Fakafuofuaʻi Hoʻo Akó 6

Mātiu 26–28; Maʻake 14–16; Luke 22–24; Sione 13–21

ʻĪmisi

Young men and young women attend an early morning seminary class in Argentina.

ʻOku fakataumuʻa ʻa e lēsoni ko ʻení ke tokoniʻi koe ke ke vakaiʻi ʻa e ngaahi taumuʻa kuó ke fokotuʻú pea mo e ako mo e tupulaki fakatāutaha kuó ke aʻusia lolotonga hoʻo ako e Fuakava Foʻoú.

Ngāue ʻaki ha ngaahi founga fakafaiako kehekehe. ʻOku faʻa lahi ange ʻa e kau mai ʻa e kau akó ʻi he taimi ʻoku fakaʻaongaʻi ai ʻe he kau faiakó ha ngaahi founga fakafaiako kehekehe. Pea mateuteu ke liliu hoʻo ngaahi founga fakafaiakó lolotonga e lēsoní ʻo kapau ʻe mole e tokanga ʻa e kau akó pe ʻoku ʻikai ke ngali tokoni ha ʻekitivitī ke aʻusia ʻe he kau akó ʻa e tefitoʻi taumuʻa ʻoku fie maʻu ke nau aʻusiá.

Teuteu ʻa e tokotaha akó: Fakaafeʻi e kau akó ke nau fakakaukau ki he meʻa ne nau aʻusia ʻi heʻenau ako e konga ʻuluaki ʻo e Fuakava Foʻoú mo e ngāue fakafaifekau ʻa Sīsū Kalaisí. Poupouʻi e kau akó ke nau haʻu mateuteu mo ha meʻa ne nau ako pe ongoʻi mei he faaʻiKosipelí (Mātiu, Maʻake, Luke, mo Sione) ʻa ia ʻoku mahuʻinga kiate kinautolú.

Ngaahi ʻEkitivitī Ako ʻE Ala Fakahokó

ʻOku fakataumuʻa e lēsoni ko ʻení ke tokoniʻi e kau akó ke nau vakaiʻi e ngaahi taumuʻa kuo nau fokotuʻú, ʻenau malava ke fakamatalaʻi e ngaahi akonaki ʻi he Fuakava Foʻoú, pe founga ʻoku liliu ai honau ʻulungāngá, holí, mo ʻenau malava ke moʻui ʻaki e ongoongoleleí. Ko hono ako ʻe he kalasí ʻa e Mātiu 26–28; Maʻake 14–16; Luke 22–24; mo e Sione 13–21 mahalo naʻe mei fakamamafaʻi ai e ngaahi moʻoni makehe meiate kinautolu ʻi he ngaahi ʻekitivitī ko ʻení. Kapau ko ia, ʻe lava ke fulihi e ngaahi ʻekitivitií ke fakakau ai e ngaahi moʻoni ko iá.

ʻOfa ki he ʻOtuá ʻaki ho lotó kotoa

Kapau naʻe maʻu ʻe he kau akó ha faingamālie ke fakakaukauloto ki heʻenau ʻofa ki he ʻOtuá ʻi heʻenau ako ʻa e Mātiu 22 mo e Sione 14:15 , ʻe lava ke tokoni ʻa e ngāue ko ʻení ke fakafuofuaʻi ʻe he kau akó ʻa e founga kuo nau tupulaki mo fakalakalaka ai ʻenau ʻofa ki he ʻOtuá.

Tā ha foʻi haati ʻi he palakipoé. Fakaafeʻi ha tokotaha ako loto fiemālie ke vahevahe ha meʻa ʻe taha kuo nau ako pe ongoʻi fekauʻaki mo Sīsū Kalaisi ʻa ia kuó ne fakatupulaki ʻenau ʻofa kiate Iá. Poupouʻi e tokotaha ako ʻuluakí ke fili ha tokotaha ako hono ua ke vahevahe ha meʻa kehe ʻoku nau ʻofa ai fekauʻaki mo e Fakamoʻuí. Hoko atu e ʻekitivitī ko ʻení mo e kau akó ʻi hono fili ha toe kau ako kae ʻoua kuo maʻu ʻe he kau akó kotoa ha faingamālie ke vahevahe. Hiki e ngaahi tali ʻa e kau akó fekauʻaki mo ʻenau ʻofa kia Sīsū Kalaisí ʻi loto pe takatakai ʻi he foʻi haati he palakipoé.

