Mga Buhat 8

Si Felipe Nagtudlo sa usa ka Etiopianhon nga Tawo

Philip (New Testament figure) teaching the gospel to an Ethiopian as they ride in a chariot. Another man is pictured driving the horses and chariot. A lake or river can be seen beside of the road they are riding on. Scriptural Reference: Acts 8:26-39

Si Felipe usa ka madasigon ug matinud-anon nga misyonaryo kinsa miadto sa desyerto subay sa mando sa Ginoo. Ang Espiritu nagtultol kang Felipe ngadto sa usa ka Etiopianhon nga tawo nga nagbasa sa mga kasulatan sakay sa iyang karwahe. Dihang si Felipe nangutana kon ang tawo nakasabot sa iyang gibasa, siya mitubag, “Unsaon nako pagkasabot niini kon walay motudlo kanako?” (Mga Buhat 8:31). Tungod kay si Felipe nakasabot ug nahigugma sa mga kasulatan, siya nakatudlo sa Etiopianhon mahitungod kang Jesukristo sa paagi nga nakagiya kaniya aron motuo ug mabunyagan. Sa inyong pagtuon sa Mga Buhat 8:26–40, pamalandong unsaon ninyo paggamit sa mga kasulatan aron matabangan ang uban nga motuo ug moadto ngadto kang Jesukristo.

Paggamit sa mga pulong sa bag-ong mga propeta. Ang bag-ong mga propeta kasagaran mogamit og mga sugilanon gikan sa mga kasulatan aron pagtudlo sa mga baroganan ug doktrina nga mahimong makat-onan gikan niining mga giasoy. Dapita ang mga estudyante sa pagtuon sa mga pulong sa bag-ong mga propeta aron maila ug masabtan ang doktrina ug mga baruganan gikan sa mga kasulatan ug makat-on unsaon paggamit niining mga kamatuoran sa ilang kaugalingong kinabuhi.

Pagpangandam sa estudyante: Awhaga ang mga estudyante sa paghunahuna mahitungod sa espirituhanong mga himan o mga kahanas nga nakatabang kanila pagtubo nga mas lig-on diha sa ebanghelyo. Aduna silay kahigayonan sa pagpaambit sa ilang mga ideya panahon sa leksiyon.

Posible nga mga Kalihokan sa Pagkat-on

Paggamit sa saktong mga himan

Ikonsiderar ang pagdala og martilyo o screwdriver o pagpasundayag og mga imahe niini. Pagdapit og usa ka estudyante sa pagpakita unsa ang saktong paggamit sa himan. Dayon pangutan-a ang mga estudyante unsa lagmit ang mahitabo kon ilang sulayan pagpukpok ang usa ka lansang o screw sa usa ka screw nga dili mogamit og mga himan.

Ang paggamit og saktong himan makatabang kaninyo nga mas paspas o mas sayon ra nga makatukod o makaayo og mga butang. Handurawa unsa kalisod nga magtukod o mag-ayo og mga butang kon walay saktong mga himan. Ikonsiderar unsa ang gamit sa mosunod nga mga himan.

Hammer

Saw

Combination Wrench (english)

• Kanus-a man mapuslanon ang maong mga himan?

• Unsaon ninyo kini paggamit nga epektibo?

Sa susamang paagi, ang pihong mga himan ug mga kahanas mahimong magamit sa pagtukod ug pag-ayo sa atong tinguha sa pagsunod sa Manluluwas ug pagpuyo sa Iyang ebanghelyo.

Samtang ang mga estudyante nagtubag sa mosunod nga mga pangutana, dasiga sila sa paghinumdom sa mga ideya gikan sa ilang pagpangandam sa leksiyon. Seguroha nga ang pagpaambit dili mokabat og sobra kataas nga oras.

• Unsa ang pipila sa espirituhanong mga himan o mga kahanas ang nakatabang kaninyo sa paglambo diha sa ebanghelyo?

• Unsaon ninyo paggamit niining mga himan aron pagdapit og laing tawo nga moduol ngadto sa Manluluwas?

Usa niining mga himan mao ang atong abilidad sa pagsabot ug paggamit sa mga kasulatan, ilabi na sa ilang pagtudlo ug pagpamatuod mahitungod kang Jesukristo. Pamalandong sa makadiyot kon unsa ka kakomportable nga mogamit sa mga kasulatan sa pag-awhag sa uban nga moduol ngadto kang Jesukristo. Sa inyong pagtuon niini nga leksiyon, pangita og giya pinaagi sa Espiritu Santo aron mahibalo unsaon ninyo nga mas makagamit sa mga kasulatan aron matabangan ang uban nga madala ngadto sa Manluluwas.

