ngitngit nga unos sa lawod nga adunay kilat ug mga balod sa kagabhion
Human gilutos, giabuso ug dili makataronganong pagkabilanggo didto sa Jerusalem ug Cesaria, si Apostol Pablo nihangyo nga iapelar ang iyang kaso atubangan ni Cesar sa Roma. Sa iyang pagpaingon sa Roma, si Pablo ug kadtong mga uban niya nakahinagbo og makusog nga mga bagyo, pagkalunod sa barko, ug uban pang mga katalagman. Niining mga kahimtanga, si Pablo mihatag og makadasig nga tambag ug mga pasidaan aron ang tanan maluwas. Kini nga leksiyon gituyo aron matabangan ka nga mabati ang importansiya sa pagsunod sa tambag sa propeta.
Pagsabot sa konteksto sa mga kasulatan. Ang pagsabot sa konteksto sa mga kasulatan makaandam sa mga estudyante sa pag-ila sa mga mensahe sa dinasig nga mga tagsulat. Kon ang mga estudyante makasabot sa dinasig nga katuyoan sa tagsulat, sila mas maandam sa pag-ila sa tinuod nga mga baroganan ug doktrina nga talagsaong gipahaom sa ilang indibidwal nga mga panginahanglan.
Pagpangandam sa estudyante: Dapita ang mga estudyante sa pagtuon og pipila sa mga bag-ong pagtulun-an sa modernong mga propeta. Pananglitan, mahimo silang mobasa o motan-aw sa usa ka bag-ohay lang nga pakigpulong sa kinatibuk-ang komperensiya, mobasa sa usa ka artikulo sa propeta o apostol diha sa Alang sa Kalig-on sa mga Kabatan-onan nga magasin, o mobasa og pipila ka mga hilisgotan diha sa Alang sa Kalig-on sa Kabatan-onan: Usa ka Giya sa Paghimo og mga Pagpili (2022) nga booklet. Dapita ang mga estudyante sa pagpamalandong kon unsa ang ilang gibati mahitungod sa pagsanong sa tambag sa mga propeta.
Ikonsiderar ang pagpakita og mga pamahayag sa tambag o pasidaan sama sa mosunod gikan sa Alang sa Kalig-on sa mga Kabatan-onan (booklet, 2022) o magdala og mga kopya niini nga booklet. Anaa usab kini sa Gospel Library nga app.
“Himoa ang inyong bahin aron sa paghimo sa inyong panimalay nga usa ka dapit diin ang tanan makabati sa gugma sa Manluluwas” (pahina 12).
“Kamo adunay temporal ug espirituhanong mga rason sa pagtinguha ug mahalon ang pagkat-on. Ang edukasyon … kabahin sa inyong mahangtoron nga tumong sa pagkahimong mas sama sa Langitnong Amahan (pahina 31).
“Palayo sa bisan unsa nga magbugalbugal sa sagrado nga mga butang o kana nga imoral. Ayaw og apil sa bisan unsang makapahinay sa inyong paghukom o sa kasensitibo ngadto sa Espiritu” (pahina 18).
“Kamo mopakita nga inyong gihatagan og bili ang kamatuoran samtang kamo … maisogon nga mobarog alang sa unsay inyong nahibaloan nga husto—bisan kon kinahanglan nga mobarog nga mag-inusara” (pahina 31).
Unsa nga nagkalainlain nga kinaiya ang imong nakita nga gipakita sa mga tawo mahitungod sa pagsunod sa tambag sa mga propeta? Ngano kaha nga ang ubang kabatan-onan magdumili man sa pagtuman sa tambag sa mga propeta? Unsa lagmit ang pipila sa mga sangpotanan sa dili pagtuman sa tambag sa mga propeta?
Pamalandong kon giunsa nimo personal nga gisanong ang tambag ug pagdirekta sa propeta. Samtang magtuon ka sa Mga Buhat27, pangayo og inspirasyon gikan sa Langitnong Amahan pinaagi sa Espiritu Santo aron makadawat og mga impresyon nga makatabang sa pagpalig-on sa imong saad sa pagtuman sa tambag sa propeta sa Ginoo.
