Kapaangayan pinaagi sa Hugot nga Pagtuo kang Jesukristo
Imahe
Screenshot from the 2019 ComeUntoChrist.org Video.
Gihigugma ni Pablo ang mga Santos sa Roma ug gusto silang tabangan nga mahiusa pinaagi sa ilang pagtuo kang Jesukristo. Ang parehong Judio ug Hentil nga mga kinabig nagkinahanglan og tabang pagsabot sa ilang pagsalig kang Jesukristo ug kon sa unsang paagi makadawat og mga panalangin sa Iyang Pag-ula. Kini nga leksiyon mahimong makatabang nimo aron mas masabtan ang panginahanglan natong tanan nga mapasaylo sa atong mga sala, o mahatagan og kaangayan, pinaagi kang Jesukristo.
Pagpunting ngadto sa mga indibidwal. Usa sa mga hagit sa pagtudlo mao ang pagtubag sa mga panginahanglanon sa mga estudyante nga adunay lain-laing mga gigikanan [backgrounds], mga interes, mga gihandom, ug mga pakigbisog. Ang Espiritu Santo makatabang nimo sa pagpahiangay sa mga leksiyon ngadto sa mga panginahanglanon sa tanan nimong mga estudyante. Pangita og mga paagi aron matultolan ang mga estudyante ngadto sa Manluluwas, kinsa makatabang sa matag estudyante sa ilang talagsaon nga mga kahimtang.
Pagpangandam sa estudyante: Dapita ang mga estudyante sa pagbasa sa mga kahulogan nga anaa sa leksiyon sa Mga Taga-Roma 1-6 sa Dali Sunod Kanako—Alang sa Mga Indibidwal ug Mga Pamilya: Bag-ong Tugon 2023. Sultihi sila nga mangandam sa pagpaambit gamit ang ilang kaugalingong mga pulong sa kahulogan sa mga pulong nga sama sa kapaangayan ug grasya.
Posible nga mga Kalihokan sa Pagkat-on
Ang tanan nagkinahanglan kang Jesukristo
Ikonsiderar ang pagdapit sa mga estudyante sa pagdrowing sa mosunod nga senaryo sa ilang journal sa pagtuon (o ngadto sa pisara) samtang gibasa kini sa makusog.
Hunahunaa nga anaa ka sa dalan padulong sa usa ka nindot kaayo nga destinasyon. Samtang naglakaw ka sa dalan, bisan pa niana, ikaw nakakita og usa ka babag o bongbong nga nagbabag sa agianan. Ang babag nakapaundang sa bisan unsa nga pag-uswag ug imposible nga makalatas niini sa imong kaugalingong paningkamot.
Butangi og timaan ang destinasyon nga presensiya sa Dios.
Nganong ang pagbalik sa presensiya sa Dios usa man ka butang nga imong gitunguha?
Ang mga miyembro sa Simbahan sa adlaw ni Pablo naggikan sa lainlaing mga kultura ug kagikan. Usa ka butang nga managsama silang tanan, bisan pa niana, sila nakasala ug busa dili takos mosulod sa presensiya sa Dios. Diha sa imong pagtuon sa Mga Taga-Roma 2–3, pangita aron masabtan unsa ang nahimo sa Langitnong Amahan ug sa Iyang Pinalanggang Anak aron ang tanang tawo makabuntog sa babag nga nagpugong kanila sa pagbalik ngadto sa presensiya sa Dios.
Ang paghatag og kahulogan sa mga pulong makatabang sa mga estudyante aron mas masabtan ang konteksto ug ang unod [content] sa mga bersikulo sa kasulatan. Ikonsiderar ang pagpakita niining mga kahulogan aron maoy madangpan sa mga estudyante samtang sila nagbasa sa mga bersikulo sa Mga Taga-Roma. Mahimong makatabang ang dungan nga pagbasa sa usa ka bersikulo ug ipuli ang usa ka kahulogan sa pulong diha sa bersikulo. Ang mga estudyante mahimo usab nga mopaambit sa ilang nakat-onan sa pagpangandam sa estudyante.
