Mga Buhat 8:1–3; 9:1–20

“Unsa ang Buot Nimong Ipabuhat Kanako?”

Panahon sa “mapintas nga paglutos batok sa simbahan” (Mga Buhat 8:1), si Saulo mapugsanon nga misulod sa daghang mga panimalay, misikop ug mibilanggo niadtong mga mituo kang Jesukristo (tan-awa sa Mga Buhat 8:3). Sa dihang si Saulo mibiyahe paingon sa Damasco aron ipadayon ang pagpanghasi sa mga Santos, si Jesukristo mipadayag sa iyang kaugalingon ngadto kang Saulo (lantawa Mga Buhat 9:3–5). Uban sa dakong katingala, si Saulo nangutana sa Ginoo, “Unsa ang buot nimong ipabuhat kanako?” (Mga Buhat 9:6). Kini nga leksiyon gituyo aron pagtabang ninyo sa pagpamalandong unsa ang gibuhat sa Ginoo aron matabangan kamo nga magbag-o para sa mas maayo ug pagpangita aron mahibalo unsa ang ipabuhat Niya kaninyo.

Paggamit og daghang mga asoy sa kasulatan. Usahay ang mga kasulatan naglangkob og daghang mga asoy sa susamang hitabo. Pangita ug mga kahigayonan sa pag-awhag sa mga estudyante sa pagtuon sa matag asoy ug sa pag-ila sa dugang nga mga kamatuoran nga mahimong matun-an pinaagi sa pagbuhat sa ingon. Dasiga sila sa pagpangita og mga kahigayonan sa pagbuhat usab niini sa ilang personal nga pagtuon sa kasulatan.

Pagpangandam sa estudyante: Dapita ang mga estudyante sa pagpakigsulti sa usa ka myembro sa pamilya o higala mahitungod sa mga paagi nga si Jesukristo nagdapit ug nagtabang kanato aron mag-usab.

Posible nga mga Kalihokan sa Pagkat-on

Usa ka kausaban sa direksyon

Awhaga ang mga estudyante sa pagpaligid og diyolen o bola tabok sa usa ka patag nga ibabaw ug tan-awa kini nga mausab ang direksyon kon makaigo og usa ka butang.

• Unsa ang gikinahanglan alang sa diyolen o bola aron mausab ang direksyon?

• Itandi ang nagligid nga butang ngadto sa usa ka tawo, unsa ang pipila sa mga hinungdan nga ang usa ka tawo lagmit mausab alang sa mas maayo ug usbon ang direksyon sa ilang kinabuhi? Unsa ang pipila ka mga hinungdan nga tingali dili nila kini buhaton?

Hatagi ang mga estudyante og kahigayonan sa pagtimbang-timbang sa ilang kaugalingong kinabuhi. Ang mosunod nga parapo naghatag og usa ka paagi aron mabuhat kini. Ang mga estudyante mahimong motubag sa mosunod nga mga pangutana diha sa ilang mga journal sa pagtuon.

Paghunahuna mahitungod sa direksyon sa inyong kaugalingong kinabuhi. Sa unsang mga paagi kamo makabati sa paghigugma ug pagtugot sa Ginoo? Aduna bay bisan unsang kausaban sa direksyon sa inyong kinabuhi nga lagmit gidapit ka sa Ginoo nga inyong buhaton? Pagtinguha og pagpadayag alang niining mga pangutana samtang magtuon kamo niini nga leksiyon.

“Saulo, Saulo, nganong gilutos mo man ako?”

Ang Ginoo mitabang sa usa ka tawo nga ginganlan og Saulo aron mabag-o ang iyang kinabuhi. Sa sinugdanan, si Saulo usa ka Pariseo kinsa “naghimog kadaot sa simbahan” ( Mga Buhat 8:3). Siya nagtugot sa kamatayon sa disipulo nga si Esteban (tan-awa sa Mga Buhat 7:58 ; 8:1 ; 22:20) ug “[mi]dakop ug [mi]bun-og [niadtong] nagtuo [sa Ginoo]” ( Mga Buhat 22:19).

