Mga Gawa 3

Ang Pagpapagaling sa Lalaking Lumpo

Peter reaches out his hand to a crippled man and commands him to rise and walk.

Isang lalaking hindi nakakapaglakad mula pa sa pagkapanganak ang dinadala sa templo sa Jerusalem araw-araw upang manghingi ng limos. Nakita niya roon sina Pedro at Juan, na nagbigay sa kanya ng mas magandang kaloob kaysa sa limos na hinihingi niya. Gamit ang awtoridad ng priesthood at sa pangalan ni Jesucristo, pinagaling ni Pedro ang lalaki. Ang karanasang iyon ay nagbigay kay Pedro at sa iba pang Apostol ng maraming pagkakataon na magpatotoo tungkol kay Jesucristo. Layunin ng lesson na ito na tulungan kang mapalakas ang iyong pananampalataya na matutulungan ka ng Ama sa Langit at ni Jesucristo na madaig ang mga hamong kinakaharap mo.

Pag-aangkop sa mga lesson upang matugunan ang mga pangangailangan ng mga estudyante. Kasama ng pagtuturo sa pamamagitan ng Espiritu ang masigasig at maingat na paghahanda ng lesson, na kinabibilangan ng paggamit ng ibinigay na kurikulum. Gayunpaman, ang pagtuturo sa pamamagitan ng Espiritu ay nangangailangan din ng panalangin, pag-iisip, at pag-aangkop ng mga lesson upang matiyak na matutugunan ng Espiritu ang mga indibiduwal na pangangailangan ng mga estudyante at matutulungan ang mga estudyante na maipamuhay ang mga alituntunin sa kanilang mga indibiduwal na sitwasyon. Habang naghahanda kang magturo, humingi ng inspirasyon mula sa Espiritu Santo hinggil sa kung paano iaangkop ang lesson upang matugunan ang mga pangangailangan ng mga estudyante.

Paghahanda ng estudyante: Sabihin sa mga estudyante na pagnilayan ang isang hamon o paghihirap na personal nilang kinakaharap kung saan nanaisin nilang humingi ng kapanatagan o lakas sa Ama sa Langit at kay Jesucristo upang madaig ito. Sabihin sa kanila na pag-aralan ang Mga Gawa 3:1–8 habang iniisip ang hamon o paghihirap na ito at maghanap ng mga katotohanan na makatutulong sa kanila.

Mga Posibleng Aktibidad sa Pag-aaral

Pagtanggap ng nakapagpapagaling na kapangyarihan ng Diyos

Maraming iba’t ibang paraan para ituro ang nilalaman ng Mga Gawa 3 . Ang mga sumusunod na aktibidad sa pag-aaral ay isang paraan para maituro ang kabanatang ito. Tingnan ang bahaging “Mga Karagdagang Aktibidad sa Pag-aaral” sa katapusan ng lesson para sa iba pang magagamit na aktibidad sa pag-aaral.

Isulat ang mga salitang Mga Hamon at Paghihirap sa pisara. Maaari mo ring isulat ang mga sagot ng mga estudyante sa susunod na tanong.

• Ano ang ilang pisikal, espirituwal, o emosyonal na hamon o paghihirap na nararanasan ng mga tao sa buhay?

Tiyaking may sapat na espasyo sa pagitan ng mga estudyante upang magawa nila ang sumusunod na aktibidad sa kanilang study journal nang hindi nakikita ng iba ang isinusulat nila. Kung hindi ito posible, maaari mong sabihin sa mga estudyante na mag-isip na lang ng isang hamon o paghihirap na kinakaharap nila, at pagkatapos ay isulat ang kanilang mga sagot sa tatlong kasunod na tanong.

Pagnilayan ang isang hamon o paghihirap na personal mong kinakaharap kung saan nanaisin mong humingi ng kapanatagan o lakas sa Ama sa Langit at kay Jesucristo upang madaig ito. Isulat ito sa iyong study journal, at isama rin ang mga sagot mo sa mga sumusunod na tanong:

• Ano ang mga ginawa mo upang makatanggap ng tulong para sa hamon o paghihirap na ito?

• Ano ang alam mo na tungkol sa Ama sa Langit at kay Jesucristo na nagbibigay sa iyo ng tiwala na tutulungan ka Nila?

• Ano ang mga tanong o alalahanin mo tungkol sa pagdaig sa hamon o paghihirap na ito?

Pinagaling nina Pedro at Juan ang isang lalaking lumpo

Sa lesson na ito, magkakaroon ka ng pagkakataong matutuhan ang ilang katotohanan ng ebanghelyo mula sa salaysay sa Mga Gawa 3 tungkol sa pagpapagaling nina Pedro at Juan sa lalaking lumpo. Sa iyong pag-aaral, bigyang-pansin ang mga espirituwal na pahiwatig na natatanggap mo. Hangaring palakasin ang iyong pananampalataya na matutulungan ka ni Jesucristo sa mga hamong kinakaharap mo sa mortalidad.

