Mga Buhat 9:10–31

“Siya Usa ka Pinili nga Sudlanan Ngari Kanako, Sa Pagdala sa Akong Ngalan”

Sa dihang ang Ginoo sa usa ka panan-awon mihangyo kang Ananias sa pagpangita ug pagpanalangin kang Saulo, si Ananias nagduha-duha sa sinugdanan tungod kay nakadungog siya “unsa kagilngig ang mga kadaotan nga iyang nabuhat” (Mga Buhat 9:13). Si Jesukristo mitabang kang Ananias nga tan-awon si Saulo sama sa Iyang pagtan-aw kaniya. Kini nga leksiyon gituyo aron matabangan kamo nga makita ang potensyal nga nakita sa Ginoo ngadto sa uban bisan paman sa ilang mga kahuyangon ug miaging mga kasaypanan.

Paggamit sa mga baroganan ug doktrina diha sa klase. Sa dihang ang mga estudyante mulihok sa pagtuo aron magamit ang doktrina ug mga baruganan sa ebanghelyo, ang Espiritu Santo magsaksi kanila ngadto sa maong mga kamatuoran (tan-awa sa Juan 7:17). Pangita og mga kahigayonan alang sa mga estudyante nga makahimo og mga aplikasyon sa klase aron ang Espiritu Santo makadala sa mga kamatuoran ngadto sa mas lawom nga bahin sa ilang mga kasingkasing.

Pagpangandam sa estudyante: Dapita ang mga estudyante sa pagpamalandong niini nga pangutana: “Sa unsang paagi lagmit ang akong relasyon sa pamilya o mga higala mausab kon ako motan-aw kanila sama sa pagtan-aw sa Manluluwas?”

Posible nga mga Kalihokan sa Pagkat-on

Mga binilanggo ug mga leopardo

Usa ka Amerikanong warden sa prisohan kinsa naningkamot nga matabangan nga mahiuli sa kanhing kondisyon ang kadtong mga anaa sa iyang prisohan sa makausa miingon, “Kinahanglan nimong hibaloan nga ang mga leopardo dili makausab sa ilang puntik-puntik!” (tan-awa sa Thomas S. Monson, “Tan-awa ang Uban kon Unsa Sila sa Umaab[o]t,” Ensign o Liahona, Nob. 2012, 69).

• Unsa sa inyong hunahuna ang buot ipasabot niining tawhana ani nga sultihon?

• Nakasaksi o nakasinati na ba kamo sa susama nga kinaiya?

Mitubag ang warden sa prisohan, “Angay nimong masayran nga dili mga leopardo ang akong gitabangan. Mga tawo ang akong [gitabangan], ug ang mga tawo mausab matag adlaw.”” (“Tan-awa ang Uban kon Unsa Sila sa Umaab[o]t ,” 69).

• Nganong importante man nga motuo nga ang mga tawo mamahimong mag-usab? Unsa man ang nakalisod sa pagtuo niini?

Sa leksiyon karon atong itandi unsa ang panglantaw sa mga tawo kang Saulo ngadto sa panglantaw sa Manluluwas kaniya. Si Saulo agresibong naglutos sa mga kalalakin-an ug mga kababayen-an nga mga sumusunod ni Jesukristo. Pangitaa unsa ang inyong nakat-onan gikan sa Manluluwas mahitungod sa imong pagtan-aw sa inyong kaugalingon ug sa uban.

Si Jesukristo mitubag sa mga pag-ampo ni Saulo

Ang Manluluwas mipakita kang Saulo sa dihang nagpaingon siya sa Damasco aron sa pagsikop sa mga miyembro sa Simbahan ni Kristo. Ang kasinatian nakapabuta ni Saulo. Siya wala mikaon ni miinom sulod sa tulo ka adlaw, ug siya nag-ampo sa Dios alang sa tabang (tan-awa sa Mga Buhat 9:1–9, 11).

Basaha ang Mga Buhat 9:10–12 , pangitaa kon giunsa sa Dios pagtubag ang pag-ampo ni Saulo.

• Unsa ang inyong namatikdan niini nga mga bersikulo nga daw importante kaninyo?

• Ngano kaha sa inyong hunahuna nga ang Dios nagpadala man og tabang kang Saulo inay nga yanong ayohon Niya mismo ang pagkabuta ni Saulo?

Basaha ang Mga Buhat 9:13–15 aron makita unsa ang kalainan sa pagtan-aw ni Ananias ug sa Ginoo kang Saulo. (Importante nga mahimatngonan nga kon unsa ang nadungog ni Ananias mahitungod kang Saulo kini tukma [tan-awa sa Mga Buhat 8:3 ; 9:1–2 ].)

Sa inyong journal sa pagtuon, pagdrowing og yanong hulagway nga magrepresentar kang Saulo. Sa pikas nga bahin sa inyong drowing, pagsulat og usa ka hugpong sa mga pulong nga mag-sumada kon unsa ang pagtan-aw ni Ananias ug sa uban ngadto kang Saulo. Sa pikas nga bahin, pagsulat og usa ka hugpong sa mga pulong nga mag-sumada kon unsa ang pagtan-aw sa Ginoo ngadto kaniya.