Bahina ang usa ka panid sa inyong journal ngadto sa tunga, ug sulati og ulohan ang usa ka bahin nga “Giunsa sa Ginoo pagtabang si Saulo nga mag-usab.” Sulati og ulohan ang pikas bahin nga “Ang tubag ni Saulo sa Ginoo.”Pagbasa og usa o daghan pang mga asoy mahitungod sa kasinatian ni Saulo sa dalan paingon sa Damasco, ug sulati ang tsart base sa unsa ang inyong nakit-an.

Mahimong bahinon ang mga estudyante ngadto sa gagmayng mga grupo diin ang matag estudyante tahasan sa pagbasa og usa ka lahi nga asoy. Mahimo silang magtinabangay sa paghimo og lista sa ilang mga nakit-an base sa matag asoy sa kasinatian ni Saulo. Kon magbahin sa klase ngadto sa gagmayng mga grupo, ikonsiderar ang mga panginahanglan ug mga abilidad sa mga estudyante. Ibutang ang mga estudyante sa mga grupo nga mahimong makapalambo sa kasinatian sa pagtuon sa tanan.

Kon ang mga estudyante nagkinahanglan og tabang sa pagsabot sa hugpong sa mga pulong nga “pagpatid batok sa mga tunokon” ( Mga Buhat 9:5), gamita ang pagpasabot nga anaa makita diha sa “Komentaryo ug Background nga Impormasyon” nga bahin sa leksiyon.

Mga Buhat 9:3–20 (Si Lucas misulat mahitungod sa pagkakabig ni Saulo)

Mga Buhat 22:6–16 (Gisultihan ni Saulo ang uban sa istorya sa iyang pagkakabig)

Mga Buhat 26:12–20 (Si Saulo misugilon kang Hari Agrippa sa iyang pagkakabig)

Awhaga ang pipila ka mga estudyante sa pagpaambit sa unsay ilang nakita. Ikonsiderar ang pagpasupot og dugang nga mga pangutana sama sa mosunod: Unsa ang nahibaloan sa Ginoo mahitungod ni Saulo ug kinsa siya sa umaabot? Giunsa sa Ginoo paghimo ni Saulo nga mapaubsanon? Kinsa ang gipada sa Ginoo aron motabang kang Saulo? Ngano man?

Base sa unsa ang inyong nasulat sa inyong journal, paghunahuna mahitungod sa unsa nga mga kamatuoran o mga leksiyon ang inyong nakat-onan gikan niini nga asoy.

Dapita ang mga estudyante sa pagpaambit sa pipila ka mga kamatuoran nga ilang nakat-onan. Usa ka kamatuoran nga mahimong ipunting sa mas detalyado mao nga Si Jesukristo makatabang kanato nga magbag-o ug makakab-ot sa potensyal nga Iyang nakita kanato.

Ang Ginoo nagtinguha sa atong kabag-ohan

Paggahin og higayon sa paghunahuna mahitungod sa usa ka kaila ninyo nga nabag-o tungod sa impluwensya ni Jesukristo sa ilang kinabuhi.

Ikonsiderar ang pagpaambit og usa ka personal nga kasinatian mahitungod sa pagkakabig ngadto ni Ginoong Jesukristo. Mahimo usab nga hangyoon ang mga estudyante sa pagreport sa ilang pagpangandam sa klase.

• Sa inyong hunahuna giunsa kaha ni Jesukristo pag-impluwensya kini nga tawo aron mag-usab?

Aron makakita og pananglit sa usa ka tawo nga nagbag-o, tan-awa sa video nga “Iyang Grasya: Ang Pagbag-o Posible pinaagi ni Kristo” (3:29), nga may pagpangita kon giunsa sa Ginoo pagtabang ang usa ka tawo nga ginganlan og Kenny sa pag-usab sa dagan sa iyang kinabuhi. Kini nga video anaa sa ChurchofJesusChrist.org.

Alang kang Saulo, kinsa kanunay giila sa iyang Latin nga ngalang Pablo (tan-awa sa Mga Buhat 13:9), ang pagsunod sa mga direksyon sa Ginoo hingpit nga nakapausab sa iyang kinabuhi. Si Pablo mihunong sa paglutos sa mga Kristyano ug hinuon nahimong gamhanang disipulo ni Jesukristo. Si Pablo mibiyahe sa daghang mga nasod isip usa ka misyonaryo ug nagsulat og mga makapadasig ug matulon-anon nga mga sulat ngadto sa mga Santos. Napulog upat niining mga sulat nalakip sa Bag-ong Tugon (tan-awa sa Giya ngadto sa mga Kasulatan, “ Pablo ,” scriptures.ChurchofJesusChrist.org). Ang desisyon ni Pablo nga mosunod kang Jesukristo nagpadayon sa pagpanalangin sa dili maihap nga mga tawo karon.