Si Felipe gitawag didto sa disyerto

Ang Mga Buhat 8 nagtala og pipila ka mga kasinatian ni Felipe, usa sa pito ka mga igsoon nga gitawag sa mga Apostoles ngadto sa pangalagad (tan-awa sa Mga Buhat 6:3–6). Aron makalingkawas sa nagkadaghan nga pagpanglutos didto sa Jerusalem, si Felipe miadto sa Samarya aron padayon nga magpaambit sa ebanghelyo. Pinaagi sa pagkapari, siya nagpakita og mga milagro, nag-ayo sa daghang mga tawo, ug “nagwali kang Kristo ngadto kanila” (tan-awa sa Mga Buhat 8:5–8). Sa inyong pagtuon sa mosunod nga asoy, pangita og mga himan nga gigamit ni Felipe aron molampos sa wala damhang tahas nga iyang nadawat gikan sa Ginoo.

Kon pipila sa mga estudyante naglisod pagbasa og tag-as nga mga bloke sa kasulatan sa ilang kaugalingon, ikonsiderar ang pagbasa og kusog sa mosunod nga mga bersikulo isip usa ka klase o diha sa matag paresan.

Basaha ang Mga Buhat 8:26–39, ug ang mga hitabo nga gihulagway niini nga asoy. Mahimo ninyong markahan ang mga pulong nga makahuloganon alang kaninyo. (Timan-i nga ang usa ka eunuch mao ang usa ka sinaligan nga alagad, ug si Esaias mao ang Griyegong ngalan ni propeta Isaias.)

Dapita ang pipila ka mga estudyante sa pagpaambit og mga pulong ug hugpong sa mga pulong nga ilang gimarkahan ug giunsa niadto pagtabang nila nga maila ang mga pagtulun-an diha sa asoy. Ikonsiderar ang paggamit sa mosunod nga mga pangutana aron matabangan ang mga estudyante nga mapalawman ang ilang panabot.

Mahimo ninyong isulat (o ipasulat sa mga estudyante) ang mga leksiyon nga ilang naila ngadto sa pisara.

• Sa unsang mga paagi nga ang Ginoo migiya ni Felipe? Nganong importante man ang pagsunod sa mga pag-aghat sa Ginoo samtang kita mosulay sa pagtabang sa uban aron moduol ngadto Kaniya?

• Sa unsang paagi nga si Felipe nakagamit sa iyang kahibalo sa mga kasulatan aron pagtudlo sa Etiopianhon mahitungod kang Jesukristo?

• Unsa ang mga leksiyon nga labing importante kaninyo niini nga asoy?

Taliwala sa daghang mga kamatuoran niini nga asoy, kamo lagmit nakaila og usa ka baroganan sama sa mosunod: Kon kita nakasabot sa mga kasulatan ug nagtudlo mahitungod sa Manluluwas gikan niini, matabangan nato ang uban nga moduol ngadto Kaniya.

Base sa panginahanglan sa estudyante, ang mosunod nga kalihokan mahimong hulipan og dugang nga kalihokan sa pagkat-on mahitungod sa giunsa ni Felipe pagtubag ang mga pag-aghat sa Espiritu.

Paggamit sa mga kasulatan sa pagtudlo mahitungod kang Jesukristo

Sa dihang ang Etiopianhon nangutana kon ang kasulatan nga iyang gibasa mahitungod ni propeta Isaias o “ubang lalaki,” matikdi nga ang kahibalo ni Felipe sa mga kasulatan naghimo kaniya nga hinanaling magsugod “sa maong parehang kasulatan, ug [nagwali] ngadto kaniya si Jesus” ( Mga Buhat 8:34–35).

Ang tudling sa kasulatan nga gibasa sa Etiopianhon anaa sa Isaias 53 , usa ka maanindot nga propesiya mahitungod sa atong Manluluwas, si Jesukristo. Mahimo ninyong i-cross-reference o i-link ang Mga Buhat 8:32–33 ngadto sa Isaias 53:7–8 .

