ចំណេះ ចំណាន ខាងគោលលទ្ធិ ៖ ពេត្រុស ទី១ ៤:៦

« ហេតុនោះ [ បានជា ] បានផ្សាយដំណឹងល្អ ទៅមនុស្សដែលស្លាប់ហើយដែរ »

នៅក្នុងការសិក្សា ពេត្រុស ទី១ ៤ របស់អ្នក អ្នកបានរៀនថាព្រះអង្គសង្គ្រោះបានបង្កើតកិច្ចការផ្សព្វផ្សាយសាសនានៅក្នុងពិភពវិញ្ញាណ ដូច្នេះទើបកូនចៅទាំងអស់របស់ព្រះវរបិតាសួគ៌អាចមានឱកាសទទួលបានសេចក្តីសង្គ្រោះ ។ មេរៀននេះអាចជួយអ្នកឲ្យទន្ទេញសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះសម្រាប់ ពេត្រុស ទី១ ៤:៦ ។ វាក៏អាចជួយអ្នកឲ្យពន្យល់ពីគោលលទ្ធិដែលបានបង្រៀននៅក្នុងវគ្គបទគម្ពីរនោះផងដែរ ។ បន្ទាប់មក អ្នកនឹងមានឱកាសដើម្បីអនុវត្តគោលលទ្ធិនោះ និងគោលការណ៍នៃការទទួលបានចំណេះដឹងខាងវិញ្ញាណទៅនឹងសាច់រឿងជាក់ស្តែង ។

ការបង្រៀនសិស្សពីគោលការណ៍នៃការទទួលបានចំណេះដឹងខាងវិញ្ញាណ ។ ភាពស្ទាត់ជំនាញខាងគោលលទ្ធិនឹងមានប្រសិទ្ធភាពជាង ប្រសិនបើសិស្សដឹង និងយល់អំពីគោលការណ៍នៃការទទួលបានចំណេះដឹងខាងវិញ្ញាណ ។ សូមជួយសិស្សឲ្យយល់ និងរំឭកគោលការណ៍ទាំងនេះឲ្យបានទៀងទាត់ ។

ការរៀបចំសិស្ស ៖ សូមអញ្ជើញសិស្សឲ្យសញ្ជឹងគិត ហើយរៀបចំចែកចាយនូវអ្វីដែលពួកគេទទួលអារម្មណ៍ នៅពេលពួកគេធ្វើពិធីបុណ្យជ្រមុជទឹក និងការបញ្ជាក់នៅក្នុងព្រះវិហារបរិសុទ្ធ ឬធ្វើកិច្ចការពង្សប្រវត្តិផ្សេងទៀតសម្រាប់បុព្វការីជនរបស់ពួកគេដែលបានចែកឋាន ។

សកម្មភាពរៀនសូត្រដែលអាចមាន

មេរៀនវគ្គចំណេះចំណានខាងគោលលទ្ធិនេះត្រូវបានរៀបរៀងឡើង ដើម្បីបង្រៀនបន្ទាប់ពីមេរៀន « ពេត្រុស ទី១ ៣:១៨–២២; ៤:១–៦ » ដែលជាមេរៀនទាក់ទងនឹងបរិបទសម្រាប់វគ្គចំណេះចំណានខាងគោលលទ្ធិ ពេត្រុស ទី១ ៤:៦ ។ ប្រសិនបើមេរៀនវគ្គចំណេះចំណានខាងគោលលទ្ធិនេះត្រូវប្តូរទៅសប្តាហ៍ផ្សេង នោះសូមប្រាកដថា អ្នកបានបង្រៀនមេរៀនតាមបរិបទដែលត្រូវគ្នានៅអំឡុងសប្តាហ៍នោះផងដែរ ។

