព្វថ្ងៃនេះ ? ( សូមកុំភ្លេចបន្ថែមឧទាហរណ៍ទាំងនេះទៅក្នុងកំណត់ហេតុប្រចាំថ្ងៃរបស់អ្នក ) ។

ប្រសិនបើអ្នកត្រូវការមើលឧទាហរណ៍មួយចំនួនដើម្បីជួយអ្នកគិតរកចម្លើយចំពោះសំណួរនេះ សូមទស្សនា « This Is Our Time ! » ចាប់ពីលេខកូដម៉ោង ៣:៣៤ ដល់ ៥:១២ ឬ « Gather Together in One All Things in Christ » ពីលេខកូដម៉ោង ១០:០៩ ដល់ ១៣:៥៨ ដែលមាននៅលើគេហទំព័រ ChurchofJesusChrist.org ។

• តើគំរូនៃការដឹកនាំសាសនាចក្ររបស់ព្រះអង្គសង្រ្គោះទាំងនេះអាចជួយអ្នកឲ្យយល់អ្វីខ្លះអំពីព្រះទ័យរបស់ទ្រង់ចំពោះយើង ?

សញ្ជឹងគិត

សូមរំឭកបញ្ជីគំរូនៃព្រះអង្គសង្គ្រោះដែលដឹកនាំសាសនាចក្ររបស់ទ្រង់ ដែលអ្នកបានបង្កើតនៅថ្ងៃនេះ ។ សូមពិចារណាបន្ថែមលើការសរសេរបញ្ចូល នៅពេលអ្នកបន្តសិក្សាគម្ពីរកិច្ចការ ហើយមានបទពិសោធន៍បន្ថែមក្នុងការរៀនអំពីព្រះអង្គសង្គ្រោះ និងសាសនាចក្ររបស់ទ្រង់ ។ សូមពិចារណាបន្ថែមទីបន្ទាល់របស់អ្នកអំពីសេចក្តីពិតនេះទៅក្នុងកំណត់ហេតុប្រចាំថ្ងៃរបស់អ្នក ។

សូមអញ្ជើញសិស្សឲ្យចែកចាយបញ្ជីរបស់ពួកគេ ។ សូមពិចារណាអំពីការធ្វើទីបន្ទាល់ផ្ទាល់ខ្លួន អំពីរបៀបដែលព្រះអង្គសង្គ្រោះដឹកនាំសាសនាចក្រនៅសព្វថ្ងៃនេះ ហើយអញ្ជើញសិស្សដែលស្ម័គ្រចិត្តឲ្យធ្វើទីបន្ទាល់ផងដែរ ។

វិចារណកថា និង ព័ត៌មានសាច់រឿង

តើនរណាបានសរសេរគម្ពីរកិច្ចការ ?

លូកាបានសរសេរគម្ពីរកិច្ចការនៃពួកសាវក « ភាគទី ២ ក្នុងឯកសារពីរភាគ ។ … ភាគទី ១ នោះត្រូវគេស្គាល់ថាជា ដំណឹងល្អតាមលោក លូកា » ( សេចក្ដីណែនាំដល់បទគម្ពីរទាំងឡាយ « គម្ពីរកិច្ចការនៃពួកសាវក » នៅលើគេហទំព័រ scriptures.ChurchofJesusChrist.org; សូមមើល លូកា ១:១–៤ ; កិច្ចការ ១:១ ផងដែរ ) ។

តើគម្ពីរនេះនិយាយអំពីអ្វី ?

គម្ពីរកិច្ចការនៃពួកសាវកបង្កើតបានជាការសង្ខេបរវាងកំណត់ត្រាអំពីព្រះជន្មរបស់ព្រះយេស៊ូវគ្រីស្ទ និងការបង្រៀននៅក្នុងដំណឹងល្អទាំងបួន ព្រមទាំងការសរសេរ និងកិច្ចការនៃពួកសាវករបស់ទ្រង់ ។ គម្ពីរកិច្ចការបង្ហាញពីរបៀបដែលព្រះអង្គសង្គ្រោះបានបន្តដឹកនាំសាសនាចក្ររបស់ទ្រង់ តាមរយៈការបំផុសគំនិតនៃព្រះវិញ្ញាណបរិសុទ្ធ ដែលទ្រង់ប្រទានដល់អស់អ្នកដែលបានកាន់កូនសោទាំងឡាយនៃបព្វជិតភាព ។ ព្រះវិញ្ញាណបរិសុទ្ធបានបើកសម្តែងសេចក្តីពិតដល់ពួកសាវក ក្រោយមកពួកគេបានដឹកនាំ និងបង្រៀនសមាជិកសាសនាចក្រ ។ ពួកសាវកក៏បានធ្វើអព្ភូតហេតុនៅក្នុងព្រះនាមរបស់ព្រះយេស៊ូវគ្រីស្ទផងដែរ ។

អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានពន្យល់ ៖

នៅក្នុងខទីមួយ [ នៃគម្ពីរកិច្ចការ ] ការប្រកាសនោះគឺថា សាសនាចក្រនឹងបន្ដដឹកនាំដោយ ព្រះ ពុំមែនដឹកនាំដោយមនុស្សទេ ។ ជាការពិតណាស់ ចំណងជើងដែលកាន់តែពេញលេញសម្រាប់គម្ពីរកិច្ចការ គួរតែជាអ្វីមួយដូចជា « កិច្ចការរបស់ព្រះគ្រីស្ទដែលមានព្រះជន្មរស់ឡើងវិញ ធ្វើការតាមរយៈព្រះវិញ្ញាណបរិសុទ្ធនៅក្នុងជីវិត និងការងារបម្រើនៃពួកសាវកដែលបានតែងតាំងរបស់ទ្រង់ » ទើបត្រឹមត្រូវ ។ …

« ការដឹកនាំរបស់សាសនាចក្រគឺនៅដដែល ។ ទីតាំងរបស់ព្រះអង្គសង្គ្រោះត្រូវបានកែប្រែ ប៉ុន្តែការដឹកនាំ និងភាពជាអ្នកដឹកនាំក្នុងសាសនាចក្រគឺដូចគ្នាទាំងស្រុង » ។

( « Therefore, What? » [ សុន្ទរកថាដែលបានថ្លែងនៅសន្និសីទប្រព័ន្ធអប់រំសាសនាចក្រស្តីពីព្រះគម្ពីរសញ្ញាថ្មី ថ្ងៃទី ៨ ខែ សីហា ឆ្នាំ ២០០០ ] ទំព័រ ៦ នៅលើគេហទំព័រ si.ChurchofJesusChrist.org )

តើសាវកគឺជាអ្វី ?

ដើម្បីស្វែងយល់បន្ថែមអំពីសាវក សូមមើលវីដេអូ « What Is an Apostle? » ( ៦:២៥ ) ដែលមាននៅគេហទំព័រ ChurchofJesusChrist.org ។

តើព្រះអម្ចាស់ដឹកនាំសាសនាចក្ររបស់ទ្រង់សព្វថ្ងៃនេះតាមរបៀបណា ?

អែលឌើរ ឃ្វីនថិន អិល ឃុក ក្នុងកូរ៉ុមនៃពួកសាវកដប់ពីរនាក់បានពន្យល់ ៖

សូមបញ្ជាក់ថា ថ្នាក់ដឹកនាំជាន់ខ្ពស់នៃសាសនាចក្រដែលធ្វើជាអធិបតីលើគោលបំណងដែលបានតែងតាំងដ៏ទេវភាពនៃសាសនាចក្រគឺបានទទួលជំនួយទេវភាព ។ ការណែនាំនេះកើតឡើងមកពីព្រះវិញ្ញាណ ហើយជួនកាលកើតឡើងដោយផ្ទាល់មកពីព្រះអង្គសង្គ្រោះ ។ ការណែនាំខាងវិញ្ញាណទាំងពីរប្រភេទនេះត្រូវបានប្រទានឲ្យ ។ ខ្ញុំមានអំណរគុណដែលបានទទួលជំនួយបែបនោះ ។ ប៉ុន្តែការណែនាំបានផ្ដល់ឲ្យនៅក្នុងសម័យរបស់ព្រះអម្ចាស់ មួយបន្ទាត់ម្ដងៗ មួយសិក្ខាបទម្ដងៗ [ សូមមើល នីហ្វៃទី ២ ២៨:៣០ ; គោលលទ្ធិ និង សេចក្តីសញ្ញា ៩៨:១២ ; ១២៨:២១ ] នៅពេល « ព្រះអម្ចាស់ដ៏មានគ្រប់ព្រះចេស្ដាជ្រើសរើសបង្រៀនយើងដោយព្រះចេតនា » [ នែល អេ ម៉ាក់ស្វែល All These Things Shall Give Thee Experience ( ឆ្នាំ ២០០៧ ) ទំព័រ ៣១ ] ។ ការណែនាំសម្រាប់សាសនាចក្រទាំងមូលទទួលបានតាមរយៈព្យាការីរបស់ទ្រង់តែប៉ុណ្ណោះ ។

( ឃ្វីនថិន អិល ឃុក « Prepare to Meet God » Ensign ឬ Liahona ខែ ឧសភា ឆ្នាំ ២០១៨ ទំព័រ ១១៧ )

សូមទស្សនាវីដេអូ « Jesus Christ’s Church » ( ១:២៧ ) ឬ « We Need Living Prophets » ( ២:៤៤ ) ដែលមាននៅលើគេហទំព័រ ChurchofJesusChrist.org ដើម្បីមើលឧទាហរណ៍បន្ថែមទៀត ។

តើពួកសាវក និងពួកព្យាការីសម័យទំនើបត្រូវបានហៅយ៉ាងដូចម្ដេច ?