Si Ananias misalig sa pagtan-aw sa Ginoo ngadto kang Saulo. Basaha sa Mga Buhat 9:17–20 aron makita kon unsa ang sunod nga nahitabo.

Pangutan-a ang mga estudyante unsa sa ilang hunahuna ang gitabang sa Ginoo nga makita ni Ananias. Ang mga estudyante lagmit makaamgo nga ang Ginoo mibuka sa mga mata ni Saulo apan mitabang usab kang Ananias nga makita si Saulo sa bag-o ug positibo nga paagi.

Mahimo usab nga dapiton ang mga estudyante sa pagbasa sa Mga Buhat 26:16–18 aron makita nga ang Ginoo nagtinguha sa pagpadala kang Saulo ngadto sa uban aron tabangan sila nga mabuka ang ilang mga mata ug dad-on sila ngadto sa Manluluwas.

Mahimong dapiton ang mga estudyante sa pagpaambit sa ilang mga hulagway ni Saulo ug itandi ang ilang mga hugpong sa mga pulong aron sa paghulagway kaniya.

• Unsa sa inyong hunahuna ang importante mahitungod sa pagtan-aw ni Jesus kang Saulo? Ngano man?

• Unsang mga baroganan ang atong makat-onan mahitungod ni Jesukristo gikan niini nga asoy?

Ang mga estudyante mahimong magngalan og pipila ka mga baroganan, nga naglakip sa ang Ginoo nagtan-aw kanato sa unsay atong maabot; Si Jesuskristo nagtabang kanato aron makita ang uban sa mahangtorong panglantaw;ug ang Ginoo maloloy-on ug nagtugot kanato nga mag-usab ug mosunod Kaniya. Ikonsiderar ang pagsulat og mga baroganan nga gisulti sa mga estudyante ngadto sa pisara ug dayon hisgutan nganong ang maong mga baroganan mahinungdanon kanila.

Si Jesukristo makatabang kanato nga makita ang uban pinaagi sa Iyang mga mata

Paggahin og usa ka minuto sa paghunahuna kon giunsa ninyo pagtan-aw ang mga tawo nga kanunay ninyong gikaistorya ug gikauban. Tan-awa ang listahan sa mga tawo sa ubos ug paggamit og duha ka mga pulong aron sa paghulagway sa inyong pagtan-aw sa matag usa.

Usa ka ginikanan

Usa ka igsoon

Usa ka magtutudlo

Usa ka higala

Inyong kaugalingon

Ang ubang mga kasulatan ug mga pulong sa mga propeta mahimong makatabang nato aron mas masabtan unsa ang pagtan-aw sa Langitnong Amahan ug sa Manluluwas sa matag indibidwal. Basaha ang 1 Samuel 16:7 , Doktrina ug mga Pakigsaad 18:10–13 , ug ang mosunod nga pamahayag ni Elder Jeffrey R. Holland sa Korum sa Napulog Duha ka Apostoles.

“Duol kon unsa kamo,” ang usa ka mahigugmaong Amahan nag-ingon sa matag usa kanato, apan Siya midugang, “Ayaw pagplano nga magpabilin nga mao ra gihapon kamo.” Mopahiyom kita ug mohinumdom nga ang Dios determinado sa paghimo kanatong labaw pa kay sa atong mahunahuna.

(Jeffrey R. Holland, “Mga Awit nga Naawit ug Wala Maawit,” Liahona, Mayo 2017, 51)

Base sa ang inyong nakat-onan, balik sa inyong listahan sa mga tawo ug karon paggamit og duha ka mga pulong aron ihulagway ang matag usa sama sa pagtan-aw sa Langitnong Amahan ug ni Jesukristo kanila.

• Unsay inyong mabuhat aron mas makaila sa mga tawo sama sa pag-ila sa Langitnong Amahan ug ni Jesukristo?

• Nganong mahimo mang lisod ang makanunayong pagtan-aw sa uban sa samang paagi sa pagtan-aw sa Manluluwas kanila?

• Nganong mapuslanon man nga sulayan ang pagtan-aw sa uban sa ingon niana nga paagi?

Bisan kon ang tawo nag-usab pinaagi sa pagpili sa pagsunod kang Jesukristo, usahay lisod tuohan nga sila tinuod nga nausab. Pipila sa mga tawo naglisod og tuo dihang si Saulo nausab gikan sa pagpanglutos sa mga Kristyanos ngadto sa pagkahimong usa ka tinun-an ni Jesukristo mismo.

Basaha ang Mga Buhat 9:20–22, 26–27 , og pangitaa ang reaksyon sa mga tawo kang Saulo karon nga siya nagwali na sa ebanghelyo ni Jesukristo.

• Unsa ang inyong namatikdan mahitungod sa reaksyon sa mga tawo?

• Unsa ang inyong nakat-onan gikan kang Bernabe niini nga pananglitan?