Pagmabination nga pipila sa mga estudyante lagmit wala mobati nga aduna silay abilidad sa pagsabot sa mga kasulatan o pagpasabot niini ngadto sa uban. Ipasalig sa mga estudyante nga ang ilang pagsabot molambo duyog sa panahon ug paningkamot. Pahinumdomi sila nga usahay ang labing epektibong pagtudlo mao ang yanong pagpaambit kon unsa ang ilang gibati mahitungod sa usa ka tudling sa kasulatan, tungod kay ang Espiritu Santo magpamatuod sa pagkatinuod sa ilang mga pulong.

Handurawa nga kamo anaa sa kahimtang ni Felipe ug adunay kahigayonan sa pagpaambit sa inyong pagpamatuod kang Jesukristo ngadto sa usa ka higala. Basaha ang Isaias 53:3–9 , nga may pagtagad sa unsa ang inyong hunahuna ug gibati mahitungod sa Manluluwas samtang kamo nagbasa.

Hatagi ang mga estudyante og igong panahon sa mahunahunaong pagtubag sa mosunod nga mga pangutana. Mahimo ninyong ikonsiderar ang pagdapit sa mga estudyante nga idrama-drama ang pagpaambit ngadto sa ilang higala, o mahimo ninyong dapiton ang mga estuyante nga andam mopaambit ngadto sa klase kon unsa ang ilang gisulat.

• Unsa ang gusto ninyong mahibaloan, mabati, o masabtan sa inyong higala mahitungod kang Jesukristo gikan niini nga tudling? Ngano man?

• Unsaon ninyo paggamit sa inyong nahibaloan ug nabati mahitungod kang Jesukristo aron madasig ang inyong higala nga mas mosunod Kaniya?

Napalig-on pinaagi sa pagpangandam

Tungod sa mga paningkamot ni Felipe, ang Etiopianhon nakabig ug nabunyagan (tan-awa sa Mga Buhat 8:36–38). Sama kang Felipe, kita makadasig ug makadani sa uban nga mosunod ug mahimong susama kang Jesukristo. Si Elder Ulisses Soares sa Korum sa Napulog Duha ka Apostoles nagtudlo nga ang atong personal nga pagpangandam mahimong makatabang kanato sa pagdasig sa uban aron mahiduol ngadto sa Dios:

Elder Ulisses Soares, Quorum of the Twelve Apostles official portrait.

Kon kita tinud-anay, kinasingkasing, lig-on, ug sinsero nga magtinguhang makakat-on sa ebanghelyo ni Jesukristo ug motudlo niini sa usag usa uban sa tinuod nga katuyoan ug ubos sa impluwensya sa Espiritu, kining mga pagtulun-an mahimong makapausab sa [mga] kasingkasing ug modasig og tinguha nga magpuyo sumala sa mga kamatuoran sa Dios.

(Ulisses Soares, “Unsaon Nako Pagkasab[o]t?,”Liahona, Mayo 2019, 8)

Mahimong dapiton ang mga estudyante sa pagtubag sa mosunod nga mga pangutana diha sa ilang mga journal sa pagtuon. Kon itugot sa panahon, dapita ang andam nga mga estudyante sa pagpaambit sa ilang mga panabot ngadto sa klase.

• Unsa nga mga pagpahiangay ang inyong mabuhat sa inyong personal nga pagtuon sa kasulatan nga mag-andam kaninyo sa pagtabang sa uban nga moduol kang Kristo? Sa unsang mga paagi lagmit kining pagbag-o maglig-on sa inyong pagkamasaligon sa paggamit sa mga kasulatan?

• Unsang bahin sa pagtuon sa kasulatan karon ang nakatabang kaninyo nga mobati nga mas duol ngadto sa Langitnong Amahan ug kang Jesukristo? Ngano sa inyong hunahuna nga kana mas nakaimpluwensya kaninyo pag-ayo kaysa sa uban?

Komentaryo ug Background nga Impormasyon

Mga Buhat 8:27 . Unsa man ang usa ka eunuch?

Ang mga eunuch mao ang gipakapon nga mga lalaki nga nag-alagad sa daghang karaan nga Near and Middle Eastern nga mga katilingban. Sila nag-alagad isip mga sundalo, nagbantay sa harianong mga harem, og kasagaran nagkupot og sinaligang mga posisyon sa korte. Ang Etiopianhong eunuch sa Mga Buhat 8:26–39 mao ang responsable sa panudlanan sa Etiopianhong korte.

Ang usa ka matinud-anong estudyante pwedeng mahimong usa ka dinasig nga magtutudlo

Si Elder Ulisses Soares sa Korum sa Napulog Duha ka Apostoles nagtudlo:

Elder Ulisses Soares, Quorum of the Twelve Apostles official portrait.

