Pagrebyo sa Doktrinal nga Kahanas 17

Sabta ug Ipasabot

Ang usa ka katuyoan sa doktrinal nga kahanas mao ang pagtabang kaninyo nga masabtan ang mga pagtulon-an sa Manluluwas nga anaa sa mga tudling sa doktrinal nga kahanas ug mapasabot kini sa inyong kaugalingong mga pulong. Kini nga leksiyon makahatag kaninyo og oportunidad aron mapalawom ang inyong pagsabot ug mapasabot ang mga kamatuoran mahitungod sa usa o dugang pa sa mga tudling sa doktrinal nga kahanas gikan sa Bag-ong Tugon.

Pagpangandam sa estudyante: Dapita ang mga estudyante sa paghatag og pagtagad sa bisan unsang makalibog nga mga bersikulo, mga hugpong, o mga pulong sa ilang sunod nga personal o pamilya nga pagtuon sa kasulatan ug moabot sa klase nga andam mopaambit niini.

Posible nga mga Kalihokan sa Pagkat-on

Ang tudling sa doktrinal nga kahanas nga leksiyon kinahanglang matudlo isip puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor sa lugar o rehiyon o koordinitor aron maseguro nga matudlo ang kada leksiyon sa tudling sa doktrinal nga kahanas samtang anaa sa sesyon ang seminary.

Pagsabot sa mga kasulatan

Nakabasa na ba mo og kasulatan—tingali labaw pa sa kausa—ug nakit-an ninyo nga naglibog mo kon unsa ang gipasabot niini?
Unsa ang sagad ninyong bation matag higayon nga mahitabo kini sa inyong pagtuon sa mga kasulatan?
Unsa ang inyong reaksyon kon kini mahitabo kaninyo?

Tabangi ang mga estudyante nga makakita nga normal lang nga dili masabtan ang tanan diha sa kasulatan. I-follow up ang pagpangandam sa estudyante pinaagi sa pagdapit kanila nga mopaambit sa mga bersikulo, mga hugpong, o mga pulong gikan sa mga kasulatan nga wala nila masabti gikan sa miaging pagtuon sa kasulatan. Mahimong makatabang ang pagsulat niini diha sa pisara.

Kon aduna pay panahon sa kataposan sa leksiyon, makatabang sa mga estudyante ang paglakip sa mga kahanas sa kasulatan nga nakat-onan niini nga leksiyon kauban sa mga bersikulo nga gilista sa pisara.

Ang Manluluwas gusto nga kita makasabot sa Iyang mga pulong ug motabang kanato nga mabuhat kini pinaagi sa Espiritu Santo. Nagkinahanglan kini og paningkamot sa atong bahin. Niini nga leksiyon kamo adunay oportunidad sa pagkat-on sa mga kahanas sa pagtuon sa kasulatan nga makatabang kaninyo sa pagsabot sa daghang mga tudling sa doktrinal nga kahanas.

Mga kahanas sa pagtuon sa kasulatan

Daklit nga irebyo ang mosunod nga mga tudling sa doktrinal nga kahanas ug ang mahinungdanong mga hugpong sa kasulatan.

Ikonsiderar ang pagpuli sa bisan unsang mga tudling nga girebyo o pagdugang og lain pang mga tudling sa doktrinal nga kahanas nga ang mga estudyante makabenepisyo gikan sa pagpunting niini.

Mahimong irebyo sa mga estudyante ang mga tudling nga nag-inusara, may pares, o isip usa ka klase.

Tudling sa Doktrinal nga Kahanas	Mahinungdanong Hugpong sa mga Pulong sa Kasulatan
Mga Taga-Efeso 1:10	“Usa ka laraw nga pagatumanon inig-abot sa tukma nga panahon, laraw sa paghiusa diha kang Kristo sa tanang mga butang.”
Mga Taga-Efeso 2:19–20	Ang Simbahan “tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang.”
2 Mga Taga-Tesalonica 2:1–3	“Ang adlaw ni Kristo … dili pa moabot, hangtud nga mahitabo una ang pagsupil.”
2 Timoteo 3:15–17	“Ang balaan nga kasulatan … makagagahom sa pagtudlo kanimo ngadto sa kaluwasan.”