Basahin ang Mga Gawa 3:1–3 , at alamin ang ilang detalye tungkol sa lalaking ito, na mahigit 40 taong gulang na (tingnan sa Mga Gawa 4:22). Maaaring makatulong na malaman na ang “limos” na binanggit sa mga talata 2–3 ay mga bagay na ibinibigay ng mga tao sa mahihirap.

• Ano ang ilang salita na maaari mong gamitin upang ilarawan ang lalaking ito at ang kanyang sitwasyon? Bakit?

• Ano kaya ang ilang karaniwang reaksyon ng mga tao sa isang tao na nasa sitwasyon ng lalaking ito?

Basahin ang Mga Gawa 3:4–8 , at alamin ang mga katotohanang matututuhan mo tungkol sa pagdaig sa ating mga hamon o paghihirap mula sa salaysay na ito.

• Ano ang pinakanapansin mo sa kuwentong ito?

• Ano ang itinuro o ipinadama sa iyo ng karanasang ito tungkol sa Ama sa Langit at kay Jesucristo?

Sabihin sa mga estudyante na magbahagi ng iba’t ibang katotohanan na natuklasan nila mula sa salaysay na ito. Sabihin sa kanila na ibahagi kung paano nila nakita ang katotohanang iyon sa salaysay sa banal na kasulatan at kung bakit sa palagay nila ay mahalaga ang katotohanang iyon.

Itinuro ni Pedro sa mga nakasaksi sa himala na ginawa ito sa pamamagitan ng pananampalataya sa pangalan ni Jesucristo (tingnan sa Mga Gawa 3:16). Ang isang katotohanan na matututuhan natin mula sa salaysay na ito ay sa pamamagitan ng pananampalataya kay Jesucristo, mapapagaling tayo.

• Ano ang maaari mong ibahagi mula sa mga talatang ito na makatutulong sa isang tao na kasalukuyang nakararanas ng isa sa mga pisikal, espirituwal, o emosyonal na hamon o paghihirap na natukoy mo kanina sa lesson?

• Ano ang magagawa natin upang matanggap ang kapangyarihan ng Ama sa Langit at ng Tagapagligtas na tutulong sa atin sa mga hamong ito?

• Ano ang pinakanapansin mo sa mga turo ni Elder Andersen?

Para sa sumusunod na tanong, maaari kang magbahagi ng isang personal na halimbawa. Gayunpaman, tulungan ang sumagot na mga estudyante na maunawaan na hindi sila dapat magbahagi sa klase ng isang bagay na napakapersonal.

• Anong mga karanasan ang mayroon ka o alam mo kung saan nakapagbigay ang Tagapagligtas ng lakas o pagpapagaling?

• Ano ang natutuhan o nadama mo tungkol kay Jesucristo ngayon na gusto mong maalala?

• Ano ang nadama mo na kailangan mong gawin dahil sa napag-aralan mo ngayon?

Komentaryo at Pinagmulang Impormasyon

Bakit may mga pagkakataon na hindi natin natatanggap ang pagpapagaling ng Tagapagligtas sa panahon at paraang gusto natin?

Itinuro ni Pangulong Russell M. Nelson:

Official portrait of President Russell M. Nelson taken January 2018

Alam ko na paminsan-minsan, parang hindi sinasagot ang ilan sa pinakataimtim nating mga dalangin. Nagtataka tayo, “Bakit?” Naramdaman ko iyan! Naramdaman ko ang takot at lungkot sa gayong mga sandali. Pero alam ko rin na hinding-hindi binabalewala ang ating mga dalangin. Laging pinahahalagahan ang ating pananampalataya. Alam ko na ang pag-unawa ng isang napakarunong na Ama sa Langit ay mas malawak kaysa atin. Alam man natin ang ating mga problema at sakit sa buhay, alam naman Niya ang imortal nating pag-unlad at potensyal. Kung ipagdarasal nating malaman ang Kanyang kalooban at magpapasakop dito [na] taglay ang tiyaga at tapang, magaganap ang pagpapagaling ng langit sa sarili Niyang paraan at panahon.

(Russell M. Nelson, “Jesucristo—ang Dalubhasang Manggagamot,” Ensign o Liahona, Nob. 2005, 86)

Itinuro ni Elder David A. Bednar ng Korum ng Labindalawang Apostol:

Elder David A. Bednar, Quorum of the Twelve Apostles official portrait. 2020.

Ang kabutihan at pananampalataya ay tunay na kasangkapan sa pagpapagaling ng maysakit, bingi, at lumpo—kung ang gayong paggaling ay magsasakatuparan ng mga layunin ng Diyos at naaayon sa Kanyang kalooban. Sa gayon, kahit malakas ang ating pananampalataya, maraming balakid ang hindi maaalis. At hindi lahat ng maysakit at may karamdaman ay gagaling. Kung lahat ng oposisyon ay lilimitahan, kung lahat ng hirap ay aalisin, ang pangunahing mga layunin ng plano ng Ama ay mabibigo.

(David A. Bednar, Pagtanggap sa Kalooban at Takdang Panahon ng Panginoon Ensign o Liahona, Ago. 2016, 34)

Paano ko matatamo ang nagpapagaling na kapangyarihan ng Tagapagligtas kapag nakararanas ako ng mga espirituwal na paghihirap?