Irekord unsa ang inyong gustong buhaton o mahinumdoman tungod sa inyong pagtuon karon. Kini mahimong maglakip og mga butang nga inyong buhaton aron mas motan-aw sa uban sama sa pagtan-aw sa Ginoo kanila.

Pagpamatuod sa gahom ni Jesukristo aron matabangan ta ug ang uban nga mag-usab. Dapita ang mga estudyante sa pagtan-aw sa ilang kaugalingon ug sa uban sa paagi sa pagtan-aw sa Manluluwas kanato.

Komentaryo ug Background nga Impormasyon

Mga Buhat 9:15–17 . Unsaon nga ang pagtan-aw nato sa atong kaugalingon ug sa uban sa paagi sama sa pagtan-aw sa Langitnong Amahan ngari kanato makadugang sa atong kamapaubsanon?

Si Elder Dale G. Renlund sa Korum sa Napulog Duha ka Apostoles mipaambit sa mosunod nga sugilanon aron makatabang sa pagtubag niini nga pangutana:

Pipila ka tuig ang milabay usa ka talagsaong batan-on nga ginganlan og Curtis gitawag sa pagmisyon. Siya ang matang sa misyonaryo nga gipangandoy sa matag mission president. Determinado siya ug kugihan. Kausa gihimo siya nga kompanyon sa usa ka misyonaryo nga bata-bataon, kiwaw nga makig-atubang sa uban, ug kulang sa kadasig sa paghimo sa mga buluhaton.

Usa ka adlaw, samtang nagbisikleta sila, nalingian ni Curtis ang iyang kompanyon nga dili masabtan nga nanaog sa iyang bisikleta ug naglakaw na lang. Sa hilom, nakatuaw sa Dios si Curtis sa kasagmuyo; pagkalis[o]d nga sangonan ka og kompanyon nga kinahanglang dasigon og maayo aron mahimo ang buluhaton. Pagkataud-taod, dunay impresyon si Curtis, sama nga ang Dios miingon kaniya, “Kahibalo ka, Curtis, itandi ngari nako, kamong duha wala kaayoy kalainan.”

(Dale G. Renlund, “Ang mga Santos sa Ulahing mga Adlaw Magpadayon sa Pagpaningkamot,” Liahona, Mayo 2015, 58)

Mga Buhat 9:26–27 . Unsaon nako pagtabang sa usa ka tawo nga gustong mag-usab?

Si Elder Jeffrey R. Holland sa Korum sa Napulog Duha ka Apostoles mipasabot:

Tugoti ang mga tawo sa paghinulsol. Tug[o]ti ang mga tawo sa pag-uswag. Tuohi nga ang mga tawo mausab ug molambo. Dili ba kini ang hugot nga pagtuo? Oo! Dili ba kini pagla[o]m? Oo! Dili ba kini gugma nga putli? Oo! Labaw sa tanan, kini mao ang gugma nga putli, ang tiunay nga gugma ni Kristo. Kon ang usa ka butang gilubong na sa nangagi, ipabilin kini nga nalubong. Ayaw gamita pagbalik-balik ang inyong gamay nga balde para sa balas ug pala para sa dagat aron sa pagkalot, pagwara-wara niini, ug dayon paglabay ngadto sa usa ka tawo, nga moingon, “Hoy! Nakahinumdom ba ikaw niini?” Splat!

Nan, tag-ana og unsa? Kana seguro moresulta ngadto sa usa ka bati nga panghitabo sa una nga gikalot sainyongdapit nga labayanan og basura nga gitabonan og yuta uban sa tubag, “Oo, ako nakahinumdom niana. Ikaw ba nakahinumdom niini?” Splat.

Ug sa dili madugay ang matag usa mogawas nianang pagbinayloay nga hugaw ug lapukon ug masulub-on ug nasakitan, nga unta ang hangyo sa atong Amahan sa Langit mao ang pagkalimpyo ug pagkamabination ug kalipay ug pagkaayo.

Ang ingon niana nga pagpuyo sa nangagi, lakip ang nangaging mga sayop, dili gay[o]d sakto! Dili kini mao ang ebanghelyo ni Jesukristo.

(Jeffrey R. Holland, “Ang Labing Maayo Moab[o]t Pa,” Liahona, Ene. 2010, 20)

Dugang nga Kalihokan sa Pagkat-on

Ang mga pulong nga atong gigamit sa paghulagway sa atong kaugalingon

Ikonsiderar ang pagdapit sa mga estudyante sa paghanduraw nga nakighimamat og kadali sa usa ka tawo sa unang higayon. Sultihi sila sa paghunahuna og duha ka mga pulong nga lagmit gamiton niining tawhana sa paghulagway kanila. Dayon hangyoa ang mga estudyante sa paghunahuna mahitungod sa mga pulong nga gamiton sa mga tawo, ug labaw sa tanan ni Jesukristo, kinsa nakaila kaayo kanila. Dapita ang mga estudyante sa paghisgot niini nga pangutana: Unsa kaha kalahi ang kalibotan kon kita motan-aw sa uban sama sa pagtan-aw sa Manluluwas kanato?