កិច្ចការ ៨:១–៣; ៩:១–២០

« តើទ្រង់សព្វព្រះហឫទ័យឲ្យទូលបង្គំធ្វើដូចម្ដេច ? »

នៅគ្រានៃ « សេចក្តីបៀតបៀនជាខ្លាំង ទាស់នឹងពួកជំនុំ » ( កិច្ចការ ៨:១ ) សុលបានចូលគ្រប់តែផ្ទះ ចាប់ទាញអូសទាំងប្រុសទាំងស្រី បញ្ជូនទៅដាក់គុកអស់អ្នកដែលជឿលើព្រះយេស៊ូវគ្រីស្ទ ( សូមមើល កិច្ចការ ៨:៣ ) ។ នៅពេលសុលធ្វើដំណើរទៅក្រុងដាម៉ាស ដើម្បីបន្តបៀតបៀនពួកបរិសុទ្ធ ព្រះយេស៊ូវគ្រីស្ទបានបង្ហាញអង្គទ្រង់ចំពោះសុល ( សូមមើល កិច្ចការ ៩:៣–៥ ) ។ ដោយការងឿងឆ្ងល់ជាខ្លាំង សុលបានទូលសួរព្រះអម្ចាស់ថា ៖ « តើទ្រង់សព្វព្រះហឫទ័យឲ្យទូលបង្គំធ្វើដូចម្ដេច ? » ( កិច្ចការ ៩:៦ ) ។ មេរៀននេះមានគោលបំណងជួយអ្នកឲ្យសញ្ជឹងគិតពីអ្វីដែលព្រះអម្ចាស់ធ្វើដើម្បីជួយអ្នកផ្លាស់ប្តូរឲ្យកាន់តែប្រសើរ ហើយស្វែងយល់អំពីអ្វីដែលទ្រង់នឹងឲ្យអ្នកធ្វើ ។

ការប្រើប្រាស់ដំណើររឿងក្នុងព្រះគម្ពីរ ។ ជួនកាលបទគម្ពីរមានដំណើររឿងនៃព្រឹត្តិការណ៍ដូចគ្នាច្រើន ។ សូមស្វែងរកឱកាសដើម្បីអញ្ជើញសិស្សឲ្យសិក្សាដំណើររឿងនីមួយៗ និងស្វែងយល់ពីសេចក្ដីពិតបន្ថែមទៀតដែលអាចរៀនបានតាមរយៈការធ្វើដូច្នេះ ។ សូមលើកទឹកចិត្តពួកគេឲ្យស្វែងរកឱកាសដើម្បីធ្វើកិច្ចការនេះនៅក្នុងការសិក្សាព្រះគម្ពីរផ្ទាល់ខ្លួនរបស់ពួកគេផងដែរ ។

ការរៀបចំរបស់សិស្ស ៖ សូមអញ្ជើញសិស្សឲ្យនិយាយជាមួយសមាជិកគ្រួសារ ឬមិត្តភក្តិអំពីរបៀបដែលព្រះយេស៊ូវគ្រីស្ទអញ្ជើញ និងជួយយើងឲ្យផ្លាស់ប្ដូរ ។

សកម្មភាពរៀនសូត្រដែលអាចមាន

ការផ្លាស់ប្តូរទិសដៅ

សូមអញ្ជើញសិស្សឲ្យរមៀលគ្រាប់ឃ្លឺឬបាល់លើផ្ទៃដីរាបស្មើ ហើយមើលវាផ្លាស់ប្តូរទិសដៅនៅពេលវាប៉ះនឹងអ្វីមួយ ។

• តើវាត្រូវការអ្វីដើម្បីឲ្យគ្រាប់ឃ្លី ឬបាល់ផ្លាស់ប្តូរទិសដៅ ?

• សូមប្រៀបធៀបគ្រាប់ឃ្លឺរមៀលនោះទៅនឹងមនុស្សម្នាក់ តើមានហេតុផលអ្វីខ្លះដែលមនុស្សម្នាក់អាចផ្លាស់ប្តូរឲ្យកាន់តែប្រសើរ និងកែប្រែទិសដៅនៃជីវិតរបស់ខ្លួន ? តើមូលហេតុអ្វីខ្លះ ដែលពួកគេប្រហែលមិនអាចប្ដូរបាន ?

