A large crowd of people being baptized in a river at the day of Pentecost.
Kimuʻa pea pekia ʻa Sīsuú, naʻá Ne fakahā ki Heʻene Kau ʻAposetoló hili ʻEne pekiá, ʻe fekauʻi mai ʻe he Tamaí “[ʻa] e Fakafiemālié, ko e Laumālie Māʻoniʻoní” (Sione 14:26). Hangē ko e talaʻofá, naʻe hoko mai ʻa e Laumālie Māʻoniʻoní ki he Kau ʻAposetolo ʻe Toko Hongofulu Mā Uá ʻi ha founga fakaofo ʻi he ʻaho ʻo e Penitekosí. Ko e taumuʻa ʻo e lēsoni ko ʻení ke tokoniʻi koe ke fakaloloto e mahino ʻokú ke maʻú ki he ngaahi founga ʻe lava ke tāpuekina mo tokoniʻi ai koe ʻe he Laumālie Māʻoniʻoní ke ke ako e founga ke fakaafeʻi mai e ngaahi tāpuaki ko iá ki hoʻo moʻuí.
ʻIlo’i ‘o e Laumālie Māʻoniʻoní. Kumi ha ngaahi faingamālie ke tokoniʻi ai e kau akó ke nau fakatokangaʻi ʻa e founga ʻoku ngāue ai ʻa e Laumālie Māʻoniʻoní ʻi heʻenau moʻui fakatāutahá. Te ke lava ʻo fakaʻaongaʻi ha ngaahi sīpinga mei he folofolá pea fakaafeʻi e kau akó ke nau fakakaukau ki heʻenau ngaahi aʻusiá.
Teuteu ʻa e tokotaha akó: Fakaafeʻi e kau akó ke nau aleaʻi mo ha taha ʻoku nau ʻofa ai ha ngaahi founga kuo nau fakatokangaʻi ai ʻoku ʻiate kinautolu ʻa e Laumālie Māʻoniʻoní ʻi heʻenau moʻuí. Fakaafeʻi foki e kau akó ke nau haʻu mateuteu mo ha faʻahinga fehuʻi pē te nau maʻu fekauʻaki mo e Laumālie Māʻoniʻoní.
Ngaahi ʻEkitivitī Ako ʻOku Ala Fakahokó
Fakalahi e meʻa te tau malavá
Fakapapauʻi pe ko e hā e lahi hoʻo tui ki he fakamatala ko ʻení ʻi ha meʻafua mei he taha ki he fitu, pea lekooti hoʻo talí ʻi hoʻo tohinoa akó: ʻOku ou falala ʻe lava ke u ʻiloʻi e taimi ʻoku ou ongoʻi ai e Laumālie Māʻoniʻoní ʻi heʻeku moʻuí.
ʻĪmisi
Diagram with words Strongly Disagree and Strongly Agree.
ʻE lava ke hoko ʻeni ko ha faingamālie lelei ke fakaafeʻi ai e kau akó ke nau fai ha faʻahinga fehuʻi pē fekauʻaki mo e Laumālie Māʻoniʻoní naʻe maʻu mei heʻenau teuteu ʻa e tokotaha akó pe naʻe haʻu ki heʻenau fakakaukaú.
Ko e hā ha ngaahi fehuʻi ʻokú ke maʻu fekauʻaki mo e Laumālie Māʻoniʻoní?
Hiki ʻi hoʻo tohinoa akó, tohiʻi ʻa e ʻuluʻi tohí “Ngaahi founga ʻe lava ke tokoniʻi ai au ʻe he Laumālie Māʻoniʻoní.” Mateuteu ke tānaki ha ngaahi meʻa ki he lisí lolotonga e lēsoní.
Fakakaukau ke hiki ʻa e ʻuluʻi tohi ko ʻení ʻi he palakipoé pea tānaki atu ha ngaahi fakakaukau ʻi lalo ai lolotonga e lēsoní.
ʻI hoʻo ako he ʻaho ní, te ke sio ai ki ha ngaahi sīpinga ʻo e founga ngāue ʻa e Laumālie Māʻoniʻoní ʻi he moʻui ʻa e kakaí. Fakakaukau ki he meʻa te ke lava ʻo ako mei he ngaahi sīpinga ko ʻení fekauʻaki mo e founga ʻe lava ke ngāue ai ʻa e Laumālie Māʻoniʻoní ʻi hoʻo moʻuí. Ko e moʻoni ʻe taha ʻoku fakamamafaʻi ʻe he ngaahi sīpinga ko ʻení ʻoku tokoniʻi kitautolu ʻe he Tamai Hēvaní ke tau haʻu kia Sīsū Kalaisi, ʻo fakafou ʻi he Laumālie Māʻoniʻoní.
