Ngāue 1–5
Vakai Fakalūkufuá
Naʻe malanga ʻa Sīsū Kalaisi ki Heʻene kau ākongá ʻi ha ʻaho ʻe 40 hili ʻEne Toetuʻú. Naʻá Ne fakahā ki Heʻene kau ʻAposetoló hili ʻEne ʻalú, ʻe fekauʻi mai ʻe he Tamaí “ʻa e Fakafiemālié, ʻa ia ko e Laumālie Māʻoniʻoní” (Sione 14:26). Naʻe fetaulaki ha tangata naʻe ʻikai lava ʻo fononga ʻi he kotoa ʻo ʻene moʻuí mo Pita mo Sione, pea naʻe fakamoʻui ʻe Pita ʻa e tangatá ʻo fakaʻaongaʻi ʻa e mafai ʻo Sīsū Kalaisí. Naʻe puke pōpula ʻa Pita mo Sione pea tuku pōpula kinaua ʻi he fakamoʻui mo e fakamoʻoni ʻi he huafa ʻo Sīsū Kalaisí, pea naʻe fakahaofi kinaua ʻe ha ʻāngelo.
Teuteu ke Akoʻi
ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.
Ngāue 1
Taumuʻa ʻo e lēsoní: ʻE lava ke tokoni e lēsoni ko ʻení ke ongoʻi ʻe he kau akó e mahuʻinga hono tataki ʻe Sīsū Kalaisi Hono Siasí ʻo fakafou ʻi he kau ʻaposetoló mo e kau palōfitá.
-
Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe ha ngaahi sīpinga ʻokú ne fakahaaʻi hono tataki ʻe Sīsū Kalaisi Hono Siasí ʻi he ngaahi ʻaho kimui ní.
-
Laʻipepa Tufa: Ko e laʻipepa tufa fekauʻaki mo e founga naʻe tataki ʻaki ʻe Sīsū Hono Siasí ʻo fakafou ʻi he Kau ʻAposetoló
-
Vitiō: “Ko Hotau Kuongá ʻEni!” (11:14; mamata mei he taimi 3:34 ki he 5:12); “Tānaki Fakataha ʻa e Meʻa Kotoa Pē ʻia Kalaisi” (15:46; mamata mei he taimi 10:09 ki he 13:57)
-
Fokotuʻu ki hono akoʻi ʻo e konifelenisi vitioó: Fakakaukau ke fakaʻaongaʻi ha savea ʻoku ʻikai ke ʻilo ki ai ha taha ʻi he ʻinitanetí ke fai ʻa e siví ʻi he kamataʻanga ʻo e lēsoní pea fakaʻaongaʻi e tali ʻa e kau akó ke tataki e toenga ʻo e lēsoní. ʻE lava ke fakaʻaongaʻi ʻa e fakatātā ʻi laló ke ʻoatu ʻa e ngaahi tali ki he filí.
Ngāue 2
Taumuʻa ʻo e lēsoní: ʻOku fakataumuʻa e lēsoni ko ʻení ke tokoniʻi e kau akó ke fakaloloto ʻenau mahino ki he ngaahi founga ʻe lava ke tāpuekina ai kinautolu ʻe he Laumālie Māʻoniʻoní mo tokoniʻi kinautolu ke ako e founga ke fakaafeʻi ai e ngaahi tāpuaki ko iá ki heʻenau moʻuí.
-
Teuteu ʻa e tokotaha akó: Fakaafeʻi e kau akó ke nau aleaʻi mo ha taha ʻoku nau ʻofa ai ha ngaahi founga kuo nau fakatokangaʻi ai ʻoku ʻiate kinautolu ʻa e Laumālie Māʻoniʻoní ʻi heʻenau moʻuí. Fakaafeʻi foki e kau akó ke nau haʻu mateuteu mo ha faʻahinga fehuʻi pē te nau maʻu fekauʻaki mo e Laumālie Māʻoniʻoní.
Ngāue 3
Taumuʻa ʻo e lēsoní: ʻE tokoni ʻa e lēsoni ko ʻení ke fakamālohia ʻa e tui ʻa e kau akó ʻoku lava ʻa e Tamai Hēvaní mo Sīsū Kalaisi ʻo tokoniʻi kinautolu ke nau ikunaʻi ʻa e ngaahi faingataʻa ʻoku nau fehangahangai mo iá.