សូមផ្តល់ឱកាសឲ្យសិស្សវាយតម្លៃជីវិតរបស់ពួកគេផ្ទាល់ ។ កថាខណ្ឌបន្ទាប់ផ្តល់នូវវិធីមួយដើម្បីធ្វើរឿងនេះ ។ សិស្សអាចឆ្លើយនឹងសំណួរមួយចំនួនដូចខាងក្រោមនេះនៅក្នុងសៀវភៅកំណត់ហេតុការសិក្សារបស់ពួកគេ ។

សូមគិតអំពីទិសដៅនៃជីវិតរបស់អ្នក ។ តើអ្នកទទួលអារម្មណ៍នៃសេចក្ដីស្រឡាញ់ និងអនុម័តរបស់ព្រះអម្ចាស់តាមរបៀបណា ? តើមានការផ្លាស់ប្តូរណាមួយចំពោះទិសដៅជីវិតរបស់អ្នកដែលព្រះអម្ចាស់អាចនឹងអញ្ជើញអ្នកឲ្យធ្វើដែរឬទេ ? សូមស្វែងរកវិវរណៈចំពោះសំណួរទាំងនេះ នៅពេលអ្នកសិក្សាមេរៀននេះ ។

« សុលសុល ហេតុអ្វីអ្នកបៀតបៀនខ្ញុំ ? »

ព្រះអម្ចាស់បានជួយបុរសម្នាក់ឈ្មោះសុល ឲ្យកែប្រែជីវិតរបស់គាត់ ។ ដំបូងឡើយ សុលគឺជាផារិស៊ីម្នាក់ដែល « បានធ្វើទុក្ខដល់ពួកជំនុំខ្លាំងណាស់ » ( កិច្ចការ ៨:៣ ) ។ គាត់បានអនុម័តចំពោះការស្លាប់របស់សិស្សឈ្មោះ ស្ទេផាន( សូមមើល កិច្ចការ ៧:៥៨ ; ៨:១ ; ២២:២០ ) ហើយ « បានចាប់ពួកអ្នកដែលជឿដល់ [ ព្រះអម្ចាស់ ] ដាក់គុកហើយ ព្រមទាំងវាយគេនៅក្នុងគ្រប់ទាំងសាលាប្រជុំផង » ( កិច្ចការ ២២:១៩ ) ។

សូមពុះទំព័រសៀវភៅកំណត់ហេតុរបស់អ្នកជាពីរហើយដាក់ចំណងជើងម្ខាងថា « របៀបដែលព្រះអម្ចាស់បានជួយសុល ផ្លាស់ប្តូរ។ » ដាក់ចំណងជើងម្ខាងទៀតថា« ការឆ្លើយតបរបស់សុល ទៅកាន់ព្រះអម្ចាស់ » ។សូមអានដំណើររឿងមួយ ឬច្រើនអំពីបទពិសោធន៍របស់សុលនៅលើផ្លូវទៅកាន់ទីក្រុងដាម៉ាស ហើយបំពេញតារាងដោយផ្អែកលើអ្វីដែលអ្នករកឃើញ ។

សិស្សអាចត្រូវបានបែងចែកជាក្រុមតូចៗ ដែលសិស្សម្នាក់ៗត្រូវបានចាត់ឲ្យអានដំណើររឿងផ្សេងគ្នា ។ ពួកគេអាចធ្វើការជាមួយគ្នាដើម្បីរាយបញ្ជីនូវអ្វីដែលពួកគេរកឃើញដោយផ្អែកលើដំណើររឿងនីមួយៗចេញពីបទពិសោធន៍របស់សុល ។ ពេលបំបែកថ្នាក់ជាក្រុមតូចៗ សូមពិចារណាពីតម្រូវការ និងសមត្ថភាពរបស់សិស្ស ។ សូមដាក់សិស្សចូលគ្នាជាក្រុមដែលអាចបង្កើនបទពិសោធន៍សិក្សាដល់សិស្សទាំងអស់គ្នា ។

