Fakataukei Fakatokāteliné: Luke 24:36–39
“ʻOku ʻIkai Kakano mo Hui ha Laumālie, ʻo Hangē Ko Ia ʻOku Mou ʻIló Ni ʻIate Aú”
ʻI hoʻo ako ʻa e Luke 24:1–9, 36–48, naʻá ke ako fekauʻaki mo e Toetuʻu ʻa e Fakamoʻuí. ʻI hono fakaʻaongaʻi ʻo e veesi fakataukei fakatokāteline ʻo e Luke 24:36–39, ʻe tokoni e lēsoni ko ʻení ke fakatupulaki hoʻo taukei ʻi he tokāteline ʻo e toetuʻú ʻaki hano ako maʻuloto ʻa e fakamoʻoni fakafolofola mo e kupuʻi lea mahuʻinga ʻo e folofolá, fakamatalaʻi e tokāteliné, mo hono fakaʻaongaʻi ʻo e ngaahi tefitoʻi moʻoni ʻo hono maʻu ʻo e ʻilo fakalaumālié ʻi ha tūkunga moʻoni ʻo e moʻuí.
Fakaʻaongaʻi fakapotopoto ʻo e taimí. ʻOku totonu ke nounou mo ʻaonga e ngaahi ʻekitivitī fakamanatu ʻo e fakataukei fakatokāteliné. Fakaʻaongaʻi lelei e taimí ʻi hoʻo tufa e ngaahi ʻekitivitī fakamanatú ke ʻoua naʻa nau fuoloa ange ʻi he taimi kuo vaheʻí.
Teuteu ʻa e tokotaha akó: Fakaafeʻi e kau akó ke nau fakakaukau ki he meʻa ne nau ako mo ongoʻi ʻi heʻenau ako e Toetuʻu ʻa e Fakamoʻuí ʻi he Luke 24:1–9, 36–48 .
Ngaahi ʻEkitivitī Ako ʻOku Ala Fakahokó
Ako maʻuloto pea fakamatalaʻi
Manatuʻi, ʻi he hili e mamahi ʻa e Fakamoʻuí ʻi Ketisemaní mo ʻEne pekia ʻi he kolosí, naʻe ʻave Hono sinó ʻo tuku ʻi ha fonualoto. Hili ha ʻaho ʻe tolu mei ai, naʻe toetuʻu ʻa Sīsū Kalaisi. Lau ʻa e potufolofola fakataukei fakatokāteline Luke 24:36–39 pea laineʻi ʻa e ngaahi foʻi lea pe kupuʻi lea mahuʻinga naʻe akoʻi ʻe he Fakamoʻuí ki Heʻene kau ākongá hili ʻEne Toetuʻú.
Fakakaukauloto ʻoku kole atu ke ke tali ʻa e fakamatala ko ʻení ki he konga “Ngaahi Fehuʻi mo e Tali” ʻi he makasini Ki Hono Fakamālohia ʻo e Toʻu Tupú . Fakakaukau ki he meʻa te ke lava ʻo vahevahe ʻi ha sētesi pē ʻe 2–3.
Kapau ʻoku ʻikai maheni e kau akó mo e konga ʻo e “Ngaahi Fehuʻí mo e Talí” ʻi he makasini Ki Hono Fakamālohia ʻo e Toʻu Tupú , fakakaukau ke vahevahe ha ngaahi sīpinga mei he ngaahi pulusinga kimuí ni maí.
-
Ko e hā ʻoku fuʻu makehe ai ʻa e Toetuʻu ʻa Sīsū Kalaisí?
ʻOange ha faingamālie ki he kau akó ke nau ako maʻuloto ʻa e fakamoʻoni fakafolofola ki he potufolofola fakataukei fakatokāteline ko e Luke 24:36–39 mo e kupuʻi lea mahuʻinga ʻoku ʻoatu fakataha mo iá. Ko ha sīpinga ʻeni ʻe taha ʻo e founga hono fakahoko ʻení.
Ke ako maʻuloto e fakamoʻoni fakafolofola mo e kupuʻi lea mahuʻinga ko ʻení, vahevahe ha peesi ʻi hoʻo tohinoa akó ki ha konga ʻe fā. Hiki ʻa e fakamoʻoni fakafolofolá pea mo ha taha ʻo e ngaahi kupuʻi leá (ʻo hangē ko ʻene hā atu ʻi laló) ʻi he konga takitaha. Fakakaukau ke tā ha fakatātā pe fakaʻilonga faingofua ʻoku fekauʻaki mo iá ke ne fakafofongaʻi ʻa e ngaahi konga takitaha ʻe fā ʻo e fakamoʻoni fakafolofolá mo e kupuʻi lea mahuʻingá. Akoako lau maʻuloto e ngaahi meʻá ni takitaha kae ʻoua kuó ke lava ʻo lau maʻuloto kotoa ia taʻe te ke sio ki ai.
