Doktrinal nga Kahanas: Santiago 2:17–18

“Ang Hugot nga Pagtuo Patay kon kini Walay Binuhatan”

Imahe

two young men sharing Book of Mormon

Sa miaging leksiyon, imong nakat-onan nga atong gipakita ang atong hugot nga pagtuo kang Jesukristo pinaagi sa atong mga matarong nga binuhatan. Kini nga leksiyon makatabang kanimo sa pagmemorya sa pakisayran sa doktrinal nga kahanas ug sa mahinungdanon nga hugpong sa pulong sa kasulatan alang sa Santiago 2:17–18, pagpasabot sa doktrina, ug paggamit sa mga baroganan sa pag-angkon og espirituhanong kahibalo sa tinuod nga mga sitwasyon sa kinabuhi.

Pagsulti sa mga estudyante nga gihatagan og bili ug mahinungdanon ang ilang mga kontribusyon. Pangita og mga paagi aron matabangan ang kada estudyante nga mobati nga gitagaan og bili ug gidawat ug nga ang ilang mga kontribusyon nagpanalangin sa klase. Hinumdomi nga pasalamatan ang mga estudyante sa ilang pagsalmot ug pahibaloa sila nga gidayeg nimo ang ilang pagkaandam sa pagtampo.

Pagpangandam sa estudyante: Dapita ang mga estudyante sa paghunahuna mahitungod sa usa ka baroganan sa ebanghelyo nga ilang gituohan apan lagmit gikalisdan pagbuhat. Sultihi ang mga estudyante sa pagpamalandong unsa kaha ang nakapugong nila sa pagbuhat niana nga baroganan.

Posible nga mga Kalihokan sa Pagkat-on

Gidisenyo kini nga leksiyon sa tudling sa doktrinal nga kahanas nga itudlo human sa leksiyon sa “Santiago 2,” nga mao ang pangkonteksto nga leksiyon para sa tudling sa doktrinal nga kahanas sa Santiago 2:17–18 . Kon gikinahanglan nga kining leksiyon sa tudling sa doktrinal nga kahanas ibalhin ngadto sa laing semana, seguroha nga itudlo usab ang tukma nga pangkonteksto nga leksiyon nianang semanaha.

Imemorya ug ipasabot

Tabangi ang mga estudyante sa pagsag-ulo ug sa pagpasabot sa pakisayran sa kasulatan ug sa mahinungdanong hugpong sa pulong sa kasulatan alang sa Santiago 2:17–18 . Ang mosunod nga kalihokan usa ka paagi aron mabuhat kini.

Isulat ang Santiago 2:17–18, ang Hugot nga Pagtuo patay kon kini walay binuhatan sa usa ka piraso sa papel nga adunay pipila ka luna tali sa kada pulong. Isulti sa makusog ang pakisayran sa kasulatan ug ang mahinungdanon nga hugpong sa pulong sa kasulatan. Dayon guntinga ang kada pulong ug numero sa buwag nga paagi, isagol sila, ug ibalik kini sa pagkahan-ay. Isulti pag-usab ang kasulatan ug pakisayran. Ibalik ang proseso hangtod nga masulti nimo gikan sa memorya ang pakisayran sa kasulatan ug ang mahinungdanon nga hugpong sa pulong sa kasulatan nga walay tabang sa bisan unsang piraso sa papel.

Kon mas makaayo alang sa imong klase, ikonsiderar ang paggunting og pipila ka set niini nga mga papel sa dili pa ang klase ug ibutang ang kada set sa usa ka sobre nga tagsa-tagsang magamit sa mga estudyante, sa mga grupo o sa magkapares.

Samtang nagbasa ka sa Santiago 2:17–18 , hinumdomi gikan sa miaging leksiyon ang baroganan nga ang tinuod nga hugot nga pagtuo kang Jesukristo nagkinahanglan og matarong nga mga buhat.

Unsaon nimo pagpasabot niini nga kamatuoran sa pamaagi nga lagmit makapadasig sa laing tawo nga molihok diha sa iyang hugot nga pagtuo?

