Mga Taga-Roma 1

“Wala Ko Gikaulaw ang Ebanghelyo ni Kristo”

Young man wearing eyeglasses, sitting outside reading scriptures. (horiz)

Adunay usa o lain pa nga panahon, nga kitang tanan kinahanglan nga mobarog sa unsa ang atong gituohan. Samtang namulong sa mga Santos nga nagpuyo sa Roma, si Pablo mideklarar nga “wala ko ikaulaw ang Maayong Balita” ( Mga Taga-Roma 1:16). Ang iyang kahinam sa pagpaambit sa mensahe sa ebanghelyo mao ang pruweba. Kini nga leksiyon makatabang kanimo aron dili ikaulaw nga mailhan isip usa ka disipulo ni Jesukristo.

Pagpaambit og tinuod nga mga istorya ug mga asoy. Aron matabangan pagkuha sa interes sa mga estudyante niini nga leksiyon, ikonsiderar ang pagpaambit og tinuod nga personal nga mga sugilanon gikan sa kinabuhi sa mga propeta, kasaysayan sa Simbahan, mga pakigpulong sa kinatibuk-ang komperensiya, o mga magasin sa Simbahan.

Pagpangandam sa estudyante: Dapita ang mga estudyante sa pagtambong nga andam sa paghisgot nganong ang mga tawo lagmit magduha-duha nga mailhan isip mga disipulo ni Kristo o mopaambit sa ebanghelyo ngadto sa uban.

Posible nga mga Kalihokan sa Pagkat-on

Ang mosunod nga pasulit mahimong gamiton sa pagtudlo mahitungod sa Mga Epistola sa Bag-ong Tugon. Ang mga tubag mao ang (1) c; (2) b; (3) c; (4) a.

Dugang pang kasayoran mahitungod niining mga epistola anaa makita sa “ Pauline Epistles ” sa Giya sa mga Kasulatan (scriptures.ChurchofJesusChrist.org) o sa Dali, Sunod Kanako—Alang sa mga Indibidwal ug mga Pamilya.

Unsa may imong nahibaloan?

Hunahunaa nga imong gisultihan ang usa sa imong mga higala kinsa anaa sa laing Kristohanong pagtuo nga ikaw nagtuon sa Bag-ong Tugon sa seminary. Siya misulti kanimo nga ganahan siya sa Bag-ong Tugon apan usahay maglisod og sabot sa mga Epistola. Iya kang gipangutana unsa ang imong nahibaloan mahitungod niini. Tubaga ang mosunod nga pasulit aron makita unsa ka kamaayo motubag kaniya.

