Gidakop ug gipriso sila si Pedro ug Juan tungod sa pag-ayo ug pagpamatuod sa ngalan ni Jesukristo. Sila sa wala madugay gibuhian ug giingnan nga dili na mosulti o motudlo sa Iyang ngalan. Apan si Pedro ug Juan mipadayon sa pagpamatuod kang Jesukristo, ug sila gidakop ug gipriso pag-usab. Usa ka anghel ang mipagawas kanila gikan sa prisohan ug gisultihan sila nga mobalik ug mopadayon sa pagsangyaw kang Kristo, diin ilang gibuhat. Ang mga lider sa Judio mipaaresto nila og balik ug gibunalan sila. Ang mga lider misugo kanila nga moundang sa pagsangyaw kang Kristo, apan si Pedro ug Juan mitubag nga sila kinahanglan motuman sa Dios kaysa mga tawo. Si Pedro ug Juan nagmaya nga sila nag-antos sa paglutos alang kang Jesukristo. Sa inyong pagtuon karon, paghunahuna mahitungod kon unsaon ninyo pagpalambo sa inyong tinguha nga mosunod sa Dios labaw sa tanan.
Hatagi og gibug-aton ang ehemplo ni Jesukristo. Bisan ang mga hitabo sa mga kasulatan wala direktang nagpasabot sa Manluluwas, mahimo gihapon ninyong itudlo ang inyong mga estudyante ngadto Kaniya pinaagi sa pagtabang kanila nga makita giunsa Niya paghatag og ehemplo sa baroganan nga gitudlo.
Pagpangandam sa estudyante: Awhaga ang mga estudyante aron moabot nga andam sa pagpaambit og mga sitwasyon diin lagmit mahagiton ang pagtuman sa Dios tungod sa mga pagpamugos gikan sa uban.
Posible nga mga Kalihokan sa Pagkat-on
Pagbarog sa unsay tinuod
Ipakita ang mosunod nga mga pangutana. Awhaga ang mga estudyante sa pagpamalandong sa ilang pagpangandam sa klase ug dayon mag-uban sa paghisgot sa mga pangutana. Mahimong ilista ang mga tubag sa mga estudyante sa unang pangutana nga anaa sa pisara. Mahimong makatabang ang pagdangop niini nga mga tubag unya dapit sa leksiyon.
Unsa ang pipila sa mga sitwasyon diin lagmit makapahagit kaninyo o sa uban ang pagtuman sa Dios tungod sa mga pagpamugos gikan sa uban?
Unsa may nakapalisod niining mga sitwasyon?
Si Presidente Thomas S. Monson (1927–2018) miingon:
Imahe
Official portrait of President Thomas S. Monson, 2008.
Sa atong pagpakabuhi matag adlaw, dili kapugngan nga ang atong [hugot nga] pagtuo hagiton. Tingali usahay makita nato ang atong kaugalingon nga gilibotan sa uban ug sa gihapon nagbarog nga gamay ra o gani nagbarog nga nag-inusara kabahin sa unsay mahimong dawaton ug unsay dili. Aduna ba kitay moral nga kaisog sa pagbarog nga lig-on alang sa atong mga gituohan, bisan kon ang pagbuhat sa ingon nagkinahanglan nga magbarog kita nga mag-inusara?
(Thomas S. Monson, “Magmaisogon sa Pagbarog nga Mang-inusara,” Liahona, Nob. 2011, 60)
Tubaga ang mosunod nga mga pangutana diha sa inyong journal sa pagtuon:
Unsaon ninyo pagsukod ang inyong pagkaandam motuman sa Dios kaysa magpadala sa mga pagpamugos gikan sa uban?
Unsa ang pipila sa umaabot nga mga sitwasyon diin kamo mahimong mopili sa pagtuman sa Dios kaysa uban?
Sa inyong pagtuon niini nga leksiyon, pangitaa ang mga kamatuoran ug mga pananglitan nga makatabang kaninyo nga makabati og nagtubo nga tinguha sa pagtuman sa Dios labaw sa tanan.
