“Ang [Hugot nga Pagtuo] Patay Kon Kini Walay Binuhatan”
Imahe
Youth doing a service project in Australia
Aduna bay kalahian tali sa usa ka tawo nga nag-ingon nga siya nagtuo kang Jesukristo ug sa usa ka tawo nga nagpakita og hugot nga pagtuo kang Jesukristo? Si Santiago mitanyag og usa ka importante nga kalahian nga ang tinuod nga hugot nga pagtuo kang Jesukristo gipakita dili lamang sa unsa ang gihunahuna o gisulti sa tawo, kon dili diha usab sa unsa ang iyang gihimo. Kini nga leksiyon magtugot kanimo sa pagsusi unsaon nimo aron mas hingpit nga makabansay sa hugot nga pagtuo ngadto kang Jesukristo pinaagi sa matarong nga mga binuhatan.
Pagtabang sa mga magtutuon nga mahimong aktibong mga sumasalmot. Samtang nag-andam sa pagtudlo, pagpokus sa unsa ang buhaton sa mga magtutuon. Dasiga ang mga estudyante sa paggahin og paningkamot sa pagkat-on gikan sa mga kasulatan ug gikan sa usag usa. Diha sa paghimo sa mga estudyante niini, ang ilang kamasaligon sa ilang abilidad sa pagkat-on gikan sa mga kasulatan mapalambo. Ang mga estudyante mahimo usab nga mas makagamit sa unsa ang ilang nakat-onan.
Pagpangandam sa estudyante: Dapita ang mga estudyante sa paghunahuna og usa ka tawo nga suod nila kinsa adunay lig-on nga pagtuo kang Jesukristo. Kon mahimo, dapita ang mga estudyante sa pagpangutana niining tawhana sama sa mosunod: “Sa unsang paagi nga ang imong hugot nga pagtuo kang Jesukristo nakaimpluwensiya sa imong mga lihok ug batasan? Unsa ang lahi nimong gipangbuhat tungod sa imong hugot nga pagtuo kang Jesukristo?” Dapita ang mga estudyante sa pagtambong nga andam mopaambit sa unsay ilang nakat-onan.
Posible nga mga Kalihokan sa Pagkat-on
Pagdawat og mga panalangin—sama sa pagdagkot og kalayo
Mahimong i-drowing ang hulagway sa usa ka kalayo diha sa pisara.
Nangita ka ba og usa ka panalangin o usa ka tubag sa pag-ampo gikan sa Langitnong Amahan? Mahimong makatabang ang pagtandi sa proseso sa pagpangita niining mga panalangin sa pagsugod og kalayo aron makadawat og kahayag ug kainit gikan niini.
Unsa ang mga lakang nga imong buhaton aron makamugna og usa ka kalayo?
Unsa ka importante ang lihok sa pagdagkot og posporo?
Basaha ang mosunod nga pamahayag ni Elder Dale G. Renlund sa Korum sa Napulog Duha ka Apostoles aron makat-on sa unsang paagi nga ang pagdawat og mga panalangin sama sa pagdagkot og kalayo. Mahimo usab kang motan-aw sa “Magamadagayaon [Buhong] sa mga Panalangin,” anaa sa ChurchofJesusChrist.org, gikan sa time code 1:02 hangtod sa 3:27.
Imahe
Official portrait of Elder Dale G. Renlund of the Quorum of the Twelve Apostles, January 2016.
Ipahisama nato ang langitnong mga panalangin sa daghang nagtipun-og nga kahoy. … [Kining] mga gapatong-patong nga binugha usa ka dako kaayo nga sugnod, makahimo og kahayag ug kainit sulod sa mga adlaw. …
Aron ang kalayo modilaab gikan sa gapatong-patong nga binugha, ang posporo kinahanghang ikadlit ug iduslit. Ang pinong mga sanga masunog dayon ug ang mas dagkong kahoy masunog. …
Ang pagkadlit sa posporo ug ang pagpasiga sa pino nga mga sanga, mao ang gagmayng mga lihok nga makapasiga sa kahoy. Hangtod nga ikadlit ang posporo, walay mahitabo, bisan unsa pa ang gidagkoon sa gapatong-patong nga binugha. …
Sa samang paagi, kadaghanan sa mga panalangin nga tinguhang ihatag sa Dios kanato nagkinahanglan og buhat sa atong bahin—lihok nga magbase sa atong hugot nga pagtuo kang Jesukristo. … Ang gikinahanglan nga lihok, bisan pa, kanunayng gamay kon itandi sa mga panalangin nga unya atong madawat.