ប្រសិនបើសិស្សត្រូវការជំនួយក្នុងការយល់ឃ្លា « ធាក់ជល់នឹងជន្លួញដូច្នេះ » ( កិច្ចការ ៩:៥ ) សូមប្រើការពន្យល់ដែលមាននៅក្នុងផ្នែក « វិចារណកថា និង ព័ត៌មានសាច់រឿង » នៃមេរៀននេះ ។

កិច្ចការ ៩:៣–២០ ( លូកាបានសរសេរអំពីការប្រែចិត្តជឿរបស់សុល )

កិច្ចការ ២២:៦–១៦ ( សុល បានប្រាប់អ្នកដទៃអំពីការប្រែចិត្តជឿរបស់គាត់ )

កិច្ចការ ២៦:១២–២០ ( សុល បានប្រាប់ស្តេចអ័គ្រីប៉ាអំពីការប្រែចិត្តជឿរបស់គាត់ )

អ្នកអាចមើលវីដេអូ « The Road to Damascus » ( ៥:២១ ) ដែលមាននៅលើគេហទំព័រ ChurchofJesusChrist.org ផងដែរ ។

សូមអញ្ជើញសិស្សបីបួននាក់ឲ្យចែករំលែកនូវអ្វីដែលពួកគេបានរកឃើញ ។ សូមពិចារណាអំពីការសួរសំណួរបន្ថែមដូចតទៅនេះ ៖ តើព្រះអម្ចាស់បានជ្រាបអ្វីខ្លះអំពីសុល ហើយតើគាត់អាចក្លាយជានរណា ? តើព្រះអម្ចាស់បានធ្វើឲ្យសុលបន្ទាបខ្លួនយ៉ាងដូចម្ដេច ? តើព្រះអម្ចាស់ចាត់នរណាមកជួយសុល ? ហេតុអ្វី ?

ដោយផ្អែកលើអ្វីដែលអ្នកបានសរសេរនៅក្នុងសៀវភៅកំណត់ហេតុការសិក្សារបស់អ្នក សូមគិតអំពីការពិត ឬមេរៀនដែលអ្នកបានរៀនអំពីដំណើររឿងនេះ ។

សូមអញ្ជើញសិស្សឲ្យចែកចាយសេចក្ដីពិតមួយចំនួន ដែលពួកគេបានរៀនសូត្រ ។ សេចក្តីពិតមួយដែលអាចផ្តោតទៅលើកាន់តែលម្អិតនោះគឺថា ព្រះយេស៊ូវគ្រីស្ទអាចជួយយើងផ្លាស់ប្តូរ និងឈានដល់សក្តានុពលដែលទ្រង់ទតឃើញយើងមាន ។

ព្រះអម្ចាស់សព្វព្រះទ័យនឹងការផ្លាស់ប្តូររបស់យើង

សូមចំណាយពេលមួយភ្លែតដើម្បីគិតអំពីមនុស្សម្នាក់ដែលអ្នកស្គាល់ដែលបានផ្លាស់ប្តូរដោយសារឥទ្ធិពលរបស់ព្រះយេស៊ូវគ្រីស្ទនៅក្នុងជីវិតរបស់ពួកគេ ។

សូមពិចារណាពីការចែកចាយបទពិសោធន៍ផ្ទាល់ខ្លួនមួយអំពីការប្រែចិត្តជឿលើព្រះអម្ចាស់ព្រះយេស៊ូវគ្រីស្ទ ។ សិស្សក៏អាចស្នើសុំឲ្យរាយការណ៍អំពីការរៀបចំរបស់ពួកគេសម្រាប់ការរៀនសូត្រផងដែរ ។

• តើអ្នកគិតថាព្រះយេស៊ូវគ្រីស្ទបានជះឥទ្ធិពលដល់បុគ្គលនេះដើម្បីផ្លាស់ប្តូរដោយរបៀបណា ?

