Susiha ang Imong Nakat-onan 7

Mga Buhat 1–28

Young women enjoying themselves in Ghana.

Kini nga leksiyon gituyo aron matabangan ka sa pagtimbang-timbang sa mga tumong nga imong gitakda ug ang nakat-onan ug personal nga pag-uswag nga imong nasinati samtang nagtuon sa Bag-ong Tugon.

Pagpangandam sa estudyante: Dapita ang mga estudyante sa pagtambong nga andam mopaambit og mga pananglitan sa tawo nga nakabig ngadto kang Jesukristo gikan sa Mga Buhat [Acts].

Posible nga mga Kalihokan sa Pagkat-on

Kini nga leksiyon gituyo aron matabangan ang mga estudyante nga matimbang-timbang ang mga tumong nga ilang gitakda, ilang abilidad sa pagpasabot sa mga pagtulon-an sa Bag-ong Tugon, o sa unsang paagi nga ang ilang mga kinaiya, mga tinguha, ug abilidad sa pagsunod sa ebanghelyo nausab. Ang pagtuon sa klase sa Mga Buhat 1–28 posibleng mipalig-on og mga kamatuoran gawas sa kadtong anaa sa mosunod nga mga kalihokan. Kon mao, ang mga kalihokan mahimong ipahiangay aron malakip kana nga mga kamatuoran.

Dugang nga mga hisgotanan sa pagsusi ang anaa sa “Dugang nga mga Kalihokan sa Pagkat-on” nga bahin.

Mahimo bang magbag-o ang tawo?

Hunahunaa nga ang imong higala nagsulti kanimo nga adunay mga butang nga gusto niyang usbon mahitungod sa iyang kaugalingon, apan dili siya mutoo nga mahimo niya ang maong mga kausaban.

Unsaon nimo kini sa pagtubag?
Sa unsang paagi man makaapekto sa imong kinabuhi ang pagkasayod nga ikaw mabag-o pinaagi sa Pag-ula ni Jesukristo?

Pahinumdomi ang mga estudyante sa ilang pagpangandam sa klase.

Pamalandong sa mga sugilanon gikan sa basahon sa Mga Buhat nga naghulagway unsaon pagbag-o sa mga tawo samtang sila mopaduol ngadto kang Kristo ug mahimong Iyang mga tinun-an.

Kon gikinahanglan, mahimong magrebyo og usa o daghan pa sa mosunod nga mga pananglitan.

Mga tawo nga mipasakop sa Simbahan: Mga Buhat 2:14, 36–47
Ang Ethiopianhon nga eunuch: Mga Buhat 8:26–40
Si Saulo (kinsa nahimong si Pablo): Mga Buhat 9:1–22
Si Cornelius: Mga Buhat 10:1–8, 24–25, 44–48
Ang magbalantay sa prisohan nga nagbantay kang Pablo ug Silas: Mga Buhat 16:25–36

Gamit ang usa niining mga pananglitan o lain pa gikan sa basahon sa Mga Buhat, pag-andam og usa ka tubag sa imong higala kinsa wala nagtuo nga siya mabag-o. Ilakip ang mosunod:

Ebidensiya sa usa ka tawo o mga tawo nga nabag-o agi sa panabang sa Manunubos.
Giunsa sa Manluluwas ug sa mga alagad nga Iyang gipadala pagtabang sa pagkakabig.
Unsa ang gibuhat sa tawo o mga tawo aron mosalig sa Ginoo ug Iyang mga alagad.

Paminawa ang mga estudyante nga mopaambit sa ilang mga tubag nga magkapares o sa ginagmay nga grupo. Kon sila nagkinahanglan og dugang nga panudlo mahitungod sa pagkakabig ngadto kang Jesukristo, mahimong basahon og dungan ang mga bahin sa Mga Buhat 9:3–20 ug dapita ang mga estudyante sa pagpangita og mga detalye nga makatabang kanila sa pagsabot kon unsaon pagbag-o sa mga tawo uban sa panabang sa Manluluwas.

Pamalandongi ang imong kaugalingong pagkakabig ngadto kang Jesukristo. Paghunahuna mahitungod sa mga pagdapit sa pagbag-o o kalambuan nga imong nabati gikan sa Ginoo samtang ikaw nagtuon sa basahon sa Mga Buhat. Tubaga ang mosunod nga mga pangutana diha sa imong journal sa pagtuon.

Ipakita ang mosunod nga mga pangutana aron makita sa mga estudyante samtang sila nagsulat sa ilang mga journal.

