Mga Taga-Roma 4–5
Hugot nga Pagtuo, Buhat, ug Grasya
Sa iyang sulat ngadto sa mga Taga-Roma, si Pablo nagtinguha nga tabangan ang Romanhong mga Santos nga makasabot sa grasya ni Kristo pinaagi sa pagtudlo mahitungod sa koneksiyon niini sa hugot nga pagtuo ug mga buhat. Ang mga panudlo ni Pablo makatabang kanato nga mapalawom ang atong pagsabot mahitungod sa atong panginahanglan sa pagpasaylo ug kaluwasan pinaagi sa grasya ni Jesukristo. Kini nga leksiyon makatabang kanimo nga madugangan ang imong pagsabot ug pagpasalamat sa grasya ni Jesukristo.
Pagsabot sa doktrina ug mga baroganan. Samtang ang mga estudyante makaila sa mga doktrina ug mga baroganan diha sa kasulatan, giyahi sila pinaagi sa mga panaghisgot nga makatabang nila nga makahunahuna og maayo ug mas makasabot sa kahulogan niining mga kamatuoran. Kon ang mga estudyante makasabot og usa ka doktrina o baroganan sa ebanghelyo, ilang masabtan ang relasyon niini tali sa ubang mga doktrinal nga kamatuoran sa plano sa Ginoo ug ila usab nga masabtan kon unsaon paggamit niini sa ilang mga kinabuhi.
Pagpangandam sa estudyante: Dapita ang mga estudyante sa pagbasa sa bahin nga “Grasya” diha sa ang Giya sa mga Kasulatan (scriptures.ChurchofJesusChrist.org) ug dayon mag-ila ug usa ka paagi nga ilang nadawat ang grasya sa Dios sa ilang kaugalingong kinabuhi.
Posible nga mga Kalihokan sa Pagkat-on
Unsay makaluwas ninyo?
Hunahunaa nga ikaw mamatay na sa kauhaw sa usa ka desiyerto ug adunay usa ka botelya sa tubig ibabaw sa duol nga bungtod. Unsa ka importante ang matag usa sa mosunod alang sa imong kaluwasan?
Ikonsiderar ang pagpakita sa mosunod nga teksto ug hulagway ug dapita ang mga estudyante sa pagkopya sa duha ngadto sa ilang mga journal sa pagtuon.
-
Ang imong pagtuo nga ang tubig makaluwas nimo
-
Ang imong paningkamot aron makaadto sa tubig
-
Ang tubig mismo
Ang mga estudyante mahimong maghisgot sa pangutana kon unsa ang makaluwas kanila, ug ang mosunod nga mga pangutana, isip usa ka klase, magkapares, o sa gagmayng mga grupo.
-
Nganong ang tubig mismo ang bugtong butang nga makapugong kanimo nga mamatay sa kauhaw?
-
Nganong ang pagtuo sa tubig ug ang paningkamot nga makaadto sa tubig dili paigo?
-
Sa unsang paagi nga ang imong pagtuo, ang imong paningkamot, ug ang tubig tanan magtinabangay?
Kini nga senaryo makatabang nimo nga masabtan ang mga pagtulun-an ni Pablo kon sa unsang paagi nga ang hugot nga pagtuo, mga buhat, ug grasya nga may kalabotan sa kapaangayan.
-
Unsaon nimo paghatag og kahulogan ang mga pulong nga pagtuo, mga buhat, ug grasya?
Mahimong makatabang ang pagrebyo sa mga kahulogan niining mga pulong diha sa leksiyon sa Mga Taga-Roma 2–3 o diha sa Giya sa mga Kasulatan (scriptures.ChurchofJesusChrist.org).
Kon gibasa sa mga estudyante ang kahulogan sa grasya isip kabahin sa ilang pagpangandam niini nga leksiyon, mahimo silang dapiton sa pagpaambit sa ilang nakat-onan.
Sa panahon ni Pablo, pipila ka Judio nga mga Kristiyanos ang nagtuo nga sila naluwas pinaagi sa ilang mga buhat sa pagtuman sa balaod ni Moises. Gisulayan pagtul-id ni Pablo kining sayop nga pagtuo. Basaha ang Mga Taga-Roma 4:16 .
-
Unsa ang gitudlo niini nga bersikulo mahitungod sa giunsa kita pagkatarong, o gipasaylo sa atong mga sala?
Niini nga bersikulo, si Pablo nagtudlo nga kita gihatagan og kaangayan sa hugot nga pagtuo ug mga buhat pinaagi sa grasya ni Jesukristo.
Isulat ang mga pulong nga hugot nga pagtuo, mga buhat, ug grasya tapad sa hugpong sa pulong sa imong hulagway nga motakdo sa matag pulong.
-
Unsa may makat-onan nimo gikan niini nga pagtandi kabahin sa imong hugot nga pagtuo ug mga buhat?
-
Unsa ang imong makat-onan gikan sa pagtandi mahitungod sa grasya sa Manluluwas?