Bansaya ang paggamit

Tan-awa ang mosunod nga tulo ka mga baroganan sa pag-angkon og espirituhanong kahibalo. Dayon sa kada baroganan pagsulat og usa ka kapahayag [sentence] nga nagsuma sa kahulogan niini sa imong kaugalingong mga pulong. Kon makatabang, rebyoha ang mga parapo 5–12 diha sa “Pag-angkon og Espirituhanong Kahibalo” nga seksiyon sa Mahinungdanon nga Dokumento sa Doktrinal nga Kahanas (2022).

Lihok uban sa hugot nga pagtuo.
Susiha ang mga konsepto ug mga pangutana uban sa mahangtoron nga panglantaw.
Pagtinguha pa og dugang nga panabot pinaagi sa balaang gitudlo nga mga tinubdan.

Ang paglihok sumala sa atong mga pagtuo mahimong lisod. Si Elder David A. Bednar sa Korum sa Napulog Duha ka Apostoles mipahayag, “Ang atong nahibaloan dili kanunay nga makita sa atong gibuhat” (Labaw nga Makugihon ug Mabuhaton diha sa Panimalay,” Liahona, Nob. 2009, 19). Samtang nagbasa ka sa mosunod nga mga senaryo, paghunahuna og mga hinungdan nga lagmit kita dili kanunay makalihok sa baroganan sa ebanghelyo nga atong nahibaloan.

Usa ka batan-ong babaye ang gustong basahon iyang mga kasulatan kada adlaw. Usahay mawad-an siya og kadasig kon dili niya masabtan o dili makit-an ang kahulogan sa unsay iyang gibasa.
Usa ka batan-ong babaye ang matinud-anong mibayad og ikapulo sa pagkabata. Karon nga siya mas nidako na ug aduna nay permanenteng trabaho, ang kantidad sa ikapulo nga gidahom nga iyahang ihatag mas labaw pa sa iyang nahatag sukad ug mas lisod bayaran.
Ang usa ka batan-ong lalaki nakahibalo mahitungod kang Jesukristo ug sa Iyang Pag-ula sa mga katuigan. Nagtuo siya nga si Jesus nag-antos sa mga sala sa katawhan ug nga ang iyang mga sala mapasaylo. Aduna siyay mahinungdanong kasinatian sa paghinulsol sa miagi. Bisan pa niana, nakita niya ang iyang kaugalingon nga nagpadayon sa taas nga panahon nga wala maghunahuna mahitungod sa paghinulsol.

Pagpili og usa sa mga sitwasyon sa ibabaw, o paghunahuna og lain pang baroganan sa ebanghelyo nga imong gituohan apan naglisod sa pagbuhat. Isulat kon unsaon nimo o sa tawo diha sa imong gipili nga sitwasyon paggamit sa tulo ka baroganan sa pag-angkon og espirituhanong kahibalo aron matubag kini nga sitwasyon.

Kon gusto nimo og tabang sa paggamit niining mga baroganan sa sitwasyon nga imong gipili, ikonsiderar ang pagtubag sa pipila o sa tanang mosunod nga mga pangutana.

Baroganan 1: Lihokon inubanan sa hugot nga pagtuo

Sa miagi, unsang baroganan sa ebanghelyo ang nabuhat nimo nga inubanan sa hugot nga pagtuo?
Unsa ang imong nakat-onan mahitungod kang Jesukristo gikan nianang kasinatian nga lagmit makatabang kanimo sa niini nga sitwasyon?

Baroganan 2: Susihon ang mga konsepto ug mga pangutana inubanan sa mahangtorong panglantaw

Sa unsang paagi kaha nakita sa Langitnong Amahan kini nga sitwasyon? Sa unsang mga paagi Siya makatabang?
Sa unsang paagi nga ang pagbuhat niining mga baroganan mosangpot sa mga panalangin karon ug sa kahangtoran?