1. Unsa ang mga Epistola?

   1. Opisyal nga mga pahibalo sa Simbahan nga gihimo sa propeta

   2. Mga pakigpulong nga gihatag sa mga lider sa Simbahan nga nakolekta sa milabay nga mga katuigan

   3. Nagkalainlaing mga sulat nga sinulat sa mga lider sa Simbahan ngadto sa mga Santos

2. Kinsa ang gipasidunggan sa pagsulat sa 14 sa 21 ka mga epistola nga nalakip sa Bag-ong Tugon?

   1. Pedro

   2. Pablo

   3. Lucas

3. Giunsa paghan-ay ang naunang 13 ka mga Epistola?

   1. Kronolohiko (sa dihang kini gisulat)

   2. Pinaagi sa importansya

   3. Pinaagi sa gitas-on

4. Kinsa pa ang pipila sa ubang mga tagsulat sa mga Espitola?

   1. Santiago, Pedro, Juan, ug Judas

   2. Santiago, Pedro, Juan, ug Esteban

   3. Santiago, Pedro, Juan, ug Timoteo

Ang Epistola ngadto sa mga Taga-Roma

Ang basahon sa Mga Taga-Roma mao ang usa ka epistola nga gisulat ni Pablo ngadto sa mga Santos didto sa Roma sa dihang hapit na matapos ang iyang mga panaw sa pagka misyonaryo. Roma—ang kapital sa Kagamhanan sa Roma—napuno sa kalibotanon nga mga pilosopiya ug nahimong usa ka lisod nga dapit sa pagsangyaw sa ebanghelyo ni Jesukristo. Si Pablo misulat sa mga Santos nga mga Romano aron paglig-on sa ilang hugot nga pagtuo, pag-andam kanila sa iyang pag-abot, pagtin-aw ug pagdepensa sa iyang mga pagtulun-an, ug sa pagdasig og panaghiusa tali sa mga Judio ug mga Hentil nga mga miyembro sa Simbahan.

Sa imong pagtuon sa Mga Taga-Roma 1 , pangita og mga kamatuoran nga makadasig kanimo diha sa imong pagpaningkamot nga mahimong disipulo ni Jesukristo.

Wala ko igakaulaw

Basaha ang Mga Taga-Roma 1:15–17 , nga mangita kon unsa ang gibati ni Pablo bahin sa ebanghelyo ni Kristo. Ikonsiderar ang pagmarka sa mga pulong o mga hugpong sa pulong niini nga mga bersikulo nga imong nakita nga mahinungdanon.

Lagmit imong gimarkahan ang mga pulong nga “ [Wala] ko ikaulaw ang [ebanghelyo ni Kristo]” sa Mga Taga-Roma 1:16 .

• Gikan sa imong nakat-onan mahitungod ni Pablo sa basahon sa Mga Buhat, giunsa niya pagpakita nga siya wala maulaw nga mailhan isip usa ka Kristiyano?

• Unsa nga mga sitwasyon ang lagmit giatubang sa kabatan-onan karon diin sila kinahanglang mobarog ug dili ikaulaw ang ebanghelyo ni Kristo?

Si Pablo nasayod nga ang Roma usa ka lugar nga lisod puy-an ug sangyawan sa ebanghelyo. Siya nag-atubang usab og pagsupak gikan niadtong wala makasabot o misalikway sa iyang mga pagtulun-an. Bisan pa niana, si Pablo naikag sa pag-adto sa Roma ug pagsangyaw didto aron dalhon ang uban ngadto kang Kristo (tan-awa sa Mga Taga-Roma 1:15).

Paghunahuna og mga kasinatian diin, sama ni Pablo, ikaw adunay kahigayonan sa pagbarog o pagpaambit sa imong hugot nga pagtuo ni Jesukristo. Paghimo og mubo nga listahan sa imong journal. Ilakip ang imong mga hunahuna ug mga pagbati unsa kadako ang imong tinguha sa pagpaambit sa imong pagtuo niadtong mga sitwasyona.

Mahimong makatabang ang pagpahinumdom sa mga estudyante nga adunay daghang gagmay ug yanong mga paagi aron ilang mapakita nga wala nila ikaulaw ang ebanghelyo ni Kristo. Ikonsiderar ang pagdapit og pipila ka mga boluntaryo sa pagpaambit sa ilang mga kasinatian. Mahimo usab nga ipaambit sa mga estudyante ang ilang pagpangandam alang niini nga leksiyon pinaagi sa paghisgot nganong ang mga tawo lagmit magduha-duha sa pagpaambit sa ebanghelyo.

• Ngano kaha ang usa ka batan-on mobati og kaulaw nga mailhan isip usa ka Kristiyano? Unsa ang ilang mahimong buhaton kon aduna sila niini nga mga hunahuna o mga pagbati?

Mga kasulatan ug modernong mga ehemplo

Pagrebyo sa mosunod nga mga ehemplo sa mga tawo kinsa wala maulaw nga ipahibalo ang ilang hugot nga pagtuo sa Ginoo. Paghunahuna mahitungod sa ilang mga sitwasyon, ug pangita og pagkaparehas tali sa ilang kinabuhi ug sa imoha.