Ang propetikanhong tambag ni Pablo
Sa iyang pagpaingon sa Roma aron iapelar ang iyang kaso atubangan ni Cesar, si Pablo mihatag og tambag ug mga pasidaan aron magpadayong luwas ang mga biyahero sa ilang panaw.
Kompletoha ang mosunod nga kalihokan pinaagi sa pagbasa og una sa kasayoran diha sa ibabaw nga bahin sa matag kwadrado. Dayon basaha ang kauban nga mga bersikulo diha sa Mga Buhat27 . Ipamubo ang asoy sa tunga-tungang bahin sa kada kahon pinaagi sa pagdibuho og yanong hulagway o pagsulat og pinamubo sa mga pulong ug mga buhat ni Pablo. Seguroha nga malakip ang reaksiyon sa mga tawo mahitungod sa tambag ni Pablo.
Hatagi ang mga estudyante sa mosunod nga handout. Ikonsiderar ang pagtugot sa mga estudyante nga magpares-pares sa pagbuhat o sa ginagmayng mga grupo ug hatagi sila og nagkalainlaing mga hut-ong sa kasulatan. Sa laing paagi, mahimong grupohon ang upat ka mga estudyante, nga ang matag usa hatagan ug lain-laing bloke sa kasulatan aron basahon ug ihulagway o ipamubo. Kon sila mahuman na, dapita ang mga estudyante sa pagpakita ug pagpaambit sa ilang gibuhat ug paghisgot sa mosunod nga mga pangutana sa ilang grupo o isip usa ka klase.
Ang mga Romano nga mga sundalo midala kang Pablo ug sa uban pang mga piniriso ngadto sa usa ka barko nga adunay dul-an sa 300 ka mga tawo. Ang ilang paglawig hinay, lisod ug delikado tungod kay kataposang bahin na kadto sa panahon sa tinglarag, diin ang mga mapintas nga bagyo mahitabo kanunay.
Human sa 14 ka adlaw nga makalisang nga bagyo, gisulayan nila ang usa ka delikado nga pamaagi sa pagdunggo. Ang mga marino mihagbong sa angkla ug buot mobiya sa barko tungod sa ilang pagtuo nga kini madasmag ngadto sa mga bato.
Unsa sa imong hunahuna ang imong reaksiyon sa mga panudlo ni Pablo kon ikaw anaa pa sakay sa barko? Ngano man?
Unsa nga mga kamatuoran ang imong nakat-onan gikan sa imong gitun-an?
Tabangi ang mga estudyante nga maila ang mga kamatuoran nga ilang nakat-onan gikan sa mga panudlo ni Pablo. Pipila niining mga baroganan lagmit nga kon atong ibalewala ang mga pasidaan ug tambag sa mga alagad sa Ginoo, nan atong gibutang ang atong kaugalingon sa peligro ug kon kita mosunod sa tambag ug mga pasidaan sa mga alagad sa Ginoo, nan ang Ginoo motuman sa Iyang mga saad alang kanato.
Unsa ang imong nahibaloan mahitungod sa mga propeta nga naghatag kanimo og pagsalig sa ilang mga tambag ug mga panudlo?
Ang Ginoo nagtudlo nga pinaagi sa propeta kita makadungog sa Iyang tingog (tan-awa sa Doktrina ug Mga Pakigsaad 1:37–38) ug nga ang Iyang mga pasidaan kasagaran moabot pinaagi sa Iyang piniling mga propeta (tan-awa sa Doktrina ug Mga Pakigsaad 1:1–4). Sa atong panahon, kita mipaluyo sa mga sakop sa Unang Kapangulohan ug sa Korum sa Napulog Duha ka Apostoles isip mga propeta, mga manalagna ug mga tigpadayag. Paggahin og gamay nga panahon sa pagpamalandong nganong ang Ginoo mitabang kanato pinaagi sa mga propeta ug unsa ang gipakita niini mahitungod sa Iyang mga pagbati ngari kanato.