Mahalo ʻe fie maʻu ʻe he kau akó ha taimi ke nau fakakaukau ai ki heʻenau tali ki he ngaahi fehuʻi ko ʻení. Fakaafeʻi e kau akó ke hiki ʻenau ngaahi talí, pea kole ange leva ki he kau ako loto vēkeveké ke nau vahevahe.

Kuo fakaʻaiʻai fēfē nai koe ʻe hoʻo ako lahi ange fekauʻaki mo e ʻofa ʻa e Tamai Hēvaní mo Sīsū Kalaisi ʻiate koé ke ke feinga ke ʻofa lahi ange ʻiate Kinauá?
Kuo tokoni fēfē nai ʻa e mahino ʻokú ke maʻu ki Heʻena ʻofa ʻiate koé ke fakatupulaki ai hoʻo ʻofa ki he kakai kehé?

Manatuʻi naʻe akoʻi ʻe he Fakamoʻuí ʻoku tau fakahaaʻi ʻetau ʻofa kiate Iá ʻaki ʻetau tauhi e ngaahi fekaú (vakai, Sione 14:15). Naʻe ʻomi ʻe Sīsū Kalaisi ʻa e sīpinga haohaoa ʻo e fakahaaʻi ʻo e ʻofa ki he Tamai Hēvaní ʻaki e talangofua ki he ngaahi fekau kotoa pē (vakai, Sione 14:31).

ʻI hoʻo ako ʻa e Sione 14:15 , mahalo naʻá ke mei hiki ʻi hoʻo tohinoá fekauʻaki mo hoʻo ngaahi holi ke tauhi e ngaahi fekaú mo hoʻo ngaahi taumuʻá, pe ko hoʻo ngaahi ʻuhinga, ki hono fai iá. Kapau ko ia, toe vakaiʻi e meʻa naʻá ke tohí.

ʻOange ha taimi ki he kau akó ke nau fakakaukauloto ai ki he ngaahi fehuʻi ko ʻení. Mahalo he ʻikai taau ke fakaafeʻi e kau akó ke vahevahe ha ngaahi tali pau. Ka neongo ia, ʻe lava ke fakaafeʻi e kau akó ke vahevahe ha ngaahi fakakaukau fakalūkufua fekauʻaki mo e ngaahi fehuʻí.

Ko e hā hoʻo ongoʻi fekauʻaki mo hoʻo ngaahi holi mo e taumuʻa lolotongá ke tauhi e ngaahi fekaú kae lava ke fakahaaʻi hoʻo ʻofa ki he Tamai Hēvaní mo Sīsū Kalaisí? Fakafehoanaki hoʻo ngaahi holí mo hoʻo ngaahi taumuʻa he taimi ní mo e feituʻu naʻá ke ʻi ai he konga kimuʻa ʻo e taʻú.
Ko e hā ha ngaahi liliu kuó ke fakatokangaʻi ʻi hoʻo ʻofa ki he Tamai Hēvaní mo Sīsū Kalaisi ʻi hoʻo ako ʻa e Fuakava Foʻoú? Kapau kuó ke fakatokangaʻi ha ngaahi liliu, ʻokú ke pehē ko e hā e meʻa kuó ne tākiekina e ngaahi liliu ko ʻení?
ʻOku ʻi ai mo ha toe ngaahi liliu ʻokú ke ongoʻi ʻoku fie maʻu ke ke fai kae lava ke fakahaaʻi pe fakatupulaki hoʻo ʻofa ki he Tamai Hēvaní mo Sīsū Kalaisí?

Ko e Fakalelei ‘a Sīsū Kalaisi: Ne mei fēfē nai hoʻo moʻuí ka ne ʻikai ia?

