Mga Buhat 22–23, 26–28

Ang Ginoo kauban ni Pablo

The resurrected Christ appears to Paul while he is in prison.

Samtang gikadenahan ug gipalibotan sa mga Judio nga gustong mopatay kaniya, si Pablo mibarog sa mga ang-ang sa Antonia Fortress sa Jerusalem ug dayag nga nipamatuod sa iyang pagkakabig kang Jesukristo. Human sa pagkabilanggo ni Pablo, ang Manluluwas mibisita kaniya ug misaad nga si Pablo magpamatuod Kaniya didto sa Roma. Si Pablo pagkahuman nakasinati og daghang mga pagsulay nga nakahimo niini nga saad nga daw dili matuman. Kini nga leksiyon naghatag og kinatibuk-ang paghulagway sa Mga Buhat 22–23, 26–28 ug gituyo aron sa pagdugang sa imong pagsalig nga ang Langitnong Amahan ug si Jesukristo motuman sa Ilang mga saad samtang ikaw maningkamot sa pag-alagad Kanila. 

Mga kasinatian sa pagpakigbahin. Pangutana og mga pangutana nga magdapit sa mga estudyante sa pagpamalandong sa espirituhanong mga kasinatian nga may kalabotan sa mga kamatuoran nga gitudlo. Sa pagpaambit sa mga estudyante sa ilang mga kasinatian, ilang mabati ang importansiya niana nga kamatuoran ug magmalig-on ang ilang tinguha nga magpuyo niini nga mas matinud-anon.

Pagpangandam sa estudyante: Dapita ang mga estudyante sa pagpamalandong sa mga gisaad sa Ginoo diha kanila. Pananglitan, mahimo silang mamalandong sa mga gisaad diha sa pag-ampo sa sakramento (tan-awa sa Moroni 4:3 ; 5:2) o sa lain pang mga kasulatan. Ang mga estudyante nga nakadawat na sa ilang patriyarkal nga mga panalangin mahimong mobasa kanila ug mangita sa mga gisaad sa Ginoo. Pahinumdomi ang mga estudyante nga ang patriyarkal nga mga panalangin kay indibidwal ug sagrado ug dili gayod ipakigbahin sa mga miyembro sa klase.

Posible nga mga Kalihokan sa Pagkat-on

Kang kinsa kamo misalig?

Ipakita ang mosunod nga mga pag-aghat [prompts] ug dapita ang mga estudyante sa pagtubag diha sa ilang mga journal sa pagtuon sa dili pa sila mopaambit sa ilang mga tubag sa klase.

Kang kinsa ninyo isalig ang pagbuhat sa mosunod ug ngano?

Pagpili unsa ang inyong isul-ob
Pagpili asa kamo mopuyo
Motuman kanunay sa ilang mga gisaad
Magpabilin uban kaninyo sa malisod nga mga panahon

Tubaga ang mosunod nga mga pangutana:

Hain niini ang labing importante alang kaninyo? Ngano man?
Sa unsang paagi kini nakatabang kaninyo nga adunay mga tawo sa inyong kinabuhi nga inyong masaligan?

Paggahin og panahon sa pagpamalandong unsa kadako ang inyong pagsalig sa Langitnong Amahan ug kang Jesukristo. Nagtuo ba kamo nga Sila motuman sa Ilang mga gisaad nganha kaninyo? Nagtuo ba kamo nga Sila maanaa kaninyo panahon sa malisod nga mga panahon? Aduna ba kamoy igong pagsalig Kanila aron tugotan Sila nga mogiya kaninyo sa matag adlaw? Ngano o nganong dili?Sa inyong pagtuon niini nga leksiyon, pangita og mga asoy nga makatabang kaninyo nga madugangan ang inyong kompyansa nga ang Langitnong Amahan ug si Jesukristo motuman sa Ilang mga gisaad samtang maningkamot kamo nga moalagad Kanila.

Si Pablo mibalik ngadto sa Jerusalem

Human sa iyang ikatulong misyonaryong panaw, si Pablo mibalik sa Jerusalem aron magmatuod kang Kristo. Siya giguyod gikan sa templo sa usa ka grupo sa mga Judio nga gustong mopatay kaniya apan siya giluwas sa Romanhong mga sundalo. Siya gidala ngadto sa mga ang-ang sa Antonia Fortress ug gitugotan sa pagsulti (tan-awa sa Mga Buhat 21). Si Pablo nagpamatuod mahitungod sa iyang pagkakabig ngadto kang Jesukristo ug sa sugo sa Manluluwas sa pagsangyaw ngadto sa mga Hentil. Ang mga Judio nasuko pag-usab, ug si Pablo gipadala og balik sa kampo alang sa iyang kaluwasan (tan-awa sa Mga Buhat 22 ; 23:1–10).