ដើម្បីមើលឧទាហរណ៍អំពីនរណាម្នាក់ដែលបានផ្លាស់ប្តូរ សូមមើលវីដេអូ « His Grace: Change Is Possible through Christ » ( ៣:២៩ ) ដោយរកមើលពីរបៀបដែលព្រះអម្ចាស់បានជួយបុរសម្នាក់ឈ្មោះ កេន្នី ផ្លាស់ប្តូរដំណើរជីវិតរបស់គាត់ ។ វីដេអូនេះមាននៅលើគេហទំព័រ ChurchofJesusChrist.org ។

ចំពោះសុល ដែលត្រូវបានគេស្គាល់ជាញឹកញាប់ដោយឈ្មោះឡាតាំងរបស់គាត់ថា ប៉ុល ( សូមមើល កិច្ចការ ១៣:៩ ) ការធ្វើតាមការដឹកនាំរបស់ព្រះអម្ចាស់បានផ្លាស់ប្ដូរជីវិតរបស់គាត់ទាំងស្រុង ។ ប៉ុលបានឈប់បៀតបៀនពួកអ្នកកាន់សាសនាគ្រិស្ត ហើយជំនួសមកវិញបានក្លាយជាសិស្សដ៏ខ្លាំងក្លារបស់ព្រះយេស៊ូវគ្រីស្ទ ។ ប៉ុលបានធ្វើដំណើរទៅប្រទេសជាច្រើនក្នុងនាមជាអ្នកផ្សព្វផ្សាយសាសនា ហើយបានសរសេរសំបុត្រលើកទឹកចិត្ត និងការណែនាំដល់ពួកបរិសុទ្ធ ។ សំបុត្រចំនួន ១៤ ច្បាប់ក្នុងចំណោមសំបុត្រទាំងនេះត្រូវបានដាក់បញ្ចូលនៅក្នុងព្រះគម្ពីរសញ្ញាថ្មី ( សូមមើល សេចក្ដីណែនាំដល់បទគម្ពីរទាំងឡាយ « ប៉ុល » គេហទំព័រscriptures.ChurchofJesusChrist.org ) ។ ការសម្រេចចិត្តរបស់ប៉ុលដើម្បីដើរតាមព្រះយេស៊ូវគ្រីស្ទ បន្តផ្តល់ពរដល់មនុស្សរាប់មិនអស់នៅសព្វថ្ងៃនេះ ។

សូមពិចារណាអំពីការបង្ហាញក្រាហ្វិកនៃជីវិតរបស់ប៉ុល ហើយអញ្ជើញសិស្សឲ្យពិនិត្យមើលវាឡើងវិញ ។ វាអាចមានសារប្រយោជន៍ក្នុងការយោងទៅលើក្រាហ្វិកនេះពីមួយពេលទៅមួយពេលនៅពេលដែលសិស្សសិក្សាពីជីវិត និងសំណេររបស់ប៉ុល ។

ព្រះអម្ចាស់ក៏ជ្រាបអំពីយើង ហើយអញ្ជើញយើងឲ្យធ្វើការផ្លាស់ប្ដូរក្នុងជីវិតរបស់យើងផងដែរ ។ ទាំងនេះអាចជាការផ្លាស់ប្តូរដ៏ធំ ប៉ុន្តែវាក៏អាចជាការផ្លាស់ប្តូរបន្តិចបន្តួចផងដែរ ។

នៅក្នុងសៀវភៅកំណត់ហេតុរបស់អ្នក សូមពុះទំព័រមួយទៀតជាពីរ ហើយដាក់ចំណងជើងម្ខាង « របៀបដែលព្រះអម្ចាស់អញ្ជើញខ្ញុំឲ្យផ្លាស់ប្ដូរ » និងផ្នែកម្ខាងទៀត « ការឆ្លើយតបរបស់ខ្ញុំចំពោះព្រះអម្ចាស់ » ។ សូមសញ្ជឹងគិតពីសំណួរខាងក្រោមនេះ ដើម្បីជួយអ្នកឲ្យសរសេរចម្លើយមួយនៅក្នុងសៀវភៅកំណត់ហេតុការសិក្សារបស់អ្នកនៅក្រោម « របៀបដែលព្រះអម្ចាស់អញ្ជើញខ្ញុំឲ្យផ្លាស់ប្តូរ » ។

• ទោះបីជាព្រះអម្ចាស់មិនបានបង្ហាញព្រះឲ្យអ្នកឃើញនៅក្នុងការនិមិត្តក្តី តើទ្រង់បានធ្វើអ្វីខ្លះ ឬកំពុងធ្វើអ្វី ដើម្បីជួយអ្នកឲ្យធ្វើការផ្លាស់ប្តូរជាវិជ្ជមាននៅក្នុងជីវិតរបស់អ្នក ?

