Santiago 1
“Papangayoa sa Dios”
Nakabati ka ba nga mahimo kang mangayo sa Dios og tabang kon aduna kay wala natubag nga mga pangutana o nagkinahanglan sa Iyang kaalam sa pagbuhat og importanteng mga desisyon? Si Santiago mideklarar nga si bisan kinsa nga nagkulang og kaalam mahimong “mangayo sa Dios, nga nagahatag sa tanan nga mga tawo sa madagayaon gayod … ug kini ihatag kaniya” (Santiago 1:5). Gituyo kini nga leksiyon aron lig-onon ang imong pagpamatuod nga ang Langitnong Amahan maghatag kanimo og kaalam agig tubag sa imong mga pag-ampo.
Pagtudlo sa mga kasulatan ug mga pulong sa mga propeta nga adunay konbiksiyon ug tumong. “Ang inyong labing dako nga tinguha, ang inyong labing importante ug bugtong nga buluhaton, mao ang pagtudlo sa ebanghelyo ni Ginoong Jesukristo ingon nga gipadayag niining ulahing mga adlaw. Kamo kinahanglang motudlo niining ebanghelyo, gamit ang sumbanan nga mga basahon sa Simbahan ug ang mga pulong niadtong kinsa gitawag sa Dios sa pagdumala sa Iyang katawhan niining ulahing mga adlaw” (J. Reuben Clark Jr., The Charted Course of the Church in Education, rev. ed. [1994; tubag sa mga relihiyosong edukador sa Church Educational System, Ago. 8, 1938], 10, ChurchofJesusChrist.org).
Pagpangandam sa estudyante: Dapita ang mga estudyante sa pagbasa sa Santiago 1:5–6 ug sa paghunahuna mahitungod sa mga bahin sa ilang mga kinabuhi diin sila nagkinahanglan og kaalam o direksiyon gikan sa Dios.
Posible nga mga Kalihokan sa Pagkat-on
Importanteng mga tubag
Ikonsiderar ang pagpakita sa mosunod nga mga kapilian ug mga pangutana. Tugoti ang mga estudyante sa paggahin og panahon aron mamalandong sa hilom sa ilang mga tubag sa dili pa magpadayon.
Tan-awa ang matag usa sa mosunod nga mga pangutana ug pamalandongi kining mga butang alang sa matag usa: (1) Nakadawat ba ako og tubag gikan sa Dios? (2) Nangita ba ako og tubag gikan sa Dios nga wala pa nako madawat? (3) Dili pa ba ko interesado sa pagpangita og tubag?
-
Ang Simbahan ni Jesukristo sa mga Santos sa Ulahing mga Adlaw ba tinuod nga Simbahan?
-
Si Jesukristo ba gayod ang akong Manluluwas?
-
Unsa ang angay nakong tutokan aron mas mahimong maayong sumusunod ni Jesukristo?
Mahimong sultihan ang mga estudyante sa pagpaambit og pipila sa lain pang importanteng mga pangutana nga gipangitaan nila og tubag ug sa kadtong nagpalibot nila.
Diha sa imong pagtuon sa mga pulong ni Apostol Santiago sa Santiago 1 , pangita og mga baroganan nga mahimong makatabang kanimo sa pagkaplag og mga tubag alang sa importanteng mga pangutana sa imong kinabuhi.
Pagpaambit og pipila ka background ni Santiago ingon man usab ang konteksto sa iyang epistola. Ang pipila sa mosunod nga mga kasayoran mahimong makatabang. Isip alternatibo, ang mga estudyante mahimong dapiton sa pagpaambit unsa ang ilang nahibaloan mahitungod kang Santiago ug sa iyang epistola.
Basaha ang mosunod nga impormasyon mahitungod kang Santiago. Paghunahuna mahitungod sa unsang mga pangutana ang iyang gipangitaan og mga tubag sa tibuok niyang kinabuhi.
-
Lagmit siya ang igsoon sa inahan [half brother] ni Jesukristo (tan-awa ang Giya ngadto sa Kasulatan, “ Santiago, Igsoon nga Lalaki sa Ginoo ,” ChurchofJesusChrist.org).
-
Sama sa laing mga igsoon sa inahan sa Ginoo, lagmit wala siya motuo sa sinugdanan nga si Jesus mao ang Kristo (tan-awa ang Juan 7:3–5).
