ចំណេះចំណានខាងគោលលទ្ធិ ៖ កូរិនថូស ទី១ ១៥:២០–២២

« នោះគ្រប់គ្នាក៏នឹងបានប្រោសឲ្យរស់ក្នុងព្រះគ្រីស្ទយ៉ាងនោះដែរ »

One oil painting of Mary seeing the resurrected Christ. The tomb is in the background, Mary is seen dressed in brown, her back to the viewer. Christ is seen with marks on his hands, dressed in a white robe.

នៅក្នុងមេរៀនពីមុន អ្នកបានរៀនថា ដោយសារការមានព្រះជន្មរស់ឡើងវិញរបស់ព្រះអង្គសង្គ្រោះ នោះបុត្រាបុត្រីទាំងអស់របស់ព្រះវរបិតាសួគ៌នឹងរស់ឡើងវិញ ( សូមមើល កូរិនថូស ទី១ ១៥:២០–២២ ) ។ មេរៀននេះអាចជួយអ្នកឲ្យទន្ទេញសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះសម្រាប់ កូរិនថូស ទី១ ១៥:២០–២២ ពន្យល់ពីគោលលទ្ធិនៃការរស់ឡើងវិញ និងអនុវត្តតាមគោលការណ៍នៃការទទួលបានចំណេះដឹងខាងវិញ្ញាណនៅក្នុងស្ថានភាពជីវិតពិត ។

ការរៀបចំរបស់សិស្ស ៖ សូមអញ្ជើញសិស្សឲ្យសញ្ជឹងគិតអំពីបទពិសោធន៍ដែលពួកគេធ្លាប់ជួប នៅពេលដែលមនុស្សជាទីស្រឡាញ់របស់នរណាម្នាក់បានទទួលមរណភាព ។ សូមឲ្យពួកគេមករៀនដោយបានត្រៀមខ្លួនដើម្បីពិភាក្សាអំពីបញ្ហាប្រឈមនៅក្នុងបទពិសោធន៍ទាំងនេះ និងពីរបៀបដែលសេចក្ដីជំនឿលើព្រះយេស៊ូវគ្រីស្ទអាចជួយដល់អ្នកដែលប្រឈមមុខនឹងបញ្ហាទាំងនេះ ។

សកម្មភាពរៀនសូត្រដែលអាចមាន

មេរៀនវគ្គបទគម្ពីរចំណេះចំណានខាងគោលលទ្ធិនេះត្រូវបានរៀបរៀងឡើងដើម្បីបង្រៀនបន្ទាប់ពីមេរៀន « កូរិនថូស ទី១ ១៥:១៣–២៨ » ដែលជាមេរៀនទាក់ទងនឹងបរិបទសម្រាប់វគ្គបទគម្ពីរចំណេះចំណានខាងគោលលទ្ធិ កូរិនថូស ទី១ ១៥:២០–២២ ។ ប្រសិនបើមេរៀនវគ្គបទគម្ពីរចំណេះចំណានខាងគោលលទ្ធិនេះត្រូវប្តូរទៅសប្តាហ៍ផ្សេង សូមប្រាកដថាបានបង្រៀនបរិបទមេរៀនដែលត្រូវគ្នានៅអំឡុងសប្តាហ៍នោះផងដែរ ។

ទន្ទេញ និងពន្យល់

ប្រធាន ហ្គរដុន ប៊ី ហ៊ីងគ្លី ( ឆ្នាំ ១៩១០–២០០៨ ) បានបង្រៀនថា « ព្រឹត្តិការណ៍ទាំងអស់នៃប្រវត្តិសាស្ត្រមនុស្សជាតិ គ្មានអ្វីសំខាន់ដូចការមានព្រះជន្មរស់ឡើងវិញនៃព្រះរាជបុត្រានៃព្រះឡើយ » ( « The Empty Tomb Bore Testimony » Ensign ខែ ឧសភា ឆ្នាំ ១៩៨៨ ទំព័រ ៦៥ ) ។

