Mga Taga-Roma 1–6

Kinatibuk-ang Pagpasabot

Samtang namulong sa mga Santos nga nagpuyo sa Roma, si Pablo mideklarar nga siya “wala maulaw sa ebanghelyo ni Kristo” (Mga Taga-Roma 1:16). Ang parehong Judio ug hentil nga mga nakabig nagkinahanglan og tabang sa pagsabot sa ilang pagsalig kang Jesukristo ug kon unsaon pagdawat ang mga panalangin sa Iyang Pag-ula ngadto sa ilang mga kinabuhi. Si Pablo nagtinguha sa pagtabang sa Romanhong mga Santos nga makasabot sa grasya ni Kristo pinaagi sa pagtudlo mahitungod sa koneksyon niini ngadto sa pagtuo ug mga buhat. Siya nagtudlo nga kita makakuha sa gahom sa Manluluwas diha sa atong paghimo ug pagtuman sa mga pakigsaad uban Kaniya, “[maglakaw] sa bag-ong kinabuhi” (Mga Taga-Roma 6:4).

Pangandam sa Pagtudlo

Ang mosunod nga impormasyon maghatag sa mga magtutudlo og mga ideya kon unsa ang lagmit nga kinahanglang andamon daan para sa kada leksiyon.

Mga Taga-Roma 1

Katuyoan sa leksiyon: Kini nga leksiyon makatabang sa mga estudyante nga dili ikaulaw ang mailhan isip disipulo ni Jesukristo.

• Pagpangandam sa estudyante: Dapita ang mga estudyante sa pagtambong nga andam sa paghisgot nganong ang mga tawo lagmit magduha-duha nga maila isip mga tinun-an ni Kristo o magduha-duha sa pagpaambit sa ebanghelyo ngadto sa uban.

• Bidyo:“Si Abinadi Nagpamatuod kang Jesukristo” (25:38; tan-awa gikan sa time code 14:39 hangtod 18:39)

• Sugyot sa pagtudlo pinaagi sa videoconference: Ikonsiderar ang pagpresentar sa pasulit pinaagi sa pagpakita niini sa mga estudyante ug tugotan sila nga i-highlight ang mga tubag nga paminaw nila insakto o pagsulat sa mga letra sa ilang napiling mga tubag didto sa chat. Ang mga tubag mahimong tagsa-tagsang hisgotan samtang nagtubag sa pasulit o sa higayon nga motunga ang hilisgotan atol sa leksiyon.

Mga Taga-Roma 2–3

Katuyoan sa leksiyon: Kini nga leksiyon makatabang sa mga estudyante nga mas makasabot sa panginahanglan nga kita mapasaylo sa atong mga sala ug mahatagan og kaangayan pinaagi ni Jesukristo.

• Pagpangandam sa estudyante: Dapita ang mga estudyante nga mobasa sa mga kahulugan diha sa Dali, Sunod Kanako—Alang sa Mga Indibidwal ug Mga Pamilya gikan sa leksiyon sa Mga Taga-Roma 1–6 ug pag-andam aron mopaambit gamit ang ilang kaugalingong mga pulong kon unsa ang kahulugan sa mga pulong sama sa kapaangayan, hugot nga pagtuo, ug grasya.

• Content nga ipakita: Ang mga kahulugan sa kapaangayan, hugot nga pagtuo, ang balaod, ug grasya

• Sugyot sa pagtudlo pinaagi sa videoconference: Pagdapit og usa ka estudyante sa paggamit sa whiteboard ug ihulagway ang gisugyot nga drowing ngadto sa tibuok klase.

Mga Taga-Roma 4–5

Katuyoan sa leksiyon: Kini nga leksiyon makatabang sa mga estudyante nga madugangan ang ilang pagsabot ug pagpasalamat sa grasya ni Jesukristo.

• Pagpangandam sa estudyante: Dapita ang mga estudyante sa pagbasa sa seksiyon nga “Grasya” diha sa Giya sa Mga Kasulatan , dayon ilhon ang usa ka paagi kon giunsa nila pagdawat ang grasya sa Dios sa ilang kaugalingong mga kinabuhi.

• Content nga ipakita:Ang diyagram nga tukog ang porma sa disyerto ug ang kauban nga teksto

• Sugyot sa pagtudlo pinaagi sa videoconference: Ang mga estudyante mahimong bahinon ngadto sa mga breakout room aron paghisgot sa diyagram. Seguroha ang paghatag og klaro nga mga instruksiyon aron mahibalo ang mga estudyante unsa ang ilang tinguhaon sa pagkab-ot. Mahimong makatabang ang pagpakita sa tulo ka mga pangutana nga hisgotan sa mga estudyante sa mga breakout room.

Mga Taga-Roma 6

Katuyoan sa leksiyon: Kini nga leksiyon makatabang sa mga estudyante sa pagtinguha og kabag-ohan pinaagi kang Jesukristo ug mas makahibalo kanus-a mahitabo ang maong mga kabag-ohan.

• Pagpangandam sa estudyante: Dapita ang mga estudyante sa paghinumdom sa mga detalye sa ilang bunyag ug tingali magdala og usa ka hulagway kon aduna sila niini. Ang pipila ka mga estudyante o ilang mga ginikanan lagmit nakasulat og entry sa journal niadtong ang mga estudyante gibunyagan. Mahimong makapaikag sa mga estudyante ang pagbasa niana nga entry sa journal o ang pakigsulti sa ilang mga ginikanan mahitungod sa mga detalye sa ilang bunyag, lakip na ang kadtong mga lagmit nalimtan sa mga estudyante.

• Content nga ipakita: Usa ka hulagway kaniadtong ikaw gibunyagan

• Sugyot sa pagtudlo pinaagi sa videoconference: Ikonsiderar ang paggamit og hangtod sa unom ka breakout rooms nga gisugyot sa magtutudlo nga giubanan sa Mga Taga-Roma 6:9–14 . Bahina ang mga estudyante ngadto sa mga grupo ug i-assign ang matag grupo og labing menos usa ka bersikulo gikan sa Mga Taga-Roma 6:9–14 aron magkaubang hisgotan, human niana sila mopaambit sa unsa ang ilang nakat-onan kauban sa klase. Bisitaha ang matag grupo sa makadiyot aron hatagan og personal nga tabang ug tubag sa mga pangutana kon gikinahanglan. Seguroha nga ang mga estudyante andam nga mopaambit ngadto sa ilang mga klasmeyt sa dili pa taposon ang breakout rooms.

Pagrebyo sa Doktrinal nga Kahanas 17

Katuyoan sa leksyon: Kini nga leksiyon maghatag sa mga estudyante og mga oportunidad aron mapalawom ang ilang pagsabot ug mapasabot ang mga kamatuoran mahitungod sa usa o dugang pa sa mga tudling sa doktrinal nga kahanas gikan sa Bag-ong Tugon.

• Pagpangandam sa estudyante: Dapita ang mga estudyante sa paghatag og pagtagad sa bisan unsang makalibog nga mga bersikulo, mga hugpong sa pulong, o mga pulong diha sa ilang sunod nga personal o pamilya nga pagtuon sa kasulatan ug motambong sa klase nga andam mopaambit niini.

• Sugyot sa pagtudlo pinaagi sa videoconference: Ikonsiderar ang paggamit og breakout rooms alang sa paghisgot sa mga estudyante kon unsaon paggamit ang lainlaing mga kahanas sa pagtuon sa kasulatan aron madugangan ang ilang pagsabot sa mga tudling sa kasulatan sa doktrinal nga kahanas.