Basaha ang Mga Buhat 23:11, ug pangitaa unsa ang giingon ug gibuhat sa Manluluwas alang kang Pablo.

1:32

Unsa ang atong makat-onan mahitungod sa Manluluwas gikan sa unsa ang Iyang giingon ug gibuhat niini nga bersikulo?

Ang mga estudyante mahimong moila sa mga kamatuoran sama sa mosunod: Siya nakaila kanato sa ngalan. Siya naghupay ug nagdasig kanato. Kauban Siya nato panahon sa atong mga hagit.

Ikonsiderar ang pagdapit sa mga estudyante sa pagpamalandong sa ilang kaugalingong mga kasinatian pinaagi sa paggamit sa mosunod nga pangutana.

Kanus-a napakita sa Manluluwas ang usa niini nga kamatuoran diha sa inyong kinabuhi o sa kinabuhi sa usa ka tawo nga inyong nailhan?

Kon ang mga estudyante nagkinahanglan og tabang sa paghunahuna sa mga kasinatian, mahimong mopaambit og usa ka personal nga kasinatian o usa ka pananglitan diha sa mga kasulatan nga naghulagway niining mga kamatuoran, sama sa Unang Panan-awon ni Joseph Smith (tan-awa sa Joseph Smith—Kasaysayan 1:14–20).

Ang mga saad sa Manluluwas

Ang kasinatian ni Pablo usa ka ehemplo nga ang Manluluwas nagtuman sa Iyang gisaad nga makauban ang Apostoles diha sa ilang pagsangyaw sa ebanghelyo (tan-awa sa Mateo 28:19–20).

Sa imong journal sa pagtuon, pagmugna og usa ka tsart sama sa anaa sa ubos. Sa kinatibuk-an niini nga leksiyon, paglista sa mga gisaad sa Ginoo diha sa wala nga bahin sa tsart ug ang katumanan sa maong mga saad diha sa tuo.

Ikonsiderar ang pagpakita sa tsart diha sa pisara ug ang pagtubag niini isip usa ka klase. Dapita ang mga estudyante sa pagmugna usab og tsart diha sa ilang mga journal.

Mga saad

Katumanan sa mga saad

Si Jesus kauban sa Apostoles diha sa ilang pagsangyaw sa ebanghelyo (tan-awa sa Mateo 28:19–20).

Si Pablo magpamatuod didto sa Roma (tan-awa sa Mga Buhat 23:11).

Si Jesus miadto kang Pablo sa kampo human si Pablo nagsangyaw (tan-awa sa Mga Buhat 23:11).

Ang Manluluwas mihimo og dugang nga mga saad ngadto sa Iyang Apostoles.

Basaha ang Mateo 10:18–20 ug Marcos 16:17–18 .Ilha ang mga saad sa Manluluwas, ug isulat kini diha sa wala nga kolum sa inyong tsart.

Unsa ang gitudlo niini nga mga saad kaninyo mahitungod ni Jesukristo?

Si Pablo nagpadayon sa pagpamatuod kang Kristo

Basaha ang tanan nga mosunod nga mga pinamubo [summaries], ug pamalandongi kon unsa kaha ang inyong bation kon kamo ang anaa sa sitwasyon ni Pablo. Dayon basaha ang mga bersikulo nga nalista human sa kada sitwasyon aron makita giunsa ni Pablo pagsanong ug giunsa pagkatuman ang mga gisaad sa Ginoo. Idugang ang natuman nga mga saad nga imong nakita sa tuong bahin sa tsart sa imong journal sa pagtuon.

Si Pablo gihusay atubangan sa mga Romanhong gobernador ug mga hari; Mga Buhat 26:1–2, 22–23 .
Si Pablo gipadala sakay sa usa ka barko paingon sa Roma apan nakasugat og usa ka makalilisang nga unos nga naghulga sa paglunod kanila; Mga Buhat 27:22, 25, 41, 44 .
Si Pablo natanggong sa usa ka isla diin siya gipaak og usa ka bitin; Mga Buhat 28:4–6 .
Sa kataposan si Pablo miabot sa Roma; Mga Buhat 28:16, 30–31 .