សូមប្រើសេចក្តីពិតទាំងឡាយពី កូរិនថូស ទី១ ១៥:២០–២២ ,ដូចជា ដោយសារដំណើររស់ឡើងវិញរបស់ព្រះយេស៊ូវគ្រីស្ទ នោះមនុស្សគ្រប់គ្នានឹងរស់ឡើងវិញ, ដើម្បីពន្យល់ពីមូលហេតុដែលការមានព្រះជន្មរស់ឡើងវិញរបស់ព្រះអង្គសង្គ្រោះគឺជាព្រឹត្តិការណ៍ដ៏សំខាន់បំផុតនៅក្នុងប្រវត្តិសាស្ត្រមនុស្សជាតិ ។ សូមរួមបញ្ចូលមូលហេតុដែលវាមានសារៈសំខាន់សម្រាប់អ្នកផ្ទាល់ ។

សូមអញ្ជើញសិស្សពីរបីនាក់ឲ្យចែកចាយការពន្យល់របស់ពួកគេជាមួយសិស្សក្នុងថ្នាក់ ។ សូមកំណត់ថា តើសិស្សត្រូវការការណែនាំបន្ថែមអំពីគោលលទ្ធិនៃការរស់ឡើងវិញដែរឬទេ មុននឹងបន្តមេរៀនទៅមុខទៀត ។

សូមចំណាយពេលមួយភ្លែតដើម្បីទន្ទេញសេចក្តីយោងបទគម្ពីរ និងឃ្លាបទគម្ពីរគន្លឹះសម្រាប់ កូរិនថូស ទី១ ១៥:២០–២២ ។ ជំហាននានាខាងក្រោមគឺជាវិធីមួយដើម្បីធ្វើបែបនេះ ។

សូមអញ្ជើញសិស្សឲ្យរក្សាក្រដាសដែលពួកគេប្រើក្នុងសកម្មភាពនេះ ដើម្បីជាសេចក្ដីយោងក្នុងមេរៀននាពេលអនាគត ។

1. នៅលើក្បាលទំព័រ សូមសរសេរសេចក្ដីយោងបទគម្ពីរ និងឃ្លាបទគម្ពីរគន្លឹះ កូរិនថូស ទី១ ១៥:២០–២២ ៖ « ព្រោះដូចជាគ្រប់មនុស្សទាំងអស់បានត្រូវស្លាប់ក្នុងលោកអ័ដាមជាយ៉ាងណា នោះគ្រប់គ្នាក៏នឹងបានប្រោសឲ្យរស់ក្នុងព្រះគ្រីស្ទយ៉ាងនោះដែរ » ។

2. សូមបត់ក្បាលទំព័ររបស់អ្នកចុះក្រោម ដើម្បីកុំឲ្យអ្នកឃើញអ្វីដែលអ្នកបានសរសេរ ។ បន្ទាប់មក សូមសរសេរសេចក្ដីយោងបទគម្ពីរ និងឃ្លាបទគម្ពីរគន្លឹះឲ្យបានច្រើនតាមដែលអ្នកអាចធ្វើបានចេញពីការចងចាំ ។

3. សូមលាក្បាលទំព័រ ដើម្បីពិនិត្យភាពត្រឹមត្រូវរបស់អ្នក និងកែកំហុសនានាណាមួយ ។

4. សូមធ្វើដំណើរការនេះឡើងវិញម្ដងហើយម្ដងទៀតរហូតដល់អ្នកអាចសរសេរសេចក្ដីយោងបទគម្ពីរ និងឃ្លាខគម្ពីរគន្លឹះយ៉ាងល្អឥតខ្ចោះពីការចងចាំ ។