Sa konteksto sa pagkat-on ug sa pagtudlo sa ebanghelyo, usahay susama kita sa Etiopianhon—nagkinahanglan kita sa tabang sa matinud-anon ug dinasig nga magtutudlo; ug usahay susama kita ni Felipe—kinahanglan kitang motudlo ug molig-on sa uban diha sa ilang pagkakabig.

(Ulisses Soares, “Unsaon Nako Pagkasab[o]t?,” Liahona, Mayo 2019, 6)

Dugang nga mga Kalihokan sa Pagkat-on

Si Felipe mitubag sa mga pag-aghat sa Espiritu

Balika ang Mga Buhat 8:26–35 , ug dapita ang mga estudyante sa pag-ila sa mga hugpong sa mga pulong nga nagpakita giunsa ni Felipe pagkasayod unsa ang gusto sa Ginoo nga iyang buhaton ug giunsa ni Felipe pagtubag. Ipaambit ang mosunod nga pamahayag, magdapit sa mga estudyante sa pagkonsiderar nganong mahinungdanon kaayo ang pagtubag sa espirituhanong mga pag-aghat.

Si Elder Ronald A. Rasband sa Korum sa Napulog Duha ka Apostoles nagsugilon mahitungod sa pagsunod sa usa ka espirituhanong pangaghat samtang nangalagad sa misyon:

Official Portrait (as of June 2016) of Elder Ronald A. Rasband of the Quorum of the Twelve Apostles.

Usa ka init nga buntag sa Hulyo ang akong kompanyon ug ako naaghat nga mangita sa usa ka referral gikan sa Temple Square. Nanuktok kami sa pultahan sa balay ni Elwood Schaffer. Si Mrs. Schaffer matinahurong mihangyo nga mobiya na lang mi.

Sa dayon niyang sira sa pultahan, mibati ko pagbuhat og butang nga wala pa gayod nako mabuhat sa una ug wala pa gayod mahimo sukad! Gibangil nako ang akong tiil sa pultahan ug nangutana, “Duna pa kahay lain nga tingali interesado sa among mensahe?” Ang iyang 16 anyos nga anak nga babaye, nga si Marti, dunay interes, ug kinasingkasing nga nag-ampo alang sa giya sa miagi lang gayod nga adlaw. Nakighimamat si Marti namo, ug sa wala madugay, ang iyang inahan miapil sa mga diskusyon. Silang duha nagpasakop sa Simbahan.

Agig resulta sa bunyag ni Marti, 136 ka tawo, lakip na ang kadaghanan sa kaugalingon niyang pamilya, ang nabunyagan ug mihimo og mga pakigsaad sa ebanghelyo. Mapasalamaton kaayo ko nga naminaw ko sa Espiritu ug mibangil sa akong tiil diha sa pultahan nianang init nga adlaw sa Hulyo.

(Ronald A. Rasband, “Tuguti ang Balaang Espiritu nga mao ang Mogiya,” Liahona, Mayo 2017, 94)

• Giunsa ni Elder Rasband pagtubag sa pangaghat sa Espiritu? Unsay nahitabo isip resulta?

• Kanus-a ka mitubag sa mga pangaghat sa Espiritu? Unsay nahitabo?

• Unsaon ninyo paghatag og mas maigmaton nga pagtagad sa mga pangaghat sa Espiritu?

• Sa unsang paagi nga ang paghimo niana nga kausaban makatabang kaninyo sa pagpaambit sa ebanghelyo sa mas masaligong paagi ngadto sa uban?

Pamalandong kinsa ang gusto sa Ginoo nga inyong mahimamat, mahigala, o mapaambitan sa ebanghelyo.

Pweding Ikapuli nga Ideya sa Leksiyon

Kon ang mga estudyante makabenepisyo sa pagtuon mahitungod sa tinguha ni Simeon sa pagpalit sa pagkapari sa Mga Buhat 8:5–24 , ikonsiderar ang pagpaambit og mga ideya nga anaa sa ubos sa “Ang Atong mga kasingkasing kinahanglan nga ‘anaa sa saktong panlantaw sa Dios’” sa “July 10–16. Mga Buhat 6–9: ‘Unsa ang Imong Ipabuhat Kanako?’” sa Dali, Sunod Kanako—Alang sa Sunday School: Bag-ong Tugon 2023.