Makakat-on kamo og dugang pa mahitungod niining mga asoy sa umaabot nga mga leksiyon.

Unsa nga mga saad ang imong nakit-an nga natuman?
Nganong importante kanimo nga si Jesukristo motuman sa Iyang mga saad?
Sa unsang paagi nga ang pagkahibalo nga ang Manluluwas motuman sa Iyang mga saad makaimpluwensiya sa inyong mga pagbati ngadto Kaniya ug sa imong tinguha sa pagpaminaw ug pagsunod Kaniya?

Bisan tuod ang Dios nagdapit kanato sa pagpaningkamot sa pag-alagad Kaniya, Siya wala magdahom nga maperpekto una kita sa dili pa Niya tumanon ang Iyang mga saad ngari kanato. Bisan og si Pablo nakasinati og daghang mga hagit (tan-awa sa 2 Mga Taga-Corinto 11:23–27) ug wala maperpekto (tan-awa sa 1 Timoteo 1:15), ang Dios padayong nagtuman sa Iyang mga saad ngadto kang Pablo.

Mga saad nga natuman sa imong kinabuhi

Paghunahuna mahitungod sa mga gisaad sa Langitnong Amahan ug ni Jesukristo diha kanimo.

Si Elder David A. Bednar sa Korum sa Napulog Duha ka Apostoles mitudlo:

Masabut lang, ang tanan nga bililhon ug dagko uyamot nga mga saad nga gitanyag sa Langitnong Amahan sa Iyang mga anak dili maihap o hingpit nga mahulagway. Hinoon, bisan [ang usa ka] dili kompleto nga lista sa gisaad nga mga panalangin … makapahimo sa matag usa kanato nga “[m]agpabilin nga natingala” ug “moluhod ug mosimba sa Amahan” sa pangalan ni Jesukristo.

(David A. Bednar, “Bililhon ug Dagko Uyamot nga mga Saad,” Ensign o Liahona, Nob. 2017, 91)

Ang mosunod nga mga kapanguhaan naglangkob og mga saad nga gihimo sa Langitnong Amahan ug ni Jesukristo alang kanato.

Alang sa Kalig-on sa mga Kabatan-onan(nga booklet, 2011)
Ang inyong patriyarkal nga panalangin (kon nadawat na ninyo kini)
Mosiah 18:8–10
Moroni 4:3
Doktrina ug mga Pakigsaad 58:42–43
Doktrina ug mga Pakigsaad 68:6
Doktrina ug mga Pakigsaad 84:88

Pagpili og pipila gikan niining mga kapanguhaan aron tun-an. Sa inyong pag-ila sa mga saad, idugang kini sa walang bahin sa tsart diha sa inyong journal sa pagtuon.

Unsa ang gitudlo niini nga mga saad kabahin sa tinguha sa Manluluwas alang kaninyo?

Tan-awa ang listahan sa mga saad nga inyong naila. Pangitaa ang impluwensiya sa Espiritu Santo diha sa inyong pagpamalandong giunsa sa Langitnong Amahan ug ni Jesukristo pagtuman sa maong mga saad sa inyong kinabuhi. Sa tuong kolum sa tsart sa inyong journal sa pagtuon, pagdugang og mubo nga paghulagway giunsa Nila pagtuman sa usa sa daghang mga saad o bisan unsang dugang nga mga saad nga inyong mahunahunaan. Pananglitan, ang pagbati sa impluwensiya sa Espiritu Santo mahimong katumanan sa mga saad nga gihimo diha sa mga pag-ampo alang sa sakramento (tan-awa sa Moroni 4:3 ; 5:2). Mahimo usab ninyong isulat giunsa sa Langitnong Amahan ug ni Jesukristo pagtuman sa Ilang mga saad sa inyong kaila.

Pamalandongi unsaon niining mga pananglitan pagdugang sa inyong kompyansa nga ang Langitnong Amahan ug si Jesukristo motuman sa Ilang mga saad sa umaabot.

Hatagi ang mga estudyante og igong panahon sa pagkompleto sa ilang mga tsart. Dapita sila sa pagpaambit og personal nga mga kasinatian o mga pagpamatuod nga nakapadugang sa ilang kompyansa nga ang Langitnong Amahan ug si Jesukristo motuman sa Ilang mga saad.