• តើទ្រង់បានចាត់នរណាឲ្យមកជួយអ្នកក្នុងការផ្លាស់ប្តូរឲ្យកាន់តែល្អប្រសើរនេះ ?

នៅក្រោម « ការឆ្លើយតបរបស់ខ្ញុំចំពោះព្រះអម្ចាស់ » សូមសរសេរអំពីរបៀបដែលអ្នកចង់ឆ្លើយតបទៅនឹងការខិតខំរបស់ព្រះអម្ចាស់ ដើម្បីជួយអ្នកឲ្យផ្លាស់ប្តូរកាន់តែប្រសើរឡើង ។

វាប្រហែលជាមានសារប្រយោជន៍ក្នុងការប្រាប់សិស្សថានៅក្នុងមេរៀននាពេលខាងមុខ ពួកគេនឹងមានឱកាសសញ្ជឹងគិតពីការខិតខំរបស់ពួកគេដើម្បីឆ្លើយតបទៅនឹងព្រះអម្ចាស់ និងវាយតម្លៃពីការរីកចម្រើនផ្ទាល់ខ្លួនរបស់ពួកគេ ។

សូមថ្លែងទីបន្ទាល់ទៅសិស្សថា ព្រះអម្ចាស់នឹងជួយយើងផ្លាស់ប្តូរ ហើយនិងឈានដល់សក្តានុពលដែលទ្រង់ទតឃើញថាយើងមាន ប្រសិនបើយើងឆ្លើយតបដោយរាបសារចំពោះការអញ្ជើញរបស់ទ្រង់ ។

វិចារណកថា និង ព័ត៌មានសាច់រឿង

កិច្ចការ ៩:៥ ។ តើ« ធាក់ជល់នឹងជន្លួញ » មានន័យដូចម្ដេច ?

លំពែង ឬដំបងមុតស្រួចត្រូវបានគេប្រើជាញឹកញាប់ដើម្បីគោះសត្វឲ្យវាដើរទៅមុខ ។ សត្វដែលមានប្រតិកម្មដោយការធាក់ ជំនួសឲ្យដើរទៅមុខអាចបង្កឲ្យមានការឈឺចាប់បន្ថែមទៀតចំពោះខ្លួនវា ។ ព្រះអម្ចាស់បានជួយសុល ដោយប្រើរឿងប្រៀបប្រដូចនេះ ឲ្យគាត់ឃើញថា ការប្រយុទ្ធប្រឆាំងនឹងទ្រង់នឹងនាំមកនូវការឈឺចាប់ដល់ខ្លួនគាត់តែប៉ុណ្ណោះ ។

តើព្រះអម្ចាស់អាចបង្គាប់ឲ្យខ្ញុំធ្វើការកែប្រែអ្វីខ្លះ ?

ស៊ីស្ទើរ បែកឃី ក្រាវីន ទីប្រឹក្សាទីពីរក្នុងគណៈប្រធានយុវនារីទូទៅ បានបង្រៀន ៖

វាអាចជាការផ្លាស់ប្តូរគំនិត ទម្លាប់ ឬទិសដៅ ដែលយើងកំពុងឆ្ពោះទៅ ។ ជាថ្នូរនឹងការបង់ថ្លៃដែលមិនអាចកាត់ថ្លៃបានសម្រាប់យើងម្នាក់ៗ ព្រះអម្ចាស់បង្គាប់ឲ្យយើងផ្លាស់ប្តូរចិត្ត ។ ការផ្លាស់ប្តូរដែលទ្រង់ស្នើសុំពីយើងមិនមែនសម្រាប់ជាប្រយោជន៍របស់ទ្រង់នោះទេ ប៉ុន្តែគឺជាប្រយោជន៍សម្រាប់យើងទៅវិញទេ ។

( បែកឃី ក្រាវីន « Keep the Change » Ensign ឬ Liahona ខែ វិច្ឆិកា ឆ្នាំ ២០២០ ទំព័រ ៥៨ )

តើខ្ញុំគួរស្វែងយល់អ្វីខ្លះអំពីជម្រើសរបស់ខ្ញុំ និងទិសដៅនៃជីវិតរបស់ខ្ញុំ ?