Mahimong bahinon ang klase ngadto sa tinag-upat matag grupo ug dapiton ang matag estudyante sa pagpili og usa ka tudling nga iyang gusto nga mas masabtan pa. Seguroha nga ang tanang upat ka mga tudling gamiton sa matag grupo. Kini lagmit nagkinahanglan og pipila ka mga estudyante nga magrebyo og labaw sa usa ka tudling.

Kon ang mga estudyante makabenepisyo gikan sa usa ka pananglitan, mahimong gamiton ang 2 Timoteo 3:15–17 aron pagtudlo sa mga estudyante sa kahanas sa paglista.

Pagpili og usa ka tudling sa kasulatan nga gusto ninyong mas masabtan pa. Dayon pagpili og usa o labaw pa sa mosunod nga mga kahanas sa pagtuon sa kasulatan aron matabangan kamo nga mas makasabot nianang maong tudling. Pangandam nga inyong mapasabot sa uban ang inyong kasulatan.

Kon itugot sa panahon, sulayi paggamit ang lain nga kahanas sa usa sa ubang mga tudling.

Kalihokan A: Pagcross-reference

Gamita ang anaa nga mga kapanguhaan aron makita ang laing mga tudling sa kasulatan nga mahimong makatabang sa pagdugang sa inyong pagsabot sa maong tudling sa doktrinal nga kahanas. Ang maong mga kapanguhaan lagmit naglakip og mga footnote sa kasulatan, Giya sa mga Kasulatan, o ang Topikal nga Giya. Markahi ang mga tudling gikan niining mga kapanguhaan, ug irekord sa journal sa pagtuon o sa Gospel Library nga app kon giunsa niini pagdugang ang inyong pagsabot sa inyong napili nga tudling sa doktrinal nga kahanas.

Kalihokan B. Ihatag ang kahulogan sa mga pulong ug ang hugpong sa mga pulong

Pangita og mga pulong sa tudling sa doktrinal nga kahanas nga wala ninyo masabti. Pangitaa ang mga kahulogan niadtong mga pulong o hugpong sa mga pulong nga anaa sa mga kapanguhaan, sama sa Giya sa mga Kasulatan, ang Bible Dictionary, o kinatibuk-ang diksyonaryo. I-rekord sa journal sa pagtuon, margin sa kasulatan, o sa Gospel Library nga app ang mga kahulogan nga inyong nakaplagan, kauban sa bisan unsang bag-ong panabot.

Kalihokan C: Pagsabot sa konteksto ug content

Kompletoha ang usa o daghan pa sa mosunod nga mahimong makatabang nimo sa imong tudling sa doktrinal nga kahanas:

Basaha ang mahitungod sa epistola niini nga tudling gikan sa entry nga “ Pauline Epistles ” sa Giya sa mga Kasulatan o sa Bible Dictionary.
Giunsa sa ulohan sa kapitulo o sa nagpalibot nga mga bersikulo pagdugang ang inyong pagsabot sa tudling sa doktrinal nga kahanas?

Kinsa ang gipasabot sa inspiradong tagsulat, ug ngano man?
Unsa ang pinakaunod nga mensahe niining tudling sa kasulatan?

Irekord unsa ang inyong nasabtan mahitungod sa tudling base sa unsay inyong napamalandongan.

Human sa igong panahon, dapita ang mga estudyante sa pagpasabot ngadto sa ilang grupo sa ilang kahanas sa pagtuon sa kasulatan ug kon unsa ang ilang nasabtan karon mahitungod sa tudling sa doktrinal nga kahanas tungod niini. Ikonsiderar ang pagdapit og pipila ka mga estudyante sa pagpasabot sa ilang tudling ngadto sa tibuok klase.

Pahinumdomi ang mga estudyante nga ang ilang Langitnong Amahan ug ang Manluluwas motabang kanila nga masabtan ang kasulatan pinaagi sa Espiritu Santo. Mahimong makatabang ang pagpamatuod sa importansya sa pagpangita sa panabang sa Dios samtang sila nagtuon.