Pagrebyo sa Doktrinal nga Kahanas 16

Imemorya ang mga Pakisayran ug Mahinungdanong Hugpong sa mga Pulong sa Kasulatan

Ang paghinumdom sa mga tudling sa kasulatan ug ang mga gitudlo niini makatabang kanimo sa daghang mga paagi. Kini nga leksiyon gituyo aron matabangan ka nga masag-ulo ang pipila sa mga pakisayran sa kasulatan sa doktrinal nga kahanas sa Bag-ong Tugon ug sa mahinungdanong hugpong sa mga pulong sa kasulatan.

Paggamit sa lainlain aron madani ang mga estudyante. Ang paggamit og lainlaing mga estratehiya sa pagtudlo mahimong makatabang sa mga estudyante nga mas epektibo nga makakat-on. Pagpahiangay og materyal sa leksiyon aron mahimong madanihon ngadto sa mga estudyante ug mas makatabang kanila sa pagkat-on.

Pagpangandam sa estudyante: Dapita ang mga estudyante sa pagbasa og usa o duha ka mga tudling sa doktrinal nga kahanas nga ilang gitun-an. Hagita sila sa pagsag-ulo sa pakisayran sa kasulatan ug sa mahinungdanong mga hugpong sa pulong sa kasulatan o, kon mahimo, ang tibuok nga tudling sa doktrinal nga kahanas.

Posible nga mga Kalihokan sa Pagkat-on

Ang tudling sa doktrinal nga kahanas nga leksiyon kinahanglang matudlo isip puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor sa lugar o rehiyon o koordinitor aron maseguro nga matudlo ang kada leksiyon sa tudling sa doktrinal nga kahanas samtang anaa sa sesyon ang seminary.

• Nganong lagmit ninyong masag-ulo ang pipila sa mosunod: liriko sa kanta, usa ka iskedyul, o mga kasayoran mahitungod sa mga magdudula sa isports o mga tigpasundayag?

• Unsa ang lain pang mga pananglit sa mga butang nga inyong gisag-ulo? Nganong gisag-ulo man ninyo kini?

Ikonsiderar ang pagpaambit og usa ka personal nga pananglitan sa pagsag-ulo og usa ka butang ug mga hinungdan nganong gisag-ulo kini.

• Unsa ang pipila sa mga rason nga sag-ulohon ang mga kasulatan?

Basaha ang mosunod nga pamahayag ni Elder Richard G. Scott (1928–2015) sa Korum sa Napulog Duha ka Apostoles, o tan-awa ang bidyo nga “He Lives,” anaa sa ChurchofJesusChrist.org, gikan sa time code 5:27 hangtod 6:05. Pangita og labing menos tulo ka mga panalangin nga gihatag kanato sa mga nasag-ulong mga kasulatan.

Mosugyot ko nga memoryahon ninyo ang mga kasulatan nga motandog sa inyong kasingkasing ug mopuno sa inyong kalag og panabot. Kon ang mga kasulatan gigamit sumala sa tuyo sa Ginoo sa pagkarekord niini, duna kini kaugalingon niyang gahom nga dili masulti kon usabon ang pulong. Usahay kon dunay makahuluganong panginahanglan sa akong kinabuhi, ribyohon nako sa hunahuna ang mga kasulatan nga naghatag kanako og kalig-on. Adunay dakong kahupayan, direksiyon, ug gahom nga modagayday gikan sa mga kasulatan, ilabi na sa mga pulong sa Ginoo.

(Richard G. Scott, “Siya Buhi,” Ensign, Nob. 1999, 87–88)

• Unsa ang pipila sa mga panalangin nga imong nasinati gikan sa pagsag-ulo og mga kasulatan o mahinungdanong mga hugpong sa pulong gikan sa mga kasulatan?

• Sa unsang paagi nga ang pagsag-ulo sa mga pulong sa Ginoo nga narekord sa kasulatan nakatabang nimo nga makabati og pagkaduol ngadto sa Langitnong Amahan ug kang Jesukristo?

Mga flash kard

Usa ka paagi sa pagsag-ulo sa mga pakisayran sa kasulatan ug sa mahinungdanong mga hugpong sa pulong mao ang paggamit og mga flash kard. Aron sa paghimo og mga flash kard, pagpilo og katunga sa blankong panid sa papel ug dayon tungaon usab aron makahimo og upat ka bahin. Ibukhad ang papel, ug guntinga ngadto sa napilo nga mga linya aron makahimo og upat ka mga kard.