Itinuro ni Pangulong Russell M. Nelson:

Official portrait of President Russell M. Nelson taken January 2018

Dumarating ang mga pasakit mula sa espirituwal at pisikal na mga dahilan. Naalala ng Nakababatang Alma na napakasakit ng kanyang kasalanan kaya ninais niyang siya’y “mawasak kapwa kaluluwa at katawan, upang hindi [siya] madalang tumayo sa harapan ng … Diyos, upang hatulan sa [kanyang] mga gawa” [ Alma 36:15 ]. Sa gayong mga pagkakataon, paano Niya tayo mapapagaling?

Mas ganap tayong makapagsisisi! Mas ganap tayong makapagbabalik-loob! Sa gayo’y mas lubos tayong mababasbasan ng nagpapagaling na kamay ng “Anak ng Kabutihan.”

… Ang pananampalataya, pagsisisi, binyag, patotoo, at pananatili sa pagbabalik-loob ay humahantong sa kapangyarihang magpagaling ng Panginoon.

(Russell M. Nelson, “Jesucristo—ang Dalubhasang Manggagamot,” Ensign o Liahona, Nob. 2005, 86)

Mga Karagdagang Aktibidad sa Pag-aaral

Pagbubuod ng mga turo ng Mga Gawa 3:1–8

Pagkatapos basahin ang Mga Gawa 3:1–8 , ipakita ang mga sumusunod na larawan, at sabihin sa mga estudyante na magkuwento tungkol sa mga larawang ito sa sarili nilang salita. Makatutulong ito para maalala ng mga estudyante ang salaysay.

(1)

Men carry a cripple since birth and set him on the steps.

(2)

Peter and John healing a man sitting on steps.

(3)

Peter reaches out his hand to a crippled man and commands him to rise and walk.

(4)

A man crippled since birth is healed by Peter and John, and he thanks them with an embrace.

Ang epekto ng himalang ito sa iba

Tulungan ang mga estudyante na maunawaan na ang pagpapagaling na naganap sa templo noong araw na iyon ay nagkaroon ng matinding epekto sa maraming tao. Pag-aralan ang mga sumusunod na talata, at alamin kung paano nakaapekto ang himalang ito sa mga taong nakalista sa ibaba.

Maaari mong hatiin ang mga estudyante sa tatlong grupo at mag-assign sa bawat grupo ng isa sa mga sumusunod na set ng mga talata na pag-aaralan (maaaring i-assign sa isang grupo ang unang dalawang scripture passage).

Mga Gawa 3:8 —Ang lalaking pinagaling Mga Gawa 3:9–13, 19 ; 4:4 —Ang mga tao sa templo Mga Gawa 4:13–18 —Ang mga pinunong Judio

Pagkatapos mag-aral ng mga estudyante, ipatalakay ang natutuhan nila. Maaari mong itanong ang tulad ng mga sumusunod:

Ano ang napansin ninyo tungkol sa kung paano nakaapekto ang himalang ito sa iba’t ibang grupo ng mga tao?

Sa inyong palagay, bakit magkakaiba ang epekto nito sa bawat tao?

Kung isa kayo sa mga taong nasa templo, paano maaaring mabago ang pananaw ninyo tungkol kina Pedro at Juan pagkatapos ninyong masaksihan ang himalang ito?

Mga Gawa 3:19–21 . Ang pagpapanumbalik ng lahat ng mga bagay

Ipaliwanag na pagkatapos pagalingin nina Pedro at Juan ang lalaking lumpo, mabilis na kumalat ang balita tungkol sa himala. Maraming tao ang sama-samang nagtipon upang makinig kina Pedro at Juan, kabilang na ang ilan sa mga taong hindi tumanggap noon kay Jesucristo.

Ipabasa nang malakas sa isang estudyante ang Mga Gawa 3:19–21 . Sabihin sa klase na tahimik na sumabay sa pagbabasa, at alamin kung ano ang ipinagagawa ni Apostol Pedro sa mga taong nagtipon doon.

Ipaliwanag na ayon sa Mga Gawa 3:21 , ipinropesiya ni Pedro na mananatili sa langit si Jesucristo “hanggang sa mga panahon ng pagpapanumbalik ng lahat ng mga bagay.” Bahagi ng “pagpapanumbalik ng lahat ng mga bagay” ang Pagpapanumbalik ng ebanghelyo sa mga huling araw.

Maaari mong talakayin ang mga tanong na tulad ng mga sumusunod:

• Ayon sa talata 21 , bukod kay Pedro, sino pa ang nagpropesiya na magkakaroon ng Pagpapanumbalik ng ebanghelyo sa mga huling araw?

• Anong mahahalagang pangyayari ang naganap na, na nauugnay sa katuparan ng propesiyang ito?

Ibahagi ang iyong patotoo na nagpropesiya ang mga propeta ng Panginoon sa maraming iba’t ibang panahon tungkol sa panahon natin ngayon at inasam nila ang Pagpapanumbalik ng ebanghelyo at ang Ikalawang Pagparito ng Panginoon.