Tan-awa sa “Dugang nga Mga Kalihokan sa Pagkat-on” nga bahin alang sa dugang nga mga pananglitan ug sa usa ka ideya kon unsaon paggamit ang teknolohiya alang niini nga kalihokan.

• Kon ang uban naghukom kanimo: Ang babaye kinsa naghugas sa mga tiil ni Jesus sa iyang mga luha ( Lucas 7:36–50)

• Kon ikaw kinahanglang mobarog sa imong mga higala: Abinadi ug Alma ( Mosiah 13:1–9 ; 17:1–4 ; 18:1–3)

• Unsa ang nakadasig kanimo mahitungod niini nga pananglitan?

• Giunsa niining mga indibidwal pagpakita nga sila wala maulaw sa ebanghelyo ni Kristo?

• Kinsa ang nahimong ehemplo sa imong kinabuhi nga dili maulaw sa ebanghelyo ni Jesukristo? Giunsa nila sa pagpakita ang ilang hugot nga pagtuo?

Ang Taga-Roma 1:15–17 nagsulti kanato nga ang kadasig ni Pablo sa ebanghelyo ni Kristo iyang nakab-ot tungod sa iyang pagsabot nga “[ang ebanghelyo] mao ang gahom sa Dios alang sa kaluwasan” alang sa tanang mga anak sa Dios. Sa laing pagkasulti, tungod kay si Pablo nasayod nga walay bisan usa nga maluwas kon wala ang ebanghelyo ni Jesukristo, siya gustong mopaambit niini sa tanan.

Ang mga tubag sa mga estudyante sa mosunod nga mga pangutana mahimong managlahi kaayo sa usag usa. Samtang kini nga mga pangutana gihisgotan, tabangi ang mga estudyante nga makasabot nga ang paggamit niini nga baroganan personal ug dili nila angay nga hukman ang uban base sa giunsa nila pagpadayag ang ilang hugot nga pagtuo.

• Sa unsang paagi nga ang paghinumdom sa gibuhat sa Manluluwas alang kanimo makatabang kanimo aron dili ikaulaw Siya ug ang Iyang ebanghelyo?

• Samtang adunay mga higayon nga kita tawgon aron pagpanalipod sa atong pagtuo sa dagko o dramatikong mga pamaagi, kasagaran ang atong hugot nga pagtuo mas mapakita sa gagmay ug yanong mga paagi (tan-awa sa Alma 37:6–7). Unsa kaha ang hitsura, paminaw, o bation nga “dili ikaulaw ang ebanghelyo ni Kristo” sa imong inadlaw-adlaw nga kinabuhi?

• Taposa ang mosunod nga pamahayag: Wala ko gikaulaw ang ebanghelyo ni Jesukristo, tungod kay …

Ikonsiderar ang pagpamatuod sa kalipay ug kalinaw nga maangkon gumikan sa pagpabiling matinud-anon sa imong pagtuo ug pakigsaad.

Komentaryo ug Background nga Impormasyon

Unsaon man nako pagpaambit sa akong pagpamatuod sa normal ug natural nga paagi?

Si Elder Dieter F. Uchtdorf sa Korum sa Napulog Duha ka Apostoles mitudlo:

Official portrait of Elder Dieter F. Uchtdorf of the Quorum of the Twelve Apostles, 2006. Called as Second Counselor in the First Presidency, 3 February 2008. Made official portrait in 2008 replacing portrait taken in 2004.

Ako nahibalo nga pipila kanato mas mahigalaon kaysa uban. Okay ra na. Ang Ginoo naghimo niini nga posible alang sa matag usa kanato, sa atong kaugalingong paagi, aron mag-awhag sa uban nga moduol ug motan-aw ug moduol ug motabang. Dayon ang Dios mohimo sa Iyang pagluwas nga buhat, ug sila mahimong moduol ug magpabilin.