ទន្ទេញ និងពន្យល់

សូមអញ្ជើញសិស្សម្នាក់ឲ្យគូរដ្យាក្រាមសាមញ្ញមួយនៃផែនការនៃសេចក្ដីសង្គ្រោះនៅលើក្ដារខៀន ។ បន្ទាប់មក សូមសួរសំណួរមួយចំនួនខាងក្រោម ដើម្បីវាយតម្លៃការយល់ដឹងរបស់សិស្សអំពីផែនការ និងពីរបៀបដែលដំណឹងល្អត្រូវបានបង្រៀន ។ ដើម្បីលើកទឹកចិត្តសិស្សដែលជាធម្មតាមិនស្ម័គ្រចិត្តនិយាយ នោះសំណួរខាងក្រោមនេះអាចផ្តល់ជាចំណោទសួរ ហើយបន្ទាប់មកពិភាក្សាជាថ្នាក់ ។

• កូនចៅទាំងអស់របស់ព្រះត្រូវបានបង្រៀនពីដំណឹងល្អនៅក្នុងជីវិតមុនជីវិតរមែងស្លាប់ ។ តើមានអ្វីកើតឡើងចំពោះអ្នកដែលទទួលយកដំណឹងល្អដោយជ្រើសរើសផែនការរបស់ព្រះ ? តើមានអ្វីកើតឡើងចំពោះអ្នកដែលបដិសេធដំណឹងល្អ ?

• តើដំណឹងល្អត្រូវបានបង្រៀននៅលើផែនដីដោយរបៀបណា ?

សូមប្រើសំណួរពីរខាងក្រោមនេះដើម្បីជួយសិស្សស្វែងរកសេចក្ដីយោងវគ្គចំណេះចំណានខាងគោលលទ្ធិ និងឃ្លាបទគម្ពីរគន្លឹះ ។

• តើមានអ្វីកើតឡើងចំពោះអ្នកដែលមិនមានឱកាសរៀនអំពីព្រះយេស៊ូវគ្រីស្ទ ឬទទួលពិធីបរិសុទ្ធបព្វជិតភាពដែលមានសិទ្ធិនៅក្នុងជីវិតនេះ ?

• តើយើងអាចអានអំពីរឿងនេះនៅឯណានៅក្នុងព្រះគម្ពីរសញ្ញាថ្មី ?

សូមពិចារណាប្រើសកម្មភាពទន្ទេញខាងក្រោមនេះ ៖

សូមផ្ដល់ឲ្យសិស្សម្នាក់ៗនូវក្រដាសមួយសន្លឹក ហើយអញ្ជើញសិស្សឲ្យសរសេរសេចក្ដីយោងពេញលេញ និងឃ្លាបទគម្ពីរគន្លឹះនៅផ្នែកខាងលើនៃក្រដាស ៖ « ពេត្រុស ទី១ ៤:៦ ៖ ‹ ហេតុនោះ [ បានជា ] បានផ្សាយដំណឹងល្អ ទៅមនុស្សដែលស្លាប់ហើយដែរ › » ។ សូមណែនាំពួកគេឲ្យបត់ក្រដាសខាងលើមកគ្របលើអ្វីដែលពួកគេបានសរសេរ ហើយបន្ទាប់មកត្រូវសរសេរសេចក្ដីយោង និងឃ្លាម្ដងទៀត ដោយលុបចោលពាក្យ និងលេខពីបីទៅបួនដែលពួកគេជ្រើសរើស ។ ស្នើសុំឲ្យសិស្សប្តូរក្រដាសជាមួយមនុស្សដែលនៅជិតពួកគេ ។