ʻOku lilingi atu ʻa e Laumālie Māʻoniʻoní ʻi he ʻaho ʻo e Penitekosí
Kimuʻa pea pekia ʻa Sīsuú, naʻá Ne akoʻi ki Heʻene kau ākongá ʻe fekauʻi mai kiate kinautolu ʻe he Tamai Hēvaní ʻa e Laumālie Māʻoniʻoní hili e mavahe ʻa Sīsū mei he māmaní. Naʻá Ne fakamoʻoni ʻe ʻomi ʻe he Laumālie Māʻoniʻoní ha fakafiemālie, tataki, mo fakamoʻoni kiate Ia (vakai, Sione 14:16,26 ; 15:26).
ʻOku ʻoatu ʻe he ngaahi fakakaukau fakafaiako ʻoku hiki atu ʻi laló ha founga ʻe taha ki hono tokoniʻi ʻo e kau akó ke nau ako mo aleaʻi ʻa e ngaahi veesi mei he Ngāue 2 . Ko e founga ʻe taha ko hono vahevahe ʻa e kau akó ki ha ngaahi kulupu ʻe tolu pea fakaafeʻi ʻa e ngaahi kulupú ke nau ako ʻa e ngaahi veesi ko ʻení:
Hili hono ako e ngaahi vēsí, ʻe lava ke aleaʻi ʻe he kau akó ʻa e ngaahi fehuʻi ko ʻení:
ʻI he ngaahi veesi naʻá ke akó, naʻá ke fakatokangaʻi fēfē nai hono tokoniʻi ʻe he Laumālie Māʻoniʻoní ʻa e kakaí?
Ko e hā ʻoku tokoniʻi ʻe he ngaahi veesi ko ʻení ke mahino kiate koe fekauʻaki mo e finangalo ʻo e Tamai Hēvaní maʻatautolú?
ʻOku tokoniʻi fēfē nai kitautolu ʻe he Laumālie Māʻoniʻoní ʻi he ngaahi founga tatau?
Hili ha taimi feʻunga, fakaafeʻi ha kau ngāue tokoni mei he ngaahi kulupu kehekehe ke lipooti e ngaahi meʻa ne nau maʻú pea vahevahe ʻenau ngaahi talí mo e kalasí.
Ko e Penitekosí ko ha ʻaho mālōlō faka-Siu ia ʻoku hoko hili ha ʻaho ʻe 50 mei he kātoanga Lakaatú. ʻE fononga ʻa e kau Siu mei he ngaahi fonua takatakaí ki Selusalema ʻi he ʻaho mālōlō ko ʻení naʻa nau fakafiefiaʻi ʻa e ʻuluaki ututaʻu ʻo e faʻahitaʻú (vakai, Ko e Fakahinohino ki he Ngaahi Folofolá, “ Penitekosí ,” scriptures.ChurchofJesusChrist.org). Lau ʻa e Ngāue 2:1–8 , ʻo kumi ki he founga naʻe fakahoko ai ʻi he ʻaho ko ʻení ʻa e talaʻofa ʻa e Fakamoʻuí fekauʻaki mo hono maʻu ʻe he Kau ʻAposetoló ʻa e Laumālie Māʻoniʻoní. (Fakatokangaʻi ange ʻoku ʻuhinga ʻa e “ngaahi ʻelelo mangamanga ʻo hangē ko e afí” ʻi he veesi3 ki hano fakahaaʻi mahino mai ʻa e ʻi ai ʻa e Laumālié.)
ʻI he veesi 4–8 , naʻe aʻusia ʻe he Kau ʻAposetoló ʻa e meʻafoaki ʻo e lea ʻi he ngaahi lea kehekehé, “ko ha meʻafoaki ʻo e Laumālie Māʻoniʻoní ʻa ia ʻokú ne ngaohi ha niʻihi ʻoku ueʻi fakalaumālie, ke nau lea ʻi he ngaahi lea muli, pe ʻoku mahino kiate kinautolu, pea nau fakatonulea ki ha ngaahi lea ʻoku ʻikai ke nau maheni mo iá” (Ko e Fakahinohino ki he Ngaahi Folofolá, “ Ngaahi Lea Kehekehé, Meʻafoaki ʻo e ,” scriptures.ChurchofJesusChrist.org).
Naʻe tāpuekina fēfē nai ʻe he Laumālie Māʻoniʻoní ʻa e kau ākongá mo kinautolu naʻe fanongo kiate kinautolú?