រៀនអនុវត្ត

ដោយសារការធ្លាក់របស់អ័ដាម និងនាងអេវ៉ា នោះបុត្រាបុត្រីរបស់ព្រះវរបិតាសួគ៌ម្នាក់ៗដែលដកពិសោធន៍ជីវិតរមែងស្លាប់នៅលើផែនដីនឹងស្លាប់ ( សូមមើល កូរិនថូស ទី១ ១៥:២១–២២ ) ។ ពេលយើងឆ្លងកាត់ការស្លាប់របស់នរណាម្នាក់ដែលជិតស្និទ្ធនឹងយើង នោះយើងយល់ពីអារម្មណ៍សោកសៅនោះ ។ ទោះបីជាបទពិសោធន៍ទាំងនេះមានភាពខុសប្លែកគ្នាសម្រាប់មនុស្សគ្រប់គ្នាក៏ដោយ ប៉ុន្តែការយល់ដឹង និងការអនុវត្តសេចក្តីពិតនៃដំណឹងល្អនៃព្រះយេស៊ូវគ្រីស្ទ អាចជួយដោះស្រាយនូវទុក្ខសោកនោះបាន ។

សាច់រឿងខាងក្រោមគឺជាឧទាហរណ៍ដែលអាចប្រើសម្រាប់សកម្មភាពរៀនអនុវត្ត ។ ម៉្យាងទៀត អ្នកអាចប្រើប្រាស់សាច់រឿងផ្សេងទៀត ដូចជាបទពិសោធន៍ផ្ទាល់ខ្លួន បទពិសោធន៍របស់សិស្សពីការរៀបចំរបស់ពួកគេដើម្បីមករៀន ឬបទពិសោធន៍ដែលបានចែកចាយដោយស៊ីស្ទើរ រ៉េណា អ៊ី អាប៊ើតូ នៃគណៈប្រធានសមាគមសង្គ្រោះទូទៅនៅក្នុងសុន្ទរកថារបស់គាត់ ដែលមានចំណងជើងថា « The Grave Has No Victory » ( សូមមើលពីលេខកូដម៉ោង ៤:២២ ដល់ ៤:៤៩ ) ។ វីដេអូនេះមាននៅលើគេហទំព័រ ChurchofJesusChrist.org ។

អែលឌើរ អេស ម៉ាក ផលម័រ នៃពួកចិតសិបនាក់បានពិពណ៌នាពីបទពិសោធន៍របស់ឪពុកម្តាយលោកអំពីការស្លាប់របស់ប្អូនស្រីលោក មុនពេលឪពុកម្តាយលោកបានរៀនអំពីដំណឹងល្អនៃព្រះយេស៊ូវគ្រីស្ទ ។

សូមមើល « Our Sorrow Shall Be Turned into Joy » ដែលមាននៅលើគេហទំព័រ ChurchofJesusChrist.org, ចាប់ពីលេខកូដម៉ោង ៣:២៧ ដល់ ៤:២៦ ឬអានសេចក្ដីថ្លែងការណ៍ខាងក្រោម ។

Former Official portrait of Elder S. Mark Palmer. Replaced March 2017.

ឪពុកម្តាយរបស់ខ្ញុំគឺជាកសិករចិញ្ចឹមសត្វចៀមនៅប្រទេស នូវវែលសេឡង់ ។ ជីវិតរបស់ពួកលោករីករាយណាស់ ។ កាលជាគូស្វាមីភរិយាវ័យក្មេង ពួកលោកមានពរដែលមានកូនស្រីតូចៗបីនាក់ ។ កូនពៅគេមានឈ្មោះថា អាន ។ នៅថ្ងៃមួយពេលពួកលោកធ្វើដំណើរកម្សាន្ដទៅលេងបឹងមួយជាមួយគ្នា នោះ អាន ដែលមានអាយុ ១៧ ខែ ដែលចេះដើរតេះតាស់នោះបានបាត់ខ្លួន ។ បន្ទាប់ពីខំស្វែងរកអស់ប៉ុន្មាននាទីមក អាន ត្រូវបានគេរកឃើញថាស្លាប់បាត់បង់ជីវិតនៅក្នុងទឹក ។