Unsang mga panabot ang imong nakuha gikan sa analohiya ni Elder Renlund?
Unsa kaha ang buot ipasabot sa paglihok “base sa atong hugot nga pagtuo kang Jesukristo”?
Ikonsiderar ang pagtugot sa mga estudyante sa pagpamalandong ug pagtubag sa mosunod nga mga pangutana diha sa ilang journal sa pagtuon.
Pamalandongi ang mosunod nga mga pangutana:
Sa unsang mga paagi nga aduna kay hugot nga pagtuo kang Jesukristo? Unsang mga buhat ang imong gihimo tungod niining hugot nga pagtuo?
Unsang mga tubag ug uban pang mga panalangin ang imong nadawat gikan sa Dios diha sa imong paglihok sa hugot nga pagtuo kang Jesukristo? Aduna pa bay dugang nga mga paagi nga nabati nimo nga ang Ginoo buot nga molihok ka diha sa hugot nga pagtuo? Ngano man kaha?
Pag-ampo sa Langitnong Amahan aron giyahan ka sa imong pagpangita og mga tubag alang niining mga pangutanaha panahon sa imong pagtuon.
Hugot nga pagtuo diha ni Jesukristo
Si Santiago migamit og laing analohiya sa pagtudlo kanato sa importansiya sa paglihok nga adunay hugot nga pagtuo kang Jesukristo.
Basaha ang Santiago 2:14–16 , ug sulayi paghanduraw unsa ang imong mahunahunaan kon ikaw makasaksi niini nga sitwasyon. (Ang pulong “walay igong panapot” sa bersikulo 15 nagpasabot og walay igong ikasul-ob nga bisti.)
Mahimong dapiton ang duha ka mga estudyante sa pagduol sa atubangan sa klase. Sultihi ang usa ka estudyante sa paglihok isip usa ka makililimos ug ang usa ka estudyante sa paglihok isip usa ka tawo nga makatabang sa makililimos. Dapita ang ikatulo nga estudyante sa pagbasa og kusog sa Santiago 2:15–16 samtang ang duha ka estudyante naglihok sa unsay gihulagway niini nga mga bersikulo.
Unsa ang imong nakat-onan gikan sa analohiya ni Santiago?
Basaha ang Santiago 2:17–18, 26 (tan-awa usab ang Santiago 1:22) ug pangita og kamatuoran nga gihulagway ni Santiago pinaagi niini nga analohiya.
Unsaon ninyo sa pagsumada sa unsay gitudlo ni Santiago?
Usa ka paagi sa pagsaysay sa kamatuoran nga gitudlo ni Santiago mao nga ang tinuod nga hugot nga pagtuo kang Jesukristo nagkinahanglan og matarong nga buhat.
Ngano sa imong hunahuna gusto man ni Jesukristo nga atong ibutang ang atong hugot nga pagtuo ngadto sa buhat?
Mahimong makatabang ang pagpasabot nga usa sa nagbalikbalik nga mga pagtulun-an sa sulat ni Santiago mao nga kinahanglan natong atimanon ang mga kabos, masakiton, ug timawa (tan-awa ang Santiago 1:27 ; 2:1–9 ; 5:14–15). Ang maong mga buhat nagpakita og hugot nga pagtuo kang Jesukristo.
Sa unsang paagi kaha nga ang paghinumdom sa Manluluwas nga si Jesukristo ug sa Iyang kaayo nakapadasig kanato sa paglihok sa atong mga pagtuo?
Mga ehemplo sa paglihok uban sa hugot nga pagtuo
Mahimo kining makapadasig ang paghunahuna og mga ehemplo sa kadtong mga naglihok sa ilang hugot nga pagtuo kang Jesukristo. Basaha ang Santiago 2:21–25 , ug ilha ang mga ehemplo sa kadtong anaa sa Daang Tugon kinsa milihok inubanan sa hugot nga pagtuo.
Kon makatabang, ikonsiderar ang pagpangutana sama sa mosunod:
Unsa ang gitawag kang Abraham tungod sa iyang mga binuhatan? (tan-awa ang Santiago 2:23). Ngano sa imong hunahuna ang iyang matinud-anong mga binuhatan nagdala niini nga titulo?