Komentaryo ug Background nga Impormasyon

Nganong kinahanglan man natong ibutang ang atong pagsalig sa Ginoo?

Si Elder Stanley G. Ellis sa Seventy mipasabot:

Mga kaigsoonan, makaangkon kita sa hugot nga pagtuo sa pagsalig Kaniya! Siya nagtinguha sa unsay labing maayo alang kanato (tan-awa sa Moises 1:39). Siya motubag sa atong mga pag-ampo (tan-awa sa Doktrina ug Mga Pakigsaad 112:10). Siya motuman sa Iyang mga saad (tan-awa sa Doktrina ug Mga Pakigsaad 1:38). Siya adunay gahom sa pagtuman niadto nga mga saad (tan-awa sa Alma 37:16). Siya nasayod sa tanan! Ug labaw sa tanan, Siya nasayod unsa ang labing maayo (tan-awa sa Isaias 55:8–9).

(Stanley G. Ellis, “Misalig Ba Kita Kaniya? Ang Kalisod Makaayo,” Ensign o Liahona, Nob. 2017, 114)

Nganong gusto man nakong maningkamot nga moalagad sa Dios?

Si Sister Elaine L. Jack, kanhi Kinatibuk-ang Presidente sa Relief Society, mipasabot:

Isip usa ka batan-ong inahan ako nahinumdom nga nagsulti sa akong kamanghorang anak, nga si Gordon, sa dihang siya nahagbong gikan sa iyang bisikleta ug nahiatubang dili lamang sa napaslot nga tuhod apan lakip ang pagkawala usab sa kompyansa, “Ania ako dinhi.” Ako moingon sa dihang mogakos kaniya aron hupayon siya, “Ania ako dinhi.” Dili ba kana nagpahinumdom kanato sa Ginoo, nga nag-uban kanato kanunay? (tan-awa sa Mateo 28:20) Siya wala lamang sa simbahan, sa templo, o kon kita moluhod sa atong katre. Siya “ania dinhi” kon kita nagpuyo pinaagi sa iyang mga pagtulun-an.

(Elaine L. Jack, “Ponder the Path of Thy Feet,” Ensign o Liahona, Nob. 1993, 100)

Mga Buhat 23:11 . Ang Ginoo nasayod sa mga sakripisyo ug mga pagsulay ni Pablo ug Siya nag-uban kaniya. Iya bang buhaton ang susama alang kanako?

Si Sister Sharon Eubank, Unang Magtatambag sa Kinatibuk-ang Kapangulohan sa Relief Society mitudlo:

Ako mopamatuod nga kamo gihigugma. Ang Ginoo nasayod giunsa nimo sa pagpaningkamot. Nakahimo ka og kalamboan. Padayon lang. Nakakita Siya sa tanan nimong sakripisyo nga wala makita sa uban ug moganti kaninyo ug niadtong inyong mga gihigugma. Ang inyong gihimo wala makawang. Wala kamo mag-inusara. Ang Iya mismong ngalan, Emmanuel, nagpasabot og “Ang Dios uban kanato.” Sigurado nga Siya uban kaninyo.

(Sharon Eubank, “Kristo: Ang Kahayag nga Nagdan-ag taliwala sa Kangitngit,” Ensign o Liahona, Mayo 2019, 75–76)

Sa unsang paagi nako mas masabtan ang mga panghitabo sa Mga Buhat 22–23, 26–28?

//media.ldscdn.org/webvtt/scripture-and-lesson-support/new-testament-stories/2010-11-67-chapter-63-paul-finishes-his-mission-eng.vtt

Dugang nga mga Kalihokan sa Pagkat-on

Pablo usa ka Panig-ingnan ni Kristo

Samtang ang mga estudyante magrebyo sa panghitabo sa istorya sa Mga Buhat 22–23, 26–28, mahimong dapiton sila sa pagpangita og mga paagi nga si Pablo nahisama kang Kristo. Ikonsiderar ang mga paagi nga matabangan sila nga makakita giunsa nga si Pablo ug si Jesukristo parehong bakak nga giakusahan ug nagbuhat og mga milagro. Ang mga estudyante mahimo dayon nga maghisgot giunsa sa mga kasinatian ni Pablo pagtabang kaniya nga mamahimong mas susama sa Manluluwas.