Aron mas masabtan ang mga pagtulun-an ni Pablo ngadto sa mga Taga-Roma, ang mosunod nga mga kahulogan mahimong makatabang:
Kapaangayan, Paghatag og Kaangayan: “Mapasaylo gikan sa silot sa sala ug ipahayag nga walay sala. Ang usa ka tawo kahatagan og kaangayan pinaagi sa grasya sa Manluluwas pinaagi sa hugot nga pagtuo diha Kaniya. Kini nga hugot nga pagtuo gipakita pinaagi sa paghinulsol ug pagsunod sa mga balaod ug mga ordinansa sa ebanghelyo. Ang Pag-ula ni Jesukristo makahimo sa katawhan sa paghinulsol ug mahatagan og kaangayan o kapasayloan gikan sa silot nga ila unta nga madawat” (Giya ngadto sa mga Kasulatan, “ Kapaangayan, Paghatag og Kaangayan ,” scriptures.ChurchofJesusChrist.org).
Hugot nga Pagtuo: “Kompyansa ug pagsalig kang Jesukristo nga mogiya sa usa ka tawo sa pagsunod Kaniya” (Giya ngadto sa Mga Kasulatan, “ Hugot nga Pagtuo ,” scriptures.ChurchofJesusChrist.org).
Ang balaod: Kini nga pulong nagpasabot sa balaod ni Moises ug ang kauban nga mga panggawas nga mga aksiyon niini, o “mga buhat” (tan-awa sa “Agosto 7–13. Mga Taga-Roma 1–6: ‘Ang Gahom sa Dios sa Kaluwasan,’” sa Dali Sunod Kanako—Alang sa Mga Indibidwal ug Mga Pamilya: Bag-ong Tugon 2023; tan-awa usab ang Giya sa mga Kasulatan, “ Balaod ni Moises ,” scriptures.ChurchofJesusChrist.org).
Grasya: Ang mga panalangin, kaluoy, tabang, ug kalig-on anaa kanato tungod sa Pag-ula ni Jesukristo (tan-awa ang Bible Dictionary, “ Grasya ”).
Basaha ang Mga Taga-Roma 3:10–12, 20–23, ug pangita kon giunsa ni Pablo paghulagway ang babag taliwala kanato ug sa Dios.
Unsa nga mga hugpong sa mga pulong gikan sa mga pagtulun-an ni Pablo ang makatabang kanato nga masabtan unsa ang pasabot sa babag?
Isulat kini nga mga hugpong sa mga pulong sa babag diha sa imong gidrowing.Basaha ang mosunod nga pamahayag ni Presidente Dieter F. Uchtdorf, kanhi sakop sa Unang Kapangulohan, ug pangita og dugang nga panabot kon unsa ang girepresentar sa babag:
Imahe
Official portrait of Elder Dieter F. Uchtdorf of the Quorum of the Twelve Apostles, 2006. Called as Second Counselor in the First Presidency, 3 February 2008. Made official portrait in 2008 replacing portrait taken in 2004.
“Sanglit nakasala man ang tanan ug nakabsan sa himaya sa Dios” [Mga Taga-Roma 3:23] ug tungod kay “walay butang nga mahugaw nga makasulod sa gingharian sa Dios”[1Nephi 15:34], ang matag usa nato dili takos nga makabalik sa presensiya sa Dios.
Bisan kon kita moalagad sa Dios uban sa tibuok natong mga kalag, kini dili igo, tungod kay kita sa gihapon “dili mapuslanon nga mga sulugoon” [Mosiah 2:21]. Dili kita makaangkon sa atong agianan ngadto sa langit; ang gipangayo sa hustisya nagbarog isip babag, diin kita walay gahom sa pagbuntog sa atong kaugalingon.
Ang mga estudyante mahimo usab modugang sa Ang mga gipangayo sa hustisya ngadto sa babag sa ilang gidrowing.
Paghunahuna mahitungod sa mga dapit diin kamo napakyas o sa mga sala nga inyong gipaningkamotang mabuntog.
Mahimong makatabang dinhi ang pagpaambit sa pamahayag ni Elder Uchtdorf sa “Komentaryo ug Background nga Impormasyon” nga bahin.
Basaha ang Mga Taga-Roma 3:24–28 (tan-awa ang Paghubad ni Joseph Smith sa bersikulo 24), ug pangitaa unsa ang gitudlo ni Pablo mahitungod sa bugtong paagi nga kita matagaan og kaangayan, o mapasaylo sa atong mga sala.
Dapita ang mga estudyante sa pagpaambit sa ilang mga hunahuna o mga pangutana kon aduna sila mahitungod niini nga hilisgotan o niini nga mga bersikulo. Pananglitan, ang mga estudyante lagmit wala makasabot sa pulong nga “pagpasig-uli” (bersikulo25). Tabangi ang mga estudyante nga makasabot sa mosunod nga maisugong kamatuoran nga naggikan niini nga mga bersikulo.