Kon, gikinahanglan, pulihi ang mosunod nga mga pakisayran ug mahinungdanong mga hugpong sa mga pulong sa kasulatan sa mga pakisayran ug mahinungdanong mga hugpong sa mga tudling sa doktrinal nga kahanas nga gitun-an sa mga estudyante.

Isulat ang matag mosunod nga pakisayran sa usa ka bahin sa matag kard. Sa pikas nga bahin, isulat ang mahinungdanong hugpong sa mga pulong sa kasulatan.

Pakisayran	Mahinungdanong Hugpong sa mga Pulong sa Kasulatan
Mga Taga-Efeso 1:10	“Usa ka laraw nga pagatumanon inig-abot sa tukma nga panahon, laraw sa paghiusa diha kang Kristo sa tanang mga butang.”
Mga Taga-Efeso 2:19–20	Ang Simbahan “tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang.”
2 Mga Taga-Tesalonica 2:1–3	“Ang adlaw ni Kristo … dili pa moabot, hangtud nga mahitabo una ang pagsupil.”
2 Timoteo 3:15–17	“Ang balaan nga kasulatan … makagagahom sa pagtudlo kanimo ngadto sa kaluwasan.”

Pagmamugnaon aron matabangan ka sa pagsag-ulo. Pagpili og usa sa mosunod nga mga ideya o paghunahuna og usa sa imong kaugalingon.

• Pagpasulit sa kaugalingon: Guniti ang mga flash kard aron ang imo lamang makita mao ang pakisayran o mahinungdanong hugpong sa mga pulong sa kasulatan. Sulayi pagsulti sa katugbang nga mahinungdanong hugpong sa mga pulong sa kasulatan o pakisayran. Balika kini sa makadaghang higayon sa matag pakisayran ug katugbang nga hugpong sa pulong.

• Pagrebyo sa text: Pag-text og usa ka pakisayran ngadto sa mga higala sa imong seminary nga klase ug tan-awa kinsa ang mobalos sa insaktong mahinungdanong hugpong sa mga pulong.

• Pagpares nga kalihokan: Pakigpares og lain pang klasmeyt o miyembro sa pamilya. Ipabutang sa usa ka tawo ang ilang mga kard nga nag-atubang paitaas ang pakisayran ug ang lain pang tawo magbutang sa ilang mga kard nga nag-atubang paitaas ang mahinungdanong hugpong sa mga pulong sa kasulatan. Ipares ang mahinungdanong hugpong sa mga pulong sa kasulatan ngadto sa katugbang nga pakisayran pinaagi sa pagbutang sa kard sa mahinungdanong hugpong sa mga pulong sa kasulatan sa ibabaw sa pakisayran nga kard.

• Paggamit sa app: Gamita ang app sa Doktrinal nga Kahanas aron matabangan nga magsag-ulo.

Mahimong bahinon ang mga estudyante ngadto sa tag-tinag-upat nga mga grupo. Dapita ang matag grupo sa paggamit og usa ka set sa mga flash kard ug sa pagbahin niini nga set ngadto sa mga miyembro sa grupo. Pagbasa og usa ka mahinungdanong hugpong sa mga pulong sa kasulatan ngadto sa klase. Ang estudyante sa matag grupo nga adunay kard sa napares nga pakisayran kinahanglang idagan ang maong kard ngadto sa magtutudlo. Hagita ang matag grupo sa pagdala og insakto nga kard ngadto sa magtutudlo sulod sa gitakda nga oras (pananglitan, lima ka segundo). Dasiga ang mga estudyante nga tabangan ang lain pang mga miyembro sa ilang grupo. Mahimo usab nga dapiton ang mga estudyante sa pagbaylo og mga kard sa laing tawo sa ilang ka grupo aron matabangan sila nga makat-onan ang tanang mga pakisayran ug ang mahinungdanong hugpong sa mga pulong sa kasulatan.

Pagpili og usa sa mga tudling sa doktrinal nga kahanas.

• Nganong gusto man nimong masag-ulo ang kini nga tudling o ang mahinungdanong hugpong sa mga pulong sa kasulatan?

• Sa unsang paagi kini lagmit makatabang aron mapalawom ang imong pagsabot kang Jesukristo ug sa Iyang ebanghelyo?

Kon adunay oras nga mahibilin, mahimong maghimo og mga flash kard ang mga estudyante alang sa uban pang mga pakisayran ug katugbang nga mahinungdanong hugpong sa mga pulong sa kasulatan.