Luke 24:36–39
He ʻoku ʻikai
kakano mo hui ha laumālie,
ʻo hangē ko ia ʻoku mou ʻiló ni ʻiate aú
Akoako hono fakaʻaongaʻí
Tokoni ke toe vakaiʻi ʻe he kau akó ʻa e ngaahi tefitoʻi moʻoni ʻo hono maʻu ʻo e ʻilo fakalaumālié ʻaki hono fakakakato ʻa e ʻekitivitī ʻi laló ʻi ha miniti nai ʻe 3–5. Fakakaukau ke kole ange ke nau lipooti pe naʻa nau lava ʻo hiki maʻuloto e ngaahi tefitoʻi moʻoni ʻe tolú, pea fakaafeʻi ʻa kinautolu ʻoku loto fiemālie ke vahevahe ʻa e founga kuo fakaʻaongaʻi, pe lava ke fakaʻaongaʻi ai ʻa e ngaahi tefitoʻi moʻoni ko ʻení, ʻi heʻenau moʻuí.
Toe vakaiʻi ʻa e palakalafi 5–12 ʻi he konga “Ko Hono Maʻu ʻo e ʻIlo Fakalaumālié” ʻo e Fakamatala ki he ʻElito ʻo e Fakataukei Fakatokāteliné (2022). Ko e founga ʻe taha ke fai ai ʻení ko hano vakaiʻi pe te ke lava ʻo hiki kotoa e ngaahi tefitoʻi moʻoni ʻe tolú mei hoʻo manatú. Hili iá, hiki ʻi hoʻo tohinoa akó ʻa e founga kuó ke fakaʻaongaʻi, pe lava ke fakaʻaongaʻi ai e ngaahi tefitoʻi moʻoni ko ʻení ʻi hoʻo moʻuí.
Akoako fakaʻaongaʻi he taimí ni ʻa e ngaahi tefitoʻi moʻoni ki hono maʻu ʻo e ʻilo fakalaumālié mo e tokāteline ʻoku akoʻi ʻi he Luke 24:36–39 ʻaki hono lau ʻa e tūkunga ko ʻení pea tali e ngaahi fehuʻi ʻoku muimui maí.
Fakakaukau ke fulihi e tūkunga ko ʻeni ke ʻaonga ki he kau ako.
Kuo loto-fiemālie ha taha ho ngaahi kaungāmeʻa ofi ko Siniuní, ke akoʻi ange e ngaahi lēsoni fakafaifekaú ʻi homou ʻapí. Naʻe toki hiki mai ʻa Siniuni mo hono fāmilí ki homou koló, pea naʻe ʻikai ke ne maʻu ha mahino pe ʻilo kimuʻa fekauʻaki mo Sīsū Kalaisi. ʻI hono akoʻi e palani ʻo e fakamoʻuí mo e fatongia ʻo Sīsū Kalaisí, ʻoku ngali taʻefiemālie ʻa Siniuni ka ʻoku ʻikai ke ne lea ʻaki ha meʻa. Kimui ange, hili e mavahe ʻa e ongo faifekaú, ʻokú ne vahevahe atu ʻoku ʻikai tui ia ki he foʻi fakakaukau ʻo e toetuʻú mo e moʻui hili ʻa e maté.
ʻOku fakataumuʻa e ngaahi fehuʻi ko ʻení ke fakaʻatā e kau akó ke nau akoako fakaʻaongaʻi ʻa e ngaahi tefitoʻi moʻoni ʻo hono maʻu ʻo e ʻilo fakalaumālié ʻiate kinautolu peé. Neongo pe ʻoku aleaʻi fakakalasi pe fakakulupu iiki e ngaahi fehuʻi ko ʻení, fakapapauʻi ke fakafanongo lelei ki he kau akó ke fakafuofuaʻi ʻenau malava ke fakaʻaongaʻi e ngaahi tefitoʻi moʻoni ko ʻení ʻiate kinautolu peé. Kapau ʻoku fie maʻu tokoni e kau akó, fakakaukau ke ueʻi kinautolu ʻaki ha ngaahi fehuʻi hangē ko ia ʻi lalo ʻi he ngaahi ʻuluʻitohi ʻo e tefitoʻi moʻoni takitaha ʻoku hiki atu ʻi laló.