-
Teuteu ʻa e tokotaha akó: Fakaafeʻi e kau akó ke nau fakakaukau ki ha pole pe faingataʻa ʻoku nau fehangahangai fakatāutaha mo ia te nau fie fekumi ai ki he Tamai Hēvaní mo Sīsū Kalaisi ke maʻu ha fakafiemālie pe fekumi ki Hona mālohi ke ikunaʻí. Fakaafeʻi kinautolu ke nau ako ʻa e Ngāue 3:1–8 ʻi he fakakaukau ki he pole pe faingataʻa ko ʻení pea fekumi ki he ngaahi moʻoni ʻe lava ʻo tokoni kiate kinautolú.
-
Vitiō: “Ko e Faitoʻo ‘e Pita mo Sione ha Tangata Mamatea (Pipiki) talu mei hono Fāʻeleʻí” (3:20); “ʻE Fakamoʻui ʻa Kinautolu Kuo Kafó” (5:45)
-
Fokotuʻu ki hono akoʻi ʻo e konifelenisi vitioó: Fakaʻaliʻali ʻa e ngaahi fakatāta, ʻoku maʻu ʻi he konga “ʻEkitivitī Tokoni ki he Akó” pea fakaafeʻi ha kau ngāue tokoni ke nau fakaʻaongaʻi ʻa e ngaahi ʻīmisi ko iá ke fakamatalaʻi fakanounou ʻa e ngaahi meʻa naʻe hoko ʻoku fakamatalaʻi ʻi he Ngāue 3:1–8 .
Ngāue 4–5
Taumuʻa ʻo e lēsoní: ʻE tokoni e lēsoni ko ʻení ke ongoʻi ʻe he kau akó ha holi lahi ange ke talangofua ki he ʻOtuá ʻi ha toe taha kehe.
-
Teuteu ʻa e tokotaha akó: Fakaafeʻi e kau akó ke nau haʻu mateuteu ke vahevahe ha ngaahi tūkunga ʻe ala faingataʻa ai ke talangofua ki he ʻOtuá koeʻuhí ko e ngaahi fakalotoa mālohi mei he niʻihi kehé.
-
Ngaahi Vitioó: “Hokohoko atu hono Malangaʻi ʻe Pita mo Sione ʻa e Ongoongoleleí” (5:37; mamata mei he taimi 0:00 ki he 3:51); “Te Mou Tauʻatāina” (9:54; mamata mei he taimi 6:43 ki he 8:51)
-
Fokotuʻu ki hono akoʻi ʻo e konifelenisi vitioó: Fakakaukau ke fakaafeʻi e kau akó ke nau mamata ʻi he “ʻOku Fakamāuʻi ʻa Pita mo Sione” mo e “Hokohoko Atu hono Malangaʻi ʻe Pita mo Sione ʻa e Ongoongoleleí” kimuʻa ʻi he kalasí koeʻuhí ke nau maheni mo e talanoá.
Toe Vakaiʻi ʻo e Fakataukei Fakatokāteliné 12
Taumuʻa ʻo e lēsoní: ʻE ʻoange ʻe he lēsoni ko ʻení ha ngaahi faingamālie ki he kau akó ke nau kumi mo fakaʻilongaʻi ʻa e ngaahi potufolofola fakataukei fakatokāteline fakaʻosi ʻe 13 ʻoku maʻu ʻi he Fuakava Foʻoú.
Fakatokangaʻi ange: ʻE ala fie maʻu ke akoʻi ha lēsoni ʻo e ngaahi potufolofola fakataukei fakatokāteline ʻo fetongi ʻaki ʻa e lēsoni fakamanatu ko ʻení. Vakai ki he taimi-tēpile ki he vave hono akoʻí ʻa ia ʻoku ʻomi ʻe he talēkita fakaʻēliá pe fakavahefonuá pe kouʻotineitá ke fakapapauʻi ʻe akoʻi e lēsoni fakataukei fakatokāteline takitaha lolotonga e fakataha ʻa e seminelí.
-
Saati: Ko ha saati ʻo e ngaahi potufolofola fakataukei fakatokāteliné mo ʻenau ngaahi kupuʻi lea fakafolofola tefitó ke fakaʻaliʻalí
-
Fokotuʻu ki hono akoʻi ʻo e konifelenisi vitioó: Vahevahe ʻa e kau akó ki he fanga kiʻi lokí. ʻOange ha taimi ke nau fakaʻilongaʻi ai ʻa e ngaahi potufolofola fakataukei fakatokāteliné ʻi heʻenau folofolá (kapau te nau fili pehē), fai e ngaahi fehuʻi “feinga ke ʻiloʻi koé” pea aleaʻi ʻa e ngaahi potufolofola ʻoku nau akó. Hili ha taimi pau, tuifio ʻa e fanga kiʻi lokí koeʻuhí ke kehekehe ʻa e toʻu ʻo e kau akó ke nau ngāue mo aleaʻi.