Baruganan 3: Tinguhaa ang dugang nga panabot pinaagi sa balaanong gitudlo nga mga tinubdan

Unsaon kaha pagtabang sa Santiago 2:17–18 niini nga sitwasyon? Unsay lain pang mga kasulatan o mga pakigpulong sa kinatibuk-ang komperensiya ang makatabang kanimo nga mas makasabot ug makabati og kadasig sa pagkinabuhi niining baroganan? (Pananglitan, tan-awa ang Alma 32:27–28 .)
Makatabang kasagaran ang paghisgot niining mga butang uban sa kasaligan nga higala, miyembro sa pamilya, o lider sa Simbahan. Kang kinsa kaha gusto sa Ginoo nga imong hisgotan kini nga sitwasyon?

Paningkamot sa pagmugna og kahimtang diin ang mga estudyante mobati nga luwas nga maghisgot sa ilang mga hunahuna ug mga kabalaka. Pagdapit og pipila ka mga estudyante sa pagpaambit og usa o daghan pang mga paagi nga ilang magamit ang mga baroganan sa pag-angkon og espirituhanong kahibalo sa pagtabang sa ilang sitwasyon nga dili magpaambit og bisan unsang personal ra kaayo. Kung mapuslanon, pangutana og mga follow-up nga pangutana sama sa “Nganong makatabang man kana nga baroganan?” ug “Aduna bay bisan kinsa sa klase nga adunay mga panabot o mga kasinatian nga tingali makatabang niini nga sitwasyon?”

Paggahin og higayon sa pagpamalandong kon unsa imong nakat-onan niini nga leksiyon. Kon ikaw miila og usa ka kamatuoran sa ebanghelyo nga personal nimong gilisdan sa pagbuhat, timbang-timbanga nga matinuoron kon nagplano ka ba nga buhaton kini karon. Kung wala ka nagplano nga buhaton karon, hunahunaa ang mga babag nga naa sa imong agianan ug kon unsaon sa Ginoo pagtabang kanimo.

Mahimong mapuslanon kon hisgotan isip usa ka klase ang mga pangutana sa parapo nga naa sa ibabaw. Pagpamatuod sa pagkaandam sa Ginoo nga motabang ug sa mga panalangin nga moabot samtang kita naglihok uban sa hugot nga pagtuo kang Jesukristo.

Rebyo sa doktrinal nga kahanas

Panahon sa umaabot nga leksiyon, tabangi ang mga estudyante sa pagrebyo niining tudling sa doktrinal nga kahanas ug sa mahinungdanong hugpong sa pulong sa kasulatan. Ikonsiderar ang pagbutang sa mga estudyante nga magkapares ug ipatan-aw kanila sa makadiyot ang pakisayran sa kasulatan ug ang mahinungdanong hugpong sa pulong sa kasulatan sa: “Santiago 2:17–18, ang hugot nga Pagtuo patay kon kini walay binuhatan.” Dayon dapita sila nga magpuli-puli sa pagsulti og usa ka pulong o numero kada higayon. Pananglit, ang unang estudyante moingon “Santiago,” ang ikaduha nga estudyante moingon “dos,” ug magpadayon. Magpadayon sila sa pagpuli-puli hangtod sa masulti nila ang tanang pakisayran ug mahinungdanon nga hugpong sa pulong sa kasulatan. Mahimo dayon silang magbaylo kung kinsa ang mosulti sa unang pulong ug sublion ang pagbansay.

Dugang nga Kalihokan sa Pagkat-on 

Agig dugang sa duha ka mga pangutana nga nagsunod sa “Baroganan 3: Tinguhaa ang dugang nga panabot pinaagi sa balaanong gitudlo nga mga tinubdan,” ikonsiderar ang pagdapit sa mga estudyante nga mogahin og pipila ka mga minuto sa pagpangita sa mga hilisgotan diha sa Gospel Library sa ChurchofJesusChrist.org (sama sa pagtuon sa kasulatan, ikapulo, o paghinulsol) nga may kalabotan sa senaryo nga ilang gipili nga tubagon. Mahimong gamiton sa mga estudyante kon unsa ang ilang nakat-onan aron matubag ang ilang gipili nga senaryo.