Gidakop sila si Pedro ug Juan tungod sa pag-ayo ug pagsangyaw pinaagi sa ngalan ni Jesukristo
Nag-atubang sila si Pedro ug Juan sa mga sitwasyon diin sila kinahanglan nga mopili taliwala sa pagtuman sa Dios o pagpadala sa pagpamugos gikan sa uban. Human maayo ang tawo nga bakol didto sa templo ug sa pagsangyaw sa ngalan ni Jesukristo, si Pedro ug Juan gidakop, gipriso, ug gidukitdukit sa mga lider sa Judio (tan-awa sa Mga Buhat 3:1–11 ; 4:1–7).
Basaha ang Mga Buhat 4:8–21 , nga mangita kon giunsa ni Pedro ug Juan pagtubag niini nga sitwasyon. Ikonsiderar ang pagmarka sa mga pulong o hugpong sa mga pulong niini nga mga bersikulo nga pamati ninyo importante o makadasig kaninyo sa pagpili sa pagtuman sa Dios labaw sa tanan.
Unsa nga mga pulong o mga hugpong sa mga pulong ang nagpatigbabaw diha kaninyo niini nga mga bersikulo? Ngano man?
Ikondiderar unsa nga kalihokan ang labing makatabang sa mga estudyante nga makat-on sa mga kamatuoran sa ebanghelyo nga gitudlo sa Mga Buhat 5:12–32 . Mahimong tahasan ang mga estudyante sa pagbasa sa mga pulong sa lainlaing mga tawo niining giasoy nga kasulatan. Ang mga estudyante mahimong tahasan isip usa ka tigsaysay, ang anghel, ang sundalo, si Pedro, ug ang high priest.
Basaha ang Mga Buhat 5:12–32 ug ipadayon ang inyong pagtuon niini nga asoy. Mahimo usab ninyong buhaton ang pagmarka sa bisan unsang doktrina, mga baroganan, o mga hugpong sa mga pulong nga pamati ninyo importante kaninyo. O mahimo kamong motan-aw sa “Si Pedro ug si Juan Padayon nga Nagsangyaw sa Ebanghelyo” hangtod sa time code nga 3:51. Basaha ang Mga Buhat 5:12–32 ug padayon sa pagtuon niini nga asoy. Mahimo usab ninyong buhaton ang pagmarka sa bisan unsang doktrina, mga baroganan, o mga hugpong sa mga pulong nga pamati ninyo importante kaninyo.
Unsa man ang inyong nakit-an?
Unsa nga mga kamatuoran ang inyong nakat-onan gikan niini nga asoy?
Dasiga ang mga estudyante sa pag-ila sa mga baroganan sa ilang kaugalingon nga pulong ug isulat kini sa pisara.
Usa sa mga kamatuoran nga atong makat-onan gikan niini nga asoy mao nga kon kita mopili sa pagtuman sa Dios kaysa mahadlok sa uban, nan Siya maanaa kanato.
Paghunahuna mahitungod sa mga sitwasyon nga inyong nabantayan sa sinugdanan niining leksiyon diin lagmit makapahagit sa pagtuman sa Dios tungod sa pagpamugos gikan sa uban.
Unsa ang pipila sa mga panalangin ang atong madawat pinaagi sa pagtuman sa Dios kaysa mahadlok sa uban?
Unsa ang inyong nahibaloan mahitungod sa Dios nga naghatag ninyo og kompyansa aron mosunod Kaniya—bisan kon kamo gipugos sa uban nga dili motuman?
Kon ang mga estudyante nagkinahanglan og tabang sa mosunod nga mga pangutana, pagpaambit og mga ehemplo gikan sa kinabuhi sa Manluluwas nga anaa sa “Komentaryo ug Background nga Impormasyon” nga bahin sama sa girekomenda sa tip sa magtutudlo. Lain pang mga ehemplo anaa sa dugang nga kalihokan sa pagkat-on nga may ulohan nga “Makadasig nga mga sugilanon.”
Kanus-a ka o ang uban nakakita sa kaalam sa pagtuman sa Dios kaysa mahadlok sa uban? (Mahimo usab ninyong ilhon ang mga ehemplo gikan sa kinabuhi sa Manluluwas.)