Sa unsang paagi kaha ang atong mga buhat mahimong makatabang sa pagpalig-on ug pagpahingpit sa atong hugot nga pagtuo? (tan-awa ang Santiago 2:22).
Makatabang usab ang pagpatin-aw nga si Rahab mipalihok sa iyang hugot nga pagtuo pinaagi sa pagrisgo sa iyang kinabuhi aron mapanalipdan ang mga sulugoon sa Dios (tan-awa ang Joshua 2:1, 3 ; 6:17, 23, 25 ; Mga Hebreohanon 11:31).
Ikonsiderar ang pagdapit sa mga estudyante sa pagsulat sa ilang mga tubag sa mosunod nga mga pangutana diha sa duha ka piraso nga papel. Mahimong gamiton sa mga estudyante ang pagpangandam sa estudyante nga kalihokan.
Kinsa man ang imong mahunahunaan, gikan man sa imong kinabuhi o gikan sa mga kasulatan, kinsa nagpakita sa pagbutang sa hugot nga pagtuo kang Jesukristo diha sa buhat? Unsay imong nakat-onan gikan niini nga ehemplo?
Unsa ang usa ka paagi nga si Jesukristo mao ang ehemplo sa matarong nga mga binuhatan? Sa unsang paagi nga ang atong matarong nga mga binuhatan magtabang kanato nga mahimong mas sama Kaniya?
Human ang mga estudyante nakasulat sa ilang mga tubag, dapita sila nga pil-on ang duha ka piraso nga papel ug paggunit og usa sa matag kamot. Ang mga estudyante mahimo dayong molibot sa tibuok kwarto ug mopili og usa ka tawo nga pakigbahinan. Ang matag estudyante mahimo dayong mopili sa tuo o wala nga kamot sa lain pang estudyante aron madungog ang iyang mga tubag. Ang mga estudyante mahimong mosubli niini nga kalihokan kauban ang uban pang mga estudyante.
Pag-abli sa mga panalangin pinaagi sa dinasig sa hugot nga pagtuo nga mga buhat
Si Presidente Russell M. Nelson mihatag sa mosunod nga hagit nga may kalabotan sa atong hugot nga pagtuo ug atong mga buhat:
Imahe
Official portrait of President Russell M. Nelson taken January 2018
Ang paghimo og bisan unsang mas maayo nagkinahanglan og paningkamot. Ang pagkahimong tinuod nga disipulo ni Jesukristo dili eksepsyon. Ang pagpalambo sa inyong hugot nga pagtuo ug pagsalig Kaniya nagkinahanglan og paningkamot. …
…Unsay inyong buhaton kon kamo adunay dugang nga hugot nga pagtuo? Hunahunaa kini. Isulat kini. Dayon dawata ang dugang pa nga hugot nga pagtuo pinaagi sa paghimo og butang nga nagkinahanglan og dugang nga hugot nga pagtuo.
Unsay imong buhaton kon ikaw adunay dugang nga hugot nga pagtuo?
Unsa nga mga lakang ang imong himoon aron makalihok sa imong mga impresyon?
Paggahin og usa ka minuto sa pagsugod og lihok nianang imong mga impresyon. Pananglitan, depende sa imong gibati nga angay nimong buhaton, mahimo kang magpadala ug text, mag-ampo, magbutang ug pahinumdom sa imong kalendaryo, o magplano kon unsay sunod nimong buhaton.
Pangutana kon aduna bay mga estudyante nga komportable nga mopakigbahin sa unsay ilang nasugdan nga buhaton o plano nga buhaton. Ang pagpaambit og mga ideya mahimong makapaikag sa uban pang mga estudyante.
Mahimong mopaambit og pagpamatuod o usa ka personal nga kasinatian mahitungod kon nganong ang hugot nga pagtuo kang Jesukristo mohulma sa atong mga binuhatan.
Komentaryo ug Background nga Impormasyon
Ang mga pagtulun-an ba ni Santiago mahitungod sa hugot nga pagtuo ug mga buhat supak sa mga pagtulun-an ni Pablo?