Unsa ang imong nakat-onan mahitungod sa Ginoo gikan sa tambag ug mga pasidaan nga Iyang gihatag pinaagi sa Iyang mga propeta?
Unsa nga mga kasinatian nimo o sa uban nga imong nailhan diha sa pagpili kung mosunod o mobalewala ba sa tambag gikan sa propeta?
Dapita ang mga estudyante sa pagpaambit sa ilang mga hunahuna.
Alang sa mosunod nga kalihokan, mahimong magrebyo ang mga estudyante ug gamiton ang ilang pagpangandam alang niini nga leksiyon. Ikonsiderar kon unsaon sa mga estudyante pagkadawat og tambag gikan sa mga propeta. Tinoa kon ang papel nga mga kopya sa kapanguhaan kinahanglan ba nga dalhon sa klase o kon ang mga estudyante maka-access ba niini sa elektronik nga paagi.
Paggahin og ubay-ubay nga minuto aron sa pagpangita ug pagtuon sa labing bag-ong tambag o mga pasidaan nga gihatag sa Ginoo kanato pinaagi sa Iyang mga propeta. Pipila sa mga lugar diin kini mapangita naglakip sa bag-ong mga pakigpulong sa kinatibuk-ang komperensiya, sa Alang sa Kalig-on sa mga Kabatan-onan nga magasin, o sa Alang sa Kalig-on sa mga Kabatan-onan (2022) nga booklet. Mahimo nimong ilakip ang mga pamahayag gikan sa mga propeta nga gihatag sa sinugdanan sa leksiyon.
Sa unsang paagi nga kining maong tambag gikan sa propeta sa Ginoo nahimong ebidensiya sa pag-amuma, pagpangga, ug kaluoy sa Ginoo alang kanimo?
Kon imoha kining gisunod nga tambag sa imong kinabuhi, giunsa ka pagpanalangin sa Langitnong Amahan tungod sa imong pagtuman?
Kon adunay bisan unsa nga mga paagi nga gibalewala nimo o gisupak kini nga tambag, ngano kaha nga ang mahigugmaong Manluluwas modapit kanimo sa pagsugod og tuman niini nga tambag? Sa unsang paagi kini makapalambo sa imong kinabuhi?
Ikonsiderar ang pagdapit sa mga estudyante sa pagpaambit sa tambag nga ilang natun-an ug ang ilang mga hunahuna ug mga pagbati mahitungod niini.
Pagsunod sa propetikanhong tambag sa imong kinabuhi
Unsa ang pipila sa mga hinungdan nga ikaw mapasalamaton sa propetikanhong tambag ug mga pasidaan sa imong kinabuhi?
Tinguhaa ang inspirasyon gikan sa Langitnong Amahan pinaagi sa Espiritu Santo aron matabangan ka nga maila ang mga paagi nga ang Ginoo nagpakita nga Siya nahimuot sa imong pagkamasulondon sa Iyang mga propeta, ingon man usab sa mga paagi nga Siya mahimong moawhag kanimo sa paglambo. Isulat ang mga hunahuna ug mga impresyon nga moabot sa hunahuna, ug pagsaad nga sundon kini. Mahimong makatabang ang pagpaambit sa imong mga impresyon ngadto sa usa ka suod nga miyembro sa pamilya o gisaligang lider sa Simbahan ug dapita siya nga tabangan ka nga masunod ang maong mga impresyon.
Ikonsiderar ang pagtapos pinaagi sa pagpamatuod mahitungod sa panalangin ug importansiya sa pagsunod sa tambag ug mga pasidaan sa mga propeta sa Ginoo.
Komentaryo ug Background nga Impormasyon
Sa unsang paagi nga ang pagsunod sa tambag sa mga propeta nakaapekto kanako?
Si Presidente Henry B. Eyring sa Unang Kapangulohan mitudlo sa mosunod:
Imahe
Opisyal nga Hulagway ni Presidente Henry B Eyring nga gilitratohan niadtong Marso 2018.
