Pagrebyo sa Doktrinal nga Kahanas 12

Pangitaa ug Markahi: 1 Mga Taga-Corinto 6:19–20 hangtod sa Pinadayag 20:12

Ang usa sa mga katuyoan sa doktrinal nga kahanas mao ang pagtabang kaninyo sa pagpangita ug pagmarka sa mga pakisayran sa kasulatan ug mahinungdanong hugpong sa mga pulong sa kasulatan diha sa mga tudling sa kasulatan sa doktrinal nga kahanas. Kini nga leksiyon maghatag kaninyo og mga kahigayonan sa pagpangita ug pagmarka sa 13 ka mga tudling sa kasulatan sa doktrinal nga kahanas nga makita sa katungang bahin sa Bag-ong Tugon.

Pagmarka sa mga tudling sa doktrinal nga kahanas. Ang pagmarka sa mga tudling sa doktrinal nga kahanas makatabang sa mga estudyante nga mas dali nga mahinumdom ug makita kini nga mga tudling. Awhaga ang mga estudyante sa pagkonsiderar nga markahan ang mga tudling sa kasulatan sa paagi nga lahi gikan sa ilang pagmarka sa uban. Ang mga estudyante nga migamit sa Gospel Library nga app makahimo usab og tag alang niini nga mga tudling.

Posible nga mga Kalihokan sa Pagkat-on

Ang usa ka tudling sa doktrinal nga kahanas nga leksiyon lagmit nga kinahanglang matudlo isip puli niini nga leksiyon sa pagrebyo. Tan-awa ang eskedyul sa pagtudlo nga gihatag sa direktor sa lugar o rehiyon o koordinitor aron masiguro nga matudlo ang kada leksiyon sa tudling sa doktrinal nga kahanas samtang anaa sa sesyon ang seminary.

Mga pakisayran sa kasulatan ug mahinungdanong hugpong sa mga pulong sa kasulatan

Handurawa nga ang inyong higala nakakita ninyo nga nagtuon ug nagmarka sa inyong mga kasulatan. Human makakita og usa ka panid nga adunay daghang marka niini, siya nangutana nganong inyo man nga gimarkahan ang inyong mga kasulatan.

• Unsaon ninyo pagtubag ang inyong higala?

Mahimong maghatag og higayon alang sa mga estudyante nga mopaambit og pipila sa lainlaing mga paagi sa ilang pagmarka sa ilang mga kasulatan ug nganong ila man gimarkahan ang ilang mga kasulatan sama sa ingon. Pahinumdomi ang mga estudyante nga walay sakto o sayop nga paagi sa pagmarka sa mga kasulatan.

Ang pagmarka o paglinya sa mga kasulatan usa ka epektibo nga paagi sa pag-ila sa pihong mga tudling sa kasulatan gikan sa uban, ug makapahimo nimo nga mas dali makakita sa mga tudling sa kasulatan sa umaabot. Niini nga leksiyon aduna kamoy higayon sa pagpangita ug pagmarka sa 13 ka mga tudling sa doktrinal nga kahanas nga anaa sa ikaduhang bahin sa Bag-ong Tugon. Aron matabangan kamo nga mabuhat kini, mahimong kopyahon ang mosunod nga tsart nganha sa inyong journal sa pagtuon.

Ipakita ang mosunod nga tsart o ipaambit ang kopya niini sa klase.