សូមទស្សនា « Revelation for the Church, Revelation for Our Lives » ពីលេខកូដម៉ោង ៩:៤១ ដល់ ១១:៤៩ ឬ « The Heart of a Prophet » ពីលេខកូដម៉ោង ៤:០៨ ដល់ ៦:៤០ ដែលមាននៅលើគេហទំព័រ ChurchofJesusChrist.org ដើម្បីមើលឧទាហរណ៍នានា ។

សកម្មភាពរៀនសូត្របន្ថែម

សាក្សីបុរាណ និងសម័យទំនើបរបស់ព្រះគ្រីស្ទ

ឧទាហរណ៍មួយនៃរបៀបដែលព្រះអង្គសង្គ្រោះដឹកនាំសាសនាចក្ររបស់ទ្រង់ គឺថាទ្រង់ប្រទានសាក្សីអំពីទ្រង់ ។ សិស្សអាចសិក្សាពីរបៀបដែលពេត្រុស និងយ៉ូហានបានធ្វើជាសាក្សីអំពីព្រះយេស៊ូវគ្រីស្ទ ដូចដែលបានកត់ត្រានៅក្នុង កិច្ចការ ២:៣២ ; ៣:១០–១៦ និង ៥:៣២ ។ ពួកគេអាចប្រៀបធៀបទីបន្ទាល់ទាំងនេះជាមួយនឹងឯកសារដែលបានកត់ត្រានៅក្នុង ពេត្រុស ទី២ ១:១៦ ; យ៉ូហាន ទី១ ១:១ និង គោលលទ្ធិ និង សេចក្តីសញ្ញា ៧៦:២២–២៤ និងជាមួយនឹងទីបន្ទាល់ដែលបានកត់ត្រានៅក្នុងវីដេអូ « Special Witnesses of Christ » មួយ ឬច្រើនដែលមាននៅលើគេហទំព័រ https://www.churchofjesuschrist.org/media/collection/special-witnesses-of-christ-video-collection ។

នៅឯការយាងមកជាលើកទីពីរ ព្រះអង្គសង្គ្រោះនឹងយាងចុះពីស្ថានសួគ៌នៅក្នុងសិរីល្អ

អ្នកអាចប្រើសកម្មភាពនេះបាន ប្រសិនបើសិស្សមានសំណួរអំពីរបៀបដែលព្រះអង្គសង្គ្រោះនឹងយាងមក ។ សូមអញ្ជើញសិស្សឲ្យស្វែងរកការពិតខាងលើនៅក្នុង កិច្ចការ ១:១–១២ ។ ចូរចង្អុលបង្ហាញថា ការយាងឡើងទៅវិញរបស់ព្រះអង្គសង្គ្រោះបានកើតឡើងនៅលើភ្នំដើមអូលីវ ( សូមមើល ខទី ១២ ) ។ សូមពន្យល់ថា នៅពេលព្រះអង្គសង្គ្រោះយាងមកម្តងទៀត នោះព្រះកាយរបស់ទ្រង់នឹងមានរូបរាងដូចជាពេលទ្រង់យាងចុះពីស្ថានសួគ៌ ហើយគង់នៅលើភ្នំដើមអូលីវដូច្នោះដែរ ( សូមមើល សាការី ១៤:៤ ; គោលលទ្ធិ និង សេចក្ដីសញ្ញា ៤៥:៤៧–៥៣ ; ១៣៣:១៩–២០ ) ។ ការណ៍នេះនឹងកើតឡើងមុនការបង្ហាញព្រះកាយរបស់ទ្រង់ដល់ពិភពលោក ដែលអំឡុងពេលនោះ « គ្រប់ទាំងមនុស្សទាំងឡាយនឹងបានឃើញ [ ទ្រង់ ] ព្រមគ្នា » ( អេសាយ ៤០:៥ ) ។ សិស្សអាចពិភាក្សាអំពីមូលហេតុដែលវាសំខាន់ដើម្បីដឹងថា ការយាងមកជាលើកទីពីររបស់ព្រះអង្គសង្គ្រោះនឹងមានភាពច្បាស់លាស់ និងជាភស្តុតាងសម្រាប់ពិភពលោកទាំងមូល ។ តើនេះជាការបង្ហាញពីសេចក្ដីស្រឡាញ់របស់ទ្រង់ចំពោះយើងយ៉ាងដូចម្ដេច ?