ស្នើសុំឲ្យសិស្សស្វែងរកពាក្យ និងលេខដែលបានលុបនៅលើក្រដាសថ្មីរបស់ពួកគេ ។ បន្ទាប់មកណែនាំពួកគេឲ្យបត់ក្រដាសដើម្បីបិទបាំងការសរសេររបស់ពួកគេ ហើយត្រូវសរសេរសេចក្ដីយោង និងឃ្លាឡើងវិញ ដោយលើកនេះលុបចោលពាក្យ ឬលេខពីប្រាំមួយទៅប្រាំបីពាក្យ ។ ស្នើសុំឲ្យពួកគេហុចក្រដាសនោះទៅម្ចាស់ដើមវិញ ហើយបន្ទាប់មកប្រាប់ពាក្យដែលបាត់នៅលើក្រដាសដើមរបស់ពួកគេ ដោយបត់ក្រដាសមួយលើកចុងក្រោយ ហើយសរសេរសេចក្ដីយោង និងឃ្លាទាំងស្រុងចេញពីការចងចាំ ។

រៀនអនុវត្ត

នៅក្នុងមេរៀនមុន អ្នកបានរៀនពីសេចក្តីពិតខាងក្រោមពី ពេត្រុស ទី១ ៤:៦ ៖ ដំណឹងល្អត្រូវបានផ្សព្វផ្សាយដល់មនុស្សស្លាប់ហើយ ដើម្បីឲ្យពួកគេអាចមានឱកាសដូចគ្នានឹងអ្នកដែលឮដំណឹងល្អនៅក្នុងជីវិតរមែងស្លាប់ដែរ ។

សូមប្រើសាច់រឿងខាងក្រោមដើម្បីរៀនអនុវត្តសេចក្ដីពិតនេះ និងគោលការណ៍នៃការទទួលបានចំណេះដឹងខាងវិញ្ញាណ ។

សាច់រឿង ៖ ផ្នែកទី ១

សូមស្រមៃថាអ្នកមានមិត្តម្នាក់ឈ្មោះ ជេសិន ដែលកំពុងជួបជាមួយអ្នកផ្សព្វផ្សាយសាសនា ។ ជេសិន សុំមកថ្នាក់សិក្ខាសាលាជាមួយអ្នក ដើម្បីស្វែងយល់បន្ថែមអំពីដំណឹងល្អ ។ នៅថ្ងៃដំបូងរបស់គាត់នៅក្នុងថ្នាក់សិក្ខាសាលា គ្រូរបស់អ្នកសុំឲ្យសិស្សក្នុងថ្នាក់រំឭកឡើងវិញជាមួយដៃគូអំពីគោលការណ៍នៃការទទួលបានចំណេះដឹងខាងវិញ្ញាណ ។ ជេសិន ងាកមកអ្នក ហើយសួរថា « តើអ្វីជាគោលការណ៍នៃការទទួលបានចំណេះដឹងខាងវិញ្ញាណ ? »

• តើអ្នកនឹងណែនាំ ជេសិន អំពីគោលការណ៍នៃការទទួលបានចំណេះដឹងខាងវិញ្ញាណយ៉ាងដូចម្តេច ? ( សូមពិចារណាមើលកថាខណ្ឌទី ៥–១២ ឡើងវិញនៅក្នុងផ្នែក « ការទទួលបានចំណេះដឹងខាងវិញ្ញាណ » នៃ ឯកសារគោលនៃចំណេះចំណានខាងគោលលទ្ធិ ( ឆ្នាំ ២០២២ ) ប្រសិនបើអ្នកត្រូវការជំនួយដើម្បីឆ្លើយសំណួរនេះ ) ។