Unsa ang inyong nahibaloan mahitungod kang Jesukristo nga mas nagdasig kaninyo nga mahigugma ug mosunod Kaniya sa hingpit?
Sulod sa miaging bulan o sobra pa, unsang mga kabag-ohan ang inyong nabati nga angay nga himoon pinaagi sa Espiritu Santo? Giunsa ninyo sa pagsanong?
Giunsa kamo pagpanalangin sa Langitnong Amahan tungod sa inyong mga paningkamot? Unsa ang inyong gibuhat nga nakahimo og pinakadako nga kalahian?
Unsa kaha, kon adunay butang, nga nakapahimo nga malisod ang pagdawat og mga pag-awhag sa pagbag-o ug paglambo? Unsaon ninyo pagpangita og dugang nga tabang gikan sa Langitnong Amahan?

Ipadayon ang pagtinguha og inspirasyon gikan sa Langitnong Amahan pinaagi sa Espiritu Santo samtang nagtuon niini nga leksiyon. Sulayi pag-ila unsa ang Iyang gusto nga inyong bag-ohon ug mahimong mas makakabig ngadto kang Jesukristo.Pagpili og usa sa mosunod nga mga kalihokan aron kompletohon samtang kamo namalandong unsaon pagpaduol kang Kristo.

Kalihokan A: Ang unang mga baroganan ug mga ordinansa sa ebanghelo ni Jesukristo

Sa Mga Buhat, daghang tawo ang nakadawat og langitnong panabang aron magbag-o ug mas mahimong nakabig ngadto kang Jesukristo pinaagi sa pagdawat sa unang mga baroganan ug mga ordinansa sa ebanghelyo.

Ang Giya sa mga Kasulatan nagpasabot giunsa niining mga baroganan ug mga ordinansa pagtabang kanato aron mahimong mas nakabig kang Jesukristo.

Paghinulsol, pagbunyag alang sa kapasayloan sa mga sala, ang pagdawat sa Espiritu Santo pinaagi sa pagpandong sa mga kamot, ug ang nagpadayong hugot nga pagtuo sa Ginoong Jesukristo makakompleto sa pagkakabig. Ang natural nga tawo mabag-o ngadto sa bag-ong tawo kinsa mao ang gibalaan ug giputli, natawo pag-usab kang Kristo Jesus ( 2 Taga-Cor. 5:17 ; Mosiah 3:19).

(Giya ngadto sa mga Kasulatan, “ Pagkakabig, Kinabig ,” scriptures.ChurchofJesusChrist.org)

Pamalandong sa asoy nga inyong gipili nga naghulagway sa usa ka tawo nga nabag-o tungod sa panabang sa Ginoo.

Unsa ang papel sa unang mga baroganan ug mga ordinansa sa ebanghelyo sa ilang pagkakabig?
Sa unsang paagi nga ang unang mga baroganan ug mga ordinansa sa ebanghelyo nakatabang kanimo o sa uban aron mahimong mas nakabig ngadto sa Manluluwas?

Hunahunaa nga ang lokal nga mga misyonaryo naghangyo sa imong panabang alang sa usa ka tawo nga ilang gitudloan. Gusto nila nga ikaw mopaambit unsaon sa unang mga baroganan ug mga ordinansa sa ebanghelyo pagtabang sa pagpalig-on sa pagkakabig kang Jesukristo ug dapiton ang Iyang panabang sa paghimo og gikinahanglang mga kausaban sa atong kinabuhi. Pagsulat og pagpasabot alang niining tawhana ingon nga ikaw nakigsulti direkta kanila. Gamit og labing menos usa ka pananglitan gikan sa Mga Buhat ug bisan unsang personal nga kasinatian nga pamati nimo mahimong makatabang.

Hatagi ang mga estudyante og panahon nga makasulat sa ilang mga hunahuna. Dayon dapita sila nga mohatag sa ilang pagpasabot ngadto sa ilang kapares. Paglakaw-lakaw sa palibot ug paminaw sa ilang mga pagpasabot. Kon ang mga estudyante nagkinahanglan og dugang nga pagtudlo sa unang mga baroganan ug mga ordinansa sa ebanghelyo, mahimong gamiton kining mga tudling: Mga Buhat 19:1–7 ; 2 Nephi 31:13–21 ; 3 Nephi 27:13–22 .

Kalihokan B: Pagtuon sa kasulatan ug pagkakabig

Usa ka importanteng lihok nga atong mabuhat aron pagpalig-on sa atong pagkakabig kang Jesukristo mao ang makanunayong pagtuon sa mga kasulatan. Hunahunaa giunsa sa mosunod nga mga asoy gikan sa basahon sa Mga Buhat pagpakita og importansya sa pagtuon sa kasulatan sa pagkakabig.

Si Felipe ug ang Ethiopianhong tawo: Mga Buhat 8:26–40

Si Pablo ug ang mga Santos sa Thessalonica ug Berea: Mga Buhat 17:1–14

Pamalandongi giunsa sa pagtuon sa kasulatan pagtabang kanimo sa imong pagkakabig ngadto sa Manluluwas.