Mahimo kong mosugyot og lima ka butang nga mahimong salmotan ni bisan kinsa diha sa halangdong komisyon sa Manluluwas sa pagtabang sa pagpundok sa Israel.

1. Paduol ngadto sa Dios. …

2. Pun-a ang inyong kasingkasing sa gugma alang sa uban. …

3. Paningkamot sa paglakaw sa dalan sa pagkadisipulo. …

4. Ipaambit unsay anaa sa inyong kasingkasing. …

5. Saligi ang Ginoo sa pagpahinabo sa Iyang mga milagro.

(Dieter F. Uchtdorf, “Sharing the Gospel in Normal and Natural Ways,” ChurchofJesusChrist.org)

Dugang nga mga Kalihokan sa Pagkat-on

Paggamit og teknolohiya aron pagsusi sa mga artikulo ug mga bidyo

Mahimong makatabang ang pagmugna og QR codes o minubo nga mga URL alang sa mga artikulo ug mga bidyo nga anaa sa ChurchofJesusChrist.org. Kini nga mga code o mga URL mahimong ipakita sa palibot sa room aron masusi sa mga estudyante ang mga kapanguhaan sa ilang indibidwal nga mga himan.

Ubang mga ehemplo sa pagtuo

Kini nga mga ehemplo sa tawo kinsa wala maulaw nga mahibaloan ang ilang hugot nga pagtuo sa Ginoo mahimong gamiton diha sa “Mga kasulatan ug modernong mga pananglitan” nga bahin niini nga leksiyon.

• Rayna Esther: Esther 3:8–13 ; 4:13–16 ; 7:1–6 (alang sa mas yano apan kompletong asoy, basaha gikan kang Presidente Thomas S. Monson nga pakigpulong “Unta Kamo Adunay Kaisog” [Ensign o Liahona, Mayo 2009, 123])

• Ang tawo nga gipakatawong buta: Juan 9:13–17, 24–38

• Pedro ug Juan: Mga Buhat 4:1–3, 7–20 ; 5:41–42

• Si Elder Larry Echo Hawk sa Kapitoan, “Duol Ngari Kanako, O Balay ni Israel,” Ensign o Liahona, Nob. 2012, 32

Ang pagkadaotan ug mga sala mikaylap sa panahon ni Pablo ug sa atong panahon

Sa Mga Taga-Roma 1:18–32 , si Pablo naglista og daghang mga sala nga managsamang mikaylap kaniadto ug karon. Tungod kay posibleng daghang mga tawo ang modawat niining mga kinaiyaha, hisgoti nganong kining mga butanga nagpugong kanato sa pagbalik sa kalipay sa plano sa kaluwasan sa Langitnong Amahan.

Ipasabot nga gikan sa Mga Taga-Roma 1:18–32 , atong nakat-onan nga ang mga propeta ug apostoles nagtudlo kanato mahitungod sa mga kinaiya ug pamatasan nga makasilo sa Dios.

Ang pinulongan nga gigamit sa paghulagway niining mga kinaiyaha lagmit malisod sabton alang sa mga estudyante. Ipasabot nga ang bersikulo 23 nagpasabot sa idolatriya, o pagsimba sa mga imahen nga hinimo sa tawo imbes sa pagsimba sa Dios. Ang mga bersikulo 28 hangtod 32 naghisgot og daghang mga sala nga nakaguba sa atong relasyon sa usag usa ug sa Dios, sama sa pagkasina, pagkabayolente, pagpamakak, ug pagkamapahitas-on.

Ang mga estudyante lagmit adunay mga pangutana mahitungod sa mga paghisgot sa homosexuality sa mga bersikulo 26 ug 27 . Alang sa dugang nga kasayoran o aron matabangan ang mga estudyante nga makasabot sa posisyon sa Simbahan sa homosexual behavior, tan-awa ang 38.6.15 sa Kinatibuk—ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw (ChurchofJesusChrist.org).