សាច់រឿង ៖ ផ្នែកទី ២

នៅចុងសប្ដាហ៍នោះ ជេសិន និងពួកអ្នកផ្សព្វផ្សាយសាសនាជួបគ្នានៅផ្ទះរបស់អ្នក ។ អ្នកជួយពួកអ្នកផ្សព្វផ្សាយសាសនាបង្រៀនអំពីគោលការណ៍ និងពិធីបរិសុទ្ធដំបូងនៃដំណឹងល្អ រួមទាំងសេចក្តីជំនឿទៅលើព្រះយេស៊ូវគ្រីស្ទ និងពិធីបុណ្យជ្រមុជទឹកដោយការជ្រមុជទឹកសម្រាប់ការផ្ដាច់បាប ។ ពួកអ្នកផ្សព្វផ្សាយសាសនាប្រើ យ៉ូហាន ៣:៥ ដើម្បីបង្រៀនថា ពិធីបុណ្យជ្រមុជទឹកដោយសិទ្ធិអំណាចបព្វជិតភាពត្រឹមត្រូវ គឺចាំបាច់ដើម្បីត្រូវបានសង្គ្រោះនៅក្នុងនគរស្ថានសួគ៌ ។ ជេសិន គិតរឿងនោះមួយសន្ទុះ បន្ទាប់មកមើលទៅគាត់ហាក់ដូចជាក្រៀមក្រំបន្តិច ។ អ្នកផ្សព្វផ្សាយសាសនាម្នាក់សួរពីមូលហេតុដែលគាត់សោកសៅ ហើយជេសិន ឆ្លើយថា « ជីតារបស់ខ្ញុំមិនដែលបានទទួលបុណ្យជ្រមុជទឹកទេ ប៉ុន្តែគាត់ពិតជាមនុស្សល្អម្នាក់ ដែលតែងតែនិយាយថាគាត់ចង់រស់នៅក្នុងជីវិតល្អ ដើម្បីគាត់អាចបានទៅស្ថានសួគ៌ ។ តើគាត់អាចទៅស្ថានសួគ៌បានទេ ? អ្នកធ្វើការអធិស្ឋានស្ងាត់ៗ ដោយទូលសួរព្រះវរបិតាសួគ៌អំពីរបៀបដែលអ្នកអាចជួយ ជេសិន ។ គំនិតក្នុងការប្រើគោលការណ៍នៃការទទួលបានចំណេះដឹងខាងវិញ្ញាណ និងគោលលទ្ធិដែលបានបង្រៀននៅក្នុង ពេត្រុស ទី១ ៤:៦ មកក្នុងគំនិតរបស់អ្នក ។

អាស្រ័យលើទំហំ និងពេលវេលាក្នុងថ្នាក់ សិស្សអាចប្រើការឆ្លើយតបរបស់ពួកគេដើម្បីសម្ដែងជាការបង្រៀនដល់ជេសិន ។ ម៉្យាងទៀត សិស្សអាចត្រូវបានដាក់កិច្ចការនូវគោលការណ៍មួយនៃការទទួលបានចំណេះដឹងខាងវិញ្ញាណ ហើយបន្ទាប់មកពិភាក្សាជាមួយដៃគូ ឬក្នុងក្រុមតូចមួយអំពីរបៀបដែលគោលការណ៍នោះអាចជួយ ជេសិន ។ នៅពេលពួកគេពិភាក្សាចប់ ពួកគេអាចរាយការណ៍ទៅថ្នាក់រៀន ឬដាក់ជាក្រុមបីនាក់ ដើម្បីចែកចាយគំនិតរបស់ពួកគេជាមួយមិត្តរួមថ្នាក់ ដែលបានសិក្សាគោលការណ៍ពីរផ្សេងទៀត ។

សូមរៀបរាប់ពីរបៀបដែលអ្នកអាចប្រើគោលការណ៍បីនៃការទទួលបានចំណេះដឹងខាងវិញ្ញាណ និងគោលលទ្ធិដែលបានបង្រៀននៅក្នុង ពេត្រុស ទី១ ៤:៦ ដើម្បីជួយ ជេសុន ស្វែងរកចម្លើយចំពោះសំណួររបស់គាត់ ហើយទទួលអារម្មណ៍សុខសាន្តអំពីជីតារបស់គាត់ ។ បន្ទាប់ពីរៀបរាប់ហើយ សូមរៀបចំការឆ្លើយតបទៅកាន់ ជេសិន ។ សូមគិតអំពីសំណួរអ្វីដែលអ្នកនឹងសួរដើម្បីជួយគាត់ឲ្យរកឃើញ និងទទួលអារម្មណ៍ពីសេចក្ដីពិតនៃគោលលទ្ធិ ។ សូមប្រាកដថានឹងបញ្ចូលគោលការណ៍ទាំងបីនៃការទទួលបានចំណេះដឹងខាងវិញ្ញាណ និងគោលលទ្ធិដែលបានបង្រៀននៅក្នុង ពេត្រុស ទី១ ៤:៦ ក្នុងការឆ្លើយតបរបស់អ្នក ។