Kon gikinahanglan, tabangi ang mga estudyante aron makasabot nga ang pagtuo sa tubig susama sa hugot nga pagtuo, ang paningkamot nga makaadto sa tubig susama sa atong mga buhat, o mga lihok, ug ang tubig mismo nagrepresentar sa grasya sa Dios. Tabangi sila aron makasabot nga samtang ang hugot nga pagtuo ug mga buhat gikinahanglan aron makadawat sa grasya ni Jesukristo, ang Iyang grasya mao ang nagdala sa pagpasaylo, dili ang atong hugot nga pagtuo o mga buhat.
Dugang pagsabot mahitungod sa grasya ni Jesukristo
Ang grasya ni Jesukristo naghatag kanato og kaangayan, o nagpasaylo sa atong mga sala, ug kini nagpanalangin usab kanato sa lain pang mga paagi. Si Jesukristo wala lamang naghatag og tubig nga makaluwas sa kinabuhi, apan Siya usab nagpalig-on sa atong hugot nga pagtuo ug mga paningkamot aron kita makakuha sa maong tubig. Kita mapanalanginan sa Iyang grasya sa wala pa, atol sa, ug human sa atong paggamit sa hugot nga pagtuo diha Kaniya ug paghimo og maayong mga buhat.
Si Presidente Dieter F. Uchtdorf, kanhi sakop sa Unang Kapangulohan, mitudlo:
Sa atong tibuok nga kinabuhi, ang grasya sa Ginoo naghatag og temporal nga mga panalangin ug espiritwal nga mga gasa nga mopalambo sa atong mga abilidad ug mopabuhong sa atong kinabuhi. Ang Iyang grasya makahashas kanato. Ang Iyang grasya motabang kanato nga mahimong labing maayo.
(Dieter F. Uchtdorf, “Ang Gasa sa Grasya,” Liahona, Mayo 2015, 108)
-
Sa unsang paagi nga ang grasya sa Manluluwas makatabang kanimo aron mahimong imong labing maayong kaugalingon?
Basaha ang mosunod nga mga tudling sa kasulatan ug pangita og lain pang mga panalangin kauban sa grasya sa Manluluwas. Mga Taga-Roma 5:1–2, 21
-
Unsang dugang nga mga panalangin ang moabot gikan kang Jesukristo pinaagi sa Iyang grasya?
-
Kanus-a nimo nasinati ang grasya sa Manluluwas sa imong kinabuhi?
-
Sa unsang paagi nga kini nakaimpluwensiya sa imong mga pagbati kabahin sa Manluluwas?
Kon ang mga estudyante nangandam alang niini nga leksiyon pinaagi sa paghunahuna og mga paagi nga sila nakadawat sa grasya sa Manluluwas sa ilang mga kinabuhi, sila mahimong mopaambit sa ilang mga kasinatian. Ikonsiderar usab ang pagpaambit og personal nga kasinatian o mga pananglitan.
Pagdapit sa grasya sa Manluluwas nganha sa imong kinabuhi
Si Presidente Uchtdorf naghatag niini nga panabot mahitungod kon unsaon ninyo nga mahimong mas hingpit nga modawat sa grasya ni Jesukristo:
Ang grasya usa ka gasa sa Dios, ug ang atong tinguha nga magmasulundon sa matag sugo sa Dios mao ang paghatag sa atong mortal nga kamot sa pagdawat niining sagradong gasa gikan sa atong Langitnong Amahan.
(Dieter F. Uchtdorf, “Ang Gasa sa Grasya,” Liahona, Mayo 2015, 110)
Ikonsiderar ang pagdapit sa mga estudyante sa pagtubag sa mosunod nga mga pangutana diha sa ilang journal sa pagtuon.
-
Unsa nga mga hunahuna ug mga pagbati ang moabot kanimo kon ikaw maghunahuna mahitungod sa mga epekto sa grasya ni Jesukristo sa imong kinabuhi?
-
Unsa man ang imong mabuhat aron mas hingpit nga makadawat sa grasya ni Jesukristo diha sa imong kinabuhi?
Pagpamatuod sa imong panginahanglan sa grasya sa Dios ug ang kalig-on ug gasa nga ikadalit niini sa atong kinabuhi kaniadto, karon, ug human sa atong mga paningkamot nga magmatinud-anon ug magmasulondon.
Komentaryo ug Background nga Impormasyon
Unsaon man nato pag-ila sa atong panginahanglan sa grasya?
Si Presidente Dieter F. Uchtdorf, kanhi sakop sa Unang Kapangulohan, nangutana sa mosunod nga mga pangutana mahitungod sa atong panginahanglan sa grasya:
Kita ba nakasabot sa atong pagka-utangan ngadto sa atong Langitnong Amahan ug nangamuyo sa tibuok natong mga kalag alang sa grasya sa Dios?
Kon kita moluhod sa pag-ampo, kini mao ba ang paghinumdom sa labing nindot sa atong kaugalingong pagkamatarong, o pagkumpisal ba kini sa atong mga sayop, pagpangamuyo ba kini para sa kalooy sa Dios, ug paghilak ba sa pagpasalamat alang sa nindot nga plano sa kaluwasan?