Usa ka kamatuoran nga imong makat-onan gikan niini nga mga bersikulo mao nga pinaagi sa matinud-anong pagdawat kang Jesukristo, ang tanang katawhan mahimong matagaan og kaangayan pinaagi sa Iyang grasya.
Unsa nga mga hunahuna o mga pagbati ang anaa kanimo sa dihang ikaw mamalandong niining kamatuoran?
Si Elder Dieter F. Uchtdorf sa Korum sa Napulog Duha ka Apostoles nagtudlo giunsa sa Pag-ula ni Jesukristo pagbag-o sa atong panglantaw sa atong mga sala ug pagka-dili hingpit:
Imahe
Official portrait of Elder Dieter F. Uchtdorf of the Quorum of the Twelve Apostles, 2006. Called as Second Counselor in the First Presidency, 3 February 2008. Made official portrait in 2008 replacing portrait taken in 2004.
Ang walay kinutoban nga Pag-ula sa Manluluwas hingpit nga miusab sa paagi sa atong pagtan-aw sa atong mga kalapasan ug mga diperensya. Imbes nga magsige og hunahuna niini ug mobati nga wala nay katubsanan o wala nay paglaom, makakat-on kita gikan niini ug mobati nga malaomon. Ang makalimpyo nga gasa sa paghinulsol nakatugot kanato nga makabiya sa atong mga sala ug motumaw nga bag-o nga binuhat.
Tungod ni Jesukristo, ang atong mga kapakyasan dili kinahanglan nga maoy modeterminar kanato. Kini makapahimo nato nga mas maayo.
Ang mosunod nga mga pangutana mas labing maayo nga tubagon sa indibidwal nga paagi sa mga estudyante diha sa ilang journal sa pagtuon.
Sa unsang paagi nga ang imong panglantaw sa imong kaugalingong mga sayop ug pagka-dili hingpit matandi sa unsa ang gihulagway ni Elder Uchtdorf?
Pagdugang sa imong gidrowing pinaagi sa paghulagway giunsa ni Jesukristo pagtabang kanato aron mabuntog ang babag.
Sa unsang paagi nga ang pagsabot nga kitang tanan makasala ug mapakyas sa kaluwasan makabag-o sa atong panglantaw kang Jesukristo?
Unsa nga mga panabot, mga pagbati, o mga impresyon ang anaa kanimo tungod sa imong nakat-onan niini nga leksiyon?
Komentaryo ug Background nga Impormasyon
Unsaon nako nga mas masabtan ang kapaangayan?
Si Elder D. Todd Christofferson sa Korum sa Napulog Duha ka Apostoles mitudlo sa mosunod mahitungod sa kahulogan sa kapaangayan:
Imahe
Portrait of Elder D. Todd Christofferson. Photographed in March 2020.
Tungod “sa walay kinutuban nga mithi sa Iyang talagsaon nga maulaong sakripisyo,” si Jesukristo makatagbaw o “makatubag sa katuyoan sa balaod” alang sa atong kaayohan. Ang pagpasaylo moabot pinaagi sa Iyang grasya kinsa nakatagbaw sa mga gipangayo sa kaangayan pinaagi sa Iyang kaugalingon nga pag-antos. … Iyang gitangtang ang pagpanghimaraot kanato nga wala tangtanga ang balaod. Kita napasaylo ug gibutang sa usa ka kondisyon sa pagkamatarong uban Kaniya. Mamahimo kitang, sama Kaniya, walay sala. Gipatunhay kita ug gipanalipdan pinaagi sa balaod, pinaagi sa hustisya. Kita, maingon nga, nahatagan og kaangayan.
Sa ingon, kita mahimong tukma nga mamulong sa usa kinsa nahatagan og kaangayan nga napasaylo, walay sala, o walay pagbati nga sad-an.
(D. Todd Christofferson, “Justification and Sanctification,” Ensign, Hunyo 2001, 20)
Nganong ang kalibotan nagkinahanglan man kang Jesukristo?
Ang sala nakabalda ba sa plano sa Langitnong Amahan?
Si Presidente Dieter F. Uchtdorf, kanhi sakop sa Unang Kapangulohan, mitudlo:
Imahe
Official portrait of Elder Dieter F. Uchtdorf of the Quorum of the Twelve Apostles, 2006. Called as Second Counselor in the First Presidency, 3 February 2008. Made official portrait in 2008 replacing portrait taken in 2004.