Ikonsiderar ang pagpasundayag og infographic [gipaagi sa hulagway nga mga kasayoran] sa kinabuhi ni Pablo ug dapita ang mga estudyante sa pagrebyo niini. Mahimong makatabang ang pagdangop niining infographic matag karon og unya samtang ang mga estudyante magtuon sa kinabuhi ug sa mga sinulat ni Pablo.

Ang Ginoo nasayod usab kanato ug nagdapit kanato sa pagbuhat og mga kabag-ohan sa atong kinabuhi. Kini lagmit dagkong mga pagpahiangay, apan mahimo usab nga gagmay lang kini nga mga kabag-ohan.

Sa inyong journal, pagbahin og lahi nga panid ngadto sa tunga ug sulati og ulohan ang usa ka bahin og “Giunsa sa Ginoo pag-awhag kanako aron magbag-o” ug ang lain nga bahin og “Ang akong tubag sa Ginoo.” Pamalandongi ang mosunod nga mga pangutana aron matabangan ka sa pagsulat og tubag sa inyong journal sa pagtuon ubos sa “Giunsa sa Ginoo pag-awhag kanako aron magbag-o.”

• Bisan tuod ang Ginoo lagmit wala magpakita kaninyo sa panan-awon, unsa ang Iyang nabuhat, o unsa ang Iyang ginabuhat, aron pagtabang kaninyo sa paghimo og positibo nga kabag-ohan sa inyong kinabuhi?

• Kinsa ang Iyang gipadala aron matabangan kamo nga magbag-o alang sa mas maayo?

Ubos sa “Ang akong tubag sa Ginoo,” pagsulat mahitungod sa unsaon ninyo pagtubag sa mga paningkamot sa Ginoo sa pagtabang ninyo nga magbag-o alang sa mas maayo.

Mahimong makatabang ang pagsulti sa mga estudyante nga sa umaabot nga leksiyon aduna silay kahigayonan sa pagpamalandong sa ilang mga paningkamot sa pagtubag sa Ginoo ug sa pagtimbang-timbang sa ilang personal nga paglambo.

Pagpamatuod sa mga estudyante nga ang Ginoo motabang kanato sa pagbag-o ug pagkab-ot sa potensyal nga Iyang nakita kanato kon mapaubsanon kitang mutubag sa Iyang mga pagdapit.

Komentaryo ug Background nga Impormasyon

Mga Buhat 9:5 . Unsay gipasabot sa “pagpatid batok sa mga tunokon”?

Usa ka hait nga bangkaw o lipak ang kanunayng gamiton sa pagtusok sa mga hayop aron sila mopadayon sa unahan. Ang mga hayop nga molihok pinaagi sa pagpatid inay nga mopadayon sa unahan mahimong mas makapasakit sa ilang kaugalingon. Pinaagi sa paggamit niini nga analohiya, ang Ginoo mitabang ni Saulo nga makakita nga ang pagpakig-away batok Kaniya magdala lamang og kasakit sa iyang kaugalingon.

Unsa nga mga kabag-ohan lagmit ang ipahimo sa Ginoo kanako?

Si Sister Becky Craven, Ikaduhang Magtatambag sa Kinatibuk-ang Kapangulohan sa Young Women, mitudlo:

Kini mahimong usa ka kausaban sa hunahuna, usa ka kausaban sa kinaiya, o usa ka kausaban sa direksyon nga atong gipadulngan. Agig balos sa Iyang bililhon nga bayad alang sa matag usa kanato, ang Ginoo nangayo kanato og kausaban sa kasingkasing. Ang kausaban nga Iyang gihangyo kanato dili alang sa Iyang kaayohan apan alang kanato.