ប្រសិនបើចាំបាច់ អ្នកអាចប្រើសំណួរមួយចំនួន ឬទាំងអស់ខាងក្រោម ជាសេចក្តីណែនាំដល់អ្នក ។

• តើអ្នកអាចជួយជេសិនឲ្យមានទស្សនៈដ៏នៅអស់កល្បជានិច្ចដោយរបៀបណា ? តើអ្នកនឹងប្រាប់ជេសិនអ្វីខ្លះអំពីព្រះវរបិតាសួគ៌ និងព្រះយេស៊ូវគ្រីស្ទ ដែលអាចផ្តល់ឲ្យគាត់នូវសេចក្ដីសុខសាន្តអំពីជីតារបស់គាត់ ?

• បន្ថែមពីលើ ពេត្រុស ទី១ ៤:៦ តើមានប្រភពដែលបានតែងតាំងដ៏ទេវភាពណាខ្លះទៀតដែលអ្នកអាចចែកចាយជាមួយនឹងជេសិន ដើម្បីជួយគាត់ឲ្យមានក្តីសង្ឃឹមតាមរយៈព្រះយេស៊ូវគ្រីស្ទ ? តើអ្នកនឹងប្រើវគ្គបទគម្ពីរទាំងនេះដោយរបៀបណាដើម្បីជួយជេសិនឲ្យរកឃើញសេចក្ដីពិត ?

• តើការធ្វើសកម្មភាពដោយសេចក្ដីជំនឿអាចមើលទៅដូចម្ដេចក្នុងស្ថានភាពរបស់ ជេសិន ? តើអ្នកនឹងអញ្ជើញគាត់ឲ្យធ្វើអ្វីខ្លះ ?

• តើបទពិសោធន៍អ្វីខ្លះដែលអ្នកបានធ្វើកិច្ចការព្រះវិហារបរិសុទ្ធ ឬពង្សប្រវត្តិសម្រាប់បុព្វការីជនរបស់អ្នក ដែលអ្នកអាចចែកចាយជាមួយជេសិន ?

• តើអ្នកនឹងថ្លែងទីបន្ទាល់អំពីអ្វីដើម្បីជួយមិត្តរបស់អ្នក ?

ការរំឭកចំណេះចំណានខាងគោលលទ្ធិ

សូមជួយសិស្សឲ្យរំឭកសេចក្ដីយោង និងឃ្លាបទគម្ពីរគន្លឹះឡើងវិញសម្រាប់ ពេត្រុសទី១ ៤:៦ នៅអំឡុងមេរៀនបន្ទាប់ ។ ខាងក្រោមគឺជាវិធីមួយដើម្បីធ្វើរឿងនេះ ៖

សូមសរសេរតួអក្សរ ១, ពេ, ៤:៦, ហ, [ប], ផ, ទ, ម, ដ, ស, ហ, ដ, ចោទិ នៅក្នុងជួរឈរមួយនៅលើក្តារខៀន ។ សូមអញ្ជើញសិស្សឲ្យស្វែងរកពាក្យនៃសេចក្ដីយោងចំណេះចំណានខាងគោលលទ្ធិ និងឃ្លាបទគម្ពីរគន្លឹះពីអក្សរដំបូងទាំងនេះ ។ នៅពេលដែលពាក្យទាំងអស់ត្រូវបានរកឃើញហើយសូមនិយាយឡើងវិញនូវសេចក្តីយោង និងឃ្លាគន្លឹះជាថ្នាក់ ។