សុបិនអាក្រក់នេះធ្វើឲ្យពួកលោកសោកសៅហួសនឹងថ្លែង ។ ជាច្រើនឆ្នាំក្រោយមក ឪពុករបស់ខ្ញុំបានសរសេរថា សំណើចក្អាកក្អាយដែលធ្លាប់មាន បានចាកចេញពីជីវិតរបស់ពួកលោកជារៀងរហូតហើយ ។ វាចាប់ផ្តើមធ្វើឲ្យចង់ដឹងចម្លើយចំពោះសំណួរសំខាន់បំផុតនៃជីវិតថា « តើ អាន ជាទីស្រឡាញ់បំផុតរបស់យើងនឹងទៅទីណា ? តើយើងនឹងជួបនាងម្តងទៀតដែរឬទេ ? តើក្រុមគ្រួសាររបស់យើងអាចរីករាយម្តងទៀតដោយរបៀបណា ?

( អេស ម៉ាក ផលម័រ « Our Sorrow Shall Be Turned into Joy » Liahona ខែ ឧសភា ឆ្នាំ ២០២១ ទំព័រ ៨៨–៨៩ )

• តើនៅពេលណាដែលអ្នក ឬនរណាម្នាក់ដែលអ្នកស្គាល់បានឆ្លងកាត់នូវអារម្មណ៍ស្រដៀងគ្នាទៅនឹងឪពុកម្តាយរបស់អែលឌើរ ផលម័រ បន្ទាប់ពីការបាត់បង់មនុស្សជាទីស្រឡាញ់នោះ ?

• តើការមិនដឹងអំពីផែនការនៃសេចក្ដីសង្គ្រោះរបស់ព្រះវរបិតាសួគ៌អាចធ្វើឲ្យស្ថានភាពទាំងនេះកាន់តែលំបាកដោយរបៀបណា ?

គោលការណ៍នៃការទទួលបានចំណេះដឹងខាងវិញ្ញាណអាចជួយយើងឲ្យស្មោះត្រង់ស៊ូទ្រាំនឹងស្ថានភាពលំបាកដូចជាគ្រួសារ ផលម័រ បានជួបផងដែរ ។សូមស្រមៃថា អ្នកគឺជាមិត្តភក្តិនឹងបងស្រីម្នាក់របស់ អាន ដែលឥឡូវនេះកំពុងស្មុគស្មាញជាមួយនឹងសំណួរ និងបញ្ហាប្រឈមជាច្រើនបន្ទាប់ពីបាត់បង់ អាន ទៅ ។ អ្នកមានអារម្មណ៍ថាត្រូវបានជំរុញឲ្យសរសេរសំបុត្រលើកទឹកចិត្ត និងគាំទ្រដល់នាង ។ ម៉្យាងទៀត សូមសរសេរសំបុត្រមួយ ហើយប្រគល់វាទៅនរណាម្នាក់ដែលអ្នកដឹងថាអ្នកនោះនឹងទទួលបានអត្ថប្រយោជន៍ពីវា ។

មុននឹងផ្តល់ពេលដល់សិស្សក្នុងការសរសេរសំបុត្ររៀងៗខ្លួន សូមពិចារណាបំបែកពួកគេទៅជាគូៗ ឬក្រុមតូចៗ ហើយអញ្ជើញពួកគេឲ្យពិភាក្សាសំណួរដែលមានរាយខាងក្រោមនេះទាក់ទងនឹងគោលការណ៍នៃការទទួលបានចំណេះដឹងខាងវិញ្ញាណ ។ អ្នកអាចចាត់សិស្សជាក្រុមៗដែលមានគ្នាបីនាក់ ដោយមនុស្សម្នាក់ៗក្នុងក្រុមត្រូវបានចាត់តាំងគោលការណ៍មួយនៃការទទួលបានចំណេះដឹងខាងវិញ្ញាណដើម្បីសិក្សា និងបង្រៀនអ្នកផ្សេងទៀតនៅក្នុងក្រុមរបស់ពួកគេអំពីគោលការណ៍នោះ ។