-
Sa kadugayan siya nahimong usa ka Apostol ug, sumala sa nag-unang Kristiyanong mga tigsulat, siya ang una nga bishop sa Simbahan sa Jerusalem (tan-awa sa Mga Buhat 12:16–17 ; 21:17–18 ; Mga Taga-Galacia 1:18–19 ; 2:9).
Basaha ang Santiago 1:1 aron mailhan kon si kinsa ang gisulatan ni Santiago.
Si Elder Bruce R. McConkie (1915–85) sa Korum sa Napulog Duha ka Apostoles mipasabot nga “si Santiago nagsulat alang ngadto sa … mga tawo nga pagatigumon pa, sa mga modawat pa sa ebanghelyo, sa mga manuol pa ngadto sa panon ni Kristo” (Doktrinal nga Komentaryo sa Bag-ong Tugon [1973], 3:243).
-
Unsa lagmit ang pipila ka mga pangutana sa mga tawo nga wala pa makadawat sa ebanghelyo?
Basaha ang Santiago 1:5–6 , nga mangita sa mga kamatuoran nga gitudlo ni Santiago nga mahimong makatabang kanato kon aduna kitay importanteng mga pangutana ug mahimong makatabang sa kadtong nangita sa mga kamatuoran sa ebanghelyo. (Kini mahimong makatabang ang pagkahibalo nga ang pagpamoyboy nagpasabot nga pagpangita og sayop o pagpangasaba.)
-
Unsa man ang inyong nakit-an?
Paminaw og maayo sa mga tubag sa mga estudyante. Mahimong mapuslanon ang pagpangutana sa mga estudyante nganong ang ilang nakaplagan importante ug unsa ang ilang nabati mahitungod niini. Kon sila dili mopaambit og usa ka butang nga susama sa baroganan sa ubos, ipangutana ang mosunod nga pangutana:
-
Unsay imong nakat-onan mahitungod sa Langitnong Amahan gikan niini nga tudling?
Ikonsiderar ang pagsulat sa mga tubag sa mga estudyante diha sa pisara.
Usa kamatuoran nga makita niini nga tudling mao nga ang Dios mopanalangin kanato og kaalam kon kita mangayo Kaniya diha sa hugot nga pagtuo.
-
Unsa kaha ang ipasabot sa “mangayo uban sa hugot nga pagtuo, sa walay pagduhaduha”? ( Santiago 1:6).
-
Ngano sa imong hunahuna gusto sa Langitnong Amahan nga ikaw moduol Kaniya alang sa mga tubag?
Diha sa imong pagpadayon sa imong pagtuon, paghunahuna mahitungod sa mga hunahuna, mga pagbati, ug mga kasinatian nga aduna ka sa dihang nangita ka og kaalam, o mga tubag sa imong mga pangutana, gikan sa Dios.
Sa dili pa sugdan ang sunod nga bahin sa leksiyon, mahimong makatabang kini nga mahibalo nga ang umaabot nga leksiyon sa “Doktrinal nga Kahanas: Santiago 1:5–6,” ang mga estudyante dapiton sa pagtuon sa Joseph Smith—Kasaysayan 1:8–17 .
Ang ehemplo ni Joseph Smith
Mahimong makatabang ang pagpamalandong sa usa ka ehemplo sa baroganan nga ang Dios mopanalangin kanato og kaalam kon kita mangayo Kaniya diha sa hugot nga pagtuo. Ang pagpangita og kaalam gikan sa Dios adunay lawom nga epekto kang Joseph Smith.
-
Unsa ang piho nga nakapatandog nimo gikan sa kasinatian ni Joseph Smith?
-
Sa unsang paagi nga ang tubag sa Dios, diin naggikan sa Unang Panan-awon, nakaapekto sa kinabuhi ni Joseph? Sa unsang paagi kini nakaapekto sa kalibotan? Sa unsang paagi kini nakaapekto kanimo?
Ang Imong kasinatian
Hatagi ang mga estudyante og panahon sa pagkompleto sa mosunod diha sa ilang mga journal sa pagtuon:
Isulat ang mga hunahuna, mga pagbati, ug mga kasinatian nga aduna ka samtang nangita og kaalam gikan sa Dios. Ikonsiderar ang paglakip sa pipila sa mosunod:
-
Ang imong mga hunahuna ug mga pagbati mahitungod sa pagkaandam sa Dios nga motubag sa imong mga pangutana (tan-awa ang Santiago 1:5–6).
-
Ang imong mga hunahuna ug mga pagbati mahitungod sa kasinatian ni Joseph Smith sa pagpangayo og kaalam sa Dios.