Sa konteksto sa Santiago 2:14 , migamit si Santiago sa pulong binuhatan sa laing paagi kay sa paggamit ni Apostol Pablo niini. Dihang si Pablo migamit sa pulong nga buhat, siya unang mipasabot sa mga buhat sa balaod ni Moises (tan-awa ang Mga Taga-Roma 3:27–31 ug Mga Taga-Galacia 2:15–16). Sa dihang migamit si Santiago sa pulong binuhatan, ang iyang gipasabot mao ang mga buhat sa pagkamatinud-anon o mga buhat sa pagkamatarong.
Ang hugot nga pagtuo nga walay binuhatan patay, apan unsaon man ang mga binuhatan nga walay hugot nga pagtuo?
Si Elder David A. Bednar sa Korum sa Napulog Duha ka Apostoles mitudlo:
Imahe
Elder David A. Bednar, Quorum of the Twelve Apostles official portrait. 2020.
Ang tinuod nga hugot nga pagtuo nagtumong diha ni Ginoong Jesukristo ug sa kanunay mosangpot sa matarong nga aksiyon. … Ang aksiyon lamang dili matawag og hugot nga pagtuo diha sa Manluluwas, apan ang pagbuhat sumala sa husto nga mga baroganan mao ang importante nga bahin sa hugot nga pagtuo.
Santiago 1:22 . “Tumana ninyo ang pulong, ug dili kay magpaminaw ra”
Dapita ang mga estudyante sa pagpangita og mga pagtulun-an nga nagtabang kanila sa pagsabot sa importansiya sa paglihok inubanan sa hugot nga pagtuo kang Jesukristo.
Santiago 2:9 . “Kon kamo adunay mga pinalabi, kamo nagapakasala”
Kini nga baroganan mahimong itudlo isip usa ka ehemplo kon unsaon nato pagpakita sa atong hugot nga pagtuo pinaagi sa atong mga binuhatan. Panalagma og pili og usa ka estudyante, ug hatagi siya og usa ka gamay nga gasa [treat]. Sultihi ang klase nga imong gihatag kini nga gasa [treat] sa estudyante tungod sa pipila ka wala tuyoa nga mga rason (sama sa kolor nga iyang gisul-ob). Ipangutana ang mga pangutana sama sa, “Unsay inyong gibati diha sa akong pagtratar niini nga estudyante? Ngano nga usahay nagpakita kita og pagpalabi sa uban?” Dapita ang usa ka estudyante sa pagbasa og kusog sa Santiago 2:1–4 . Hangyoa ang klase sa pagsunod, nga mangita kon unsay gipasidaan ni Santiago sa mga Santos. Unsay ilang nakita? Unsaon nato paglikay ang pagpabor sa pila ka tawo labaw sa uban?
Dapita ang mga estudyante sa pagbasa sa Santiago 2:8 sa hilom nga paagi, nga mangita kon unsay gipahinumdom ni Santiago nga buhaton sa mga Santos nga makatabang nila nga wagtangon ang pagka may pinalabi. Sultihi ang mga estudyante sa paghunahuna og usa ka tawo nga ilang nailhan kinsa nagpakita og patas nga paghigugma sa mga tawo sa lain-laing mga kahimtang. Dapita ang mga estudyante sa pagpaambit kinsa ang ilang gihunahuna ug ngano. Sa unsang paagi gipakita ni Jesukristo ang patas nga paghigugma sa uban? Dapita ang mga estudyante sa paghunahuna kon sa unsang paagi sila mas makasunod sa ehemplo sa Manluluwas kon unsaon nila pagtan-aw ug pag-amuma ang uban.
Santiago 2:19–20 . Ang pagbaton ug hugot nga pagtuo sa Dios lahi kay sa pag-ila lamang nga Siya anaa
Kini nga kalihokan mahimong itudlo human sa pamahayag o video ni Elder Renlund ug sa mosunod nga mga pangutana. Sa unsang paagi mas masabtan sa mga estudyante ang relasyon tali sa hugot nga pagtuo ug mga buhat? Dapita sila nga mobasa sa Santiago 2:19–20 , nga mangita sa ehemplo nga gihatag ni Santiago nga nagpakita nga ang mga tawo mahimong motuo sa Dios nga dili magbaton og hugot nga pagtuo sa Dios. Unsa ang nakita sa mga estudyante? Unsaon nila paghulagway ang kalainan tali sa pagbaton og hugot nga pagtuo sa Dios ug sa pagtuo sa Dios?