សូមអញ្ជើញពួកគេឲ្យប្រើការយល់ដឹងពីការរៀបចំរបស់ពួកគេសម្រាប់ថ្នាក់ នៅពេលពួកគេធ្វើសកម្មភាពខាងក្រោម ។

ដើម្បីត្រៀមសរសេរសំបុត្រនេះ សូមអានកថាខណ្ឌទី ៥–៨,១១ នៅក្នុងផ្នែក « ការទទួលបានចំណេះដឹងខាងវិញ្ញាណនៃ ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២២ ) ។ សូមរកមើល និងគូសពាក្យ ឃ្លា ព្រះគម្ពីរ ឬសេចក្តីពិតទាំងឡាយ ដែលអ្នកមានអារម្មណ៍ថា មានប្រយោជន៍សម្រាប់មនុស្សដែលអ្នកកំពុងសរសេរទៅនោះ ។

• តើការព្យាយាមមើលឃើញមនុស្សដែលអ្នកកំពុងសរសេរទៅ ដូចដែលព្រះវរបិតាសួគ៌ទតឃើញពួកគេផ្លាស់ប្តូរអ្វីដែលអ្នកសរសេរទៅពួកគេដោយរបៀបណា ?

សូមសរសេរសំបុត្រទៅបងស្រីរបស់ អាន ឬអ្នកផ្សេងទៀតដែលអ្នកជ្រើសរើស ។ សូមរួមបញ្ចូលការយល់ដឹងពីគោលការណ៍ទាំងបីនៃការទទួលបានចំណេះដឹងខាងវិញ្ញាណ ។

សូមពិចារណាគំនិតមួយចំនួនខាងក្រោមនៅពេលអ្នកសរសេរ ។

សូមដាក់បង្ហាញគំនិតខាងក្រោមនេះដើម្បីឲ្យសិស្សមើលឃើញកាលដែលពួកគេសរសេរ ។

ធ្វើសកម្មភាពដោយសេចក្ដីជំនឿ

• តើការធ្វើសកម្មភាពដោយសេចក្ដីជំនឿទៅលើព្រះយេស៊ូវគ្រីស្ទមានលក្ខណៈដូចម្ដេចក្នុងស្ថានភាពរបស់ពួកគេ ?

• តើការធ្វើសកម្មភាពដោយសេចក្ដីជំនឿទៅលើព្រះគ្រីស្ទអាចជួយយើងឲ្យស៊ូទ្រាំនឹងការបាត់បង់បានយ៉ាងដូចម្ដេច ?

• តើបទពិសោធន៍មួយណាដែលអ្នក ឬនរណាម្នាក់ដែលអ្នកស្គាល់ ធ្លាប់មានបទពិសោធន៍ ដែលការធ្វើសកម្មភាពដោយសេចក្តីជំនឿទៅលើព្រះយេស៊ូវគ្រីស្ទបានជួយពួកគេក្នុងការស៊ូទ្រាំនឹងបញ្ហាប្រឈមស្រដៀងគ្នានេះ ?

ពិនិត្យមើលគោលគំនិត និងសំណួរទាំងឡាយដោយទស្សនវិស័យដ៏នៅអស់កល្បជានិច្ច

• តើសេចក្ដីពិតអ្វីខ្លះអំពីព្រះវរបិតាសួគ៌ និងផែនការរបស់ទ្រង់អាចលួងលោមក្នុងស្ថានភាពរបស់មនុស្សដែលអ្នកកំពុងសរសេរទៅនោះ ? ហេតុអ្វីទៅ ?

• តើការមានទស្សនវិស័យដ៏នៅអស់កល្បជានិច្ចមួយអាចជួយពួកគេឲ្យដឹងពីរបៀបឆ្លើយតបក្នុងស្ថានភាពរបស់ពួកគេយ៉ាងដូចម្ដេច ?