(Becky Craven, “Imo na ang Sukli,” Liahona, Nob. 2020, 58)

Unsa ang akong angay masabtan mahitungod sa akong mga pagpili ug sa direksyon sa akong kinabuhi?

Si Elder Jeffrey R. Holland sa Korum sa Napulog Duha ka Apostoles mitudlo:

Ang Dios wala kaayo maghunahuna kon unsay nanghitabo sa inyong kagahapon apan siya naghunahuna kon unsa kamo karon ug, uban sa Iyang tabang, unsay gusto ninyong mahitabo.

(Jeffrey R. Holland, “Ang Labing Maayo Moab[o]t Pa,” Liahona, Ene. 2010, 21)

Si Elder Dieter F. Uchtdorf sa Korum sa Napulog Duha ka mga Apostoles mitudlo:

Si Satanas gusto nga kita maghunahuna nga kon kita makasala kita nakalabang na sa “punto nga wala nay pagbalik” —nga ulahi na kaayo aron sa pag-usab sa atong padulngan. …

Si Kristo miabot aron sa pagluwas kanato. Kon sayop nga dalan ang atong gisubay, ang Pag-ula ni Jesukristo maghatag kanato og kasegurohan nga … [ang] luwas nga pagbalik posible kon atong sundon ang plano sa Dios alang sa atong kaluwasan. …

Ang gasa sa Pag-ula ni Jesukristo naghatag kanato sa tanang mga higayon ug sa tanang mga dapit sa mga panalangin sa paghinulsol ug kapasayloan. Tungod niini nga gasa, ang oportunidad sa paghimo og luwas nga pagbalik gikan sa makuyaw nga dalan sa sala anaa kanatong tanan.

(Dieter F. Uchtdorf, “Punto sa Luwas nga Pagbalik,” Liahona, Mayo 2007, 99, 101)

Dugang nga mga Kalihokan sa Pagkat-on

Ang mga Kabag-ohan ug ang pagdapit sa Ginoo nga mag-usab

Aron matabangan ang mga estudyante sa pagsabot nga gikinahanglan ang paghimo og mga kausaban sa atong kinabuhi inubanan sa tabang sa Dios, ikonsiderar ang paggamit og analohiya. Usa ka ideya mao ang pagbasa og pipila o sa tanang mga pakigpulong ni Presidente Nelson “Welcome nga Mensahe,” diin iyang gitandi ang mga pagpaayo palibot sa Templo sa Salt Lake ngadto sa pag-awhag sa Manluluwas kanato aron “kanunayng [mag-usab], maglambo, ug mamahimong mas putli” (tan-awa sa Liahona, Mayo 2021, 6–7). Ang mosunod nga mga pangutana lagmit makatabang sa mga estudyante sa paghunahuna kon giunsa nila paghimog mga kausaban o unsaon nila paghimo og mga kausaban:

Sa unsang paagi ang Ginoo nakapanalangin kaninyo diha sa inyong ginagmayng paabante nga mga lakang aron sa pagsunod Kaniya?

Unsa ang gisulti ni Presidente Nelson nga nakatabang ninyo nga makakita unsaon paghimo og mga kausaban sa inyong kinabuhi?

Mga Ehemplo sa pagbag-o pinaagi ni Jesukristo

Ang mosunod mao ang dugang nga mga pananglitan sa mga tawo nga nausab pinaagi sa pagdawat sa pag-awhag nga mosunod kang Jesukristo.

Usa ka batan-ong lalaki ang gibunyagan ug, pinaagi sa pagsaksi sa iyang pagbag-o, ang tanan sa iyang pamilya midawat sa pagdapit nga mosunod usab kang Jesukristo (tan-awa sa Sam Lofgran ug Annelise Gardiner, “His Example for Change,” New Era, Ago. 2020).

Si Juan Mendoza mibati og kahaw-ang nga iyang gisulayan og puno pinaagi sa pagsunod sa mga pag-aghat sa Espiritu. Kini nakatabang ni Juan sa pag-ila sa Ginoo ug makabati og tinguha sa pag-alagad Kaniya.

Si Dominic Still mibati og impluwensya sa Ginoo nga nakatabang kaniya nga mausab sa hingpit ang iyang kinabuhi. Bantayi nga kini nga pananglitan naglakip og sensitibo nga hilisgotan sa paghikog.