-
Ko e hā te ke ala fai pe lea ʻaki ke tokoni ke mahino kia Siniuni hoʻo holi ke tokoniʻi iá?
-
Ko e hā ha ngaahi fehuʻi te ke ala fai ke mahino lelei ange ai e meʻa ʻoku tui ki ai ʻa Siniuní pe ko e feituʻu ʻoku haʻu mei aí?
-
Te ke fakaʻaongaʻi fēfē ʻa e ngaahi tefitoʻi moʻoni takitaha ʻe tolu ʻo hono maʻu ʻo e ʻilo fakalaumālié ke tokoni kia Siniuní?
Ngāue ʻi he tuí
-
Te ke ngāue fēfē ʻi he tuí ʻi he tūkunga ko ʻení?
-
Ko e hā te ke lava ʻo vahevahe mo Siniuni fekauʻaki mo e ngāue ʻi he tuí? Ko e hā ʻoku hoko ai ʻeni ko ha sitepu mahuʻinga ʻi hono kumi e tali ki heʻene ngaahi fehuʻí?
Vakaiʻi mo sivisiviʻi e ngaahi fakakaukaú mo e ngaahi fehuʻí, ʻaki ha fakakaukau ʻoku taʻengatá
-
Ko e hā ha ngaahi fehuʻi te ke ala fai pe ngaahi moʻoni taʻengata te ke lava ʻo fakamoʻoni ki ai kia Siniuni ʻi hoʻo feinga ke tokoniʻi ia ke vakai ki he meʻa ʻoku hohaʻa ki aí ʻi ha fakakaukau ʻoku taʻengatá?
-
ʻE tokoni fēfē nai ʻeni kia Siniuni ke kamata mahino ʻeni mei ha fakakaukau ʻoku taʻengatá?
-
Ko e hā kuó ne tokoniʻi koe ke mahino ʻa e Toetuʻu ʻa e Fakamoʻuí mo hono fatongia ʻi he palani ʻo e fakamoʻuí?
Fekumi ke maʻu ha mahino lahi ange ʻo fakafou ʻi he ngaahi maʻuʻanga tokoni kuo fokotuʻu fakalangí.
-
Ko e hā ha ngaahi potufolofola pau mei he Luke 24 te ke ala fakaʻaongaʻi ʻi he taimi te ke tali ai kia Siniuní? Ko e hā ha ngaahi maʻuʻanga tokoni kehe te ke lava ʻo toe vakaiʻi kimuʻa peá ke toki talí? (ʻE lava ke tokoni ha niʻihi ʻo e ngaahi naunau naʻá ke ako ʻi he lēsoni kimuʻá ʻi he Luke 24.)
-
Ko e fē mo ha toe maʻuʻanga tokoni te ke fakahaaʻi kia Siniuni kapau naʻá ne toe fie ako lahi ange ʻiate ia pē?
Hili hono maʻu ʻe he kau akó ha taimi ke fakaʻaongaʻi e ngaahi tefitoʻi moʻoni ʻo hono maʻu ʻo e ʻilo fakalaumālié, fakaafeʻi kinautolu ke nau fakakaukau ki heʻenau ongo ki he tuʻunga ʻo e meʻa ne nau fakahokó. Fakakaukau ke kole ki he kau akó ke vahevahe ʻenau ngaahi aʻusia ʻi hono fakaʻaongaʻi e ngaahi tefitoʻi moʻoni ko ʻení ʻi heʻenau moʻuí. Fakaafeʻi kinautolu ke vahevahe ʻa e ʻuhinga ʻo e ngaahi tefitoʻi moʻoni ko ʻení kiate kinautolú.
Toe Vakaiʻi ʻo e Fakataukei Fakatokāteliné
Fakaʻaongaʻi ʻa e ʻekitivitī fakamanatu ko ʻení ʻi ha lēsoni ʻe akoʻi ʻi he kahaʻu ofi maí.
Fakaʻaliʻali e ngaahi konga ko ʻeni ʻe fā ʻo e fakamoʻoni fakafolofolá mo e kupuʻi lea mahuʻinga ki he Luke 24:36–39 ʻo hangē ko ʻene hā atú.
kakano mo hui ha laumālie,
He ʻoku ʻikai
Luke 24:36–39
ʻo hangē ko ia ʻoku mou ʻiló ni ʻiate aú
Fakaafeʻi e kau akó ke nau hiki e fakamoʻoni fakafolofola mo e kupuʻi lea mahuʻinga ko ʻení ʻi he hokohoko totonú ʻi heʻenau tohinoa akó.