-
Ang mga kasinatian nimo sa miagi o sa karon sa pagpangita og kaalam gikan sa Dios ug pagdawat og mga tubag. (Kining mga kasinatian mahimong maglakip sa pagpangita og mga tubag ngadto sa mga pangutana sa sinugdanan sa leksiyon.)
-
Mga paagi nga gusto nimong mangita og kaalam gikan sa Dios karon o sa umaabot.
-
Mga impresyon nga imong nadawat gikan sa Espiritu Santo panahon niini nga leksiyon nga mahimong makatabang kanimo.
Pagdapit og pipila ka mga estudyante sa pagpaambit sa ilang mga hunahuna. Paningkamot nga mahimong bukas ug maminaw sa unsa ang ilang gustong ipaambit. Pasalamati sila sa ilang mga tubag. Ang mosunod mao ang pipila ka posible nga follow-up nga mga pangutana:
-
Unsang kalahian ang nahimo niining mga hunahuna, mga pagbati, o mga kasinatian diha sa imong kinabuhi?
-
Aduna bay laing miyembro sa klase nga makapaambit og susama nga kasinatian?
Kon ang mga estudyante adunay mga pangutana mahitungod sa pagpangita og kaalam gikan sa Dios, ilang mahinumdoman kadto nga mga pangutana alang sa sunod nga leksiyon, “Doktrinal nga Kahanas: Santiago 1:5–6,” diin nagkonsiderar sa unsang paagi nga ang mga baroganan sa pag-angkon og espirituhanong kahibalo mahimong makatabang sa pagpangita og kaalam.
Paghunahuna mahitungod sa imong personal nga mga nabatasan sa pag-ampo ug pagpangayo og kaalam ug mga tubag gikan sa Dios. Kanus-a ang kataposang higayon nga ikaw nangayo sa imong Langitnong Amahan og kaalam o mga tubag sa imong mga pangutana? Unsa ang imong mabuhat karon aron sugdan ang pagpangayo nga mas sinsero ug mas makanunayon? Irekord sa imong journal sa pagtuon unsa ang imong gibati nga gustong ipabuhat sa Langitnong Amahan kanimo tungod sa unsa ang imong nakat-onan karon.
Mahimong makatabang sa mga estudyante ang pagkahibalo nga sa umaabot nga leksiyon sa (“Susiha ang Inyong Nakat-onan 11”), ang mga estudyante adunay kahigayonan sa pagpamalandong og balik unsa ang ilang nadesisyonang buhaton tungod niini nga leksiyon sa Santiago 1 .
Pagpamatuod sa gugma sa Dios alang sa matag estudyante ug sa Iyang tinguha sa pagpanalangin og kaalam alang sa matag usa. Pagpamatuod nga ang ilang mga kinabuhi mapanalanginan pinaagi sa pagpangita og kaalam gikan Kaniya.
Komentaryo ug Background nga Impormasyon
Nganong importante man nga makadawat sa kaalam gikan sa Dios ug makakuha og akong kaugalingong pagpamatuod gikan Kaniya?
Si Presidente Russell M. Nelson mitudlo:
Ang Dios buot ba gayod makigsulti kaninyo? Oo! …
Dili na kamo kinahanglan maghunahuna kon unsa ang kamatuoran [tan-awa sa Moroni 10:5]. Dili na kamo kinahanglan nga maghunahuna kinsa ang inyong luwas nga masaligan. Pinaagi sa personal nga pagpadayag, makadawat kamo sa inyong kaugalingon nga pagsaksi nga ang Basahon ni Mormon mao ang pulong sa Dios, nga si Propeta Joseph Smith usa ka propeta, ug nga kini ang Simbahan sa Ginoo. Bisan kon unsa man ang isulti o buhaton sa uban, walay bisan kinsa ang makapawala sa pagsaksi nga midala ngadto sa inyong kasingkasing ug hunahuna kon unsa ang kamatuoran. …
Kita mga sumusunod ni Jesukristo. Ang labing importante nga kamatuoran nga saksihan sa Espiritu Santo kaninyo mao nga si Jesus mao ang Kristo, ang Anak sa buhing Dios. Siya buhi!
(Russell M. Nelson, “Pagpadayag alang sa Simbahan, Pagpadayag alang sa Atong mga Kinabuhi,” Liahona, Mayo 2018, 95–96)
Santiago 1:6 . Unsay gipasabot sa “mangayo uban sa hugot nga pagtuo”?