Ang atong Langitnong Amahan nahibalo daan sa wala pa kita moanhi niining mortal nga kinabuhi nga dautang mga pwersa motintal kanato nga mapalayo sa atong tumong aron malayo gikan sa atong agianan, “kay nakasala ang tanan, ug nahilayo sa Dios” [ Mga Taga-Roma 3:23 ]. Mao nga nag-andam Siya og usa ka paagi aron kita makahimo og mga koreksiyon. Pinaagi sa maluloy-on nga proseso sa tinuod nga paghinulsol ug sa Pag-ula ni Jesukristo, ang atong mga sala mapasaylo ug kita “dili mamatay, kondili makabaton og kinabuhing dayon” [ Juan 3:16 ].
Unsa ang gipasabot ni Pablo dihang miingon siya nga ang“Mga Hentil … magabuhat sa gimbut-an sa kasugoan”? (Mga Taga-Roma 2:14)
“Giila ni Pablo nga ang pipila ka mga Hentil kinaiyanhon nagpuyo sa moral nga kinabuhi. … Kini nga mga Hentil nagsunod sa Kahayag ni Kristo, nga ‘usa ka impluwensiya alang sa kaayohan sa mga kinabuhi sa tanang katawhan (Juan 1:9; D&C 84:46–47)’ [Guide to the Scriptures, “ Kahayag, Kahayag ni Kristo ,” scriptures.ChurchofJesusChrist.org]. Bisan og wala silay balaod ni Moises, si Pablo miingon nga anaa kanila ‘ang buhat sa balaod nga nahisulat sa ilang mga kasingkasing’ (Mga Taga-Roma 2:15)” (“Mga Taga-Roma 1–3,” in Manwal sa Estudyante sa Bag-ong Tugon [2018], 337).
Dugang nga mga Kalihokan sa Pagkat-on
Masulundon gikan sa Kasingkasing
Ikonsiderar ang pagdapit og usa ka estudyante aron mobasa sa Mga Taga-Roma 2:28–29, hulipan ang pulong nga Judio og Santos sa Ulahing mga Adlaw ug ang pulong nga pagtuli og ang pakigsaad. Unsa ang madugang niining kausaban ngadto sa atong pagsabot sa mga panudlo ni Pablo? Unsa ang mga ehemplo sa mga butang nga atong gibuhat isip mga miyembro sa Simbahan nga mas makahuluganon ug gamhanan kon buhaton nga “iya sa kasingkasing, espirituhanon”? (Mga Taga-Roma 2:29). (Gikuha gikan sa “Agosto 7–13. Mga Taga-Roma 1–6: ‘Ang Gahom sa Dios alang sa Kaluwasan,’” Dali, Sunod Kanako—Alang sa Sunday School: Bag-ong Tugon 2023.)
Ang doktrina sa kapaangayan sa Pagpahi-uli sa kasulatan
Ang doktrina sa kapaangayan gitudlo usab sa Basahon ni Mormon ug sa Doktrina ug Mga Pakigsaad. Ang mga estudyante mahimong magpares-pares ug mobasa bisan asa sa 2Nephi 2:5–8 o Doktrina ug Mga Pakigsaad 20:29–31 aron makakita og mga panabot mahitungod sa kapaangayan.
Mga pagtuo sa mga Santos nga Judio mahitungod sa balaod ni Moises
Ang mosunod nga senaryo lagmit magrepresentar sa mga tinuohan sa pipila sa mga Romanhong Santos kinsa gisulatan ni Pablo. Ikonsiderar ang paggamit niini aron matabangan ang mga estudyante nga masabtan ang pipila ka sayop nga mga ideya nga gipasabot ni Pablo.
Si Asher naggikan sa usa ka matuohon nga pamilyang Judio nga nagpuyo sa Roma sulod sa duha ka mga henerasyon. Sa iyang pagdako, siya gitudloan nga magpuyo sa balaod ni Moises nga makugihon. Ang iyang pamilya nagtuo nga sila maluwas pinaagi sa pagpuyo sigon sa mga ritwal, panggawas nga mga pasundayag, ug mga ordinansa sa balaod ni Moises. Sa dihang ang pamilya ni Asher nahibalo mahitungod kang Jesukristo, sila nagtuo nga Siya mao ang Mesiyas nga ilang gipaabot. Sila gibunyagan apan nagpadayon pagpuyo sa balaod ni Moises, nagtuo nga ang hingpit nga pagsunod magdala kanila sa kaluwasan.
Unsa nga mga kamatuoran ang kinahanglan pang makat-onan ni Asher ug sa iyang pamilya?