អែលឌើរ ជែហ្វ្រី អ័រ ហូឡិន ក្នុងកូរ៉ុមនៃពួកសាវកដប់ពីរនាក់បានបង្រៀន ៖

ព្រះមិនខ្វល់ព្រះទ័យ ច្រើនអំពីកន្លែងដែលអ្នកធ្លាប់ទៅដូចដែលទ្រង់ខ្វល់ព្រះទ័យអំពីកន្លែងដែលអ្នកកំពុងរស់នៅ នោះទេ ហើយដោយមានជំនួយពីទ្រង់ តើអ្នកនឹងស័្មគ្រចិត្តទៅកន្លែងណា ។

( ជែហ្វ្រី អ័រ ហូឡិន « The Best Is Yet to Be » Ensign ខែ មករា ឆ្នាំ ២០១០ ទំព័រ ២៧ )

អែលឌើរ ឌៀថើរ អេហ្វ អុជដូហ្វ ក្នុងកូរ៉ុមនៃពួកសាវកដប់ពីរនាក់បានបង្រៀន ៖

សាតាំងចង់ឲ្យយើងគិតថា នៅពេលយើងមានបាប គឺយើងឆ្លងហួស « ចំណុចដែលមិនអាចត្រឡប់ក្រោយបាន »—ថាវាយឺតពេលហើយក្នុងការផ្លាស់ប្ដូរផ្លូវរបស់យើង ។ …

ព្រះគ្រីស្ទ បានយាងមកដើម្បីសង្គ្រោះយើង ។ ប្រសិនបើយើងជ្រើសរើសផ្លូវខុស នោះដង្វាយធួនរបស់ព្រះយេស៊ូវគ្រីស្ទអាចផ្តល់ការធានាដល់យើងថា … [ ការ ] វិលត្រឡប់វិញដោយសុវត្ថិភាពគឺអាចធ្វើទៅបាន ប្រសិនបើយើងនឹងធ្វើតាមផែនការរបស់ព្រះសម្រាប់ការសង្គ្រោះរបស់យើង ។ …

អំណោយទាននៃដង្វាយធួនរបស់ព្រះយេស៊ូវគ្រីស្ទផ្តល់ឲ្យយើងនៅគ្រប់ពេល និងគ្រប់ទីកន្លែងទាំងអស់ ព្រមជាមួយនឹងពរជ័យនៃការប្រែចិត្ត និងការអភ័យទោស ។ ដោយសារអំណោយទាននេះ នោះឱកាសនៃការវិលត្រឡប់វិញដោយសុវត្ថិភាពពីដំណើរនៃគ្រោះមហន្តរាយនៃអំពើបាបដែលកើតមានចំពោះយើងទាំងអស់គ្នា ។

( ឌៀថើរ អេហ្វ អុជដូហ្វ « Point of Safe Return » Ensign ឬ Liahona ខែ ឧសភា ឆ្នាំ ២០០៧ ទំព័រ ៩៩, ១០១ )