Si Elder David A. Bednar sa Korum sa Napulog Duha ka Apostoles nagtumong sa Santiago 1:5–6 ug mipasabot:
Tan-awa ang gikinahanglan sa pagpangayo pinaagi sa hugot nga pagtuo, nga sa akong pagsabot nagkinahanglan sa dili lamang sa pagsulti apan sa pagbuhat, ang duha ka obligasyon sa pagpangamuyo ug sa pagbuhat, ang kinahanglanon sa pagsulti ug sa pagbuhat. …
Ang mga pangutana ni Joseph nagtumong dili lamang sa unsay angay niyang mahibaloan apan unsay kinahanglang buhaton! Ang iyang pag-ampo dili lamang kon, “Hain nga simbahan ang husto?” Ang iyang pangutana mao, “Hain nga simbahan ang akong apilan?” Miadto si Joseph sa kakahoyan aron mangutana pinaagi sa hugot nga pagtuo, ug determinado siya sa pagbuhat.
Ang tinuod nga hugot nga pagtuo nagtumong diha ni Ginoong Jesukristo ug sa kanunay mosangpot sa matarong nga aksiyon. … Kita magpadayon ug molahutay sa gipahinungod nga trabaho sa pag-ampo human kita moingon og “amen,” pinaagi sa pagbuhat sa mga butang nga atong gisulti ngadto sa Langitnong Amahan.
Ang pagpangayo pinaagi sa hugot nga pagtuo nagkinahanglan og pagkamatinuoron, paningkamot, pasalig, ug pagkamakanunayon.
(David A. Bednar, “Pangayo pinaagi sa Hugot nga Pagtuo,” Liahona, Mayo 2008, 94–95)
Dugang nga mga Kalihokan sa Pagkat-on
Mga Pagpamatuod sa mga ginikanan
Aron mapalig-on ang mga pagpamatuod sa mga estudyante sa pag-ampo, mahimong hangyoon ang pipila sa ilang mga ginikanan o mga lider sa Simbahan usa o duha ka adlaw una pa ang klase sa pagsulat og mga kasinatian nila sa pagdawat og kaalam gikan sa Dios agig tubag sa pag-ampo. Basaha ang matag asoy ngadto sa klase. Sa pipila ka mga higayon, mahimong makaayo ang paghatag og kopya sa asoy ngadto sa mga estudyante kon kini ilang ginikanan o lider sa Simbahan.
Propetekanhong tambag mahitungod sa pagpangita og kaalam gikan sa Dios
Kon mapuslanon alang sa mga estudyante ang pagtuon og dugang nga propetikanhong tambag mahitungod sa pagpangita og kaalam gikan sa Dios, dapita sila sa paggahin og pipila ka minuto alang sa pagpangita og anaa nga mga kapanguhaan. Mahimo silang magsiksik sa mga termino sama sa “Pag-ampo,” “Pagpadayag,” o “Pagpamatuod” diha sa Giya ngadto sa mga Kasulatan, o sa Gospel Library nga App. Ang mosunod mao ang pipila ka mga tudling sa doktrinal nga kahanas nga lagmit ilang pilion isip kabahin sa ilang pagtuon: Mga Panultihon 3:5–6 ; 2 Timoteo 3:15–17 ; 2 Nephi 28:30 ; Mosiah 4:9 ; Moroni 10:4–5 ; Doktrina ug mga Pakigsaad 1:37–38 ; 8:2–3 .
Pagbuntog sa tentasyon
Ang mosunod nga ideya mahimong magamit alang sa umaabot nga leksiyon:
Mahimong dapiton ang mga estudyante sa paglista diha sa pisara og komon nga mga tintasyon nga giatubang sa mga kabatan-onan.
Dapita ang mga estudyante sa pagbasa sa Santiago 1:12–16 aron makakita sa mga kamatuoran nga gitudlo ni Santiago mahitungod sa tintasyon. Mahimong makatabang ang pagpunting nga ang Paghubad ni Joseph Smith sa Santiago 1:12 nagbag-o sa “moantos sa mga [pagtintal]” ngadto sa “makasukol sa tintasyon”.
Ikonsiderar ang pagpangutana sama sa mosunod:
-
Nganong importante man nga mahibaloan nga ang atong Langitnong Amahan dili mao ang tinubdan sa tintasyon?
-
Unsa ang nakatabang nimo sa pagsukol sa tintasyon?
-
Unsaon nato pagpangamuyo sa Langitnong Amahan ug kang Jesukristo aron matabangan kita sa pagbuntog sa atong mga tintasyon?