Ko e taumuʻa ʻo e ʻekitivitī ko ʻení ke ʻoange ki he kau akó ha faingamālie ke vakaiʻi e mahino ʻoku nau maʻú mo e fiemaʻu ki he Fakalelei ʻa Sīsū Kalaisí.

Fakakaukau ke fakaʻaliʻali ha fakatātā hangē ko ʻení lolotonga e fakalaulauloto ʻa e kau akó ki heʻenau ngaahi talí. ʻE lava ke tokoni hono fakaʻaongaʻi ʻo e ngaahi fakatātā ʻi he kalasí ke nofotaha ai e fakakaukau ʻa e kau akó.

Fakakaukau ki he meʻa kuó ke ako fekauʻaki mo e feilaulau fakalelei ʻa Sīsū Kalaisí mei he Fuakava Foʻoú. Fakalaulauloto ʻi ha kiʻi taimi ki he ʻuhinga fakatāutaha kiate koe ʻa Sīsū Kalaisi mo ʻEne feilaulau fakaleleí. Fakakaukau pe naʻe mei fēfē nai hoʻo moʻuí taʻe kau ai ha taha.

ʻĪmisi

Illustration of Jesus praying in the Garden of Gethsemane as he performs the Atonement.

Ko ʻeni kuó ke tuku ha taimi ke fakalaulauloto ai, lekooti ha niʻihi ʻo hoʻo ngaahi fakakaukaú ʻaki haʻo tali ʻa e ngaahi fehuʻi ko ʻení. Fakakau ha ngaahi fakaikiiki mahuʻingamālie ʻi hoʻo ngaahi talí, pea fakakau ha ngaahi potufolofola kuo nau tokoniʻi koe fekauʻaki mo e feilaulau ʻa Sīsū Kalaisí.

Naʻe mei kehe fēfē hoʻo moʻuí kapau naʻe ʻikai mamahi ʻa e Fakamoʻuí maʻau ʻi Ketisemani pea pekia maʻau ʻi he kolosi ʻi Kalevalé?
Naʻe mei kehe fēfē hoʻo moʻuí kapau naʻe ʻikai ke ikunaʻi ʻe Sīsū Kalaisi ʻa e maté ʻo fakafou ʻi Heʻene Toetuʻu nāunauʻiá?
Ko e hā ʻe hoko ki he palani ʻo e fakamoʻui ʻa e Tamai Hēvaní taʻekau ai e feilaulau fakalelei ʻa Sīsū Kalaisí?

Naʻe akonaki ‘a Palesiteni M. Russell Ballard, ko e Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongofulu Mā Uá ‘o pehē:

ʻĪmisi
Official portrait of President M. Russell Ballard of the Quorum of the Twelve Apostles, 2004.

Meʻamālié, naʻe loto-toʻa ʻa Sīsū Kalaisi ke Ne fakahoko ʻa e feilaulau ko ʻení ʻi Selusalema ʻo e kuonga muʻá. … Ka naʻe kei loto fiemālie pē ʻa Sīsū ke ne mamahi ka tau ala maʻu kotoa ʻa e faingamālie ke fufulu ke tau maʻa—ʻo fakafou ʻi heʻetau tui kiate Iá, fakatomala mei heʻetau ngaahi angahalá, papitaiso ʻi he mafai totonu ʻo e lakanga fakataulaʻeikí, maʻu ʻa e meʻafoaki fakahaohaoa ʻo e Laumālie Māʻoniʻoní ʻi he hilifakinimá, mo tali ʻa e kotoa ʻo e ngaahi ouau mahuʻinga kehé. Ka ʻikai ʻa e Fakalelei ʻa e ʻEikí, he ʻikai lava ke tau maʻu ʻa e ngaahi tāpuakí ni pea ʻikai lava ke tau taau mo mateuteu ke foki ke nofo ʻi he ʻao ʻo e ʻOtuá.

(M. Russell Ballard, “The Atonement and the Value of One Soul,” Ensign pe Liahona, May 2004, 85)

Ko hono vahevahe ʻo e ongoongo lelei ʻo Sīsū Kalaisí

ʻOku fakataumuʻa ʻa e ʻekitivitī ko ʻení ke tokoni ki he kau akó ke toe vakaiʻi mo fakamatalaʻi fakanounou ʻenau aʻusia ʻi hono ako ʻo e faaʻi Kosipelí.