សកម្មភាពរៀនសូត្របន្ថែម

ការជួសជុល និងការអញ្ជើញរបស់ព្រះអម្ចាស់ឲ្យផ្លាស់ប្តូរ

ដើម្បីជួយសិស្សឲ្យស្គាល់ពីតម្រូវការដើម្បីធ្វើការផ្លាស់ប្តូរក្នុងជីវិតរបស់យើងជាមួយនឹងជំនួយរបស់ព្រះអម្ចាស់ សូមពិចារណាប្រើរឿងប្រៀបធៀបមួយ ។ គំនិតមួយគឺអានសុន្ទរកថាមួយចំនួន ឬទាំងអស់ របស់ប្រធាន ណិលសុន « សារលិខិតសា្វគមន៍ » ដែលក្នុងនោះគាត់បានប្រៀបធៀបការជួសជុលជុំវិញបរិវេណព្រះវិហារបរិសុទ្ធសលត៍លេក ទៅនឹងការអញ្ជើញរបស់ព្រះអង្គសង្គ្រោះចំពោះយើងឲ្យ « ផ្ដល់ការអញ្ជើញឲ្យបន្ដផ្លាស់ប្ដូរ រីកចម្រើន ហើយក្លាយកាន់តែបរិសុទ្ធ » ( សូមមើល Liahona ខែឧសភា ឆ្នាំ ២០២១ ទំព័រ ៦–៧ ) សំណួរខាងក្រោមនេះអាចជួយសិស្សគិតអំពីរបៀបដែលពួកគេបានធ្វើការផ្លាស់ប្តូរ ឬរបៀបដែលពួកគេអាចនឹងធ្វើការផ្លាស់ប្តូរ ៖

តើព្រះអម្ចាស់បានប្រទានពរដល់អ្នករួចហើយដោយរបៀបណា នៅពេលដែលអ្នកបានបោះជំហានខ្លីៗឆ្ពោះទៅមុខដើម្បីដើរតាមទ្រង់ ?

តើប្រធាន ណិលសុន មានប្រសាសន៍អ្វីខ្លះ ដែលជួយអ្នកឲ្យមើលឃើញពីរបៀបដែលត្រូវធ្វើការផ្លាស់ប្ដូរក្នុងជីវិតរបស់អ្នក ?

ឧទាហរណ៍នៃការផ្លាស់ប្តូរតាមរយៈព្រះយេស៊ូវគ្រីស្ទ

ខាងក្រោមនេះគឺជាឧទាហរណ៍បន្ថែមនៃមនុស្សដែលបានផ្លាស់ប្តូរដោយការទទួលយកការអញ្ជើញឲ្យដើរតាមព្រះយេស៊ូវគ្រីស្ទ ។

យុវជនម្នាក់បានទទួលបុណ្យជ្រមុជទឹក ហើយតាមរយៈការធ្វើជាសាក្សីអំពីការផ្លាស់ប្តូររបស់គាត់ គ្រួសាររបស់គាត់ទាំងមូលបានទទួលយកការអញ្ជើញឲ្យដើរតាមព្រះយេស៊ូវគ្រីស្ទផងដែរ ( សូមមើល ស៊ែម ឡូហ្វហ្គ្រ៊ែន និង អាណេលីស ហ្គាឌីនើ « His Example for Change » New Era ខែ សីហា ឆ្នាំ ២០២០ ) ។

ជូអាន មេនដូហ្សា មានអារម្មណ៍ថាគ្មានអ្វីសោះនៅក្នុងខ្លួន ទើបគាត់ព្យាយាមបំពេញតាមការបំផុសគំនិតពីព្រះវិញ្ញាណ ។ ការណ៍នេះបានជួយ ជូអាន ឲ្យស្គាល់ព្រះអម្ចាស់ ហើយមានអារម្មណ៍ចង់បម្រើទ្រង់ ។ សូមពិចារណាបង្ហាញវីដេអូ « Acting on Inspiration: Juan Mendoza » ( ៣:៥២ ) ដែលមាននៅលើគេហទំព័រ ChurchofJesusChrist.org ។

ដូមីនិចនៅតែមានអារម្មណ៍ថាមានឥទ្ធិពលរបស់ព្រះអម្ចាស់ដើម្បីជួយគាត់ផ្លាស់ប្ដូរជីវិតរបស់គាត់ឲ្យប្រសើរឡើង ។ សូមប្រយ័ត្នប្រយែងថាឧទាហរណ៍នេះមានបញ្ចូលប្រធានបទរសើបពាក់ព័ន្ធនឹងការធ្វើអត្តឃាត ។ សូមពិចារណាពីការបង្ហាញវីដេអូ « Finding Christ during Difficult Times » ( ៤:៣៥ ) ដែលមាននៅគេហទំព័រ ChurchofJesusChrist.org ។