Usa ka moderno nga ehemplo
Si Elder Thierry K. Mutombo sa Seventy mipaambit og usa ka ehemplo sa usa ka pamilya nga mipili sa pagtuman sa Dios kaysa uban. Aron maminaw niini nga asoy, tan-awa ang “Kamo Mahimong Gawasnon,” anaa sa ChurchofJesusChrist.org, gikan sa time code 6:43 hangtod 8:51.
Unsa ang nakapadani ninyo pag-ayo mahitungod kon giunsa niini nga pamilya pagtubag ang ilang mga hagit?
Ngano kaha nga mas importante ang hugot nga pagtuo niini nga pamilya kang Jesukristo niini nga sitwasyon?
Si Pedro ug si Juan gibuhian
Ang mga lider sa Judio naghisgot unsa ang angay buhaton kang Pedro ug Juan. Usa ka tinahod kaayo nga Judio nga lider nga ginganlan og Gamaliel midasig nila aron tugotan si Pedro ug Juan nga molakaw tungod kay siya nakasabot nga kon si Pedro ug Juan tinuod nga nagbuhat sa buhat sa Dios, ang mga lider nga Judio dili makapaundang niini (tan-awa sa Mga Buhat 5:29–39).
Basaha ang Mga Buhat 5:40–42 , ug ikonsiderar ang pagmarka sa mga pulong o mga hugpong sa mga pulong nga naghulagway unsa ang gibati ni Pedro ug Juan human masinati unsa ang ilang gibuhat.
Unsa ang inyong nakat-onan karon nga nakapadasig ninyo sa pagtuman sa Langitnong Amahan kaysa sa mga tawo?
Komentaryo ug Background nga Impormasyon
Unsa kaha kon mobati ko nga wala nahiangay sa grupo tungod kay mipili ako nga motuman sa Langitnong Amahan?
Si Elder Richard G. Scott (1928–2015) sa Korum sa Napulog Duha ka Apostoles mitudlo:
Imahe
Final official portrait of Elder Richard G. Scott of the Quorum of the Twelve Apostles, 2004. Passed away 22 September 2015.
May panahon nga ikaw mobati og kamingaw ug wala masabti—Ako mibati —tungod kay wala ako mahiangay sa kadaghanan. Pagmapasalamaton nga ang imong matarong nga kinabuhi nag-umol kanimo aron dili ka mahiangay diin dili ka nahisakop. Kini usa lamang ka lumalabay nga panahon sa personal nga pagsulay ug paglambo. Kini mahulipan sa igong panahon kauban ang mga tinuod nga higala ug mas dako nga kalipay.
(Richard G. Scott, “The Power of Righteousness,” Ensign, Nob 1998, 68)
Unsaon nako pagdepensa ang akong mga pagtuo?
Si Elder Jeffrey R. Holland sa Korum sa Napulog Duha ka Apostoles mipasabot:
Imahe
Official Portrait of Elder Jeffrey R. Holland. Photographed January 2018.
Pagmalig-on. Pagpuyo nga matinud-anon sa ebanghelyo bisan og ang uban sa inyong palibot dili matinud-anon. Panalipdi ang inyong mga tinuohan uban sa maayong pamatasan ug kamanggiloy-on, panalipdi kini.
(Jeffrey R. Holland, “Ang Bili—ug mga Panalangin—sa Pagkadisipulo,” Liahona, Mayo 2014, 9)
Giunsa sa Manluluwas pagpakita nga Siya mituman sa Langitnong Amahan labaw sa tanan?
Ang mosunod nga mga video sa Biblia naghulagway sa tinguha sa Manluluwas nga moalagad sa Dios kaysa mosunod sa mga ideya sa mga tawo.
