Mga Buhat 22–28
Kinatibuk-ang Pagpasabot
Sa mga leksiyon karong semanaha, imong matun-an ang mga saad nga gihatag sa Ginoo ngadto sa Iyang Apostoles ug giunsa niini pagkatuman sa kinabuhi ni Pablo. Gigapos man sa kadena o gidala atubangan sa mga lider ug mga hari, si Pablo matinud-anong mipaambit sa iyang gamhanang pagpamatuod ni Jesukristo ug sa Iyang ebanghelyo. Sa dihang nasugatan niya ang mapintas nga mga bagyo, pagkalunod sa barko, ug uban pang mga kalisdanan, siya naghatag og madasigong tambag ug mga pasidaan aron maluwas ang iyang mga kauban. Karong semanaha naglangkob og leksiyon nga makatabang kaninyo sa pag sag-ulo sa mga pakisayran sa doktrinal nga kahanas ug mahinungdanong mga hugpong sa pulong sa kasulatan, ingon man ang kahigayonan sa pagtimbang-timbang sa mga tumong nga imong gitakda ug ang pagkat-on ug personal nga pag-uswag nga imong nasinati panahon sa imong pagtuon sa Bag-ong Tugon.
Pangandam sa Pagtudlo
Ang mosunod nga impormasyon maghatag sa mga magtutudlo og mga ideya kon unsa ang lagmit nga kinahanglang andamon daan para sa kada leksiyon.
Mga Buhat 22–28
Tumong sa leksiyon: Kini nga leksiyon gituyo aron madugangan ang kompyansa sa mga estudyante nga ang Langitnong Amahan ug si Jesukristo motuman sa Ilang mga saad samtang maningkamot ang mga estudyante sa pag-alagad Kanila.
-
Pagpangandam sa estudyante: Dapita ang mga estudyante sa pagpamalandong sa mga saad sa Ginoo ngadto kanila. Pananglitan, mahimo silang mamalandong sa mga saad diha sa pag-ampo alang sa sakramento (tan-awa sa Moroni 4:3 ; 5:2) o lain pang mga kasulatan. Ang mga estudyante nga nakadawat sa ilang patriyarkal nga mga panalangin mahimong mobasa niana ug mangita sa mga saad gikan sa Ginoo.
-
Tsart: Usa ka tsart nga nagpakita sa mga saad sa Ginoo ug giunsa Niya pagtuman niana
-
Sugyot sa pagtudlo pinaagi sa videoconference: Human tun-i sa mga estudyante ang mga saad sa Ginoo ngadto sa Apostoles, paggamita sila sa chat nga bahin aron mosulat og usa nga ilang naila. Dayon diha sa ilang pagpadayon sa ilang pagtuon, dapita sila nga mopaambit diha sa chat nga bahin giunsa sa Ginoo pagtuman sa saad nga ilang naila.
Mga Buhat 22–26
Katuyoan sa leksiyon: Kini nga leksiyon gituyo aron matabangan ang mga estudyante nga makapalambo og usa ka dakong tinguha sa pagsunod sa ehemplo ni Pablo diha sa pagpamatuod kang Jesukristo ug sa Iyang ebanghelyo sa ilang inadlaw-adlaw nga kinabuhi.
-
Pagpangandam sa estudyante: Dapita ang mga estudyante sa pagpamalandong ug sa pagtambong nga andam mopaambit og usa ka kasinatian sa uban kansang pagpamatuod nakaapekto kanila.
-
Tsart: Usa ka tsart nga nagpakita unsa ang reaksiyon sa mga tawo sa pagpamatuod ni Pablo
-
Sugyot sa pagtudlo pinaagi sa videoconference: Sa kataposan sa leksiyon, ikonsiderar ang pagbutang sa mga estudyante ngadto sa mga breakout room aron maghisgot mahitungod sa ilang mga pagpamatuod ug ilang mga ideya kon sa unsang paagi sila makapaambit sa normal ug natural nga mga paagi.
Mga Buhat 27–28
Katuyoan sa leksiyon: Kini nga leksiyon gituyo aron matabangan ang mga estudyante nga mabati ang importansya sa pagsunod sa tambag sa propeta.