ស្វែងរកការយល់ដឹងបន្ថែមតាមរយៈប្រភពដែលបានតែងតាំងដ៏ទេវភាព

• តើឃ្លាអ្វីខ្លះពី កូរិនថូស ទី១ ១៥:២០–២២ នឹងមានប្រយោជន៍សម្រាប់ពួកគេ ? ហេតុអ្វីទៅ ?

• តើប្រភពដែលបានតែងតាំងដ៏ទេវភាពអ្វីទៀតដែលនឹងជួយពួកគេឲ្យអភិវឌ្ឍសេចក្ដីជំនឿទៅលើព្រះយេស៊ូវគ្រីស្ទ ?

សូមពិចារណាបញ្ចប់សំបុត្ររបស់អ្នកដោយការចែកចាយទីបន្ទាល់របស់អ្នក ។

សូមអញ្ជើញសិស្សដែលស្ម័គ្រចិត្តឲ្យចែកចាយសំបុត្ររបស់ពួកគេទៅកាន់សិស្សក្នុងថ្នាក់ ។ សូមលើកទឹកចិត្តពួកគេឲ្យប្រើគោលការណ៍នៃការទទួលបានចំណេះដឹងខាងវិញ្ញាណ ដើម្បីដឹកនាំពួកគេអំឡុងពេលមានបញ្ហាប្រឈម ឬមានសំណួរនៅក្នុងជីវិតរបស់ពួកគេផ្ទាល់ ។

ការរំឭកចំណេះចំណានខាងគោលលទ្ធិ

នៅខាងដើម ឬចុងបញ្ចប់នៃមេរៀននាពេលខាងមុខ សូមចំណាយពេលមិនលើសពី បីទៅ ប្រាំ នាទីឡើយដើម្បីពិនិត្យមើលសេចក្ដីយោងបទគម្ពីរ និងឃ្លាបទគម្ពីរគន្លឹះសម្រាប់វគ្គបទគម្ពីរចំណេះចំណានខាងគោលលទ្ធិនេះ ។ សូមអញ្ជើញសិស្សឲ្យរកមើលក្រដាសដែលបានបត់ដែលពួកគេធ្លាប់ទន្ទេញ កូរិនថូស ទី១ ១៥:២០–២២ ។ ជាមួយនឹងក្រដាសបត់ នោះពួកគេមិនអាចមើលឃើញនូវអ្វីដែលអ្នកបានសរសេរពីមុននោះទេ សូមអញ្ជើញសិស្សឲ្យព្យាយាមសរសេរសេចក្ដីយោង និងឃ្លានោះចេញពីការចងចាំរបស់ពួកគេ ។ ប្រសិនបើពួកគេមិនអាចធ្វើវាដោយគ្មានជំនួយទេ សូមអញ្ជើញពួកគេឲ្យបើក ហើយពិនិត្យមើលវាទៅតាមការចាំបាច់ ។ ពួកគេអាចបន្តបត់ក្រដាស និងសរសេរទុករហូតដល់ពួកគេអាចសរសេរសេចក្ដីយោង និងឃ្លាចេញពីការចងចាំរបស់ពួកគេ ។

សកម្មភាពរៀនសូត្របន្ថែម

ជម្រើសសកម្មភាពរៀនអនុវត្ត

សូមទស្សនាវីដេអូ « He Will Give You Help » ( ៤:៤៣ ) ដែលមាននៅលើគេហទំព័រ ChurchofJesusChrist.org ។ សូមអញ្ជើញសិស្សឲ្យសិក្សា ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២២ ) និងដើម្បីរកឃើញវិធីដែលលោក ឌែរិន បានប្រើគោលការណ៍នៃការទទួលបានចំណេះដឹងខាងវិញ្ញាណ និងរបៀបដែលលោកត្រូវបានប្រទានពរដោយការធ្វើដូច្នេះ ។