Handurawa nga ang imong lider sa Young Men o Young Women naghangyo kanimo nga tabangan ang kabatan-onan sa imong ward o branch nga magtuon sa mga kasulatan ug mapalig-on ang ilang pagkakabig ngadto kang Jesukristo. Unsa nga kapanguhaan ang imong buhaton aron pagdasig kanila? Paggahin og pipila ka minuto aron paglista sa imong kapanguhaan diha sa imong journal sa pagtuon. Kini mahimong usa ka bidyo, usa ka artikulo, usa ka pakigpulong, usa ka website, o lain pang kapanguhaan.

Ang imong kapanguhaan mahimong maglakip sa bisan asa sa mosunod:

Usa ka pananglitan gikan sa Mga Buhat o lain pang basahon sa kasulatan nga nagpakita og importansya sa pagtuon sa kasulatan.
Usa ka pananglitan o modelo sa kahanas sa kasulatan nga imong gigamit nga nakatabang kanimo, o usa ka paghulagway kon giunsa nimo pagtuon.
Usa ka paghulagway sa usa ka kasinatian diin ang pagtuon sa kasulatan nakatabang nimo o sa imong kaila nga mas nakabig ngadto sa Manluluwas.
Ang imong personal nga pagpamatuod sa gahom sa pagtuon sa kasulatan.

Dapita ang mga estudyante sa pagbuhat sa mosunod diha sa ilang mga journal sa pagtuon.

Pangayoa ang panabang sa Langitnong Amahan pinaagi sa Espiritu Santo samtang ikaw nagsulat og bisan unsang mga buhat nga pamati nimo gikinahanglang buhaton aron mas mahimong makabig kang Jesukristo. Ang Manluluwas motabang kanimo sa imong pagpaningkamot nga mosunod niining mga impresyon. Ikonsiderar ang pagpaambit sa imong mga impresyon ngadto sa usa ka ginikanan o sinaligan nga lider sa Simbahan. Hangyoa sila nga tabangan kang masunod kining mga impresyon.

Dasiga ang mga estudyante sa pagbuhat sa mga impresyon nga ilang nadawat gikan sa Langitnong Amahan pinaagi sa Espiritu Santo. Pagpamatuod nga ang Dios motabang kanila samtang sila magtinguha sa pagsunod sa maong mga impresyon.

Dugang nga mga Kalihokan sa Pagkat-on

Mga Buhat 10 – 11 ; Mga Buhat 15 ; Mga Buhat 27 . Pagpadayag

Ikonsiderar ang pagsusi kon unsa ang nahibaloan sa mga estudyante kon sa unsang paagi moabot ang pagpadayag ngadto sa mga lider sa Simbahan. Dapita sila sa pagrebyo sa mga note nga ilang nasulat gikan sa mga leksiyon nga naglakip sa Mga Buhat 10 ; 11 ; 15 ; ug 27 . Hatagi ang mga estudyante og kahigayonan sa paghan-ay ug pagpresentar sa ilang mga hunahuna. Usa ka paagi mao ang pagpasulat sa mga estudyante og mubo nga artikulo alang sa Alang sa Kalig-on sa Kabatan-onan nga magasin nga nagpasabot og mga pamaagi kon giunsa sa tibuok Simbahan pagkadawat og pagpadayag ug kon nganong mahinungdanon nga masabtan kining maong mga kamatuoran.

Pagpangita og kalinaw diha kang Kristo latas sa kalisdanan

Dapita ang mga estudyante sa paghinumdom sa mga indibidwal gikan sa Mga Buhat kinsa nakakita og kalinaw diha kang Kristo bisan pa sa kalisdanan, sama ni Pedro ug Juan sa Mga Buhat 5:40–42 , ni Esteban sa Mga Buhat 6 – 7 , ni Pedro ug sa uban pang mga miyembro sa Simbahan sa Mga Buhat 12:1–19 , o ni Pablo sa Mga Buhat 22 – 28 . Dapita ang mga estudyante sa pagpaambit og mga kasinatian kon giunsa nila pagkaplag sa kalinaw diha kang Kristo panahon sa kalisdanan. Mahimo nilang ilhon ang mga buhat gikan sa mga asoy sa Mga Buhat ug sa personal nga mga kasinatian nga makatabang nila sa pag-atubang sa umaabot nga mga pagsulay. Dapita sila sa pagpangayo og inspirasyon gikan sa Langitnong Amahan pinaagi sa Espiritu Santo ug sa paghimo og plano kon unsa ang ilang buhaton niining umaabot nga mga pagsulay aron makakaplag og kalinaw diha kang Kristo.