ʻOkú ke pehē naʻe fakalahi fēfē nai ʻe he meʻafoaki ʻo e lea ʻi he ngaahi lea kehekehé ʻa e malava ke tokoniʻi ʻe he Kau ʻAposetoló ʻa e niʻihi kehé ke nau haʻu kia Kalaisí?
Te tau aʻusia fēfē nai e meʻafoaki ko ʻení he ʻahó ni?
Fakakaukau ke tānaki atu ha ngaahi fakakaukau mei he ngaahi veesi kuó ke akó ʻo aʻu mai ki he lisi naʻá ke faʻu ʻi hoʻo tohinoa akó.
Fakamoʻoni ʻa Pita kia Sīsū Kalaisi
Te tau lava ʻo vakai ki ha founga ʻe taha ʻe lava ke tokoniʻi ai kitautolu ʻe he Laumālie Māʻoniʻoní ʻaki ʻetau vakai ki he loto-toʻa naʻe akoʻi mo fakamoʻoni ki ai ʻa Pitá.
Manatuʻi ko e ngaahi meʻa naʻe hoko ʻi he Ngāue2 naʻe ʻikai fuoloa mei hono tutuki ʻo Sīsuú, lau ʻa e Ngāue 2:22–24, 32–33,36 pea kumi ki he founga naʻe tokoniʻi ai ʻe he Laumālie Māʻoniʻoní ʻa Pita ʻi he tūkunga ko ʻení ke malanga ʻi he loto-toʻa mo e mālohi fekauʻaki mo Sīsū Kalaisí. (Vakai foki, Ngāue 3:12–20 .)
Ko e hā ʻokú ke sio ki aí?
Ko e hā ʻokú ke ako mei he fakamatalá ni fekauʻaki mo e founga ʻe lava ke tokoniʻi ai koe ʻe he Laumālie Māʻoniʻoní ? (Vakai foki, Ngāue 1:8 ; 4:31 .)
Fakakaukau ke fakaafeʻi e kau akó ke nau fakakaukau mo vahevahe ha ngaahi aʻusia kuo tokoniʻi ai kinautolu ʻe he Laumālie Māʻoniʻoní ke nau akoʻi ha niʻihi kehe fekauʻaki mo Sīsū Kalaisi pe fakamoʻoni ʻi he loto-toʻa. Fakakaukau ke vahevahe foki ha aʻusia fakatāutaha.
Ko e ola ʻo e ngaahi akonaki ʻa Pitá ki he niʻihi kehé
Naʻe tākiekina ʻe he Laumālie Māʻoniʻoní ʻa kinautolu ne nau fanongo ki he ngaahi akonaki ʻa Pita fekauʻaki mo Sīsū Kalaisí. Lau ʻa e Ngāue 2:37–38,41 , ʻo kumi ki he founga naʻe tokoniʻi ai ʻe he Laumālie Māʻoniʻoní ʻa e kakai ko ʻení. ʻOku ʻuhinga ʻa e foʻi lea mahuhuhuhu mei he veesi37 ke fakatupu ha mamahi pe loto-mamahi pea fokotuʻu mai naʻe loto ʻa e kakaí ke liliu.
Ko e hā ʻoku makehe kiate koe ʻi he ngaahi veesi ko ʻení?
Naʻe tokoni fēfē nai ʻa e “mahuhuhuhu honau lotó” ki he kakai ko ʻení ke nau ofi ange kia Sīsū Kalaisí? ( veesi37).
Fakafehoanaki e meʻa naʻe hoko ki he kakai naʻe akoʻi ʻe Pita ki he talaʻofa naʻe fai ʻe he ʻOtuá ki Heʻene kau tamaioʻeikí ʻi he Tokāteline mo e Ngaahi Fuakava 100:5–8 .
Ko e hā ha ngaahi sīpinga ʻo e ngaahi liliu ʻe ala ueʻi kitautolu ʻe he Laumālie Māʻoniʻoní ke fakahokó ʻa ia ʻe tokoni ke tau toe ofi ange ai kia Sīsū Kalaisí?
Fakaafeʻi e kau akó ke nau fakakaukau mo vahevahe ha ngaahi aʻusia ʻi he taimi naʻe ueʻi ai kinautolu ʻe he Laumālie Māʻoniʻoní ke fai ha ngaahi liliu ʻa ia naʻá ne ʻomi ai kinautolu ke nau ofi ange kia Sīsū Kalaisí. Poupouʻi kinautolu ke nau vahevahe ha ngaahi sīpinga ʻoku ʻikai fuʻu fakatāutaha. Fakakaukau ke vahevahe foki ha aʻusia fakatāutaha.