Dugang nga mga Kalihokan sa Pagkat-on
Pagkahimong sama sa Manluluwas pinaagi sa pagsunod sa balaod sa pagpahinungod
Sa Mga Buhat 4:31–5:11 , nakat-onan nato nga ang mga Santos nianang panahona nagpuyo sa balaod sa pagpahinungod. Awhaga ang mga estudyante sa pagtuon sa “ Pagpahinungod, Balaod sa Pagpahinungod ” diha sa Giya sa mga Kasulatan (scriptures.ChurchofJesusChrist.org) o sa Mga Hilisgotan sa Kasaysayan sa Simbahan nga artikulo “Pagpahinungod ug Pagkatinugyanan” (ChurchofJesusChrist.org/study/history/topics) aron mas masabtan unsa ang balaod sa pagpahinungod. Mahimo dayon nilang matandi kini nga mga pagpasabot sa mga asoy sa Mga Buhat 2:41–47 ; Mga Buhat 4:31–37 ; ug Mga Buhat 5:1–11 . Mahimo usab nilang irebyo ang Moises 7:18 ug 4Nephi 1:1–18 . Awhaga ang mga estudyante sa pagkonsiderar unsaon nga ang pagpuyo niini nga balaod makatabang kanato aron mahimong sama sa Manluluwas ug mapakita ang Iyang gugma ngadto sa uban.
Pagkamatinuoron ug paghupot sa atong mga pakigsaad
Ang mga estudyante mahimong makabenepisyo gikan sa pagtuon sa asoy ni Ananias ug Safira sa Mga Buhat 5:1–11 , diin naghulagway sa importansiya sa pagkamatinuoron ug paghupot sa atong mga pakigsaad sa Dios. Ang mga miyembro sa Simbahan niining panahona nagpuyo sa balaod sa pagpahinungod (tan-awa sa nag-una nga kalihokan).
Samtang wala nato masabti nganong ang mga sangpotanan grabe kaayo niini nga kaso, kita nasayod sa seryoso nga kahimtang sa paglapas sa mga pakigsaad sa Dios (tan-awa sa Mga Taga Roma 6:16,23 ; Doktrina ug Mga Pakigsaad 78:11–12). Ang mga estudyante mahimong magtuon sa pipila o tanang mga pakigpulong ni Elder Ronald A. Rasband sa Korum sa Napulog Duha ka Apostoles nga giulohan og “Baruganang Atong Mga Saad ug Mga Pakigsaad” (Liahona, Nob. 2019, 53–56). Ikonsiderar ang pagpangutana nila og mga pangutana sama niini: “Sa unsang paagi nga ang pagkamatinuoron ug paghupot sa atong mga pakigsaad makatabang kanato nga mahimong sama sa Dios?” ug “Unsa ang kalahian nga mahimo niini sa mga pamilya ug sa mga komunidad kon atong huptan ang atong mga pakigsaad?”
Pagkahadlok sa Dios labaw sa tawo
Ang mga estudyante mahimong makabenepisyo pinaagi sa pagtandi sa ehemplo sa karaang Apostoles diha sa Mga Buhat 4:8–12, 18–21 ug 5:17–32 sa istorya ni Propeta Joseph Smith nga nagpadala sa mga tinguha ni Martin Harris aron mapakita ang 116-ka panid nga manuskrito sa Basahon ni Mormon ngadto sa uban. Mahimong tun-an sa mga estudyante ang Doktrina ug Mga Pakigsaad 3:1–11 aron mabasa ang mga tambag ug mga pasidaan sa Ginoo, lakip na ang Iyang kaluoy diha sa bersikulo10 . Kini nga asoy mahimong makatabang sa mga estudyante nga makasabot nga bisan kon sila masayop, ang Ginoo motabang, mosuporta, ug mopasaylo kanila kon sila andam maghinulsol.
Makadasig nga mga sugilanon
Awhaga ang mga estudyante sa paghimo og lista sa mga sugilanon nga makadasig sa mga tawo sa pagtuman sa Dios bisan unsa pa ang mga kahimtang. Mahimo nilang malakip ang sugilanon gikan niini nga leksiyon, mga kasinatian gikan sa ilang kaugalingong kinabuhi, o mga asoy gikan sa mga kasulatan. Ang mosunod nga mga kapanguhaan mahimong makatabang:
Ang Manluluwas ug ang babaye nga gidakop tungod sa pagpanapaw (tan-awa sa Juan 8:1–11)
Hatagi ang mga estudyante og pipila ka minuto sa pagpaambit sa ilang lista ngadto sa usag usa o uban sa klase. Ikonsiderar ang pagpaambit og personal nga mga ehemplo nga makadasig usab kanila.