Ang pagpili nga dili modawat sa propetikanhong tambag nag-usab sa mismong dapit nga atong gibarogan. Nahimo kining mas makuyaw. Ang kapakyas sa pagsunod sa propetikanhong tambag makapahuyang sa atong gahom sa pagdawat sa dinasig nga tambag sa umaabot. Ang labing maayong panahon nga mohukom sa pagtabang ni Noe sa pagbuhat sa arka mao ang unang higayon nga siya mihangyo. Matag higayon nga siya mihangyo human niana, matag kapakyas sa pagsanong makapaminos sa pagkasensitibo sa Espiritu. Ug mao nga matag higayon nga ang iyang hangyo nga mura og binuang, hangtod miabot ang ulan. Ug dayon ulahi na kaayo.
Sa matag higayon sa akong kinabuhi nga ako mipili sa paglangay sa pagsunod sa dinasig nga tambag o miingon nga ako walay labot [exception], akong nahibaloan nga akong gibutang ang akong kaugalingon sa kamot sa peligro. Sa matag higayon nga ako namati ngadto sa tambag sa mga propeta, gibati ang paghimatuod niini diha sa pag-ampo, ug dayon gisunod kini, akong namatngonan nga ako nagpaingon ngadto sa kahilwasan.
(Henry B. Eyring, “Finding Safety in Counsel,” Ensign, Mayo 1997, 25)
Imahe
Opisyal nga Hulagway ni Presidente Henry B Eyring nga gilitratohan niadtong Marso 2018.
Tungod kay ang Ginoo mabination, Siya mitawag og mga sulugoon aron sa pagpasidaan sa mga katawhan sa kakuyaw. Kana nga tawag sa pagpasidaan nahimong mas kusog ug mas importante tungod sa kamatuoran nga ang labing bililhon nga mga pasidaan mao ang mahitungod sa mga kuyaw nga wala pa mahunahuna sa mga katawhan nga mga tinuod.
(Henry B. Eyring, “A Voice of Warning,” Ensign, Nob. 1998, 32)
Mga Buhat 27:9 . Unsa ang gipasabot nga “ang tingpuasa milabay na”?
“Ang tingpuasa” tingali gipasabot sa mga Judio nga balaan nga adlaw nga gitawag nga Adlaw sa Pag-ula, nga nagtimaan sa sinugdanan sa panahon nga sa kasagaran giisip kini nga dili luwas sa paglawig sa Dagat sa Mediterania tungod sa dagkong mga unos. Ang adlaw sa Pag-ula kasagaran mahitabo sa hinapos sa Septyembre o sayong bahin sa Oktubre.
Ang usa ka dupa mao ang distansya gikan sa pinakataas nga tudlo sa usa ka kamot ngadto sa pinakataas nga tudlo sa lain pang kamot kon ang mga bukton gituy-od. Ang usa ka dupa katumbas sa mga upat ka maniko [cubits].
Dugang nga Kalihokan sa Pagkat-on
Mga Buhat 28 . Ang Dios makahimo sa mga pagsulay ngadto sa mga panalangin
Ikonsiderar ang pagdapit sa mga estudyante sa pagtuon sa lainlaing mga kasinatian ni Pablo nga natala sa Mga Buhat 28:1–6 ; 28:7–14 ; 28:16–24 ; ug 28:30–31 aron matabangan sila nga makasabot sa kamatuoran nga kon kita magmatinud-anon, ang Dios makatabang kanato aron mahimong mga panalangin ang mga pagsulay alang kanato ug sa uban, sumala sa makita sa Mga Buhat28 . Ang mga estudyante mahimong motan-aw sa pipila ka nagkalainlaing mga hagit nga giatubang ni Pablo ug giunsa niya pagpabilin nga matinud-anon. Unsa ang pipila sa mga hagit nga misulay sa hugot nga pagtuo sa mga kabatan-onan karon? Unsa nga ebidensiya ang nagpakita nga ang Dios nagpadayon sa paghimo sa mga pagsulay ngadto sa mga panalangin?