Ko ʻeni kuó ke fakalaulauloto ki he mahuʻinga ‘o e feilaulau fakalelei ‘a Sīsū Kalaisi, lau ʻa e lea ko ʻeni ʻa Palesiteni Russell M. Nelson.

ʻĪmisi
Official portrait of President Russell M. Nelson taken January 2018

ʻOku ʻuhinga ʻa e foʻi lea ongoongoleleí ki he “ongoongo fakafiefia.” Ko e ongoongo leleí ko e ʻEiki ia ko Sīsū Kalaisí mo ʻEne pōpoaki ʻo e fakamoʻuí. Naʻe fakatatau ʻe Sīsū ʻa e ongoongoleleí ki Hono misioná mo ʻEne ngāue ʻi he matelié.

(Russell M. Nelson, “Senior Missionaries and the Gospel,” Ensign pe Liahona, Nov. 2004, 81)

ʻE lava ke ʻi ai ha ngaahi sīpinga tatau ʻo e ngaahi posts naʻe fai ʻi he polokalama Gospel Living ʻa ia ʻe lava ke fakahaaʻi ki he kau akó ke tokoniʻi kinautolu ke nau kamata faʻu pē ʻe kinautolu haʻanau meʻa.

Ko e hā ha ongoongo lelei te ke fie vahevahe mo e niʻihi kehé fekauʻaki mo Sīsū Kalaisi mo Hono misiona fakalangí? Fakakaukauloto ʻoku kamata ʻe he Siasí ha kemipeini ʻi he mītia fakasōsialé ke fakamafola ʻa e ʻilo fekauʻaki mo e moʻui mo e ngaahi akonaki ʻa Sīsū Kalaisi naʻe lekooti ʻi he faaʻi Kosipelí. ʻOku kole ʻe he Siasí ha ngaahi posts ʻi he mītia fakasōsialé ki he kemipeiní.

Hiki ha kiʻi tohi (post) nounou ʻokú ne fakamatalaʻi hoʻo ongoongo lelei fekauʻaki mo Sīsū Kalaisí. Fakakaukau ki ha meʻa naʻá ke ako mei he Ngaahi Kosipelí (Mātiu, Maʻake, Luke, mo Sione) ʻoku makehe kiate koe pea kuó ne tokoniʻi koe ke ke ongoʻi ofi ange ai kia Sīsū Kalaisi. Hangē ko ʻení, te ke lava ʻo fili ha meʻa naʻe akoʻi ʻe Sīsū, ko ha mana naʻá Ne fai, ko ha talanoa fakatātā, ko ha talanoa ki he founga ʻo ʻEne fengāueʻaki mo e niʻihi kehé, ko ha ʻulungaanga naʻá Ne fakahaaʻi, pe ko ha konga ʻo ʻEne feilaulau fakaleleí, pekiá, mo e Toetuʻú. Kapau ʻokú ke ongoʻi fiemālie, mahalo te ke fie tuku hoʻo ongoongo leleí ʻi he mītia fakasōsialé pe vahevahe ia mo ha taha kehe. Fakakau e ngaahi fakaikiiki ko ʻení ʻi hoʻo tohí:

Faʻu ha ʻuluʻi tohi pe hingoa ki hoʻo tohí.
Fakamatalaʻi ange ʻa e founga ʻoku mahuʻingamālie ai kiate koe ʻa e ongoongo lelei ʻo e Fakamoʻuí mo tokoniʻi koe ke ke ongoʻi ofi ange kiate Iá.
Fakakau ha potufolofola pau mei he Ngaahi Kosipelí (Mātiu, Maʻake, Luke, pe Sione).
Fakakau ai hoʻo fakamoʻoní mo e founga ʻe lava ke ʻaonga ai ʻa e ongoongo lelei ko ʻení ki he niʻihi kehé.

ʻE lava ke ke fakaafeʻi ha kau ako loto vēkeveke ke vahevahe ʻenau posts mo e kalasí.