-
Pagpangandam sa estudyante: Dapita ang mga estudyante sa pagtuon og pipila sa mga bag-ong pagtulun-an sa modernong mga propeta. Pananglitan, mahimo silang mobasa o motan-aw sa usa ka bag-ong pakigpulong sa kinatibuk-ang komperensiya, mobasa og usa ka artikulo sa usa ka propeta o apostol diha sa Alang sa Kalig-onan sa mga Kabatan-onan nga magasin, o mobasa og pipila ka mga hilisgotan diha sa Alang sa Kalig-on sa mga Kabatan-onan nga booklet. Dapita ang mga estudyante sa pagpamalandong kon unsa ang ilang gibati mahitungod sa pagsanong sa tambag sa mga propeta.
-
Handout: “Ang Paglawig ni Pablo sa Roma”
-
Sugyot sa pagtudlo pinaagi sa videoconference: Ikonsiderar ang pagpakita og kopya sa handout ngadto sa mga estudyante aron sa pagkonsulta samtang sila nagbuhat sa maong kalihokan diha sa ilang journal sa pagtuon. Dayon, gamit ang whiteboard nga bahin, pag-assign og lainlaing mga estudyante aron pag-drowing o pag-type og usa ka summary kon unsa ang nahitabo sa usa sa upat ka mga kahon. Dayon sultihi ang kadtong mga estudyante sa pagpasabot sa ilang gidrowing o gisulat.
Pagrebyo sa Doktrinal nga Kahanas 16
Katuyoan sa leksiyon: Kini nga leksiyon gituyo aron tabangan ang mga estudyante sa pagsag-ulo sa pipila sa Bag-ong Tugon nga mga pakisayran sa kasulatan sa doktrinal nga kahanas ug sa mahinungdanong mga hugpong sa kasulatan.
-
Pagpangandam sa estudyante: Dapita ang mga estudyante sa pagbasa og usa o duha sa mga tudling sa doktrinal nga kahanas nga ilang gitun-an. Hagita sila sa pagsag-ulo sa pakisayran sa kasulatan ug sa mahinungdanong mga hugpong sa pulong sa kasulatan o, kon mahimo, ang tibuok nga tudling sa doktrinal nga kahanas.
-
Mga Materyales alang sa mga estudyante: Papel alang sa mga flash kard
-
Tsart: Ang doktrinal nga kahanas nga tsart nga ipakita o handout
-
Sugyot sa pagtudlo pinaagi sa videoconference: Human sa pagbansay sa mga estudyante sa pagsag-ulo sa mga pakisayran sa doktrinal nga kahanas ug sa mahinungdanong mga hugpong sa pulong sa kasulatan, ipahibalo ang usa ka mahinungdanong hugpong sa mga pulong sa kasulatan ngadto sa klase og sultihi sila nga ibutang ang insakto nga kard atubangan sa ilang kamera sulod sa gitagana nga oras (pananglitan, lima ka segundo).
Susiha ang Imong Nakat-onan 7
Katuyoan sa leksiyon: Kini nga leksiyon gituyo aron matabangan ang mga estudyante sa pagtimbang-timbang sa mga tumong nga ilang gitakda ug nakat-onan ug personal nga paglambo nga ilang nasinati panahon sa ilang pagtuon sa Bag-ong Tugon.
-
Pagpangandam sa estudyante: Dapita ang mga estudyante sa pagtambong nga andam nga mopaambit og mga pananglitan gikan sa Mga Buhat kalabot sa mga tawo nga nakabig ngadto kang Jesukristo.
-
Sugyot sa pagtudlo pinaagi sa videoconference: Hatagi ang mga estudyante og kinatibuk-ang pagsabot sa Kalihokan A ug Kalihokan B, ug padalhi og kopya sa parehong mga kalihokan ang mga estudyante. Dayon ibutang ang mga estudyante ngadto sa mga breakout room ug tugoti sila nga mopili og kalihokan nga dungan nilang buhaton. Sa ilang pagbalik sa klase, sultihi sila nga mopaambit sa unsa ang ilang nahisgotan ug nakat-onan.