(Dieter F. Uchtdorf, “Ang Gasa sa Grasya,” Liahona, Mayo 2015, 109)
Unsa ang usa ka pananglitan sa grasya nga naglihok sa kinabuhi sa usa ka tawo?
Mga Taga-Roma 4:16 . Nganong si Abraham gigamit isip usa ka panig-ingnan sa pagkadawat og kaangayan?
Alang sa pagtul-id sa ideya nga kadto lamang mga natuli ug nagtuman sa balaod ni Moises ang maluwas, si Pablo nagtudlo nga si Abraham nakadawat og mga panalangin sa wala pa siya matuli ug sa mga siglo sa wala pa gihatag ang balaod ni Moises. Si Abraham dayon nagpadayon sa pagkamatinud-anon human makigsaad sa Dios ug nagpatuli. Busa, si Pablo nakapakita nga ang mga indibidwal wala nakadawat og kaangayan pinaagi sa pagsunod sa balaod ni Moises apan diha sa hugot nga pagtuo ug mga buhat pinaagi sa grasya ni Jesukristo.
Sa unsang paagi nga ang grasya sa Dios may kalabotan sa Pagkapukan ni Adan?
Sa Mga Taga-Roma 5:12–21 si Pablo nagtudlo nga si Jesukristo nagtabang kanato nga mabuntog ang mga epekto sa Pagkapukan. Tungod sa paglapas ni Adan, ang sala ug kamatayon misulod sa kalibotan. Hinoon, tungod sa “gasa sa grasya, pinaagi sa usa ka tawo nga mao si Jesukristo” ( Mga Taga-Roma 5:15), ang tanan makabuntog sa mga epekto sa sala ug kamatayon ug makadawat sa kinabuhing dayon. Ang pakisayran ni Pablo sa Pagkapukan nagtabang kanato nga makasabot sa halayo og nalukopan nga gahom sa grasya sa Manluluwas nga makabuntog sa tanang butang.
Dugang nga mga Kalihokan sa Pagkat-on
“Kasakit mohimog pagkamainantuson”
Pangutan-a ang mga estudyante kon nakapasalamat na ba sila sa pagsulay nga ilang nasinati. Posible nga mga pangutana sa diskusyon mao ang “Sa unsa nga punto ikaw nahimong mapasalamaton?” o “Unsa ang imong masulti sa usa ka tawo nga kasamtangang nakasinati og pagsulay nga mamahimong makatabang kaniya sa paglahutay og tarong?” (tan-awa sa Doktrina ug mga Pakigsaad 121:7–8). Ipasabot nga si Pablo miagi og daghang malisod nga mga pagsulay sa iyang kinabuhi ug nagsulat mahitungod sa mga panalangin agig resulta sa iyang mga pag-antos. Dapita ang mga estudyante sa pagbasa sa Mga Taga-Roma 5:3–5 , nga mangita sa unsa ang gisulti ni Pablo nga resulta sa mga pagsulay o mga kalisdanan sa atong kinabuhi. Ikonsiderar ang paghangyo sa mga estudyante sa pagpaambit giunsa nila pagsinati ang bisan unsa niining mga panalangin.
Pagkat-on mahitungod sa grasya gikan sa Basahon ni Mormon
Ang mga propeta sa Basahon ni Mormon nadasig sa pagtudlo ug pagsulat mahitungod kang Jesukristo ug sa grasya alang kanato pinaagi Kaniya. Mahimong basahon sa mga estudyante ang labing minos tulo sa mosunod nga mga bersikulo, maghunahuna kon unsa ang gitudlo niining mga bersikulo kanila mahitungod sa grasya.
Lain pang kapilian mao ang pagbutang sa mga estudyante ngadto sa mga grupo ug hatagan ang matag miyembro sa grupo og usa o daghan pang mga tudling sa kasulatan. Ipabasa kanila ang ilang kasulatan ug isulat ang pakisayran ug usa ka paboritong pulong o hugpong sa pulong gikan sa tudling sa kasulatan sa usa ka panid sa papel. Dayon ipatuyok kanila ang mga papel ug balikon ang proseso sa matag papel sa kada miyembro sa grupo. Human makompleto ang kalihokan, mahimong pangitaon sa mga estudyante ang ilang orihinal nga papel ug tan-awon ang mga pulong ug mga hugpong sa mga pulong nga napili sa mga miyembro sa grupo alang sa tanang mga bersikulo.
Panapos nga imbitasyon
Aron matabangan ang mga estudyante nga magamit ang ilang nakat-onan niini nga leksiyon, ikonsiderar ang paghatag kanila og usa ka notecard o gamayng piraso sa papel. Dapita sila sa pagdala-dala niini sulod sa 24 ka oras samtang sila mangita sa grasya sa Dios sa ilang kinabuhi ug isulat ang bisan unsa nga ebidensiya nga ilang makit-an. Dapita sila sa pag-ampo ug pagpadayag og pagpasalamat sa matag higayon ug mangayo sa Langitnong Amahan og tabang aron hatagan sila og mga mata nga mas makakita sa Iyang grasya sa ilang kinabuhi. Ang mga estudyante mahimong moreport mahitungod sa ilang mga kasinatian sa sunod nga klase.