Kapau ʻe lava, ʻe ʻaonga foki ke fakaafeʻi ha taha toki papi ului ki he kalasí pea kole ange ke nau fakaʻaongaʻi ha ngaahi miniti siʻi ke vahevahe ʻenau ngaahi aʻusiá mo e founga naʻe tokoniʻi ai kinautolu ʻe he Laumālie Māʻoniʻoní ke nau ofi ange kia Sīsū Kalaisi mo Hono Siasí. Manatuʻi ke maʻu ha ngofua mei he kouʻotineita fakalotofonua ʻo e S&I pea pehē ki he taki lakanga fakataulaʻeiki fakalotofonua ʻo e tokotahá kimuʻa pea toki fakahoko iá.
Fakakaukau ke tānaki atu hoʻo ngaahi fakakaukau mei he Ngāue 2:37–38,41 ki he lisi ʻi hoʻo tohinoa akó.
Fakakaukau ki he meʻa naʻá ke akó
Fakaafeʻi e kau akó ke nau toe vakaiʻi ʻa e lisi naʻa nau faʻu ʻi heʻenau tohinoa akó. ʻE ala tokoni e ngaahi fehuʻi ko ʻení ki he kau akó ke nau aleaʻi mo tukulotoʻi e meʻa ne nau akó. Fakamoʻoni ki he ngaahi moʻoni kuo aleaʻi ʻi he lēsoni ko ʻení.
Ko e fē ʻa e tāpuaki naʻe ongo taha kiate koe mei he Laumālie Māʻoniʻoní?
Ko e hā ʻoku mahuʻinga ai ʻa e Laumālie Māʻoniʻoní ke tokoniʻi kitautolu ke tau haʻu kia Sīsū Kalaisi pea ʻomi e niʻihi kehé kiate Iá?
Ko e hā ha ngaahi sitepu te ke lava ʻo fakahoko ke fiefia kakato ange ai ʻi he ngaahi tāpuaki ʻo e Laumālie Māʻoniʻoní?
Fakamatala Fakamahinó mo e Puipuituʻá
Kuo tokoniʻi fēfē nai kitautolu ʻe he Laumālie Māʻoniʻoní ke tau ofi ange ki he Tamai Hēvaní mo Sīsū Kalaisí?
Naʻe akonaki ʻe Palesiteni Dallin H. Oaks ʻo e Kau Palesitenisī ʻUluakí ‘o pehē:
ʻĪmisi
Official Portrait of President Dallin H. Oaks taken March 2018.
Ko e misiona ʻo e Laumālie Māʻoniʻoní ke fakamoʻoniʻi ʻa e Tamaí mo e ʻAló (vakai, Sione 15:26 ; 2Nīfai 31:18 ; 3Nīfai 28:11), ke tataki kitautolu ki he moʻoní (vakai, Sione 14:26 ; 16:13), mo fakahā mai ʻa e ngaahi meʻa kotoa ʻoku tonu ke tau faí (vakai, 2Nīfai 32:5). ʻOku maʻu mei he founga fetuʻutaki fakatāutaha ko ʻeni mo ʻetau Tamai Hēvaní ʻo fakafou ʻi Hono Laumālie Māʻoniʻoní ʻetau fakamoʻoni ki he moʻoní, ʻetau ʻiló, mo hotau fakahinohino fakatāutaha mei heʻetau Tamai Hēvani ʻofá. Ko ha konga mahuʻinga ia ʻo ʻEne palani ʻo e ongoongoleleí, ʻa ia ʻe lava ke maʻu ai ʻe Heʻene fānaú ha fakamoʻoni fakatāutaha ki hono moʻoní.
(Dallin H. Oaks, “Ongo Founga ʻo e Fetuʻutakí,” Ensign pe Liahona, Nōvema. 2010, 83)
Naʻe fakamoʻoni ‘a Palesiteni M. Russell Ballard ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻĪmisi
Official portrait of President M. Russell Ballard of the Quorum of the Twelve Apostles, 2004.
Ko e taimi ʻoku ongoʻi ai ʻe he fakafoʻituituí … ʻa e ngāue ʻa e Laumālié ʻiate kinautolú, pe ko e taimi ʻoku nau fakatokangaʻi ai ha fakamoʻoni ʻo e ʻofa mo e ʻaloʻofa ʻa e ʻEikí ʻi heʻenau moʻuí, ʻoku langaki mo fakamālohia fakalaumālie ai kinautolu pea tupulaki mo ʻenau tui kiate Iá.