Doktrinal nga Kahanas sa Bag-ong Tugon: 1 Mga Taga-Corinto–Gipadayag

1 Mga Taga-Corinto 6:19–20	“Ang inyong lawas templo sa Espiritu Santo.”
1 Mga Taga-Corinto 11:11	“Diha sa Ginoo ang babaye dili gawas sa lalaki ni ang lalaki gawas sa babaye”
1 Mga Taga-Corinto 15:20–22	“Kay ingon nga nangamatay ang tanang mga tawo tungod sa ilang pagkahiusa kang Adan, banhawon usab ang tanan tungod sa ilang pagkahiusa kang Kristo.”
1 Mga Taga-Corinto 15:40–42	Diha sa Pagkabanhaw, adunay tulo ka ang-ang sa himaya.
Mga Taga-Efeso 1:10	“Usa ka laraw nga pagatumanon inig-abot sa tukma nga panahon, laraw sa paghiusa diha kang Kristo sa tanang mga butang.”
Mga Taga-Efeso 2:19–20	Ang Simbahan “tinukod ibabaw sa patukoranan nga mao ang mga apostoles ug mga propeta, nga niini si Jesukristo mao ang ulohang bato sa pamag-ang.”
2 Mga Taga-Tesalonica 2:1–3	“Ang adlaw ni Kristo … dili pa moabot, hangtod nga mahitabo una ang pagsupil.”
2 Timoteo 3:15–17	“Ang balaan nga kasulatan … makagagahom sa pagtudlo kanimo ngadto sa kaluwasan.”
Mga Hebreohanon 12:9	Ang Langitnong Amahan mao “ang Amahan sa mga espiritu.”
Santiago 1:5–6	“Kon aduna man kaninyoy nakulangan og kaalam, papangayoa siya sa Dios.”
Santiago 2:17–18	“Ang pagtuo patay kon kini walay binuhatan.”
1 Pedro 4:6	“Ang maayong balita [gi]wali hangtod ngadto sa mga patay.”
Pinadayag 20:12	“Ug ang mga patay gipanaghukman … pinasikad sa ilang mga binuhatan.”

Ipakita ang mosunod nga tulo ka panudlo aron sundon sa mga estudyante. Dapita ang mga estudyante nga maglibot-libot sa lawak-klasehanan ug makigtinabangay sa mga kapares sa pagpangita ug, kon pilion nila, sa pagmarka sa tanang 13 ka tudling sa kasulatan sa doktrinal nga kahanas ug sa mahinungdanong hugpong sa mga pulong sa kasulatan. Ipabaylo ang mga estudyante og pares sa kada pipila ka minuto.

Alang sa unang pangutana, mahimong maghatag og pipila ka mga pangutana nga kapilian sa mga estudyante, sama sa “Unsang klaseha sa mga kanta ang inyong gipaminaw?” ug “Unsa nga mga dula ang inyong gustong dulaon?”

1. Mangutana og usa ka pangutana aron mas mag-ilhanay ang matag usa.

2. Tabangi ang usag usa sa pagpangita sa tudling sa mga kasulatan sa doktrinal nga kahanas ug, kon mahimo, ang mahinungdanong hugpong sa mga pulong sa kasulatan. Ikonsiderar ang pagmarka sa hugpong sa mga pulong sa inyong mga kasulatan.

3. Ipaambit kon nganong importante ang kamatuoran diha sa mahinungdanong hugpong sa mga pulong sa kasulatan.

Kon mahuman ang mga estudyante, dasiga sila nga sugdan ang pagsag-ulo sa mga pakisayran ug sa nag-unang hugpong sa mga pulong sa kasulatan.

Dugang nga Kalihokan sa Pagkat-on

Usa ka pulipuli nga kalihokan

Alang sa laing paagi aron matabangan ang mga estudyante nga maapil niini nga leksiyon, mga pangutana nga duol og may kalabotan sa matag tudling sa doktrinal nga kahanas mahimong isulat sa mga piraso sa papel. Ang mga estudyante mahimong magtinabangay nga managpares aron tubagan ang mga pangutana. Ang mosunod mao ang mga pananglitan kon sa unsang paagi nato kini makita sa pipila sa mga tudling sa doktrinal nga kahanas:

1 Mga Taga-Corinto 6:19–20 Pangitaa ang 1 Mga Taga-Corinto 6:19–20 . Ikonsiderar ang pagmarka sa mahinungdanon hugpong sa mga pulong sa kasulatan nga “Ang imong lawas mao ang templo sa Espiritu Santo.” Siguroha nga markahan kining mahinungdanong hugpong sa pulong sa mga kasulatan diha sa inyong mga kasulatan.

• Unsa ang inyong paborito nga templo? Ngano man?

• Ngano kaha nga ang imong lawas susama sa usa ka templo?

1 Mga Taga-Corinto 11:11 Pangitaa ang 1 Mga Taga-Corinto 11:11 . Ikonsiderar ang pagmarka sa mahinungdanong hugpong sa mga pulong sa kasulatan “Ang babaye nagkinahanglan sa lalaki ug ang lalaki nagkinahanglan usab sa babaye, diha sa Ginoo.” Siguroha nga markahan kining mahinungdanong hugpong sa pulong sa mga kasulatan diha sa inyong mga kasulatan.

• Diin man kamo makakita og usa ka maayong ehemplo sa usa ka lig-on nga kaminyoon?

• Ngano kaha nga ang kaminyoon taliwala sa usa ka lalaki ug usa ka babaye mahinungdanon man sa Langitnong Amahan?