(M. Russell Ballard, “Now Is the Time,” Ensign, Nov. 2000, 75)
ʻOku ongo fēfē ʻa e Laumālie Māʻoniʻoní, pea te ke fakaafeʻi fēfē nai ia?
ʻOku ʻomi ʻe he foʻi vitiō “Ongoʻi ‘o e Laumālie Māʻoniʻoni” (3:17) ha ngaahi sīpinga ʻo e ngaahi founga ʻoku ongoʻi ai ʻe he kakaí ʻa e Laumālie Māʻoniʻoní. ‘Oku lava ke maʻu ʻa e vitiō ko ʻení ‘i he ChurchofJesusChrist.org.
ʻOku ʻomi ʻe he vitiō “Maʻu ʻa e Laumālie Māʻoniʻoní” (2:56), ʻoku maʻu ʻi he ChurchofJesusChrist.org, ha ngaahi sīpinga ʻo e founga ke fakaafeʻi ai ʻa e Laumālie Māʻoniʻoní.
Ngaahi ʻEkitivitī Fakalahi ki he Akó
Founga ʻe taha ke kamata ʻaki e lēsoní
ʻI heʻene lea ʻi he konifelenisi lahi ʻo ʻEpeleli 2017, naʻe fakamatala ai ʻe ʻEletā Gary E. Stevenson ʻo e Kōlomu ʻo e Kau ʻAposetolo ʻe Toko Hongofulu Mā Uá ha talanoa kau ki ha taimi naʻá ne kau ai ki ha fāmili kei talavou ʻi he efiafi [fakafāmil] ʻi ʻapí. Huluʻi e vitiō “ʻE tokonia fēfeeʻi koe ‘e he Laumālie Māʻoniʻoní?” mei he taimi 0:00 ki he 1:15. ‘Oku maʻu ‘a e vitioó ni ‘i he ChurchofJesusChrist.org.
Hili hono mamataʻi e foʻi vitioó, fakaafeʻi e kau akó ke nau fakakaukau ki he founga te nau tali ʻaki e fehuʻi ʻa e kiʻi tamasiʻí.
Kumi ha taimi maʻá e Laumālie Māʻoniʻoní
ʻI he femoʻuekina ʻa e moʻuí, ʻe lava ke faingataʻa ke tuku ha taimi ke tāpuekina ai kitautolu ʻe he Laumālie Māʻoniʻoní ʻaki ha ueʻi fakalaumālie. Sio he vitiō “Ko e Holi Fakamātoato ʻa e Laumālié” (3:28), pea vakai ki he founga naʻe fehangahangai ai ha finemui mo e faingataʻa ko ʻení. ‘Oku maʻu atu ‘a e vitioó ni ‘i he ChurchofJesusChrist.org.
ʻE lava ke tokoniʻi au ʻe he tokāteline ʻo Kalaisí ke u maʻu ʻa e Laumālie Māʻoniʻoní pea haʻu kia Kalaisi
ʻE lava ke fakaafeʻi e kau akó ke nau lau ʻa e Ngāue 2:38 , ʻo kumi e tali ʻa Pita ki he kakai naʻa nau fehuʻi, “Ko e hā te mau faí?” ( Ngāue 2:37). ʻE lava ke ke fehuʻi ange ʻeni:
Ko e hā e ngaahi sitepu ʻoku fokotuʻutuʻu ʻe Pita ʻi he veesi38 ?
ʻOku kaunga fēfē ʻa e ngaahi sitepu ko iá ki ha taha kuo ʻosi papitaiso?
Ke tokoni ke mahino lelei ange ki he kau akó e tali ki he fehuʻi hono uá, fakakaukau ke fakaʻaongaʻi e fakamatala ko ʻeni ʻa ʻEletā Dale G. Renlund ‘o e Kōlomu ʻo e Kau ʻAposetolo ʻe Toko Hongofulu Mā Uá : “ʻE lava ʻo fakahaohaoaʻi kitautolu ʻi he hokohoko mo e toutou … tui kia [Kalaisi], fakatomala, maʻu ʻa e sākalamēnití ke fakafoʻou e ngaahi fuakava mo e ngaahi tāpuaki ʻo e papitaisó, pea maʻu ʻa e Laumālie Māʻoniʻoní ke hoko ko ha takaua maʻu pē. ʻI heʻetau fai iá, ʻoku tau hoko lahi ange ai ʻo hangē ko Kalaisí pea lava ke kātaki ki he ngataʻangá, fakataha mo e ngaahi meʻa kotoa ko iá” (“Kāingalotu ʻOua Naʻa Tuku e Feingá,” Ensign pe Liahona, Mē 2015, 56).
